Mafumbo Ghakufumira ku Ŵaŵazgi

Kasi Mkhristu wangasezgeka mu mpingo usange wali na cizgoŵi ca kulaŵilira vithuzithuzi vyamuziro?

▪ Enya, wangasezgeka. Lekani nchakuzirwa comene kugega vithuzithuzi vyamuziro vya mtundu uliwose. Vithuzithuzi ivi vingaŵa vya mu mabuku, magazini, mafilimu, mavidiyo ndiposo pa Intaneti.

Vithuzithuzi vyamuziro vili palipose. Intaneti ndiyo yikuthandazga comene vithuzithuzi vyamuziro kuluska cilicose ndipo yapangiska kuti ŵanthu ŵanandi ŵalaŵilirenge vinthu ivi. Ŵanthu ŵanyake ŵalaŵilira vithuzithuzi vyamuziro mwangozi pa Intaneti. Kweni ŵanji ŵakulaŵilira dala vithuzithuzi vyamuziro pa Intaneti, ŵakughanaghana kuti palije uyo wakuŵawona. Ŵakulaŵilira vinthu ivi kwaŵekha mu nyumba zawo panji mu ofesi. Cifukwa wuli Ŵakhristu ŵakucenjezgeka pa nkhani iyi?

Cenjezgo la Yesu likutiphalira cifukwa cake. Likuti: “Waliyose uyo wakulutilira kulaŵiska mwanakazi na kuŵa nayo na khumbiro, wacita nayo kale uleŵi mu mtima wake.” (Mat. 5:28) Mbunenesko kuti kugonana nkhuwemi waka ku awo ŵali mu nthengwa ndipo ici nchawanangwa ico ŵakukondwa naco. (Zinth. 5:15-19; 1 Kor. 7:2-5) Kweni ici ndico nchilato ca vithuzithuzi vyamuziro yayi, cifukwa vikulongora waka ŵanthu ŵakugonana mwambura kwenelera ivyo vikupangiska maghanoghano ghambura kwenelera agho Yesu wakacenjezga. Nakuti para munthu wakulaŵilira vithuzithuzi vyamuziro wakususkana na languro la Ciuta, lakuti: “Ntheura zgorani viŵaro vya thupi linu vya pa caru capasi kuŵa vyakufwa ku uzaghali, ukazuzi, ulamphalampha, khumbiro liheni, na udokezi, uko nkhusopa vikozgo.”—Kol. 3:5.

Wuli usange Mkhristu wakalaŵilirapo vithuzithuzi  vyamuziro kamoza panji kaŵiri? Para vingaŵa nthena, wangaŵa pa ngozi nga umo vikaŵira na wamasalmo Asafu, uyo wakati: “Kweni ine, malundi ghane ghakaŵa pafupi kukhuŵara, malwayo ghane ghakaŵa pafupi kutelera.” Kasi Mkhristu wangaŵa wuli na njuŵi yituŵa ndiposo kuŵa pa mtende na Ciuta para wakalaŵilira vithuzithuzi vyamuziro vya ŵanalume panji ŵanakazi ŵali bengende panji vya ŵanthu ŵakucita uzaghali? Asafu nayo wakaŵa pa mtende yayi ndipo wakati: “Ndakweŵeskeka muhanya wose, mulenji na mulenji ndalangika.”—Sal. 73:2, 14.

Mkhristu uyo wakulaŵilira vithuzithuzi vyamuziro wakwenera kumanya kuti wakunanga ubwezi wake na Yehova ndipo wakwenera kupenja wovwiri wauzimu. Wovwiri uwu ukusangika mu mpingo: “Nanga munthu wangapuluka kwambura kumanya, imwe muli ŵakwenelera mwauzimu yezgani kumunyoloska munthu wantheura mu mzimu wa kuzika, uku mukujilaŵilira mwaŵene kuti namweso mungayezgeka.” (Gal. 6:1) Mulara yumoza panji ŵaŵiri ŵangamupa wovwiri wakukhumbikwa, ndipo ŵakwenera kumulombera ‘malurombo gha cipulikano agho ghangacizga mulwari, ndipo zakwananga zake zingagowokereka.’ (Yak. 5:13-15) Asafu wakasanga candulo cifukwa ca kusendelera kwa Ciuta. Awo ŵapenja wovwiri kuti ŵaleke cizgoŵi ca kulaŵilira vithuzithuzi vyamuziro nawo ŵasangenge candulo cifukwa ŵaŵenge paubwezi na Ciuta.—Sal. 73:28.

Kweni, mpositole Paulosi wakayowoya kuti ŵanji awo ŵakananga ŵakapera yayi “ku maukazuzi ghawo na uzaghali na ukwakwa.” a (2 Kor. 12:21) Pakuyowoya za lizgu Lacigiriki ilo lili kung’anamulika kuti “maukazuzi,” Pulofesa Marvin R. Vincent wakalemba kuti lizgu ili likupeleka “ghanoghano lakuti cinthu ico nchaunyankhasi comene.” Nchacitima kuti pali vithuzithuzi vinyake vyamuziro ivyo ni vyaunyankhasi comene kuluska vya ŵanthu awo ŵandavware waka panji vya mwanalume na mwanakazi ŵakucita uzaghali. Pali vithuzithuzi vyakuseluska nadi ivyo vikulongora ŵanalume panji ŵanakazi pera ŵakugonana, gulu la ŵanthu likugonana, munthu wakugona cinyama, vithuzithuzi vyamuziro vyakulongora ŵana ŵakugonana, ŵanthu ŵanandi ŵakukolelera munthu yumoza, kucitira nkhaza ŵanakazi, panji kuyuzga na vinyake vyantheura. Ŵanji mu nyengo ya Paulosi awo ŵakaŵa “mu cisi mu maghanoghano” ŵakazgoka “ŵambura kupwelerako kalikose, [ndipo] ŵakajipeleka ku ukwakwa, kuwunukira kucita ukazuzi wa mtundu uliwose.”—Efe. 4:18, 19.

Paulosi wakayowoyaso lizgu lakuti “ukazuzi” pa Ŵagalatiya 5:19. Munthu munyake wakusambira wa ku Britain wakayowoya kuti lizgu ili “comenecomene apa [likung’anamura] makhumbiro ghose ghaheni gha kugonana.” Kasi ni Mkhristu nju uyo wangakana kuti vithuzithuzi vyamuziro ivyo tavizunura mu nkhani iyi vikuwuska ‘makhumbiro ghaheni gha kugonana’ ndiposo kuti ni vyaunyankhasi? Pa Ŵagalatiya 5:19-21 Paulosi wakamalizga kuti “awo ŵakucita” maukazuzi agha “ŵazamuhara cara ufumu wa Ciuta.” Ntheura, usange munthu munyake wali na cizgoŵi ca kulaŵilira vithuzithuzi vyamuziro, mutepanji cizgoŵi ici waŵa naco kwa nyengo yitali, ndipo wakupera yayi na kuvileka, wakwenera yayi kuŵa mu mpingo Wacikhristu. Wakwenera kusezgeka mwakuti mpingo uvikilirike ndiposo ulutilire kuŵa wakutowa.—1 Kor. 5:5, 11.

Nchakukondweska comene kumanya kuti ŵanji awo ŵakaŵa na cizgoŵi ca kulaŵilira vithuzithuzi vyamuziro ŵakaluta ku ŵalara ndipo ŵali kovwirika mwauzimu na kusintha nkharo yawo. Yesu wakaciska Ŵakhristu mu mpingo wa Saradisi kuti: “Khozga vinthu vyakukhalapo ivyo vikakhala pacoko kufwa, . . . lutilira kukumbuka umo uli kupokelera na umo uli kupulikira, ndipo lutilira kusungilira, kweniso upere. Nadi, kwambura kuti wawuka, . . . uzamumanya cara ora ilo nizirenge pa iwe.” (Uvu. 3:2, 3) Nchamacitiko kupera na kupona mu moto.—Yuda 22, 23.

Ndipouli, nchiwemi comene kuleka kubinkhiskika na vithuzithuzi vyamuziro nanga mphacoko. Tikwenera kufwilirapo kuti tigege vithuzithuzi vyamuziro vya mtundu uliwose.

[Mazgu ghamusi]

[Mazgu Ghakukhozgera pa peji 30]

Mkhristu uyo wakulaŵilira vithuzithuzi vyamuziro wakwenera kumanya kuti wakunanga ubwezi wake na Yehova ndipo wakwenera kupenja wovwiri wauzimu