Kasi Mukukumbuka?

Kasi muli kuŵazgapo magazini gha Gongwe la Mulinda ghasonosono apa? Yezgani kuzgora mafumbo agha:

Cifukwa wuli tingati vinyake ivyo Solomoni wakacita ni cenjezgo kwa ise?

Ciuta wakatumbika Themba Solomoni, ndipo wakaligwiliskira nchito. Ndipouli, apo wakawusanga, Solomoni wakaleka kulondezga ulongozgi wa Ciuta. Wakatora mwana mwanakazi wa Faro uyo wakasopanga vikozgo. Wakatoraso ŵanakazi ŵanji ŵanandi, ndipo mwapacokopacoko ŵanakazi ŵambura kopa Ciuta aŵa ŵakamupatuska ku cisopa caunenesko. Tikwenera kugega nkharo ziheni izo zikwamba mwapacokopacoko. (Dute. 7:1-4; 17:17; 1 Mathe. 11:4-8)—12/15, peji 10-12.

Cifukwa wuli tikuti Sara wakaŵa mwanakazi wakopa Ciuta ndiposo muwoli wakuzirwa?

Ciuta wakati waphalira Abrahamu kuti wawukeko ku Uri, Abrahamu wakeneranga kuleka ŵabali ŵake, ŵabwezi, ndiposo umoyo uwemi na kuluta ku malo ghambura kughamanya. Ndipouli, Sara wakapulikira, ndipo wakagomezganga kuti Ciuta wamutumbikenge. Wakamucindikanga Abrahamu ndipo wakalongoranga nkharo yiwemi.—1/1, peji 8.

Cifukwa wuli Yehova wakapempha Abrahamu kuti wapeleke mwana wake wakutemweka kuŵa sembe?

Nchakuzirwa kukumbuka kuti Ciuta wakazomerezga yayi kuti Abrahamu wakome Yisake. Ciuta wakakhumbanga kutilongora umo nyifwa ya Mwana wake, Yesu, yizamumuŵinyira.—1/1, peji 23.

Nchivici ico cikulongora kuti kufuma mu nyengo ya Ŵakhristu ŵakwambilira, nyengo zose pa caru capasi paŵenge Ŵakhristu ŵaunenesko ŵakuphakazgika?

Mu ntharika ya Yesu ya “tirigu” na “duru,” “mbuto yiwemi” “mbana ŵa ufumu.” (Mat. 13:24-30, 38) Duru likulirenge pamoza na tirigu mpaka pa nyengo ya vuna. Ntheura, nangauli tingaŵazunura mwakusimikizga yayi awo ŵakaŵa mu gulu la tirigu, kweni nyengo zose paŵa Ŵakhristu ŵaunenesko ŵakuphakazgika mpaka mu nyengo yithu yino.—1/15, peji 7.

Kasi ni vinthu wuli ivyo vizamulongozgera ku Haramagedoni?

Mitundu yizamucemerezga kuti “Bata na mtende!” (1 Tes. 5:3) Maboma ghazamuwukira cisopa cautesi. (Uvu. 17:15-18) Ŵasopi ŵaunenesko ŵazamuwukilika, ndipo umaliro uzamwiza.—2/1, peji 9.

Kasi tingacita wuli kuti timazge bina?

Vinthu ivyo vingatovwira ni ivi: Tifwilirepo kutemwa ŵabali, ticezgenge na ŵanthu awo ŵakusopa Ciuta, ticitenge uwemi, ‘tisekelere na awo ŵakusekelera.’ (Rom. 12:15)—2/15, peji 16-17.

Mbanjani awo ŵakuyowoya ciyowoyero ca Nahuatl, ndipo ni vinthu wuli vyakukhwaskana na iwo ivyo vikucitika?

Nahuatl cikaŵa ciyowoyero ca Ŵaaziteki ŵakale, ndipo cicali kuyowoyeka na ŵanthu 1.5 miliyoni ku Mexico. Ŵakaboni ŵakupharazga mu ciyowoyero ca Nahuatl, ndipo mabuku ghithu ghanyake ghalipo mu ciyowoyero ici.—3/1, peji 13-14.

Kasi tikwenera kukumbuka vici para tikupeleka ulongozgi?

Tiyimanye makora nkhani. Tileke kucimbilira kuzgora. Mwakujiyuyura tiyowoye Mazgu gha Ciuta. Usange nchamacitiko, tigwiliskire nchito layibulare ya mabuku ghithu. Tileke kudumulira ŵanji vyakucita.—3/15, peji 7-9.

Yesu wakaciska ŵategherezgi ŵake kuti ŵalute makilomita ghaŵiri. (Mat. 5:41) Kasi fundo yake yikaŵa yakuti wuli?

Mu nyengo ya Yesu ku Israyeli, Ŵaroma ŵakacicizganga ŵanthu kuti ŵagwire nchito yinyake. Pakuciska ŵategherezgi ŵake kuti ŵalute makilomita ghaŵiri, Yesu wakang’anamuranga kuti ŵaleke kudinginyika pakucita nchito iyo ŵatumika na ŵamazaza mwakuyana na dango.—4/1, peji 9.