“Cenjerani na Cilungo ca Ŵafarisi”

Yesu wakacenjezga ŵasambiri ŵake kuti: “Cenjerani na cilungo ca Ŵafarisi, ceneico mbupusikizgi.” (Luka 12:1) Nkhani yakuyana na iyi yikulongora makora kuti apa Yesu wakasuskanga “visambizgo” vya Ŵafarisi.—Mat. 16:12.

Nyengo zinyake Baibolo likugwiliskira nchito mazgu ghakuti “cilungo,” panji yisiti, kwimira kuvunda. Tikukayika yayi kuti visambizgo na kacitiro ka vinthu ka Ŵafarisi vikatimbanizganga ŵapulikizgi ŵawo. Cifukwa wuli visambizgo vya Ŵafarisi vikaŵa viheni?

1 Ŵafarisi mwakujikuzga ŵakayowoyanga kuti mbarunji, ndipo ŵakayuyuranga ŵanthu bweka.

Mu ntharika yake yinyake, Yesu wakayowoya umo ŵanthu aŵa ŵakaŵira ŵakujikuzga. Wakati: “Mufarisi . . . wakimilira na kwamba kulomba vinthu ivi mu mtima wake, ‘A Ciuta, nkhumuwongani kuti nili nga mbanthu ŵanyake cara, ŵakuphanga, ŵambura urunji, ŵaleŵi, panji nga ngwakusonkheska msonkho uyu. Nkhuziŵizga kurya kaŵiri mu sabata, nkhupeleka cakhumi ca vinthu vyose ivyo nkhusanga.’ Kweni wakusonkheska msonkho yura wakimilira pataliko wakakhumba cara nanga nkhwinuska maso ghake kucanya, kweni ŵakajitimbanga pa nganga, wakatenge, ‘A Ciuta, muŵe na lusungu kwa ine wakwananga.’”—Luka 18:11-13.

Yesu wakalumba wakusonkheska msonkho cifukwa cakuti wakaŵa wakujiyuyura, wakati: “Nkhumuphalirani kuti, Munthu uyu wakakhilira ku nyumba yake wakurunjiskika comene kuluska [Mufarisi]; cifukwa waliyose uyo wakujikwezga wazamukhizgika, kweni uyo wakujiyuyura wazamukwezgeka.” (Luka 18:14) Nangauli ŵakusonkheska msonkho ŵakaŵa na lumbiri lwa kuŵa ŵaryarya, kweni Yesu wakawovwirapo ŵamsonkho ŵanji awo ŵakategherezga kwa iyo. Tikumanyapo ŵakusonkheska msonkho ŵaŵiri, Mateyu na Zakeyu, awo ŵakazgoka ŵasambiri ŵake.

Wuli usange tikughanaghana kuti tiliko makora kuluska ŵanji cifukwa ca maluso panji mauteŵeti agho Ciuta wali kutipa panji cifukwa ca maubudi gha ŵanji? Tikwenera kumazga mwaluŵiro maghanoghano agha, cifukwa Malemba ghakuti: “Citemwa cikukhomezga ndipo nchalusungu. Citemwa cilije sanji, cikujilumba cara, nesi kujitukumura, cikucita mwambura kwenelera cara, cikupenja vyake pera cara, ndipo cikwavyika cara. Citemwa cikukonthora uheni cara. Cikusekelera na ubendezi cara, kweni cikusekelera na unenesko.”—1 Kor. 13:4-6.

Tikwenera kuŵa na maghanoghano ghakuyana na gha mpositole Paulosi. Wati wayowoya kuti “Khristu Yesu wakiza mu caru kuzakaponoska ŵakwananga,” Paulosi wakasazgirapo kuti: “Ndipo wakwananga kwakuluska, ndine.”—1 Tim. 1:15.

Mafumbo ghakuti tighanaghanirepo:

Kasi nkhumanya kuti ndine wakwananga ndiposo kuti nizamuponoskeka cifukwa ca lusungu lukuru lwa Yehova? Panji nkhuwona kuti uteŵeti wane uwo nacita mwakugomezgeka kwa vilimika vinandi, maudindo agho nili nagho mu gulu la Ciuta, panji maluso agho nili nagho ni vyakujikuzgira pacanya pa ŵanji?

2 Ŵafarisi ŵakakhumbanga kujilongora ku ŵanji kuti mbarunji. Ŵakakhumbanga comene maudindo na mazina ghapacanya.

 Kweni Yesu wakacenjezga kuti: “Milimo yose iyo ŵakucita, ŵakucita kuti ŵawoneke na ŵanthu; pakuti ŵakusanuzga tuvibiliti twakuŵikamo malemba uto ŵakuvwara nga nchivikiliro, ndiposo ŵakukuzga mphonje za malaya ghawo. Ŵakutemwa malo ghakuzirwa comene pa viphikiro na vitengo vyakunthazi mu masunagoge, ndiposo kutawuzgika mwanchindi mu misika na kucemeka Rabi na ŵanthu.” (Mat. 23:5-7) Pambaniskani nkharo yawo na ya Yesu. Nangauli wakaŵa Mwana wakufikapo wa Ciuta, kweni wakaŵa wakujiyuyura. Apo munthu munyake wakamucema kuti “muwemi,” Yesu wakati: “Cifukwa wuli ukunicema muwemi? Palije uyo ni muwemi, kweni yumoza pera, Ciuta.” (Mrk. 10:18) Pa nyengo yinyake Yesu wakageziska malundi gha ŵasambiri ŵake, kuŵalekera bambiro la kujiyuyura lakuti ŵalondezgenge.—Yoh. 13:1-15.

Mkhristu waunenesko wakwenera kuteŵetera ŵanji. (Gal. 5:13) Awo ŵakukhumba kuti ŵaŵe ŵakwenelera kucita mulimo wa kulaŵilira mu mpingo ndiwo ŵakwenera kuyezgayezga comene pa nkhani iyi. Nchiwemi ‘kunwekera mulimo wa ulaŵiliri,’ kweni tikwenera kucita nthena cifukwa cakuti tikukhumba kovwira ŵanji. “Mulimo” uwu ngwakumanyikwirapo yayi nesi wakuti tilongolere nkhongono. Awo ŵakucita mulimo wa ulaŵiliri ŵakwenera kuŵa ‘ŵakujiyuyura mu mtima,’ nga umo wakaŵira Yesu.—1 Tim. 3:1, 6; Mat. 11:29.

Mafumbo ghakuti tighanaghanirepo:

Kasi nkhutemwa awo ŵali na maudindo mu mpingo na cilato cakuti nimanyikwe panji nisange maudindo ghakusazgikira? Kasi nkhuŵika mahara comene pa mauteŵeti agho munthu wakuwoneka kuti wakumanyikwirapo panji kulumbikirapo? Kweniso, kasi nkhuyezga kujilongora pa ŵanyane?

3 Malango na maluso gha Ŵafarisi ghakapangiskanga kuti Dango liŵe linonono ku ŵanthu bweka.

 Dango la Ciuta ilo likapelekeka kwizira mwa Mozesi likaŵa na vyose vyakukhumbikwa pakusopa Yehova. Ndipouli, tunthu tucokotucoko tukasazgikako yayi. Mwaciyelezgero, Dango likakanizganga kugwira nchito pa Sabata, kweni likazunura yayi vinthu ivyo ŵakeneranga kucita na ivyo ŵakeneranga kuleka kucita pa zuŵa ili. (Ex. 20:10) Pa nthena apa, Ŵafarisi ŵakaŵikangapo malango ghawo na maluso ghawo, na kulilongosora umo ŵeneko ŵakhumbira. Nangauli Yesu wakacitangako yayi tumalango uto Ŵafarisi ŵakapeleka kweni wakalondezganga Dango ilo likapelekeka kwizira mwa Mozesi. (Mat. 5:17, 18; 23:23) Yesu wakalimanyanga makora Dango. Wakamanyanga fundo iyo Dango likalembekera ndiposo kuti lusungu lukaŵa lwakukhumbikwa comene. Wakapulikiskanga nanga ni para ŵasambiri ŵake ŵatondeka kucita makora. Mwaciyelezgero, pa usiku uwo wakakakikira, Yesu wakaphalira ŵapositole ŵake ŵatatu kuti ŵaŵe maso kweni iwo ŵakagona. Ivi vikacitika mwakuwerezgawerezga. Ndipouli, mwalusungu wakayowoya kuti: “Mzimu ngwakukhumbisiska nadi, kweni thupi ndakulopwa.”—Mrk. 14:34-42.

Mafumbo ghakuti tighanaghanirepo:

Kasi nkhuyezga kuzgora fundo panji maghanoghano ghane kuti ghaŵe malango? Kasi nkhulongora kuti nili na mahara pa ivyo nkhukhazga ku ŵanji?

Ghanaghaniranipo mphambano iyo yilipo pakati pa visambizgo vya Yesu na vya Ŵafarisi. Kasi mukuwona apo mungasintha? Usange ni nthena, mwalekeraci kuŵikapo mtima kuti musinthe?

[Cithuzithuzi pa peji 28]

Ŵafarisi ŵakavwaranga tuvibiliti twakuŵikamo malemba.—Mat. 23:2, 5

[Vithuzithuzi pa peji 29]

Mwakupambana na Ŵafarisi ŵakujikuzga, Ŵakhristu awo mbalara ŵakuteŵetera ŵanji

[Cithuzithuzi pa peji 30]

Kasi imwe mukulongora kuti muli na mahara pa ivyo mukukhazga ku ŵanji nga umo Yesu wakacitiranga?