Kasi Imwe Mukuŵaliska Ucindami wa Yehova?
Kasi Imwe Mukuŵaliska Ucindami wa Yehova?
“Tikuŵaliska ucindami wa Yehova nga ni magalasi.”—2 KOR. 3:18.
KASI MUNGAZGORA WULI?
Kasi tingapeleka wuli ucindami kwa Yehova nangauli tili ŵakwananga?
Kasi malurombo ghithu na kuwungana vikutovwira wuli kuti tiŵaliske ucindami wa Ciuta?
Nchivici ico cingatovwira kuti tilutilire kupeleka ucindami kwa Yehova?
1, 2. Cifukwa wuli nchamahara kuwona kuti tingatolera mikhaliro ya Yehova?
TOSE tikukozganako na ŵapapi ŵithu. Ntheura, nchakuzizika yayi kupulika munthu wakuphalira mwana munyamata kuti, ‘Ukukozgana na awuso.’ Mwana msungwana wangaphalirika kuti, ‘Ukunikumbuska amama ŵako.’ Ndipo kanandi ŵana ŵakutolera ivyo ŵapapi ŵawo ŵakucita. Ise ke? Kasi tingatolerako kwa Yehova, awo Mbadada ŵithu ŵa kucanya? Nangauli, tindaŵawonepo, kweni tikuwona mikhaliro yawo yiwemi para tikuŵazga Mazgu ghawo, kuwona ivyo ŵali kulenga, ndiposo para tikughanaghanirapo pa Malemba kweniso ivyo Mwana wawo, Yesu Khristu, wakayowoya na kucita. (Yoh. 1:18; Rom. 1:20) Ntheura, nchamacitiko kuti tiŵaliske ucindami wa Yehova.
2 Pambere Adamu na Eva ŵandalengeke, Ciuta wakasimikizga kuti ŵanthu ŵazamucita khumbo lake, kulongora mikhaliro yake, na kupeleka ucindami kwa iyo. (Ŵazgani Genesis 1:26, 27.) Pakulongora kuti tili kujipeleka kwa Ciuta, tikwenera kuŵa na mikhaliro yake pakuti ndiyo wakatilenga. Usange ndimo tikucitira, mbwenu tili na mwaŵi wa kuŵaliska ucindami wa Ciuta, nanga tingaŵa kuti tili kukulira nkhuni, kwali tili ŵakusambira comene, kwali tili ŵa mtundu wuli. Cifukwa wuli? Cifukwa “Ciuta wakutemwera cara, kweni mu mtundu uliwose munthu uyo wakumopa na kucita urunji ngwakuzomerezgeka kwa iyo.”—Mil. 10:34, 35.
3. Kasi Ŵakhristu ŵakujipulika wuli para ŵakuteŵetera Yehova?
3 Ŵakhristu ŵakuphakazgika ŵakuŵaliska ucindami wa Yehova. Ntheura mpositole Paulosi wakalemba kuti: “Tose, uku tikuŵaliska ucindami wa Yehova nga ni magalasi na visko vyambura kudika, tikuzgoreka kuŵa mu cikozgo cakuyana waka kufuma ku ucindami kuya ku ucindami.” (2 Kor. 3:18) Apo nchimi Mozesi yikafumanga ku Lupiri lwa Sinayi na viphapha vya Malango Khumi, cisko cake cikagadimanga cifukwa Yehova wakayowoya nayo. (Ex. 34:29, 30) Nangauli Ŵakhristu ivi vindaŵacitikirepo ndipo cisko cawo cikugadima yayi, kweni ŵakuŵa nga ni para ŵakuŵala cifukwa ca cimwemwe ico ŵakuŵa naco para ŵakuphalira ŵanji vya Yehova, mikhaliro yake, na ivyo wacitirenge ŵanthu. Nga ni magilasi ghakuŵala comene gha mu nyengo yakale, ŵakuphakazgika na ŵa mberere zinyake ŵakuŵaliska ucindami wa Yehova kwizira mu vyakucita na uteŵeti wawo. (2 Kor. 4:1) Kasi imwe mukuŵaliska ucindami wa Yehova kwizira mu nkharo yinu na mu milimo yinu pakuŵa ŵapharazgi ŵa Ufumu?
TIKUKHUMBA KUŴALISKA UCINDAMI WA YEHOVA
4, 5. (a) Nga ni Paulosi, kasi tili na suzgo wuli? (b) Kasi kwananga kukutikhwaska wuli?
4 Pakuti tili ŵateŵeti ŵa Yehova, tikukhumba kucindika na kupeleka ucindami kwa Mlengi withu mu vyose. Kweni kanandi ivyo tikukhumba kucita ndivyo tikucita yayi. Paulosi nayo wakalimbananga na suzgo ili. (Ŵazgani Ŵaroma 7:21-25.) Pakulongosora cifukwa ico tiliri na suzgo ili, Paulosi wakalemba kuti: “Wose ŵali kwananga ndipo ŵakupeleŵera pa ucindami wa Ciuta.” (Rom. 3:23) Nadi, kwizira mwa munthu wakwananga Adamu, ŵanthu wose ŵali pasi pa kwananga.—Rom. 5:12; 6:12.
5 Kasi kwananga ni vici? Kwananga ni cilicose ico cikupambana na wunthu wa Yehova, nthowa zake, malango ghake na khumbo lake. Ubwezi wa munthu na Ciuta ukunangika cifukwa ca kwananga. Kwananga kukupangiska kuti munthu watondeke kuŵaliska ucindami wa Ciuta, nga umo cinthu cinyake cingatondeskera ciŵinda kulasa ico wakhumbanga. Tingabudira dala panji mwangozi. (Maŵa. 15:27-31) Kwananga kuli kunjira mu ŵanthu ndipo kuli nga nchakujandizga pakati pa iwo na Mlengi wawo. (Sal. 51:5; Yes. 59:2; Kol. 1:21) Ntheura, ŵanthu ŵali kutali na Yehova ndipo ŵakutaya mwaŵi wapadera comene wa kuŵaliska ucindami wa Ciuta. Kwananga ni suzgo likuru comene ilo ŵanthu ŵali nalo.
6. Kasi tingapeleka wuli ucindami kwa Ciuta nangauli tili ŵakwananga?
6 Nangauli tili ŵakwananga, Yehova walongora kuti ni “Ciuta uyo wakupeleka cigomezgo.” (Rom. 15:13) Wapeleka nthowa yakumazgira kwananga, iyo ni sembe yakuwombora ya Yesu Khristu. Para tikulongora cipulikano mu sembe iyi, tiliso “ŵazga ŵa kwananga” cara, kweni sono tili na mwaŵi wa kuŵaliska ucindami wa Yehova. (Rom. 5:19; 6:6; Yoh. 3:16) Usange tikulutilira kuŵa na cipulikano mu sembe iyo Yehova wali kupeleka, watitumbikenge sono kweniso munthazi tizamuzgoka ŵakufikapo na kukhala kwamuyirayira. Nangauli ticali ŵanthu ŵakwananga, Ciuta wakutiwona kuti tingaŵaliska ucindami wake. Ili ni thumbiko likuru comene.
KUŴALISKA UCINDAMI WA CIUTA
7. Ni vinthu wuli vya ise taŵene ivyo tikwenera kumanya dankha kuti tiŵaliske makora ucindami wa Ciuta?
7 Pakuti tili ŵanthu ŵakwananga tose tikubuda. Usange waliyose wa ise wakukhumba kuŵaliska ucindami wa Ciuta, wakwenera kumanya ivyo wakubuda. (2 Mid. 6:36) Tikwenera kuzomerezga dankha kuti tikubuda, na kuyezgayezga kulimbana na maubudi ghithu kuti tipeleke makora ucindami kwa Ciuta. Mwaciyelezgero, usange tikulaŵilira vithuzithuzi vyamuziro, tikwenera kupempha wovwiri wauzimu, ndipo ticitepo kanthu mwaluŵiro kuti tipokere wovwiri uwu. (Yak. 5:14, 15) Ici ndico cinthu cakwamba ico tikwenera kucita kuti ticindike Ciuta mu umoyo withu. Pakuŵa ŵateŵeti ŵa Yehova, nyengo zose tikwenera kulutilira kujisanda kuti timanye usange ivyo tikucita vikukolerana na malango ghake ghaurunji. (Zinth. 28:18; 1 Kor. 10:12) Tikwenera kulutilira kulimbana na vyose ivyo tikubuda mwakuti tiŵaliske ucindami wa Ciuta.
8. Nangauli tili ŵambura kufikapo, nchivici ico tikwenera kucita?
8 Munthu uyo wali kukhalapo pa caru capasi mpaka kufwa kwambura kutondekapo kukondweska Ciuta na kupeleka ucindami kwa iyo ni Yesu pera. Yesu wakaŵa munthu wakufikapo, apo ise tili ŵakufikapo yayi. Ndipouli, tikwenera kumuyezga pa nkhani ya kupeleka ucindami kwa Ciuta. (1 Pet. 2:21) Yehova wakuwona kufwilirapo kwithu na ivyo tikusintha, ndipo wakutitumbika para tikuyezgayezga kupeleka ucindami kwa iyo.
9. Kasi Baibolo likovwira wuli Ŵakhristu awo ŵakukhumba kucita vinthu ivyo Ciuta wakukhumba?
9 Mazgu gha Yehova ghangatovwira kumanya ivyo tingasintha. Nchakuzirwa comene kusambira Baibolo mwakufwilirapo na kughanaghanirapo pa ivyo likuyowoya. (Sal. 1:1-3) Para tikuŵazga Malemba zuŵa na zuŵa ghatovwirenge kuti tisinthe. (Ŵazgani Yakobe 1:22-25.) Vinthu ivyo tikuŵazga mu Baibolo ndivyo vikutovwira kuti tiŵe na cipulikano. Vinthu ivi ndivyo vikutovwiraso kuti tiŵikepo mtima kugega kwananga kukuru na kukondweska Yehova.—Sal. 119:11, 47, 48.
10. Kasi lurombo lungatovwira wuli kuti titeŵetere Yehova mwakukwana?
10 Kweniso kuti tiŵaliske ucindami wa Ciuta, tikwenera ‘kukosera mu lurombo.’ (Rom. 12:12) Tikwenera kulomba kuti Yehova watovwire kuti timuteŵetere mu nthowa yakuzomerezgeka. Kuti ivi vicitike, tikwenera kulomba mzimu wake, cipulikano cikuru, nkhongono zakutondera viyezgo, na luso ‘lwakucitira mwakwenelera na mazgu gha unenesko.’ (2 Tim. 2:15; Mat. 6:13; Luka 11:13; 17:5) Nga umo mwana wakuthembera adada ŵake, nase tikwenera kuthemba Yehova, awo Mbadada ŵithu ŵa kucanya. Usange taŵalomba kuti ŵatovwire kuti tiŵateŵetere mwakukwana, tikwenera kugomezga kuti ŵatovwirenge. Tikwenera yayi kughanaghana kuti ŵawonenge nga ni para tikuŵasuzga. M’malo mwake, mu lurombo tikwenera kuŵalumba, kuŵawonga, kulomba ulongozgi comenecomene para tikuyezgeka, na kuŵapempha kuti ŵatovwire kuti tiŵateŵetere mu nthowa iyo yikupeleka ucindami ku zina lawo lituŵa.—Sal. 86:12; Yak. 1:5-7.
11. Kasi maungano gha mpingo ghakutovwira wuli kuti tiŵaliske ucindami wa Ciuta?
11 Ciuta wapeleka mulimo wa kupwelelera mberere zake zakuzirwa kwa “muzga wakugomezgeka na wakucenjera.” (Mat. 24:45-47; Sal. 100:3) Gulu la muzga likukondwa comene kuwona umo Ŵakhristu ŵanyawo ŵakuŵaliskira ucindami wa Yehova. Pa maungano tikovwirika kuti tisinthe umoyo withu. Vili nga umo tikupelekera laya kwa telara kuti watisonere umo ise tikukhumbira kuti tiwoneke makora. (Heb. 10:24, 25) Ntheura, tiyeni tifikenge mwakutendekera pa maungano, cifukwa usange tikutemwa kucedwa, vyakurya vinyake vyauzimu ivyo vingatovwira pakuŵa ŵateŵeti ŵa Yehova vikutijumpha.
TIŴE ŴAKUYEZGA CIUTA
12. Kasi tingamuyezga wuli Ciuta?
12 Kuti tiŵaliske ucindami wa Yehova, tikwenera kuŵa “ŵakuyezga Ciuta.” (Efe. 5:1) Nthowa yimoza iyo tingayezgera Yehova nkhuwona vinthu nga umo iyo wakuviwonera. Para tikucita vinthu umo ise tikukhumbira ndikuti tikumuyuyura ndipo vitovwirenge yayi. Pakuti caru ico tikukhalamo cikuwusika na muheni, uyo ni Satana Dyabulosi, tikwenera kufwilirapo comene kuti titinkhenge ivyo Yehova wakutinkha, na kutemwa comene ivyo wakutemwa. (Sal. 97:10; 1 Yoh. 5:19) Tikwenera kukhorwa mu mtima withu kuti tingateŵetera Ciuta mu nthowa yakuzomerezgeka pekha para tikucita vyose ku ucindami wake.—Ŵazgani 1 Ŵakorinte 10:31.
13. Cifukwa wuli tikwenera kutinkha kwananga, ndipo para tikucita nthena ticiskikenge kucitaci?
13 Yehova wakutinkha comene kwananga ndipo nase ndimo tikwenera kucitira. Usange tikutinkha kwananga, tigegenge cilicose ico cingapangiska kuti tinange. Mwaciyelezgero, tikwenera kujivikilira kuti tileke kugaluka. Kugaluka nkhwananga uko kungapangiska kuti tiŵe ŵambura kwenelera kupeleka ucindami kwa Ciuta. (Dute. 13:6-9) Ipo tiyeni tileke kwendezgana na ŵakugaluka panji waliyose uyo wakuti ni mubali kweni wakucita vinthu ivyo vikuyuyura Ciuta. Ndimo tikwenera kucitiraso nanga ni para munthu uyo, ngwamumbumba yithu. (1 Kor. 5:11) Tingagazgananga nawo yayi ŵakugaluka panji awo ŵakususka gulu la Yehova. Nakuti tingapwetekeka mwauzimu para tingaŵazganga mabuku ghawo panji ivyo ŵakulemba pa Intaneti, kweniso nchambura kwenelera kucita nthena.—Ŵazgani Yesaya 5:20; Mateyu 7:6.
14. Para tikufwilirapo kuŵaliska ucindami wa Ciuta, kasi ni mukhaliro wuli uwo tikwenera kuŵa nawo, ndipo cifukwa wuli?
14 Nthowa yapadera iyo tingayezgera Adada ŵithu ŵa kucanya nkhulongora citemwa. Nadi, nga ndiwo nase tikwenera kutemwa ŵanyithu. (1 Yoh. 4:16-19) Nakuti citemwa ico tikulongora pakati pithu nchimanyikwiro cakuti tili ŵasambiri ŵa Yesu kweniso ŵateŵeti ŵa Yehova. (Yoh. 13:34, 35) Nangauli nyengo zinyake tingatondeka kucita makora pa nkhani iyi cifukwa ca kwananga uko tili kuhara, kweni tikwenera kuyezgayezga kutemwa ŵanyithu nyengo zose. Para titemwenge ŵanyithu na kuŵa na mikhaliro yinyake iyo Ciuta wakukhumba, tigegenge kucita vinthu mwambura lusungu kweniso kucita viheni.—2 Pet. 1:5-7.
15. Kasi citemwa cikukhwaska wuli ubwezi withu na ŵanji?
15 Citemwa cikuticiska kuti ticitirenge ŵanji vinthu viwemi. (Rom. 13:8-10) Mwaciyelezgero, para tikutemwa muwoli panji mfumu withu, pakugona pithu paŵenge pambura kukazuzgika. Para tikutemwa ŵalara, na kucindika mulimo wawo, ciŵenge cipusu kuŵapulikira na kujilambika ku ulongozgi wawo. Ŵana awo ŵakutemwa ŵapapi ŵawo ŵakuŵacindika ndipo ŵakuŵayowoyera uheni yayi. Usange tikutemwa ŵanthu, tiŵawonenge kuti mbapasi yayi, nesi kuyowoya nawo mwakuŵayuyura. (Yak. 3:9) Ndipo ŵalara awo ŵakutemwa mberere za Ciuta ŵakucita nazo vinthu mwalusungu.—Mil. 20:28, 29.
16. Kasi citemwa cingatovwira wuli mu upharazgi?
16 Mu upharazgi namo tikwenera kulongora citemwa. Cifukwa cakuti tikumutemwa comene Yehova, tizomerezgenge yayi kuti ŵakususka ŵatigongoweske. Kweni tilutilirenge kupharazga makani ghawemi. Citemwa citikhuŵilizgenge kuti tinozgekerenge ndiposo kuti tipharazgenge mwakucontha mitima ya ŵategherezgi. Usange tikutemwa nadi Ciuta na ŵazengezgani ŵithu, mbwenu ticitenge mulimo wa kupharazga Ufumu mwakucicizgika waka yayi nesi mwadango waka. M’malo mwake, tiwuwonenge kuti ngwakuzirwa comene ndipo ticitenge na cimwemwe.—Mat. 10:7.
LUTILIRANI KUPELEKA UCINDAMI KWA YEHOVA
17. Kasi tikusanga candulo wuli cifukwa ca kumanya kuti tikupeleŵera pa ucindami wa Ciuta?
17 Caru cikuwona kuti kwananga ni nkhani yayi, kweni ise ndimo tikuwonera yayi. Ici cikutovwira kuti tiwonenge kuti nchakukhumbikwa kulimbana na maubudi ghithu. Usange tikuzomerezga kuti tili ŵakwananga ticiskikenge kuti ticitengepo kanthu para maghanoghano na mtima withu vikukhumba kuti tinange. (Rom. 7:22, 23) Tingaŵavya nkhongono nyengo zinyake, kweni Ciuta wangatovwira kuti ticite ico nchakwenelera nyengo yiliyose.—2 Kor. 12:10.
18, 19. (a) Ni vinthu wuli ivyo vikutovwira kuti tilimbane na mizimu yiheni? (b) Kasi tikwenera kuŵikapo mtima kucita vici?
18 Usange tikukhumba kupeleka ucindami kwa Yehova tikweneraso kulimbana na mizimu yiheni. Vyankhondo vithu vyauzimu ivyo Ciuta wali kutipa vikutovwira kuti ticite makora pa nkhani iyi. (Efe. 6:11-13) Nyengo zose Satana wakuyezgayezga kuti wibe ucindami uwo ukwenelera Yehova pera. Kweniso Dyabulosi wakulutilira kuyezga kuti wanange ubwezi withu na Yehova. Kweni Satana soni zikumukora comene para ise kweniso ŵanyithu ŵanandi awo nawo mbambura kufikapo, ŵanalume, ŵanakazi na ŵana wuwo ŵakulutilira kugomezgeka kwa Ciuta. Ntheura tiyeni tilutilire kulumba Yehova, nga umo vikucitira vilengiwa vyakucanya ivyo vikuti: “Muli ŵakwenelera, Yehova, enya, Ciuta withu, kupokera ucindami, nchindi na nkhongono, cifukwa mukalenga vinthu vyose, ndipo cifukwa ca khumbo linu vikaŵako ndipo vikalengeka.”—Uvu. 4:11.
19 Mphanyi taŵikapo mtima kuti tipeleke ucindami kwa Yehova visuzge viti wuli. Iyo wakukondwa comene para wakuwona kuti ŵanthu ŵanandi ŵakugomezgeka ŵakucita vyose ivyo ŵangafiska pakuyezga iyo na kuŵaliska ucindami wake. (Zinth. 27:11) Mphanyi mazgu ghithu ghaŵa nga gha Davide uyo wakati: “Nkhumuwongani; A Yehova, Ciuta wane, na mtima wane wose, ndipo tindicindamiske zina linu muyirayira swii.” (Sal. 86:12) Tili ŵakunweka comene kuzakaŵapo pa nyengo iyo tizamuŵaliska ucindami wa Yehova mwakufikapo na kumulumba kwamuyirayira. Ivi ndivyo vizamucitikira ŵanthu ŵakupulikira. Kasi pasono mukuŵaliska ucindami wa Yehova Ciuta, uku muli na cilindizga cakuti muzamucita nthena kwamuyirayira?
[Mafumbo]
[Vithuzithuzi pa peji 27]
Kasi mukuŵaliska ucindami wa Yehova mu nthowa izi?
