Lusungu Lukupozga Ukali

MWANAKAZI munyake mucekuru wakakwiya comene apo Ŵakaboni ŵaŵiri ku Netherlands, Goerge na Manon, ŵakiza pa nyumba yake kuti ŵamupharazgire makani ghawemi gha Ufumu. Ŵakamanya kuti mfumu wake wakwamba wali kufwa, waciŵiri nayo wali kufwa kweniso mwana wake mwanalume nayo wali kufwa. Ŵakamanyaso kuti iyo wakalwaranga nyamakazi. Nangauli nyengo zinyake wakatunanga para ŵakudumbiskana nayo kweni wakayowoyanga mwaubwezi yayi.

Ndipouli, George wakasacizga kwa Manon kuti ŵamuyeghere maluŵa mwanakazi uyu cifukwa cakuti wakawonekanga kuti wali na phukwa kweniso ni mukali. Ŵakati ŵacita nthena, mweneko wa nyumba uyo zina lake ni Rie, wakakondwa comene. Ndipouli, pa nyengo iyi mwanakazi uyu wakatangwanika, ntheura ŵakapangana kuti ŵazakize zuŵa linyake. Apo George na Manon ŵakawelerako pa nyengo iyo ŵakapangana, pa nyumba ya mwanakazi uyu pakaŵavya ŵanthu. Nangauli ŵakayezga kulutaso pa nyengo zakupambanapambana kweni ŵakamusangaso yayi. Ŵakamba kughanaghana kuti panji mama uyu wakuŵagwentha waka.

Zuŵa linyake George wakamusanga Rie pa nyumba. Rie wakaphepiska cifukwa cakuti wakasunga phangano yayi ndipo wakalongosora kuti wakaŵa mu cipatala. Wakati: “Kweni mungagomezga yayi ivyo nkhacita mukati mwaluta. Nkhamba kuŵazga Baibolo.” Ŵakamba kudumbiskana makora ndipo sambiro la Baibolo likamba.

Apo Rie wakalutilira kusambira Baibolo, wakasintha. Wakaleka kuŵa mukali ndipo wakaŵa mama wakukondwa kweniso walusungu. Nangauli wakasuzgikanga kwenda, kweni nyengo yeneyiyo wakamba kuphalirako waliyose uyo wiza kuzakamuwona vya cipulikano cake ciphya. Cifukwa cakuti wakasuzgikanga kwenda kanandi wakalutanga yayi ku maungano gha mpingo, kweni wakakondwanga comene para ŵabali na ŵadumbu ŵakwiza kuzakamuwona ku nyumba kwake. Pa zuŵa ilo wakafiskira vilimika 82, wakaluta ku ungano wa dera ndipo wakabapatizika kulongora kuti wajipatulira kwa Ciuta.

Pakati pajumpha myezi yicoko waka kufuma pa nyifwa yake, powemu iyo wakalemba yikasangika. Mu powemu iyi wakalongosora za phukwa ilo ŵacekuru ŵakuŵa nalo ndiposo za kuzirwa kwa lusungu. Manon wakuti: “Powemu yake yikanicontha mtima comene, ndipo nili wakukondwa comene kuti Yehova wakatovwira kuti timulongore lusungu mama uyu.”

Enya, citemwa na lusungu lwa Yehova, vikuticiska kuti nase tilongorenge mikhaliro iyi. (Efe. 5:1, 2) Uteŵeti withu uŵenge na vipambi apo “tikujilumba taŵene kuti ndise ŵateŵeti ŵa Ciuta . . . [pa nkhani ya] lusungu.”—2 Kor. 6:4, 6.