Mafumbo Ghakufumira ku Ŵaŵazgi
Mafumbo Ghakufumira ku Ŵaŵazgi
Kasi mphawuli apo Uthemba wa pa Caru Cose wa Britain na America ukaŵira uthemba wa pa caru cose wacinkhondi na ciŵiri wa mu ucimi wa mu Baibolo?
▪ Cikozgo cikuru ico Themba Nebukadinezara likawona cikwimira mauthemba ghose yayi gha pa caru cose. (Dan. 2:31-45) Cikozgo ici cikulongora waka mauthemba ghankhondi agho ghawusa kwambira mu nyengo ya Daniyeli kuya munthazi, agho vyakucita vyawo vikakhwaska comene ŵanthu ŵa Ciuta.
Ivyo Daniyeli wakalongosora vyakukhwaskana na cikozgo ca visulo vyakupambanapambana, vikulongora kuti Uthemba wa pa Caru Cose wa Britain na America ukafuma mu Romu kuti ukamuthereska yayi. Mu cikozgo ici, Daniyeli wakawona kuti cisulo cikufika ku vikandiro mpaka ku minwe. (Ku vikandiro na minwe, cisulo nchakusazgikana na dongo.) a Ici cikulongora kuti Uthemba wa pa Caru Cose wa Britain na America uzamufumira mu malundi gha cisulo. Mdauko ukulongora kuti fundo iyi njaunenesko. Britain, uyo pakwamba wakaŵa cigaŵa ca Uthemba wa Romu, wakamba kukura ca kuumaliro kwa vilimika vya m’ma 1700. Nyengo yikati yajumphapo, caru ca United States of America cikajiyimira pacekha. Ndipouli, uthemba wa pa caru cose wacinkhondi na ciŵiri wa mu ucimi wa Baibolo ukaŵa kuti undapangike. Cifukwa wuli? Cifukwa cakuti Britain na United States ŵakaŵa kuti ŵandambe kucitira lumoza vinthu vikuruvikuru. Iwo ŵakamba kucitira lumoza vinthu pa Nkhondo Yakwamba ya Caru Cose.
Pa nyengo iyi “ŵana ŵa Ufumu” ŵakaŵa ŵamwamphu, comenecomene mu United States, ndipo ofesi yawo yikuru yikaŵa ku Brooklyn, ku New York. (Mat. 13:36-43) Ŵakhristu ŵakuphakazgika ŵakapharazganga mwamwamphu mu vigaŵa vinandi ivyo vikawusikanga na Uthemba wa Britain. Pa Nkhondo Yakwamba ya Caru Cose, Britain na America ŵakakolerana comene pakutimba ŵalwani ŵawo. Kweniso cifukwa ca kutemwa mtundu wawo, uthemba uwu ukalongora kuti ukutinkha ŵanthu awo ŵakaŵa cigaŵa ca mphapu ya “mwanakazi” wa Ciuta. Ukaŵakanizga kugaŵira mabuku agho ŵakapanganga, na kujalira mu jele awo ŵakadangiliranga pa mulimo wa kupharazga.—Uvu. 12:17.
Ipo mwakuyana na ucimi wa mu Baibolo, uthemba wacinkhondi na ciŵiri wa pa caru cose ukaŵa kuti undakhazikike kuumaliro wa vilimika vya m’ma 1700 apo Britain wakambiranga waka kuŵa na mazaza. Kweni ukaŵa uthemba wa pa caru cose apo zuŵa la Fumu likambiranga. b
[Mazgu ghamusi]
a Dongo lakusazgikana na cisulo likwimira vinthu vyakugaŵaniska mu Uthemba wa pa Caru Cose wa Britain na America uwo kulwande uli nga nchisulo. Mu nyengo iyo yajumphapo, dongo lapangiska kuti uthemba uwu utondeke kuŵa na nkhongono zikuru izo ukukhumba kuŵa nazo.
b Kalongosolero aka kasintha ivyo vili kulongosoreka pa peji 57, ndime 24, mu buku la Ulosi wa Daniyeli, ndiposo ivyo vili pa chati ico cili pa peji 56 na 139.
[Cithuzithuzi pa peji 19]
Ŵabali ŵankhondi na ŵatatu ŵa ku ofesi yikuru ya Watchtower ŵakajalirika mu jele mu Juni 1918
