“Ivyo Nkhakhumbanga Vyafiskika”

Vilimika 15 kumasinda, Emilia wakaŵa mupayiniya wanyengozose. Ndipouli, wakaleka kucita uteŵeti wanyengozose. Mu vilimika vyasonosono, kanandi wakaghanaghanirangapo cimwemwe ico wakaŵanga naco apo wakacitanga upayiniya, ndipo wakambaso kukhumba kucita upayiniya.

Kweni, nchito iyo Emilia wakagwiranga yikamumaliranga nyengo, ndipo yikamupokanga cimwemwe. Zuŵa linyake apo wakaŵa na ŵanyake ŵa ku nchito, wakadandawura kuti: “Vingaŵa makora comene usange ningagwiranga nchito kwa maora ghacoko.” Bwana wake wakapulika ivyo wakayowoya, ndipo wakamufumba usange wakaneneskanga. Emilia wakazomera. Ndipouli, kuti wazomerezgeke kugwira nchito kwa maora ghacoko pakakhumbikwiranga kuti bwana mulara wazomerezge dankha, cifukwa kampani iyi yikakhumbanga kuti ŵanchito ŵake ŵagwirenge nchito maora ghose. Mudumbu withu wakanozgekera kukakumana na bwana mulara ndipo wakalomba kwa Ciuta kuti ŵakadumbiskane mwamtende ndiposo kuti wakaŵe na cikanga.

Pa nyengo iyo ŵakadumbiskananga, Emilia wakayowoya mwaluso kweniso mwacikanga. Wakalomba kuti ŵamucepeskereko maora ghakugwilira nchito. Wakalongosora kuti mazuŵa agho wakuleka kugwira nchito wakusanga mwaŵi wakuti wawovwilire ŵanji. Iyo wakati: “Ndine Kaboni wa Yehova, ndipo nkhovwira ŵanthu mwauzimu. Mazuŵa ghano nkharo za ŵanthu ŵanandi zahenipa. Ŵakukhumbikwira malango na fundo ziwemi, ndipo vinjeru vya mu Baibolo ivyo nkhuŵaphalirako ni vyakuzirwa comene kwa iwo. Nkhukhumba yayi kuti milimo yane iyo nkhucita para naŵeluka yitimbanizge nchito, kweni nkhukhumba kuti niŵe na nyengo yinandi yakovwilira ŵanthu. Lekani nkhukhumba kuti municepeskereko maora agho nkhugwilira nchito.”

Bwana uyu wakategherezga mwakupwelelera ndipo wakati nayo wakaghanaghanapo vya kugwira nchito ya kovwira ŵanthu ŵakusuzgika. Ndipo wakati: “Vifukwa ivyo wayowoya ni vyakupulikikwa ndipo napulika pempho lako. Kweni kasi ukumanya kuti upokerenge ndalama zicoko?” Emilia wakati wakumanya ndipo usange nchakwenelera, wakhumbenge vinthu vinandi yayi pa umoyo. Wakayowoyaso kuti: “Nkhukondwa comene para nkhovwira ŵanthu.” Bwana uyu wakamuphalira kuti: “Nkhudokera para ŵanthu ŵakupeleka nyengo yawo mwawanangwa kuti ŵawovwire ŵanji.”

Palije nanga njumoza pa kampani iyi uyo wali kuzomerezgekapo kuti wagwirenge nchito kwa maora ghacoko nga ni Emilia. Panyengo yasono Emilia wali kuzomerezgeka kugwira nchito mazuŵa ghanayi pera pa sabata. Wakazizwa kuwona kuti ŵasazgirako malipiro ghake, ndipo wakupokera malipiro ghanandi kuluska kale. Wakati: “Ivyo nkhakhumbanga vyafiskika, sono ningacitaso upayiniya wanyengozose.”

Kasi muli kughanaghanirapo vya kusintha vinthu vinyake kuti mwambe panji mwambeso kucita upayiniya?

[Mazgu Ghakukhozgera pa peji 32]

Bwana uyu wakamuphalira kuti: “Nkhudokera para ŵanthu ŵakupeleka nyengo yawo mwawanangwa kuti ŵawovwire ŵanji”