“Ine Nili Namwe”
“Ine Nili Namwe”
“Ŵanandi ŵamkucimbira uku na uko, na mahara ghamkwandana.”—DAN. 12:4.
KASI MUNGAZGORA WULI?
Kasi “mahara” ghamanyikwa wuli mu nyengo yithu yino?
Cifukwa wuli tikuti awo ŵakuzomera unenesko ‘mbanandi’?
Kasi mahara ‘ghandana’ wuli?
1, 2. (a) Kasi tikumanya wuli kuti Yesu wali na ŵanthu ŵake sono ndiposo kuti wazamuŵa nawo munthazi? (b) Kuyana na lemba la Daniel 12:4, kasi pakuŵa uwemi wuli para tikusambira Malemba mwakupwelelera?
JITORANI kuti muli mu Paradiso. Mulenji uliwose para mukuwuka mukujipulika makora ndipo mukunweka kucita milimo yinu. Mukupulika vyakuŵinya yayi. Ulwari uliwose uwo mukaŵa nawo wamara. Thupi linu lose lili makora, mukulaŵiska, mukupulika, mukunuska vinthu, mukumanya kuti mwakhwaska cinthu cinyake, ndiposo mukumanya usange cakurya cikunowa panji yayi. Muli na nkhongono zinandi, muli na nchito yakukondweska, muli na ŵabwezi ŵanandi, ndiposo kwenjerwa kose kwamara. Vitumbiko ivi ndivyo muzamusangwa navyo mu Ufumu wa Ciuta. Khristu Yesu, Themba ilo lili kwimikika, wazamutumbika ŵanthu ŵake na kuŵasambizga kuti ŵamanye Yehova.
2 Yehova wazamuŵa na ŵateŵeti ŵake ŵakugomezgeka apo ŵazamucitanga mulimo uwu wa kusambizga ŵanthu pa caru cose. Ciuta na Mwana wake ŵaŵa na ŵanthu ŵakugomezgeka kwa vyaka vinandi. Pambere wandakwelere kucanya, Yesu wakasimikizgira ŵasambiri ŵake kuti waŵenge nawo. (Ŵazgani Mateyu 28:19, 20.) Kuti tikhozge cipulikano cithu mu layizgo ili, tiyeni tisande ucimi umoza wakupelekeka na Ciuta uwo ukalembekera mu Babuloni vyaka vyakujumpha 2,500 ivyo vyajumpha. Pakuyowoya za “nyengo ya umaliro” iyo tilimo sono, nchimi Daniyeli yikalemba kuti: “Ŵanandi ŵamkucimbira uku na uko, na mahara ghamkwandana.” (Dan. 12:4) Sono tikupulikiska kuti mu vesi ili, mazgu ghakuti “ŵamkucimbira uku na uko” ghakung’anamura kusambira mwakupwelelera. Awo ŵakusambira mwakupwelelera ŵasangenge vitumbiko vinandi. Awo ŵakusambira mwakupwelelera Malemba ŵaŵenge na mahara gha mu Mazgu gha Ciuta. Ucimi uwu ukayowoyaso kuti ŵanandi ŵazamuzomera “mahara.” Kweniso, mahara agha ghazamwandana. Ghazamuthandazgika comene ndiposo ghazamuŵa palipose. Apo tikusanda umo ucimi uwu wafiskikira, tiwonenge kuti Yesu wali na ŵasambiri ŵake mazuŵa ghano ndiposo kuti Yehova wakucita vyose ivyo wali kulayizga.
“MAHARA” GHAMANYIKWA
3. Kasi nchivici ico cikacitikira “mahara” ŵapositole ŵati ŵafwa?
3 Ŵapositole ŵakati ŵafwa, ŵakugaluka awo ŵakayowoyekerathu kuti ŵazamufuma mu Ŵakhristu ŵaunenesko ŵakamba ndipo ŵakathandazgika nga ni moto. (Mil. 20:28-30; 2 Tes. 2:1-3) Vyaka vinandi kufuma apa, “mahara” ghakasoŵa comene pakati pa ŵanthu awo ŵakalimanyanga yayi Baibolo kweniso pakati pa ŵanthu awo ŵakajicemanga kuti Mbakhristu. Nangauli ŵalongozgi ŵa Cikhristu cautesi ŵakayowoyanga kuti ŵakagomezganga Malemba, kweni ŵakasambizganga visambizgo vyautesi, ivyo ni “visambizgo vya viŵanda” vyeneivyo vikuyuyura Ciuta. (1 Tim. 4:1) Pa cifukwa ici ŵanthu ŵakamanyanga yayi unenesko wakukhwaskana na Ciuta. Vinyake mwa visambizgo vya ŵakugaluka ni cisambizgo cakuti kuli ŵa ciuta ŵatatu mwa Ciuta yumoza, cakuti mzimu ukufwa yayi, ndiposo cakuti mizimu yinyake yikutambuzgika kwamuyirayira ku moto wa helo.
4. Kasi gulu linyake la Ŵakhristu mu vyaka vya m’ma 1870 likamba wuli kupenja “mahara”?
4 Ndipouli, mu vyaka vya m’ma 1870, vyaka pafupifupi 40 pambere “mazuŵa ghaumaliro” ghandambe, gulu licoko waka la Ŵakhristu ŵaunenesko ku Pennsylvania, U.S.A., likakumana pamoza kuti lisambire Baibolo mwakufwilirapo na kupenja “mahara.” (2 Tim. 3:1) Gulu ili likajithya zina lakuti Ŵasambiri ŵa Baibolo. Aŵa ŵakaŵa “ŵavinjeru na ŵamahara” yayi, awo Yesu wakayowoya kuti mahara ghakabisika kwa iwo. (Mat. 11:25) Ŵakaŵa ŵanthu ŵakujiyuyura awo ŵakakhumbanga nadi kucita khumbo la Ciuta. Ŵasambiri ŵa Baibolo ŵakaŵazganga Malemba mwakupwelelera, kudumbiskana, na kughanaghanirapo pa Malemba, ndipo ŵakalombanga kuti Ciuta waŵalongozge. Kweniso ŵakayaniskanga malemba gha mu Baibolo na kusanda mabuku gha ŵanthu ŵanyake awo nawo ŵakasanda nga umo iwo ŵakacitira. Mwapacokopacoko, Ŵasambiri ŵa Baibolo aŵa ŵakamanya unenesko uwo ukaŵa wakubisika kwa vyaka vinandi.
5. Kasi cilato ca mathirakiti ghakucemeka kuti The Old Theology cikaŵa civici?
5 Nangauli Ŵasambiri ŵa Baibolo ŵakaŵa ŵakukondwa cifukwa ca vinthu ivyo ŵakasambiranga, kweni ŵakajitukumuranga yayi cifukwa ca kumanya vinthu viphya; nesi kujilumba cifukwa ca kupharazga vinthu viphya ivi. (1 Kor. 8:1) M’malo mwake, ŵakamba kusindikizga mathirakiti ghakucemeka kuti The Old Theology. Cilato cawo cikaŵa ca kovwira ŵaŵazgi kuti ŵamanye unenesko wa mu Malemba uwo uli kulembeka mu Baibolo. Mathirakiti ghakwamba ghakawovwira kuti ŵanthu ŵasambire Baibolo mwakuti ŵakane “maluso ghautesi ghose gha ŵanthu” ndiposo kuti ŵazomere visambizgo vyaunenesko vyakukhwaskana na Yesu na vya ŵapositole, panji “visambizgo vyakwambilira.”—The Old Theology, Na. 1, Epulero 1889, peji 32.
6, 7. (a) Kasi ni unenesko wuli uwo tawovwirika kuti tiwupulikiske kwambira waka mu vyaka vya m’ma 1870? (b) Kasi ni unenesko wuli uwo mukuwonga comene kuti muli kuwumanya?
6 Unenesko unandi comene wavumbukwa kwambira waka apo mathirakiti agha ghakalembekera vyaka vyakujumpha 100 ivyo vyajumpha. a Para tikusambira unenesko uwu, tikumanya waka vinthu yayi. Ni unenesko uwo ungatovvwira kuti tiŵe na umoyo uwemi ndiposo wakukondweska kweniso ungatovwira kuti tiŵe na cilindizga ciwemi. Ukutovwira kumanya Yehova, citemwa cake, na khumbo lake. Kweniso ukulongosora mwakupulikikwa makora mulimo wa Yesu, cifukwa ico wakaŵirako na ico wakakomekera, ndiposo ukuyowoya ivyo wakucita sono. Unenesko uwu ukuvumbura cifukwa ico Ciuta wali kuzomelezgera kuti viheni vicitikenge, cifukwa ico tikufwira, umo tingalombera, ndiposo umo tingaŵira ŵakukondwa zanadi.
7 Sono tingapulikiska ng’anamuro la maucimi agho ‘ghakajalirika’ kwa vyaka vinandi comene kweni ghakufiskika mu nyengo iyi ya umaliro. (Dan. 12:9) Maucimi agha ni agho ghakusangika mu Malemba ghose, comenecomene mu Mabuku gha Makani Ghawemi na mu buku la Uvumbuzi. Yehova watovwira kuti tipulikiske vyakucitika ivyo tingaviwona na maso ghithu yayi, nga ni apo Yesu wakimikikira kuŵa Fumu, nkhondo iyo yikacitika kucanya, ndiposo umo Satana wakacimbizgikira kucanya kwiza pa caru capasi. (Uvu. 12:7-12) Kweniso Ciuta wakutovwira kuti tipulikiske ng’anamuro la vyakucitika ivyo tingaviwona, nga ni nkhondo, vindindindi, zinthenda, na njara. Watovwiraso kumanya cifukwa ico ŵanthu ŵambura kumupulikira ŵakucitira vinthu viheni ivyo vikovwira kuti nyengo izi ziŵe “zinonono na zakusuzga.”—2 Tim. 3:1-5; Luka 21:10, 11.
8. Kasi tikwenera kuwonga njani cifukwa ca vinthu ivyo tikuwona na kupulika?
8 Yesu wakaphalira ŵasambiri ŵake kuti: “Ŵakukondwa mbanthu awo maso ghawo ghakuwona vinthu ivyo imwe mukuwona. Pakuti nkhumuphalirani kuti, Nchimi zinandi na mathemba ŵakakhumba kuwona vinthu ivyo imwe mukuwona kweni ŵakaviwona cara, na kupulika vinthu ivyo imwe mukupulika kweni ŵakavipulika cara.” (Luka 10:23, 24) Umu ndimo tikujipulikira mazuŵa ghano. Tikuwonga comene Yehova Ciuta cifukwa ca kutovwira kuti tiwone na kupulika vinthu ivi. Ndiposo tikuwonga comene kuti “movwiri,” uwo ni mzimu utuŵa wa Ciuta, watumizgika kuti ulongozgere ŵalondezgi ŵa Yesu “ku unenesko wose.” (Ŵazgani Yohane 16:7, 13.) Tiyeni tose tizirwiske “mahara” na kuphalirako ŵanji kwawanangwa.
“ŴANANDI” ŴAKUZOMERA “MAHARA”
9. Kasi ni nchemo wuli iyo yikaŵa mu Gongwe la Mulinda la Epulero 1881?
9 Mu Epulero 1881, pambere pandajumphe vyaka viŵiri kufuma apo Gongwe la Mulinda lakwamba likasindikizgikira, mu magazini iyi mukaŵa nkhani yakuti: “Pakukhumbikwa Ŵapharazgi 1,000.” Nkhani iyi yikapempha awo ŵangafiska kucita mulimo wa kupharazga wa makopotara, panji kuti ŵapayiniya. Ŵakapempheka kuti ŵalute kulikose uko ŵangasanga Ŵakhristu awo ŵakatemwanga Ciuta kweni ŵakamumanyanga makora yayi, ndipo ŵaŵasambizge unenesko wakukhwaskana na Ciuta na Baibolo.
10. Kasi ŵanthu ŵakacita wuli ŵati ŵapempheka kuti ŵaŵe ŵapharazgi ŵanyengozose?
10 Nchemo iyi yikalongora kuti Ŵasambiri ŵa Baibolo ŵakamanya kuti mulimo wakuzirwa wa Ŵakhristu ŵaunenesko nkhupharazga makani ghawemi. Kweni nchemo iyi yakupempha ŵapharazgi 1,000 yikalongora nga kuti yendenge makora yayi, cifukwa cakuti ŵanthu mahandiredi ghacoko waka ndiwo ŵakizanga ku maungano gha Ŵasambiri ŵa Baibolo panyengo iyo. Ndipouli, pamanyuma pa kuŵazga thirakiti panji magazini, ŵanthu ŵanandi ŵakamanya kuti ŵasanga unenesko ndipo ŵakazomera nchemo iyi. Mwaciyelezgero, pamanyuma pa kuŵazga Gongwe la Mulinda na kabuku kanyake kakupharazgika na Ŵasambiri ŵa Baibolo, mu 1882 muŵazgi munyake wa ku London, ku England, wakalemba kuti: “Naŵeya nisambizgani umo ningapharazgira ndiposo ivyo nkhwenera kupharazga mwakuti nifiske mulimo wakutumbikika uwo Ciuta wakukhumba kuti ucitike.”
11, 12. (a) Kasi makopotara ghakaŵa na cilato wuli ico cikuyana na cithu? (b) Kasi makopotara ghakambiskanga wuli “makilasi,” panji kuti mipingo?
11 Kufika mu 1885, Ŵasambiri ŵa Baibolo pafupifupi 300 ŵakacitanga uteŵeti wa ukopotara. Ŵapharazgi ŵanyengozose aŵa ŵakaŵa na cilato cakuyana na ico tili naco ise mazuŵa ghano, ca kuzgora ŵanthu kuti ŵaŵe ŵasambiri ŵa Yesu Khristu. Ndipouli, nthowa izo ŵakapharazgiranga zikupambana na zithu. Lero, kanandi tikusambira Baibolo na munthu yumoza panyengo yimoza. Pamanyuma tikumupempha msambiri wa Baibolo kuti wize kuzakawungana na mpingo uwo ulipo kale. Mu nyengo zakwambilira, makopotara ghakapelekanga mabuku ndipo pamanyuma ghakawunganyanga pamoza ŵakunweka kuti ŵasambirenge Malemba nga ni gulu. M’malo mwa kusambira na waliyose payekha ŵakambiskanga “makilasi,” panji mipingo.
12 Mwaciyelezgero, mu 1907, gulu linyake la makopotara likendera msumba unyake kuti limanye awo ŵakaŵa nagho kale mabuku gha Millennial Dawn (agho ghakacemekangaso kuti Studies in the Scriptures). Gongwe la Mulinda likati: “[Ŵakunweka] aŵa ŵakawungana mu nyumba yimoza. Ndipo Kopotara wakadumba nkhani ya mutu wakuti Divine Plan of the Ages zuŵa lose la Sabata. Pa zuŵa la Sabata lakulondezgapo wakaŵaciska kuti ŵawunganenge nyengo zose.” Mu 1911, ŵabali ŵakasintha nthowa zakupharazgira. Ŵateŵeti ŵakwendakwenda ŵakukwana 58 ŵakayowoyanga nkhani yacisanisani mu United States na mu Canada. Ŵabali aŵa ŵakalembanga mazina na maadiresi gha ŵanthu ŵakunweka awo ŵakiza kuzakategherezga nkhani na kunozga ndondomeko yakuti ŵawunganenge mu nyumba kuti ŵapange “makilasi” ghaphya. Kufika mu 1914, pa caru cose capasi pakaŵa mipingo 1,200 ya Ŵasambiri ŵa Baibolo.
13. Kasi nchivici ico cikumuzizwiskani cakukhwaskana na umo “mahara” ghandanira mazuŵa ghano?
13 Mazuŵa ghano, pa caru cose capasi pali mipingo pafupifupi 109,400, ndipo ŵabali na ŵadumbu 895,800 ŵakucita upayiniya. Pa nyengo yasono, ŵanthu pafupifupi 8 miliyoni ŵali kuzomera “mahara,” na kughalondezga mu umoyo wawo. (Ŵazgani Yesaya 60:22.) b Ici nchakuzizwiska, cifukwa Yesu wakayowoyerathu kuti ŵasambiri ŵazamuŵa ‘ŵakutinkhika na ŵanthu wose’ cifukwa ca zina lake. Wakayowoyaso kuti ŵalondezgi ŵake ŵazamutambuzgika, kuŵikika mu magadi, nanga nkhukomeka. (Luka 21:12-17) Nangauli Satana, viŵanda vyake, ndiposo ŵanthu ŵanandi ŵayezga kulekeska mulimo wa kupharazga, kweni ŵanthu ŵa Yehova ŵakulutilira kuzgora ŵanthu kuŵa ŵasambiri, ndipo mulimo uwu ukwenda makora. Mazuŵa ghano, ŵakupharazga mu “caru cose.” Ŵakupharazga kwambira ku vigaŵa vya kocha comene mpaka ku vigaŵa vyakuzizima comene, mu mapiri, mu viparamba, mu misumba, na mu vigaŵa vyakusuzga kufikako. (Mat. 24:14) Ivi mphanyi vindacitike kwambura wovwiri wa Ciuta.
“MAHARA” GHANDANA
14. Kasi “mahara” ghandana wuli kwizira mu mabuku ghithu?
14 “Mahara” ghandana pakati pa ŵanthu ŵanandi awo ŵakupharazga makani ghawemi. Kweniso ghandana kwizira mu mabuku agho ghakusindikizgika. Mu Julayi 1879, Ŵasambiri ŵa Baibolo ŵakasindikizga magazini yakwamba ya Gongwe la Mulinda, iyo pa nyengo iyo yikacemekanga kuti Zion’s Watch Tower and Herald of Christ’s Presence. Magazini iyi, yikasindikizgika na kampani ya ŵanthu bweka, ndipo makope ghakukwana 6,000 ghakasindikizgika mu Cingelezi pera. Mubali Charles Taze Russell uyo pa nyengo iyi wakaŵa na vyaka 27 ndiyo wakasankhika kuti walembenge magazini iyi, pamoza na Ŵasambiri ŵa Baibolo ŵakukhwima ŵankhondi awo ŵakawovwirananga nayo nyengo zose. Pasono Gongwe la Mulinda likupharazgika mu viyowoyero 195. Ni magazini iyo yikugaŵirika ku ŵanthu ŵanandi comene kuluska yiliyose pa caru capasi, ndipo makope 42,182,000 ghakusindikizgika pa Gongwe la Mulinda lililose. Magazini iyo yili paciŵiri ni Galamukani! ndipo makope 41,042,000 ghakusindikizgika mu viyowoyero 84. Kweniso, mabuku na Mabaibolo pafupifupi 100 miliyoni ghakusindikizgika caka cilicose.
15. Kasi ndalama zakusindikizgira mabuku ghithu zikufuma nkhu?
15 Ŵanthu ndiwo ŵakupeleka vyawanangwa kuti mulimo ukuru uwu wende makora. (Ŵazgani Mateyu 10:8.) Ici cikuzizwiska awo ŵakusindikizga mabuku gha malonda awo ŵakumanya kudura kwa makina, mapepara, inki, na vinthu vinyake. Mubali munyake uyo wakugura katundu wakukhwaskana na kusindikizga mabuku pa Beteli wakati: “Ŵanthu ŵa bizinesi awo ŵakuwona makina ghithu ghakusindikizgira mabuku ŵakuzizwa kuti makina ghapacanya comene agho tili nagho ghali kugulika na ndalama zakupelekeka mwawanangwa. Kweniso ŵakuzizwa comene kuti awo ŵakugwira nchito pa Beteli mbana ŵacoko kweni mbakukondwa.”
CARU CIZAMUZURA NA KUMUMANYA CIUTA
16. Kasi cilato ico “mahara” ghamanyikwira nchakuti wuli?
16 “Mahara” ghandana pa vifukwa vyakwenelera. Khumbo la Ciuta ndakuti “ŵanthu ŵa mitundu yose ŵafike pa kumanya makora unenesko.” (1 Tim. 2:3, 4) Yehova wakukhumba kuti ŵanthu ŵamanye unenesko mwakuti ŵasope iyo mwakwenelera na kupokera vitumbiko. Cifukwa cakuti “mahara” ghamanyikwa, Yehova wawunganya Ŵakhristu ŵakuphakazgika. Kweniso kufuma mu “mitundu yose na mafuko na ŵanthu na malulimi,” wakuwunganya “mzinda ukuru,” uwo uli na cilindizga ca kuzakakhala kwamuyirayira pa caru capasi.—Uvu. 7:9.
17. Kasi kukura kwa cisopa caunenesko kukulongora vici?
17 Mu vyaka 130 ivyo vyajumpha kusopa kwaunenesko kwakura comene. Ici calongora kuti Ciuta na Themba ilo wali kwimika, Yesu Khristu, ŵali na ŵateŵeti ŵa Yehova pa caru capasi, ndipo ŵakuŵalongozga, kuŵavikilira, kuŵawunganya, na kuŵasambizga. Kukura uku nchilongolero cakuti vinthu vya munthazi ivyo Yehova wali kulayizga vizamufiskika kwambura kutondeka. “Caru camkuzura na kumumanya Yehova umo maji ghakuzuzgira nyanja.” (Yes. 11:9) Pa nyengo iyi, ŵanthu ŵazamutumbikika comene.
[Mazgu ghamusi]
a Mungasanga candulo cikuru comene para mungawonelera DVD ya Jehovah’s Witnesses—Faith in Action, Part 1: Out of Darkness na ya Jehovah’s Witnesses—Faith in Action, Part 2: Let the Light Shine.
b Wonani buku la Ulosi wa Yesaya—Muuni wa Anthu Onse 2, peji 320.
[Mafumbo]
[Cithuzithuzi pa peji 6]
Ŵasambiri ŵa Baibolo ŵakwambilira ŵakaŵa ŵanthu ŵakujiyuyura awo ŵakakhumbanga kucita khumbo la Ciuta kufumira pasi pa mtima
[Cithuzithuzi pa peji 7]
Yehova wakuzirwiska para mukufwilirapo pakuthandazga “mahara” ghake
