Kasi Mukukumbuka?

Kasi muli kuŵazgapo magazini gha Gongwe la Mulinda ghasonosono apa? Yezgani kuzgora mafumbo agha:

Kasi tingazimwa wuli moto wa kuyowoya kwambura kujikora?

Tikwenera kusanda mtima withu. M’malo mwa kukayikira mubali withu, tingacita makora kusanda cifukwa ico tikumughanaghanira vinthu viheni. Kasi tikumughanaghanira viheni cifukwa cakuti tikukhumba kuti ise tiwonekenge ŵawemi? Kweniso para tikughanaghanira ŵanyithu viheni ndipo tikunangirathu vinthu.​—8/15, peji 21.

Kasi Dango likalongoranga wuli umo Ciuta wakuwonera ŵanakazi?

Ŵanakazi Ŵaisrayeli ŵakaŵa na wanangwa ukuru, ndiposo ŵakaŵanga na mwaŵi wa kusambira. Ŵakeneranga kucindikika, ndipo wanangwa wawo ukavikilirikanga.​—9/1, peji 5-7.

Kasi ni vinthu wuli ivyo vizamucitika para kwakhala nyengo yicoko waka kuti zuŵa la Yehova lize?

Pazamuŵa nchemerezgo yakuti “Bata na mtende!” Mitundu yizamuwukira na kuparanya Babuloni Mukuru. Ŵanthu ŵa Ciuta ŵazamuwukilika. Nkhondo ya Haramagedoni yizamucitika, ndipo para yacitika, Satana na viŵanda vyake ŵazamujalirika mu cizongwe.​—9/15, peji 4.

Kasi tikusanga vyandulo wuli cifukwa cakuti tikumanya yayi apo umaliro wizirenge?

Cifukwa ca kuleka kumanya apo umaliro wizirenge, tikuvumbura ivyo vili mu mitima yithu. Kweniso tikuŵa na mwaŵi wa kukondweska mtima wa Ciuta. Cifukwa ca kuleka kumanya apo umaliro wizirenge tikuciskika kuti tiŵenge ŵakujipata ndiposo vikutovwira kuti tithembenge comene Ciuta na Mazgu ghake. Cinyake nchakuti tikuyengeka para takumana na masuzgo.​—, peji 24-25.

Kasi tingagwiliskira wuli nchito lemba la Genesis 3:19 kuti tidumbiskane na munthu uyo wakugomezga kuti kuli moto wa helo?

Vesi ili likuti para Adamu wafwa wawelerenge ku fuvu, kuti walutenge ku moto wa helo yayi.​—10/1, peji 13.

Kasi “nyenyezi zinkhondi na ziŵiri” izo zili mu woko lamalyero la Yesu, zeneizo zikuzunulika pa Uvumbuzi 1:16, 20 zikwimira anjani?

Zikwimira ŵalara ŵakuphakazgika na mzimu mu mpingo, kweniso zingimiraso ŵalara wose.​—10/15, peji 14.

Kasi mbumba yingacita wuli na ngongoli izo yili nazo?

Mbumba yikwenera kudumbiskana mwakuzika kweniso mwakufwatuka pa nkhani ya ngongoli izo yili nazo. Cingaŵa cakovwira usange yingasanda bajeti yake. Kasi yingasazgirako ndalama zake panji kucepeska vinthu ivyo vikukhumba ndalama? Yikwenera kughanaghanira umo yizamucitira kuti yiwezge ngongoli izo yili nazo, panji yingadumbiskana na awo ŵayikongozga. Kweni mbumba iyi yikwenera kuwona ndalama mwakwenelera. (1 Tim. 6:8)​—11/1,peji 19-21.

Kasi Yesu wakalongora wuli mzimu wa kujiyuyura uwo ukuyowoyeka pa Yesaya 50:4, 5?

Mavesi agha ghakuyowoya kuti uyo wali na “lulimi lwa ŵakusambira” ‘wawelerenge nyuma’ cara. Yesu wakalongora kujiyuyura, ndipo wakategherezganga comene ivyo Awiske ŵakamusambizganga. Yesu wakaŵa wakunweka na wakukhumbisiska kusambira kwa Yehova, wakawonanga umo Ciuta wakajiyuyulira pakulongora lusungu ku ŵanthu ŵakwananga.​—11/15, peji 11.

Kasi sitampu ya ku Estonia ya kukumbukira ŵanthu awo ŵakakomeka yikulongora wuli kuti Ŵakaboni ŵa Yehova mbakugomezgeka?

Mu 2007, dipatimenti ya vya makalata ku Estonia yikafumiska sitampu iyo yikulongora vya ŵanthu ŵanandi awo wakakomeka mu Estonia na Stalin na ŵanthu ŵake. Pa sitampu iyi pali kulembeka 382 iyo ni nambara ya Ŵakaboni na ŵana ŵawo awo ŵakatumizgika ku misasa yakusuzgirako ŵanthu ku Russia mu 1951.​—12/1, peji 27-28.