Lekani Kucita Mayere na Baibolo

“MAZGU gha Ciuta ngamoyo na ghankhongono.” (Heb. 4:12) Apa mpositole Paulosi wakadidimizganga fundo yakuti mazgu gha Ciuta ghali na nkhongono zikuru, ndipo ghakucontha mitima na kusintha umoyo wa ŵanthu.

Kweni ŵanthu ŵakasintha pa umo ŵakuwonera nkhongono za uthenga wa mu Baibolo cigaluka ico cikayowoyekerathu cikati canjira, ŵapositole ŵakati ŵafwa. (2 Pet. 2:1-3) Ŵalongozgi ŵa chalichi ŵakamba kusambizga kuti Mazgu gha Ciuta ghali na nkhongono za mayere. Pulofesa wa vya cisopa Harry Y. Gamble wakalemba vya “kucita mayere na malemba Ghacikhristu.” Wakayowoya kuti mu vyaka vya m’ma 200 C.E., Bambo wa Chalichi, zina lake Origen, wakati “kapulikikwiro kekha ka mazgu ghakupatulika nkhacandulo: usange mazgu agho ŵanthu ŵambura kusopa ŵakuyowoya pakucita mayere ghali na nkhongono, ipo comene kwakuluska mazgu gha Ciuta agho ghali mu malemba ngankhongono comene.” John Chrysostom uyo wakaŵako kuumaliro wa vyaka vya m’ma 300 C.E. wakalemba kuti “dyabulosi wangayezga yayi kufika pafupi na nyumba iyo yili na Mabuku gha Makani Ghawemi.” Kweniso wakayowoya kuti ŵanji ŵakavwaranga mu singo mavesi gha Mabuku gha Makani Ghawemi ndipo ŵakaghawonanga nga nchinthumwa cankhongono. Pulofesa Gamble wakayowoyaso kuti nkhwantha ya vya cisopa ya Katolika Augustine “wakawonanga kuti nchakuzomerezgeka kuti para munthu walwara mutu waŵikenge buku la Makani Ghawemi la Yohane kusi kwa pilo.” Ntheura ŵanthu ŵakamba kugwiliskira nchito malemba gha mu Baibolo pakucita masalamusi. Kasi namwe mukuwona Baibolo kuŵa cinthumwa, panji cinthu cakuti cimupani mwaŵi, ceneico cingamuvikilirani ku viheni?

Paliso nthowa yinyake iyo ŵanthu ŵanandi ŵakugwiliskira nchito uheni Baibolo. Ŵakugomezga kuti usange ŵajura Baibolo pa peji lililose, vesi lakwamba ilo ŵawonenge liŵaphalirenge ivyo ŵakwenera kucita. Mwaciyelezgero, kuyana na ivyo Pulofesa Gamble wakayowoya, apo zuŵa linyake Augustine wakapulika mazgu gha mwana ghakuti: “Tora na kuŵazga, tora na kuŵazga,” Augustine wakawona kuti mazgu agha ghakafuma kwa Ciuta kumulangura kuti wajure Baibolo na kuŵazga lemba ilo wadankhenge kuwona.

Kasi muli kupulikapo ŵanthu ŵakuyowoya kuti para ŵasangana na suzgo ŵakulomba kwa Ciuta na kujura Baibolo palipose apo ladankha kujulika, uku ŵakugomezga kuti vesi lakwamba ilo ŵajurenge liŵawovwirenge kuzizipizga suzgo lawo? Nangauli iwo ŵangaŵa kuti ŵali na cilato ciwemi, kweni ndimo Ŵakhristu ŵaunenesko ŵakwenera kucitira yayi pakupenja ulongozgi mu Malemba.

Yesu wakasimikizgira ŵasambiri ŵake kuti wazamuŵatumira “movwiri, mzimu utuŵa.” Wakalutizga kuti: “Iwo uwu, uzamumusambizgani vinthu vyose na kumukumbuskani vinthu vyose ivyo namuphalirani.” (Yoh. 14:26) Mwakupambana na fundo iyi, ŵanthu awo ŵakujura Baibolo palipose apo lajulika ŵakughanaghanapo yayi fundo za mu Malemba.

Kaluso aka na maluso ghanyake gha kucita mayere na Baibolo vyazara comene. Ndipouli, Mazgu gha Ciuta ghakukanizga kuwukwa panji kucita maula. (Lev. 19:26; Dute. 18:9-12; Mil. 19:19) “Mazgu gha Ciuta ngamoyo na ghankhongono,” kweni tikwenera kuŵa ŵaluso pakughagwiliskira nchito. Para ŵanthu ŵalimanya makora Baibolo kwambura kuligwiliskira nchito mwamayere, ŵakovwirika kuti ŵasinthe umoyo wawo. Cifukwa ca kulimanya makora Baibolo ŵanthu ŵanandi ŵaŵa na makhaliro ghawemi, ŵakana nthowa ziheni, ŵakhozga mbumba zawo, ndipo ŵaŵa paubwezi na Mweneko wa Baibolo.

[Cithuzithuzi pa peji 3]