Umo Tingacitira Kuti Tilutilire Kuŵa “Ŵakupanjwa”

“Nkhumuciskani nga mbalendo na ŵakupanjwa kuti muziŵizgenge makhumbiro ghathupi.”—1 PET. 2:11.

KASI MUNGAZGORA WULI?

Cifukwa wuli tingati ŵakuphakazgika mbakupanjwa?

Kasi ŵa “mberere zinyake” mbakupanjwa pa fundo wuli?

Kasi ni vinthu wuli ivyo imwe mukulindilira mwakunweka ivyo vizenge munthazi?

1, 2. Kasi Petrosi wakayowoyanga vya anjani apo wakayowoya lizgu lakuti “ŵakusoleka,” ndipo cifukwa wuli wakaŵacema kuti “ŵakupanjwa”?

 PAKATI pajumpha vyaka 30 kufuma apo Yesu wakakwelera kucanya, mpositole Petrosi wakalemba kalata ku ‘ŵakupanjwa, awo ŵakambininikira ku Ponto, Galatiya, Kapadokiya, Asiya, na Bitiniya, ku ŵakusoleka.’ (1 Pet. 1:1) Pakuyowoya lizgu lakuti “ŵakusoleka,” Petrosi wakayowoyanga vya awo ŵakaphakazgika na mzimu utuŵa nga ndiyo na ‘kupika kubabika kuphya kuti ŵaŵe na cigomezgo camoyo’ ca kukawusa na Khristu kucanya. (Ŵazgani 1 Petrosi 1:3, 4.) Kweni cifukwa wuli pamanyuma wakacema ŵakusoleka aŵa kuti “mbalendo na ŵakupanjwa”? (1 Pet. 2:11) Ndipo kasi mazgu agha ghakung’anamuraci kwa ise mazuŵa ghano apo Ŵakaboni ŵacoko waka ndiwo ŵakuti mbakuphakazgika?

² Cikaŵa cakwenelera kuyowoya kuti ŵakuphakazgika ŵa mu nyengo ya Ŵakhristu ŵakwambilira “mbalendo na ŵakupanjwa.” Nga ni umo viliri na Ŵakhristu ŵakuphakazgika awo ŵacali ŵamoyo mazuŵa ghano, ŵakuphakazgika aŵa ŵakakhalapo nyengo yitali yayi pa caru. Mpositole Paulosi, iyomwene pakuŵa yumoza wa ŵakuphakazgika ŵa “kamskambo kacoko,” wakalongosora kuti: “Kweni ise, wenekaya withu uli kucanya, ku malo gheneagho tikulindilira mwakunweka mponoski, Fumu Yesu Khristu.” (Luka 12:32; Fil. 3:20) Pakuwona kuti “wenekaya [wawo] uli kucanya,” pa nyengo ya nyifwa yawo, ŵakuphakazgika ŵakuvileka vinthu vya pa caru capasi, na kuwuskikira ku umoyo wambura kufwa kucanya. (Ŵazgani Ŵafilipi 1:21-23.) Ntheura iwo ŵangazunulika nadi kuti “ŵakupanjwa” pa caru capasi ico cili mu nkhongono za Satana.

3. Kasi ni fumbo wuli lakukhwaskana na “mberere zinyake” ilo likuŵapo?

³ Kweni wuli pakuyowoya za ŵa “mberere zinyake”? (Yoh. 10:16) Asi ŵali na cigomezgo ca mu Malemba ca  kukhala kwamuyirayira pa caru capasi? Nadi, ici ndico cizamuŵa cikaya cawo kwamuyirayira. Ndipouli, pa nyengo yasono nawo ŵangayowoyeka kuti mbakupanjwa. Mbakupanjwa wuli?

“CILENGIWA COSE CIKULUTILIRA KUTAMPHA”

4. Kasi ŵalongozgi ŵa caru ŵatondeka kulekeska vici?

⁴ Apo mgonezi uheni wa Satana uwu ucalipo, waliyose, na Ŵakhristu wuwo, walutilirenge kutambura na masuzgo agho ghali kuŵapo cifukwa cakuti Satana wali kugalukira Yehova. Pa Ŵaroma 8:22, tikuŵazga kuti: “Tikumanya kuti cilengiwa cose cikulutilira kutampha pamoza na kuŵa mu vyakuŵinya pamoza mpaka sono.” Ŵalongozgi ŵa caru, ŵasayansi, ndiposo ŵakuwona vya wanangwa wa ŵanthu, nangauli ŵakuyezgayezga, kweni ŵatondeka kulekeska ivi.

5. Kwambira mu 1914, kasi ŵanthu ŵanandi ŵacita vici, ndipo cifukwa wuli?

⁵ Kwambira mu 1914, ŵanthu ŵanandi ŵasankha kujilambika kwa Themba ilo Ciuta wali kwimika, ilo ni Khristu Yesu. Ŵalije khumbo la kuŵa ku cigaŵa ca caru ca Satana. Ŵakukana kukhozgera caru ca Satana. M’malo mwake, ŵakugwiliskira nchito umoyo wawo na katundu wawo kukhozgera Ufumu wa Ciuta, na kucita ivyo ukukhumba.—Rom. 14:7, 8.

6. Cifukwa wuli tingayowoya kuti Ŵakaboni ŵa Yehova mbalendo?

⁶ Nadi, Ŵakaboni ŵa Yehova ŵakukhala mu vyaru vyakujumpha 200, ndipo ŵakupulikira comene malango gha mu vyaru ivyo, kweni vilije kanthu kuti ŵakukhala nkhu, iwo ŵali nga mbalendo. Ŵakulutilira kuleka kunjilirapo pa ndyali na pa vinthu vinyake vya caru mazuŵa ghano. Nanga ni sono nthena, ŵakujiwona kuti mbenekaya ŵa caru ciphya ico Ciuta wazamuŵapa. Ŵakusangwa kuwona kuti mazuŵa ghawo gha kupanjwa mu mgonezi wambura kufikapo ghali pafupi kumara.

7. Kasi ŵateŵeti ŵa Ciuta ŵazamukhala wuli kwamuyirayira, ndipo ŵazamukhala nkhu?

⁷ Sonosono apa Khristu walongorenge mazaza ghake kuti waparanye mgonezi uheni wa Satana. Boma lakufikapo la Khristu lizamuwuskapo kwananga na citima. Lizamuwuskapo waliyose uyo wakugalukira muwuso wa Yehova. Ŵateŵeti ŵakugomezgeka ŵa Ciuta ŵazamukhala kwamuyirayira mu Paradiso pa caru capasi. (Ŵazgani  Uvumbuzi 21:1-5.) Ntheura pa nyengo iyi cilengiwa “cizamufwatukaso ku wuzga wa kuvunda na kuŵa na wanangwa waucindami wa ŵana ŵa Ciuta.”—Rom. 8:21.

KASI ŴAKHRISTU ŴAUNENESKO ŴAKWENERA KUCITA WULI VINTHU?

8, 9. Longosorani ico Petrosi wakang’anamuranga pakuyowoya kuti “muziŵizgenge makhumbiro ghathupi.”

⁸ Petrosi wakalongosora ivyo Ŵakhristu ŵakwenera kucita apo wakayowoya kuti: “Ŵakutemweka, nkhumuciskani nga mbalendo na ŵakupanjwa kuti muziŵizgenge makhumbiro ghathupi. Makhumbiro gheneagha, ndigho ghakulimbana na umoyo.” (1 Pet. 2:11) Ulongozgi uwu pakwamba ukalutanga ku Ŵakhristu ŵakuphakazgika, kweni ukugwiraso nchito ku mberere zinyake za Yesu.

⁹ Makhumbiro ghanyake para ghakhorweskeka mu nthowa iyo Mlengi wakukhumba, ngaheni yayi pa igho ghekha. Nakuti nagho ghakovwira kuti munthu waŵe wakukondwa. Mwaciyelezgero, pali makhumbiro ghawemi nga nkhurya cakurya cakunowa na kumwa, kucita milimo yinyake, ndiposo kusangwa na ŵabwezi ŵawemi. Kweniso nchakawiro kuŵa na khumbo la kugonana na munyithu wa mu nthengwa ndipo nchakwenelera. (1 Kor. 7:3-5) Kweni Petrosi wakayowoyanga vya “makhumbiro ghathupi” agho “ghakulimbana na umoyo.” Kuti fundo ya vesi ili yimanyikwe makora, mu Mabaibolo ghanyake ŵali kulemba mazgu nga ngakuti “khumbo liheni la kugonana” panji “makhumbiro gha kwananga.” Apa vikulongora kuti tikwenera kuwoneseska kuti tileke kuŵa na khumbiro lililose ilo likususkana na cilato ca Yehova ndiposo ilo lingatondeska kuti munthu waŵe paubwezi na Ciuta. Para yayi mbwenu cigomezgo ca Mkhristu ca kuŵa wamoyo cingaŵa pa ngozi.

10. Kasi ni nthowa wuli zinyake izo Satana wakugwiliskira nchito kuti wakore Ŵakhristu kuti ŵaŵe ku cigaŵa ca caru?

¹⁰ Cilato ca Satana nchakuti wapangiske Ŵakhristu ŵaunenesko kuti ŵaleke kujiwona kuti ‘mbakupanjwa’ mu mgonezi uwu. Vipingo vinyake vya Satana nkhutemwa comene vinthu vyakuthupi, uzaghali, kutemwa malo ghapacanya, maghanoghano ghakuti “ine ndine niŵe pakwamba,” ndiposo kutemwa mtundu withu pera. Nchakuzirwa kumanya kuti ivi ni vipingo vya Satana. Para ise tikuŵikapo mtima kukana makhumbiro ghaheni gha thupi, tikulongora kuti tikukhumba yayi kuŵa ku cigaŵa ca caru ciheni ca Satana. Tikupeleka ukaboni wakuti tili ŵakupanjwa mu caru ici. Ico tikukhumba comene ndiposo kuyezgayezga kuti ticisange nkhuŵa na umoyo wamuyirayira mu caru ciphya ca Ciuta ico muzamuŵa urunji.

MAKHALIRO GHAWEMI

11, 12. Kasi nyengo zinyake ŵanthu ŵakuŵawona wuli ŵalendo, ndipo ni vinthu wuli ivyo ŵanthu ŵangayowoya vyakukhwaskana na Ŵakaboni ŵa Yehova?

¹¹ Petrosi wakalutilira kulongosora ivyo Ŵakhristu “ŵakupanjwa” ŵakwenera kucita. Pa vesi 12 wakati: “Sungilirani makhaliro ghinu ghawemi pakati pa mitundu, kuti mu cinthu ico ŵakumunenani kuti mukucita uheni, ŵapeleke ucindami kwa Ciuta mu zuŵa la kuskolera, cifukwa ca milimo yinu yiwemi yeneiyo iwo mbakaboni ŵakuwona na maso.” Ŵalendo ŵeneawo ŵakupanjwa mu caru ico nchawo yayi, kanandi ŵakuneneka. Cifukwa cakuti ŵakupambana na ŵazengezgani ŵawo, nyengo zinyake ŵakuwoneka nga ni para mbanthu ŵaheni. Vyakuyowoya vyawo, vyakucita vyawo, kavwaliro kawo, ndiposo umo ŵakuwonekera vingaŵa vyakupambana na vya ŵanthu ŵa mu caru ico. Kweni para ŵakucita vinthu viwemi, panji tiyowoye kuti para ŵali na nkharo yiwemi, fundo ziheni zakuti mbakupambana na ŵanyawo zikuŵa zambura malufura.

¹² Mwakuyana waka, Ŵakhristu ŵaunenesko ŵakupambana na ŵazengezgani ŵawo ŵanandi pa vinthu vinyake, nga mpha kayowoyero panji pakusankha  vyakusanguluska. Kavwaliro na kujitozga kwawo kanandi vikuŵapangiska kuti ŵaŵe ŵakupambana na ŵanandi. Ivi vyapangiska kuti nyengo zinyake ŵanthu ŵanyake ŵayowoyenge kuti Ŵakhristu mbaheni. Ndipouli ŵanthu ŵanyake ŵangaŵalumba cifukwa ca nkharo yawo.

13, 14. Kasi vinjeru “vikurunjiskika na milimo yake” pa fundo wuli? Yowoyani ciyelezgero.

¹³ Enya, nkharo yiwemi yingawovwira kuti ŵanthu ŵaleke kutisuska. Yesu, mweneuyo wakagomezgeka kwa Ciuta mwakufikapo, nayo ŵakamupusikizgira. Ŵanyake ŵakamucema kuti “munthu wakutemwa kurya na kumwa vinyo, mubwezi wa ŵakusonkheska msonkho na ŵakwananga.” Ndipouli, unenesko ukaŵa wakuti vinjeru ivyo wakalongora pakuteŵetera Ciuta vikalongora kuti wakaŵa munthu muheni yayi. Yesu wakati: “Vinjeru vikurunjiskika na milimo yake.” (Mat. 11:19) Ndimoso viliri mazuŵa ghano. Mwaciyelezgero, ŵazengezgani ŵanyake ŵakuwona kuti nchacilendo kuti ŵabali na ŵadumbu ŵakuteŵetera pa Beteli ku Selters, ku Germany. Kweni pakukhozgera Ŵakhristu aŵa, meya wa msumba uwu wakayowoya kuti: “Ŵakaboni awo ŵakuteŵetera pa malo agha ŵakukhala umoyo wawo na wawo, kweni umo ŵakukhalira ŵakutimbanizga ŵanji yayi mu msumba.”

¹⁴ Ivyo meya uyu wakayowoya vikuyana waka na ivyo khoti linyake likadumura sonosono apa pa nkhani ya Ŵakaboni ŵa Yehova awo ŵakukhala mu msumba wa Moscow, ku Russia. Ŵakaŵapusikizgira kuti ŵakacitanga vinthu vinandi viheni. Kufuma apo, mu Juni 2010, mphara ya European Court of Human Rights mu Strasbourg, ku France, yikadumura kuti: “Khoti lasanga kuti msumba wa [Moscow] ukaŵabudira ŵakudandawura cifukwa ca kuŵaswera wanangwa wawo wa kusopa na wa kuwungana na ŵanyawo. Makhoti gha mu caru ici ghakatondeka kupeleka vifukwa ‘vyakupulikikwa’ kuti ghalongore kuti ŵakudandawura” ŵakaŵa na mulandu, mwaciyelezgero, wa kumazga nthengwa, wa kukhuŵilizga kuti ŵanthu ŵajikomenge, panji wa kukanizga ŵanthu kupokera munkhwala. Ntheura, “ivyo makhoti gha mu caru ici ghakadumura vikalongora kuti ngankhaza comene pakuti ghakatondeka kughanaghana makora pa nkhani ya malango gha mu caru ici, ndipo mwambura kupwelerako cilato ico ŵakakhumbanga kufiska, kweni ŵakacita makora cara.”

KUJILAMBIKA MWAKWENELERA

15. Kasi Ŵakhristu ŵaunenesko pa caru cose capasi ŵakulondezga fundo wuli ya mu Baibolo?

¹⁵ Ŵakaboni ŵa Yehova mu Moscow, ndiposo pa caru cose, ŵakufiska ivyo vikukhumbikwa kuti munthu waŵe Mkhristu, vyeneivyo Petrosi wakayowoya. Iyo wakalemba kuti: “Cifukwa ca Fumu, jilambikani ku cilicose cakulengeka na ŵanthu: kwali kwa themba pakuŵa mulara panji ku ŵakazembe.” (1 Pet. 2:13, 14) Nangauli ŵali cigaŵa ca caru ciheni yayi, Ŵakhristu ŵaunenesko ŵakujilambika ku ŵamazaza ŵa boma “mu malo ghawo,” nga ni umo Paulosi wakaŵalongozgera.—Ŵazgani Ŵaroma 13:1, 5-7.

16, 17. (a) Kasi nchivici ico cikulongora kuti ise tikulimbana na boma yayi? (b) Kasi ŵalongozgi ŵanyake ŵandyali ŵali kuyowoya vici?

 ¹⁶ Para Ŵakaboni ŵa Yehova ŵakucita vinthu nga ‘mbakupanjwa’ mu mgonezi uwu, ŵakucita ntheura nga mbakususka boma ŵapasipasi yayi, nesi kunena ŵanthu. Iwo ŵakususka ŵanthu yayi pa ivyo ŵakusankha pa ndyali na vinyake. Ŵakaboni ŵa Yehova ŵakupambana na visopa vinyake, iwo ŵakunjilirapo yayi pa ndyali. Ŵakuphalira yayi mawupu fundo za kendeskero kawemi ka vinthu zakuti ŵakaphalire boma. Vingacitika yayi kuti ŵatimbanizge mtende wa ŵanthu panji kucita vinthu vyakuti viwiske boma.

¹⁷ Ŵakhristu ŵaunenesko ŵakupulikira ŵalara ŵa boma mwakukolerana na ulongozgi wa Petrosi wakuti “mucindikenge themba,” ndipo pakucita nthena ŵakulongora nchindi izo zikwenelera maudindo gha ŵanthu aŵa. (1 Pet. 2:17) Nyengo zinyake, ŵalara ŵa boma ŵakuyowoya kuti ŵalije vifukwa vyakufipira mtima na Ŵakaboni ŵa Yehova. Mwaciyelezgero, munthu munyake wandyali ku Germany zina lake Steffen Reiche, uyo kale wakaŵa nduna ya boma mu Brandenburg ndiposo uyo wakazakaŵa mwimiliri wa mphara ya malango ku Germany, wakati: “Ŵakaboni ŵa Yehova mu misasa na mu majele ŵakalongora kuti ŵali na nkharo yiwemi iyo pa nyengo yasono na kale wuwo njakuzirwa comene mu caru ca demokilase. Ŵakakhwima mtima apo ŵakasuzgikanga na ŵasilikari ŵa Nazi ndiposo ŵakacitiranga lusungu ŵakayidi ŵanyawo. Pakuwona nkhaza izo zikucitikira ŵalendo na ŵanthu ŵa cipani cinyake panji ŵakususka, munthu waliyose mu caru cithu wakwenera kuŵa na nkharo yiwemi iyi.”

UMO TIKULONGOLERA CITEMWA

18. (a) Cifukwa wuli nchakawiro kwa ise kuŵa na citemwa pa ŵabali wose mu cipulikano? (b) Kasi ŵanji awo Mbakaboni yayi, ŵayowoya vici?

¹⁸ Mpositole Petrosi wakalemba kuti: “Muŵe na citemwa pa ŵabali wose mu cipulikano, mopenge Ciuta.” (1 Pet. 2:17) Ŵakaboni ŵa Yehova ŵakopa kukwiyiska Ciuta, ndipo ici cikuŵaciska kuti ŵacite makora khumbo lake. Ŵakukondwa kuteŵetera Yehova mu ubali wa pa caru cose uwo uli na ŵabali na ŵadumbu awo ŵali na khumbo limoza. Ntheura nchakawiro kwa iwo kuti ŵaŵe “na citemwa pa ŵabali wose mu cipulikano.” Citemwa ici, ceneico nchakusoŵa mazuŵa ghano pakati pa ŵanthu ŵaheni, nyengo zinyake cikuŵazizika ŵanthu awo Mbakaboni yayi. Mwaciyelezgero, munthu munyake uyo wakulongozga ŵalendo pakuwona malo mweneuyo wakugwira nchito ku kampani ya vya maulendo ya ku America, wakazizwa na citemwa ndiposo wovwiri uwo Ŵakaboni awo ŵakaŵa ŵeneco cikaya ŵakapeleka ku ŵalendo pa ungano wa mitundu yose wa mu 2009 ku Germany. Iyo wakayowoya kuti kwambira kale pa nchito yake ya kulongozga ŵanthu ŵakuwona malo, wandawonepo citemwa canthena ici. Pamasinda, Kaboni munyake wakati: “Pakuyowoya vinthu vyose vyakukhwaskana na ise wakaŵa wakuzizwa comene ndipo wakayowoyanga na mtima wake wose.” Kasi namwe muli kupulikapo ŵanthu awo ŵakawona Ŵakaboni ŵa Yehova pa ungano uwo imwe mukaŵapo ŵakuyowoya mazgu ghakuyana na agha?

19. Kasi tikwenera kuŵikapo mtima kucita vici, ndipo cifukwa wuli?

¹⁹ Mu nthowa izo zalongosoreka pacanya apa, na zinyake zinandi, Ŵakaboni ŵa Yehova ŵakulongora kuti ‘mbakupanjwa’ nadi mu mgonezi uwu wa Satana. Ndipo ŵaŵikapo mtima kuti ŵalutilire kuŵa ŵakupanjwa ndipo ŵakucita nthena mwakukondwa. Cigomezgo cawo cakuti sonosono apa ŵazamukhala kwamuyirayira mu caru ciphya ca Ciuta umo muzamuŵa urunji nchakukhora ndiposo cili na malufura ghakukhora. Kasi imwe mukulindilira mwakunweka yayi kuti muzakakhale mu caru ciphya?

[Mafumbo]

[Cithuzithuzi pa peji 19]

[Cithuzithuzi pa peji 20]

Tikufwilirapo yayi kuti titeŵetere caru ca Satana. Ise tikukhozgera caru ciphya ca Ciuta

[Cithuzithuzi pa peji 22]

Unenesko wa mu Baibolo wawovwira kuti mbumba ya ku Russia iyi yambe kutemwana