YESU wakati palije libwe la tempile la Yehova ilo lizamulekeka pacanya pa libwe linyake. Ucimi uwu ukafiskika apo ŵasilikari ŵa Romu mwakulongozgeka na Tito ŵakabwangandura Yerusalemu mu 70 C.E. (Mat. 24:2) Nyengo yikati yajumphapo, Themba Julian likakhumbanga kuzengaso tempile ili.

Julian wakacemekanga kuti themba laumaliro la Romu lambura kusopa Ciuta. Mwana uyu wa mubali wa Constantine Mukuru, wakasambizgika masambiro agho ŵakuti Ngacikhristu. Kweni mu 361 C.E., apo wakapharazgikira kuti ni themba wakakana masambiro agha na Cikhristu cautesi ico cikaŵako mu nyengo yake ndipo wakamba kutemwa ŵanthu ŵambura kusopa. Mabuku gha mdauko ghakuti iyo wakaŵa “wakugaluka.”

Julian wakacitinkha comene Cikhristu. Cifukwa cimoza cikwenera kuŵa cakuti apo wakaŵa na vyaka vinkhondi na cimoza wakawona ŵimiliri ŵa Cikhristu ŵakukoma awiske na ŵabali ŵake ŵanyake. Mwakuyana na ivyo ŵanthu ŵakumanya mdauko wa chalichi ŵakuyowoya, Julian wakakhuŵilizganga Ŵayuda kuti ŵazengeso tempile lawo. Wakagomezganga kuti ivi vilongorenge kuti Yesu wakaŵa nchimi yitesi. a

Fundo yakuti Julian wakakhumbanga kuzengaso tempile njaunenesko nadi. Ŵakumanya mdauko ŵakususkana usange wakambapo kuzengaso tempile ili, ndiposo usange wakambapo, nchivici ico cikapangiska kuti mulimo uwu ulekeke. Ndipouli, cinthu cimoza ico cikapangiska kuti mulimo uwu ulekeke nchakumanyikwirathu. Julian wakakomeka pambere pandajumphe vyaka viŵiri kufuma apo wakimikikira kuŵa themba, ndipo mulimo wake wa kuzengaso tempile ukafwa nayo.