Mungakana yayi kuti Yesu wakaŵa Msambizgi waluso kuluska wose awo ŵali kuŵako pa caru capasi. Mukwenera kuti muli kuyezgapo kusambizga nga umo Yesu wakasambizgiranga, comenecomene pa umo wakafumbiranga mafumbo na umo wakayowoyeranga ntharika. Ndipouli, kasi muli kuwona kuti kanandi wakayowoyanga mazgu ghakupambaniska vinthu pakusambizga?

Ŵanthu ŵanandi ŵakupambaniska vinthu para ŵakuyowoya. Namwe mukwenera kuti mukucita nthena, ndipo kanandi mwaŵeneko mukumanya cara. Mungayowoya kuti, “Ŵanguti vipambi vyose ni vyakuphya; kweni ivi vicali viŵisi.” Panji mungati, “Pakwamba wakaŵa mwana wasoni comene, kweni sono ngwakucenjera.”

Pa nkhani nga ni izi, cakwamba mukuyowoya dankha fundo panji ghanoghano; kufuma apo, mukuyowoya mazgu ghakupambaniska vinthu. Pambere mundayowoye mazgu ghakupambaniska vinthu, mukuyowoya dankha mazgu nga ghakuti kweni, ndipouli, panji m’malo mwake. Panji mungapambaniska vinthu mwa kusazgirako fundo zinyake. Para mukuyowoya mu nthowa iyi, ivyo mukuyowoya vikupulikikwa mwakawiro, ndipo vingawovwira ŵanji kuti ŵapulikiske ivyo mukuyowoya.

Nanga ni para mu viyowoyero vinyake ŵakuyowoya viŵi yayi mazgu ghakupambaniska vinthu, kweni tingacita makora kumanya kuzirwa kwa mazgu agha. Cifukwa wuli? Cifukwa mu Mazgu gha Ciuta, mazgu agha ghalimo ghanandi. Yesu wakayowoya mazgu ghakupambaniska vinthu kanandi waka. Kumbukani mazgu agha, ghakuti: “Ŵanthu ŵakukozga nyali na kuyiŵika kusi ku cidunga cakupimira cara, kweni pa cakuŵikapo nyali.” “Nkhizira kuzakaparanya [Dango] cara, kweni kufiska.” “Mukapulika kuti kukayowoyeka, ‘Ungacitanga uleŵi cara.’ Kweni ine nkhumuphalirani kuti waliyose uyo wakulutilira kulaŵiska mwanakazi . . . ” “Kukayowoyeka, ‘Jiso pa jiso ndipo jino pa jino.’ Ndipouli, ine nkhumuphalirani kuti: Ungalimbananga na uyo ni muheni cara; kweni yose uyo wakukupamantha pa thama lako lamalyero, uzgolereso linyake kwa iyo.”—Mat. 5:15, 17, 27, 28, 38, 39.

Mu mabuku ghanyake gha mu Baibolo namo muli mazgu ghakupambaniska vinthu. Ghangamovwirani kuti mupulikiske fundo, ndiposo ghakudidimizga nthowa yiwemi yakucitira cinthu cinyake. Usange ndimwe mupapi, ghanaghaniranipo pa mphambano iyi: “Imwe ŵawiskewo, mungakwiyiskanga ŵana ŵinu cara, kweni lutilirani kuŵalera mu kulanga na kuŵasambizga maghanoghano gha Yehova.” (Efe. 6:4) Mpositole Paulosi walembenge waka kuti dada panji mama wakwenera kulera mwana mu kulanga kwa Ciuta, mphanyi napo wakalemba makora kweniso mphanyi wakaneneska. Ndipouli, fundo yapulikikwa makora comene na mazgu ghakupambaniska vinthu, ghakuti, “mungakwiyiskanga ŵana ŵinu cara, kweni lutilirani kuŵalera mu kulanga na kuŵasambizga maghanoghano gha Yehova.”

Mu cipaturo cenecici, Paulosi wakalemba kuti: “Tikulimbana na ndopa na thupi cara, kweni na . . . mawumba gha mizimu yiheni mu malo ghakucanya.” (Efe. 6:12) Mazgu ghakupambaniska vinthu agha ghakutovwira kupulikiska kuti nkhondo yithu njikuru comene. Nkhondo iyi nja  kulimbana na ŵanthu yayi, kweni na mawumba gha mizimu yiheni.

Mu buku lenelili la Ŵaefeso, muli mavesi ghanyake ghanandi agho ghali na mazgu ghakupambaniska vinthu agho Paulosi wakalemba. Para tingaghanaghanirapo pa mazgu agha, tingawovwirika kuti tipulikiske fundo ya Paulosi na kumanya ico tikwenera kucita.

Para mungasanda chati ico cili pa peji 4 na 5, ceneico cili na mazgu ghakupambaniska vinthu agho ghali mu Ŵaefeso cipaturo 4 na 5, mukondwenge comene kweniso muwonenge kuti nchakuzirwa kusanda chati ici. Apo mukuŵazga mazgu ghakupambaniska vinthu agha, ghanaghanirani umo ghakukhwaskira vyakucita vinu. Jifumbani kuti: ‘Kasi ine vinthu nkhuviwona wuli? Kasi nkhucita wuli pa nkhani iyi panji yinyake yakuyanako na iyi? Kasi nchigaŵa nchini ca mazgu ghakupambaniska vinthu agha, ico ŵanji ŵakuwona kuti cikwimira ivyo ine nkhucita?’ Usange mwamanya kuti mazgu ghakupambaniska vinthu ghalongora kuti pali cinthu cinyake ico mukwenera kusintha, mbwenu sinthani. Wovwirikani na mazgu ghakupambaniska vinthu agha.

Panji mungasambira chati ici pa Nyengo Yakusopera ya Mbumba. Cakwamba, mose mu mbumba mungaŵazga mazgu ghose ghakupambaniska vinthu. Kufuma apo, yumoza wangazunura cigaŵa cakwamba ca mazgu ghakupambaniska vinthu, na kupeleka mpata ku ŵanji kuti ŵakumbuke na kuyowoya fundo iyo yili mu cigaŵa caciŵiri. Ici cingaŵa cidumbirano cakukondweska comene ico cingamovwirani kuwona umo mungalondezgera mwakukwana fundo ya mu cigaŵa caciŵiri. Nadi, para mungasanda mazgu ghakupambaniska vinthu mu nthowa iyi, movwirikenge kuti muŵe na mikhaliro yiwemi mu mbumba na kunyake kulikose.

Apo mukumanya kuzirwa kwa mazgu ghakupambaniska vinthu, ciŵenge cipusu kughamanya mu Baibolo, ndipo muwonenge kuti ngakovwira comene mu upharazgi. Mwaciyelezgero, mungayowoya kwa mweneko wa nyumba kuti: “Ŵanthu ŵanandi ŵakuti munthu waliyose wali na mzimu uwo ukuleka kufwa, kweni wonani ivyo Mazgu gha Ciuta ghakuyowoya pa vesi ili.” Panji pa sambiro la Baibolo mungafumba kuti: Ŵanthu ŵanandi mu cigaŵa ici ŵakugomezga kuti Ciuta na Yesu ni munthu yumoza; kweni kasi Baibolo layowoya vici? Kasi imwe mukugomezga vici pa nkhani iyi?”

Nadi, mu Malemba muli mazgu ghanandi ghakupambaniska vinthu agho ghangatisambizga na kutovwira kwenda mu nthowa ya Ciuta. Nase tingayowoya mazgu ghakupambaniska vinthu kuti tovwire ŵanji kumanya unenesko wa mu Baibolo.