Filimu yinyake yikulongora ivyo vikacitikanga pa umoyo wa ŵanthu wa zuŵa na zuŵa ku San Francisco, U.S.A., kukwambilira kwa vyaka vya m’ma 1900. (A Trip Down Market Street) Awo ŵakapanga filimu iyi, ŵakakakilira kamera yawo kunthazi kwa galimoto ndipo ŵakajamburanga vinthu ivyo vikacitikanga mu msewu wa mu msumba uwu. Filimu iyi yikulongora magaleta ghakuguzika na mahaci, magalimoto gha pa nyengo iyo, ŵanthu ŵakugura malonda na ŵanyamata ŵakuguliska manyuzipepara.

Cakucitiska citima comene nchakuti, filimu iyi yikwenera kuti yikajambulika mu Epulero 1906, kukati kwakhala mazuŵa ghacoko waka kuti cindindindi na moto ivyo vikakoma ŵanthu ŵanandi pa Epulero 18, vicitike. Cindindindi na moto vikananga cigaŵa cikuru ca tawuni iyi. Ŵanthu ŵanyake awo ŵakuwoneka mu filimu iyi ŵakakhala na umoyo mazuŵa ghacoko waka ŵakati ŵajambulika. Scott Miles, mwana wa yumoza wa ŵanthu awo ŵakapangako filimu iyi wakati: “Ŵanthu awo ŵakuwoneka mu filimu iyi ŵakamanyanga yayi ico cikaŵa pafupi kuŵawira. Ndipo para ukuŵawona citima cikukukora waka.”

Para tikuyaniska ivyo vikacitika mu msumba uwu na ivyo vicitikenge mu mazuŵa ghithu ghano, tikuciskika kuti tighanaghanirepo comene. Nase tikuŵacitira citima ŵazengezgani ŵithu. Ŵakucita milimo yawo ya zuŵa na zuŵa kwambura kumanya kuti ŵakumanenge na suzgo sonosono apa. Suzgo iyi nkhuparanyika kwa mgonezi uheni uwu na mikhaliro yawo yiheni. Ndipouli, mwakupambana na cindindindi ico cikiza mwamabuci, pali nyengo yifupi comene yakuti ticenjezgere ŵazengezgani ŵithu vya zuŵa la Yehova la ceruzgo. Mukwenera kuti mukupatura nyengo yakulutira mu upharazgi wa ku nyumba na nyumba sabata yiliyose. Kweni citani vinandi pakucenjezga ŵanji.

Yesu nchiyelezgero ciwemi comene cifukwa cakuti wakalekapo yayi kupharazga. Wakapharazgiranga waliyose uyo wakumana nayo, kwali waŵe wamusonkho munthowa, panji mwanakazi pa cisimi apo wakapumuranga muhanya. (Luka 19:1-5; Yoh. 4:5-10, 21-24) Nanga ni para Yesu wapatura nyengo yakuti wapumure, wakasidanga vyakukhumba vyake kuti wasambizge ŵanji. Wakapharazganga comene cifukwa cakuti wakaŵacitiranga ciwuravi ŵanthu. (Mrk. 6:30-34) Kasi mazuŵa ghano tikulondezga wuli mwamphu wa Yesu?

Melika wakukhala mu nyumba iyo yili na civikiliro cikuru comene. Ŵazengezgani ŵake ŵanandi mbana ŵa sukulu ŵakufuma ku vyaru vya kuwaro, awo mazina na manambara ghawo gha foni ghandalembeke mu  buku la manambara gha foni ilo lili pa malo ghakupokelerapo ŵalendo. Wakuwona kuti ni mwaŵi wapadera kupharazgira ŵazengezgani ŵake para ŵali pa malo ghakupokelerapo ŵalendo, kweniso para ŵakwera mu cikepi. Iyo wakati: “Nkhuwona kuti ici nchigaŵa cane cakupharazgako.” Melika wakuyegha mabuku gha viyowoyero vinandi, ndipo ŵanandi ŵakupokera mathirakiti na magazini. Kweniso wakuŵaphalira kuti ŵangajura Webusayiti yithu ya jw.org. Ndipo wali kwambiska masambiro gha Baibolo ghanandi.

Sonia nayo wali maso kupharazgira munthu waliyose. Wakugwira nchito ku cipatala, ndipo wakajiŵikira cilato ca kupharazgira waliyose uyo wakugwira nayo nchito. Cakwamba, wakafwilirapo kuti wamanye dankha ivyo waliyose wakutemwa na ivyo wakusoŵerwa. Kufuma apo, wakalutanga kwa waliyose payekhapayekha kuti wadumbiskane nayo vinthu vyauzimu pa nyengo yakupumura ya muhanya. Kasi cikacitika nchivici? Sonia wakambiska masambiro gha Baibolo ghaŵiri. Kweniso wakukhumba kuti pa nyengo ya kupumura, walutenge pa malo ghakulindizgirapo a dokotala kuti wapharazgirenge awo ŵakulindilira pa malo agha.

Yumoza wa awo ŵakapona cindindindi ca mu 1906 wakati, “cikaŵa cakofya comene kuluska cinyake cilicose ico cikacitikapo mu tawuni iyi.” Kweni sonosono apa, kwizenge zuŵa la kuwezgera nduzga pa “awo ŵakumumanya cara Ciuta,” ilo lizamuŵa lakofya kuluska soka lililose. (2 Tes. 1:8) Yehova wakukhumba kuti ŵanthu ŵasinthe maghanoghano na mitima yawo na kucitapo kanthu pa uthenga wa ceruzgo uwo Ŵakaboni ŵake ŵakupharazga.—2 Pet. 3:9; Uvu. 14:6, 7.

Muli na mwaŵi wa kujura maso gha ŵanthu kuti ŵawone nyengo izo tilimo na kuŵawovwira kuti ŵaleke kudemelera ku makhumbiro ghawo mwakuti ŵapenje Yehova. (Zef. 2:2, 3) Pharazgirani awo mukugwira nawo nchito, ŵazengezgani ŵinu, na awo mukukumana nawo apo mukucita milimo yinu ya zuŵa na zuŵa pa mpata uliwose uwo wasangika. Citani vinandi pakucenjezga ŵanji.