1, 2. (a) Kasi cikucitika nchivici para mberere zikupwelelereka makora? (b) Cifukwa wuli ŵanthu ŵanandi mu nyengo ya Yesu ŵakaŵa nga ni mberere zambura muliska?

 MBERERE zikukura makora para muliska wakuzipwelelera makora. Buku linyake ilo likuyowoya vya kuŵeta mberere likuti: “Mberere zikulwaralwara kweniso muliska wakusanga nazo candulo yayi para zikuleka kupwelelereka makora.” Ndipouli, para mberere zikupwelelereka makora, zikukura makora.

² Kuti mskambo wa Ciuta ukure makora mwauzimu, vikuthemba pa ivyo ŵaliska ŵakucita pakupwelelera mberere yiliyose mu mpingo. Mungakumbuka kuti Yesu wakalengera citima mizinda cifukwa “ŵakaŵa ŵakufyopoka na kujowoleka nga ni mberere zambura muliska.” (Mat. 9:36) Cifukwa wuli ŵakaŵa ŵakufyopoka ndiposo ŵakujowoleka? Cifukwa cakuti ŵanthu awo ŵakaŵa na mulimo wa kuŵasambizga Dango la Ciuta, ŵakaŵa ŵankhaza, ŵakukhwimiska vinthu na ŵapusikizgi. M’malo mwa kovwira na kupwelelera mskambo wawo, ŵalongozgi ŵa cisopa ŵakawuyegheskanga “katundu muzito.”—Mat. 23:4.

3. Kasi ŵalara ŵakwenera kukumbuka vici para ŵakucita mulimo wawo wa uliska?

³ Ntheura, ŵalara mazuŵa ghano ŵali na mulimo ukuru comene. Mberere izo ŵakupwelelera ni za Yehova na Yesu, ndipo Yesu wakati iyo ni “muliska muwemi.” (Yoh. 10:11) Mberere zili ‘kugulika na mtengo’ uwo Yesu wakalipira na “ndopa zakuzirwa.” (1 Kor. 6:20; 1 Pet. 1:18, 19) Yesu wakuzitemwa comene mberere mwakuti wakapeleka umoyo wake cifukwa ca izo. Nyengo zose ŵalara ŵakwenera kukumbuka kuti iwo mbaliska ŵacokoŵacoko, ntheura ŵakwenera kujilambika ku muwuso wa Mwana wa Ciuta, Yesu Khristu, uyo ni “muliska mukuru wa mberere.”—Heb. 13:20.

4. Kasi nkhani iyi yizgorenge mafumbo wuli?

 ⁴ Ipo kasi ŵalara ŵakwenera kucita nazo wuli mberere? Ŵabali na ŵadumbu mu mpingo ŵakuciskika kuti ‘ŵapulikirenge awo ŵakulongozga’ pakati pawo. Ndipo ŵalara ŵakuciskika kuti ŵagege “kucita ufumu pa awo nchiharo ca Ciuta.” (Heb. 13:17; ŵazgani 1 Petrosi 5:2, 3.) Ipo kasi ŵalara ŵangacita wuli kuti ŵalongozgenge kwambura kucita ufumu pa mskambo? Panji tiyowoye kuti, kasi ŵalara ŵangapwelelera wuli mberere kwambura kujumpha mazaza agho Ciuta wali kupeleka kwa iwo?

5. Kasi mazgu gha pa Yesaya 40:11 ghakutisambizga vici za Yehova?

⁵ Pakuyowoya za Yehova, nchimi Yesaya yikati: “Tiwaliskenge mskambo wake nga ndi muliska, tiwawunjike twanamberere mu mawoko ghake, kutupakata pa cipakato cake, ndipo tiwalongozge makoramakora awo ŵali pacanya.” (Yes. 40:11) Mazgu agha ghakulongora kuti Yehova wakupwelelera ŵakulopwa na ŵakusuzgika mu mpingo. Nga umo muliska wakumanyira masuzgo gha mberere yiliyose mu mskambo ndipo wakuŵa wakunozgeka kuzovwira, Yehova wakumanya ivyo mberere yiliyose mu mpingo yikukhumbikwira ndipo ngwakunozgeka kuyiwovwira. Nga umo muliska wakuyeghera kanamberere ako kababika waka, Yehova nayo, uyo ni “Dada wa mtima wacisungusungu,” watovwirenge mu nyengo za masuzgo. Para takumana na ciyezgo cikuru, panji tikukhumbikwira wovwiri wapadera, iyo watisanguluskenge.—2 Kor. 1:3, 4.

6. Pakuŵa muliska wauzimu, kasi mulara wangamuyezga wuli Yehova?

⁶ Ili ni sambiro liwemi comene ilo muliska wauzimu wangasambira kwa Adada ŵithu ŵa kucanya. Nga ni Yehova, wakwenera kumanya masuzgo gha mberere. Para mulara wakumanya masuzgo gha mberere na wovwiri uwo zikukhumbikwira, waŵenge wakunozgeka kuzikhwimiska na kuzovwira mwakwenelera. (Zinth. 27:23) Ntheura, mulara wakwenera kuŵa wakufwatuka na Ŵakhristu ŵanyake. Nangauli wakwenera yayi kunjilirapo pa nkhani zaŵene, mulara wakwenera kuŵikapo mahara pa ivyo vikucitika na kuyowoyeka mu mpingo ndiposo wakwenera kuŵa wakunozgeka “kovwira awo ŵakukhumbikwira wovwiri.”—Mil. 20:35; 1 Tes. 4:11.

7. (a) Kasi ŵaliska ŵakacitanga nazo wuli mberere za Ciuta mu nyengo ya Ezekiyeli na Yeremiya? (b) Kasi tikusambirapo vici pa nchenyo iyo Yehova wakapeleka ku ŵaliska ŵambura kugomezgeka?

⁷ Ghanaghanirani nkharo ya ŵaliska awo Ciuta wakaŵasuska. Mu nyengo ya Ezekiyeli na Yeremiya, Yehova wakacenya awo ŵakaŵa na mulimo wa kupwelelera mberere zake kweni ŵakatondekanga kuzipwelelera makora. Cifukwa cakuti pakaŵavya wakuzilaŵilira, vilwani vikakoranga na kumbininiska mberere. M’malo mwa kulyeska mberere, ŵaliska ŵakazilyeranga masuku pa mutu ndipo ‘ŵakajiliskanga ŵekha.’ (Ezek. 34:7-10; Yer. 23:1) Nchenyo iyo Ciuta wakapa ŵaliska aŵa njakweneleraso ku ŵalongozgi ŵa Cikhristu cautesi. Kweniso yikulongora kuti nchakuzirwa comene kuti ŵalara ŵapwelelerenge makora ndiposo mwacitemwa mskambo wa Yehova.

8. Kasi Yesu wakacita vici kuti wasambizge ŵasambiri ŵake kujiyuyura?

⁸ Cifukwa ca kuwura kufikapo, zinyake mwa mberere za Ciuta zikupulikiska luŵiro yayi ivyo Yehova wakukhumba. Zingacita vinthu mwambura kukolerana na ulongozgi wa mu Malemba, panji zingacita vinthu ivyo vikulongora kuti ni zambura kukhwima  mwauzimu. Kasi ŵalara ŵakwenera kucita nazo wuli? Ŵakwenera kuyezga Yesu uyo wakazikiranga na ŵasambiri ŵake para ŵagazgana pa uyo waŵenge mukuru mu Ufumu. M’malo mwa kuŵakalipira, Yesu wakalutilira kuŵasambizga na kuŵapa ulongozgi mwacitemwa pa nkhani ya kujiyuyura. (Luka 9:46-48; 22:24-27) Yesu wakasambizga ŵasambiri ŵake kujiyuyura apo wakageziska malundi ghawo, ndipo ŵalara ŵakwenera kulongora mukhaliro uwu.—Ŵazgani Yohane 13:12-15; 1 Pet. 2:21.

9. Kasi Yesu wakaciska ŵasambiri ŵake kuti ŵaŵe na nkharo wuli?

⁹ Yesu wakawonanga mulimo wa muliska mwakupambana na umo Yakobe na Yohane ŵakawuwoneranga. Ŵapositole ŵaŵiri aŵa, ŵakakhumbanga udindo wapacanya mu Ufumu. Kweni Yesu wakaŵasuska, wakati: “Mukumanya kuti ŵawusi ŵa mitundu ŵakucita ufumu pa iwo ndipo ŵakuru ŵakucita mazaza pa iwo. Ndimo viliri cara pakati pinu; kweni yose uyo wakukhumba kuŵa mukuru pakati pinu wakwenera kuŵa muteŵeti winu.” (Mat. 20:25, 26) Ŵapositole ŵakeneranga kugega “kucita ufumu” pa ŵanyawo.

10. Kasi Yesu wakukhumba kuti ŵalara ŵacitenge nawo wuli mskambo, ndipo Paulosi nchiyelezgero wuli ciwemi pa nkhani iyi?

¹⁰ Yesu wakukhumba kuti ŵalara ŵacitenge vinthu na mskambo nga umo iyo wakacitiranga. Ŵakwenera kuŵa ŵakunozgeka kuteŵetera ŵanyawo, kucita ufumu pa iwo cara. Mpositole Paulosi wakaŵa wakujiyuyura, cifukwa wakaphalira ŵanalume ŵalara ŵa mpingo wa ku Efeso kuti: “Imwe mukumanya makora umo kufuma pa zuŵa lakwamba ilo nkhakandira mu cigaŵa ca Asiya nkhaŵa namwe nyengo yose, kuteŵetera nga ni muzga wa Fumu na kujicefya kukuru.” Iyo wakakhumbanga kuti ŵalara aŵa ŵafwilirengepo kweniso ŵaŵenge ŵakujiyuyura pakovwira ŵanji. Wakati: “Nalongora kwa imwe mu vinthu vyose kuti na kufukafuka ntheura, mukwenera kovwira awo ŵakukhumbikwira wovwiri.” (Mil. 20:18, 19, 35) Paulosi wakaphalira Ŵakorinte kuti wakaŵa fumu pa cipulikano cawo cara. M’malo mwake, wakaŵa wanchito munyawo kuti iwo ŵaŵe na cimwemwe. (2 Kor. 1:24) Paulosi nchiyelezgero ciwemi ku ŵalara mazuŵa ghano pa nkhani ya kujiyuyura na kulimbikira nchito.

11, 12. Kasi mulara wangamovwira wuli mubali kusankha cakucita?

¹¹ Mulara wakwenera ‘kukoleska mazgu ghakugomezgeka mu kasambizgiro kake.’ (Tito 1:9) Kweni wakucita nthena “mu mzimu wa kuzika.” (Gal. 6:1) M’malo mwa kucicizga ŵanyake mu mpingo kuti ŵacitenge vinthu mu nthowa yinyake, muliska muwemi wauzimu wakucontha mtima wawo. Mulara wangayowoya fundo za mu Malemba zakuti mubali uyo wakukhumba kusankha cakucita pa nkhani yinyake yakuzirwa waghanaghanirepo. Wangadumbiskana nayo fundo za mu mabuku ghithu izo zikukolerana na nkhani iyo. Kweniso wangamuciska mubali kuti waghanaghanirepo pa umo vinthu vyakupambanapambana ivyo wangacita vingakhwaskira ubwezi wake na Yehova. Mulara uyu wangadidimizgapo kuti nchakukhumbikwa kuti mubali uyu walombe dankha kwa Ciuta pambere wandasankhe cakucita. (Zinth. 3:5, 6) Pamanyuma pakuti ŵadumbiskana, mulara walekere mubali mulimo wa kusankha cakucita.—Rom. 14:1-4.

¹² Ŵalaŵiliri ŵakwenera kupeleka ulongozgi wakufuma mu Malemba. Ntheura,  nchakuzirwa kuti ŵagwiliskirenge nchito Baibolo mwaluso na kulondezga ivyo likuyowoya. Para ŵacita nthena, ŵacitenge makora na mazaza ghawo. Nakuti iwo mbaliska ŵacokoŵacoko, ndipo waliyose mu mpingo wazamujipatawulira yekha kwa Yehova na Yesu pa vyose ivyo wakucita.—Gal. 6:5, 7, 8.

13, 14. Kasi mulara wangaŵa ciyelezgero ku mskambo pa nkhani wuli?

¹³ Wati waciska ŵanalume ŵalara mu mpingo kuti ŵaleke “kucita ufumu pa awo nchiharo ca Ciuta,” mpositole Petrosi wakaŵaciska kuti ŵaŵenge “vyakuwonerapo ku mskambo.” (1 Pet. 5:3) Kasi mulara wangaŵa wuli cakuwonerapo ku mskambo? Wonani vinthu viŵiri ivyo munthu uyo “wakunwekera mulimo wa ulaŵiliri” wakwenera kufiska. Wakwenera kuŵa “wamahara” kweniso wakwenera kuŵa uyo “wakulongozga makora ŵamunyumba yake.” Usange mulara wali na mbumba, wakwenera kuyilongozga makora cifukwa “usange munthu wakumanya cara kulongozga ŵamunyumba yake, wangapwelelera wuli mpingo wa Ciuta?” (1 Tim. 3:1, 2, 4, 5) Kuti munthu waŵe wakwenelera kuŵa mulaŵiliri, wakwenera kuŵa wamahara, ico cikung’anamura kuti, wakwenera kupulikiska fundo za Ciuta na kuzilondezga mu umoyo wake. Kweniso ngwakukhazikika mu maghanoghano ndipo wakuphuluphutira yayi pakucita vinthu. Para ŵabali na ŵadumbu ŵakuwona mikhaliro iyi mu ŵalara ŵakuŵagomezga.

¹⁴ Ŵalaŵiliri ŵakupeleka ciyelezgero ciwemi ku Ŵakhristu ŵanyawo para ŵakudangilira pa mulimo wa kupharazga. Pa nkhani iyi, Yesu nchiyelezgero ciwemi comene ku ŵalaŵiliri. Kupharazga makani ghawemi gha Ufumu ukaŵa mulimo wakuzirwa comene pa milimo yose iyo Yesu wakacita pano pa caru capasi. Wakalongora ŵasambiri ŵake umo mulimo uwu ukwenera kucitikira. (Mrk. 1:38; Luka 8:1) Mazuŵa ghano, ŵapharazgi ŵakukhozgeka comene para ŵakupharazgira lumoza na ŵalara kweniso para ŵakuwona mwamphu uwo ŵalara ŵali nawo pa mulimo uwu. Kweniso iwo ŵakusambirako nthowa zakusambizgira. Para ŵalaŵiliri ŵakufwilirapo kupatura nyengo yakupharazgira makani ghawemi nangauli ŵakuŵa ŵakutangwanika, mpingo wose ukuŵa wamwamphu. Kweniso ŵalara ŵangaŵa ciyelezgero ciwemi ku ŵabali para ŵakunozgekera na kuzgorapo pa maungano gha mpingo, kweniso para ŵakucitako milimo yinyake nga nkhutozga na kunozga Nyumba ya Ufumu.—Efe. 5:15, 16; ŵazgani Ŵahebere 13:7.

15. Yowoyani vifukwa vinyake ivyo ŵalara ŵakucitira maulendo gha uliska.

¹⁵ Muliska muwemi wakovwira mwaluŵiro mberere para yapwetekeka panji yalwara. Mwakuyana waka, ŵalara ŵakwenera kovwira mwaluŵiro wose mu mpingo  awo ŵakusuzgika panji ŵakukhumbikwira wovwiri wauzimu. Ŵacekuru na ŵalwari ŵangakhumbikwira wovwiri wakuthupi, kweni ŵakukhumbikwiraso comene wovwiri wauzimu na kukhozgeka. (1 Tes. 5:14) Ŵawukirano mu mpingo ŵangaŵa kuti ŵakulimbana na viyezgo, nga ni “makhumbiro agho ghakwiza na uwukirano.” (2 Tim. 2:22) Ntheura, ŵaliska ŵakwenera kwendera ŵabali na ŵadumbu nyengo na nyengo kuti ŵamanye masuzgo ghawo na kuŵakhwimiska na ulongozgi wakwenelera wa mu Malemba. Para ŵalara ŵakupeleka wovwiri pa masuzgo agha mwaluŵiro, ŵangamazga masuzgo ghanandi pambere ghandakure.

16. Kasi ŵalara ŵangamovwira wuli mubali panji mudumbu uyo wakukhumbikwira wovwiri wauzimu?

¹⁶ Wuli usange masuzgo ghakura comene ndipo ghakuŵika umoyo wauzimu wa mubali panji mudumbu pa ngozi? Yakobe wakati: “Kasi walipo mulwari pakati pinu? Waceme ŵanalume ŵalara ŵa mpingo, ndipo ŵamulombere, kumuphaka mafuta mu zina la Yehova. Ndipo lurombo lwa cipulikano lumucizgenge mulwari, ntheura Yehova wamuwuskenge. Kweniso usange wacita zakwananga, zizamugowokereka.” (Yak. 5:14, 15) Nanga ni para uyo wakulwara mwauzimu ‘wandaŵaceme ŵanalume ŵalara,’ iwo ŵakwenera kumovwira mwaluŵiro para ŵamanya. Para ŵalara ŵakulomba na ŵabali ŵawo, panji kuŵalombera na kuŵawovwira para ŵasuzgika, ŵakulongora kuti mbakusamphuska mwauzimu kweniso mbakukhozga.—Ŵazgani Yesaya 32:1, 2.

17. Kasi cikucitika nchivici para ŵalara ŵakuyezga “muliska mukuru”?

¹⁷ Pa vyose ivyo ŵakucita mu gulu la Yehova, ŵaliska ŵauzimu ŵakufwilirapo kuyezga “muliska mukuru,” Yesu Khristu. Para ŵanalume aŵa ŵakupeleka wovwiri wauzimu, mskambo ukusanga candulo cikuru ndipo ukulutilira kucita makora. Tikuŵawonga comene ŵalara cifukwa ca vyose ivyo ŵakucita, kweniso tikuwonga comene Yehova, uyo ni Muliska mukuru comene.