Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:

Kasi mphawuli apo Yesu ‘wakapharazgira ku mizimu iyo yili mu gadi’? (1 Pet. 3:19)

Vikulongora kuti nyengo yicoko waka Yesu wati wawuskika, wakapharazgira mizimu yiheni kuti cilango cawo cili pafupi.—6/15, peji 23.

Kasi ni masuzgo wuli ghatatu agho ghangapangiska kuti nthengwa yaciŵiri yileke kwenda makora?

Masuzgo agha ni: kusuzgika kuluwirathu nthengwa yakale; kusuzgika kucezga na ŵabwezi ŵinu ŵakale awo mbacilendo kwa uyo mwatorana nayo sono; kusuzgika kumugomezga uyo mwatorana nayo sono para wakwamba wakaŵa wambura kugomezgeka.—7/1, peji 9-10.

Kasi mphawuli apo Yesu wazamweruzgira ŵanthu kuti ni mberere panji mbuzi? (Mat. 25:32)

Pazamuŵa pa suzgo yikuru apo Yesu wazamwizira kuzakeruzga ŵanthu, para cisopa cautesi caparanyika.—7/15, peji 6.

Kasi mphawuli apo ŵanthu awo ŵakucita ucikanamalango ŵeneawo ŵakuzunulika mu ntharika ya tirigu na duru ŵazamulira na kuska mino ghawo? (Mat. 13:36, 41, 42)

Ŵazamucita nthena pa suzgo yikuru para ŵazakamanya kuti ŵangacimbira yayi pharanyiko.—7/15, peji 13.

Kasi mazgu gha Yesu ghakukhwaskana na muzga wakugomezgeka na wakucenjera ghakamba pawuli kufiskika? (Mat. 24:45-47)

Ghakamba kufiskika pa Pentekoste 33 C.E. yayi, kweni caka ca 1914 cikati cajumpha. Mu 1919, muzga wakimikika pa ŵateŵeti ŵa pa nyumba, ŵeneawo Mbakhristu wose awo ŵakulyeskeka mwauzimu.—7/15, peji 21-23.

Kasi mphawuli apo Yesu wazamwimikira muzga wakugomezgeka pa vyake vyose?

Ivi vizamucitika munthazi pa suzgo yikuru, apo muzga wakugomezgeka wazamupokera njombe yake ya kucanya.—7/15, peji 25.

Kasi ŵanthu awo Baibolo likuŵazunura yayi mazina, ndikuti ŵakaŵa ŵaheni panji ŵambura kuzirwa?

Tikwenera kudumura nthena yayi. Baibolo likuzunura yayi mazina gha ŵanthu ŵanji awo ŵakaŵa ŵawemi na ŵanji awo ŵakaŵa ŵaheni. (Ruth 4:1-3; Mat. 26:18) Likuzunura mazina gha ŵangelo ŵakugomezgeka ŵaŵiri pera.—8/1, peji 10.

Padera pa kovwirika na Ciuta, kasi nchivici cinyake ico cikawovwira Ŵakaboni ŵakukwana 230 kuti ŵende ulendo wakufuma ku msasa wakuyuzgirako ŵanthu wa Sachsenhausen?

Nangauli ŵakalopwa cifukwa ca njara kweniso matenda, kweni ŵakalutilira kukhwimiskana yumoza na munyake kuti ŵalutilire kwenda.—8/15, peji 18.

Cifukwa wuli nkhani ya Ŵaisrayeli yakukhwaskana na kwambuka Mlonga wa Yorodani kunjira mu Caru ca Layizgano njakukhozga kwa ise?

Nangauli maji ghakazura mu mlonga uwu, kweni Yehova wakimika maji kuti ŵanthu ŵake ŵambuke. Ici cikwenera kuti cikakhozga cipulikano na cigomezgo cawo mwa iyo, ndipo nase tingakhozgeka na nkhani iyi.—9/15, peji 16.

Cifukwa wuli Baibolo kanandi likuzunura mitundu ya vinthu?

Baibolo likulongora kuti Ciuta wakumanya makora umo ŵanthu ŵakucitira na mawonekero gha cinthu cifukwa ca umo likuzunulira mitundu ya vinthu. Ndipo mtundu ungatovwira kukumbuka vinthu.—10/1, peji 14-15.

Kasi ucimi wa pa Mika 5:5 wakuyowoya vya ŵaliska ndiposo ŵakaronga, ukufiskika wuli mazuŵa ghano?

“Ŵaliska ŵankhondi na ŵaŵiri na ŵakaronga ŵankhondi na ŵatatu” awo ŵakuzunulika pa Mika 5:5 ŵakwimira ŵalara mu mpingo, ŵeneawo ŵakukhwimiska ŵanthu ŵa Ciuta pakunozgekera kuwukilika uko kucitikenge munthazi.—11/15, peji 20.

Cifukwa wuli Ciuta ngwakukhumbikwa kwa ise?

Ciuta wakupeleka ulongozgi wakovwira na mazgoro ghakukhorweska pa mafumbo ghakukhwaskana na masuzgo ghithu. Ndipo ivi ndivyo tikukhumbikwira. Iyo wakukhumba kuti tikhalenge makora kweniso mwakukondwa, ndipo wazamufiska malayizgo agho ghali mu Mazgu ghake kuti ivi vicitike.—12/1, peji 4-6.