1, 2. Cifukwa wuli upusikizgi wazara comene mazuŵa ghano, ndipo ukuthandazgika kwizira mu vici? (Wonani cithuzithuzi cakwamba.)

 UPUSIKIZGI wazara comene mu mgonezi uwu. Ici cikwenera kutizizika yayi. Baibolo likuyowoya kuti Satana Dyabulosi ni mutesi, ndiposo kuti ni muwusi wa mgonezi uwu. (1 Tim. 2:14; 1 Yoh. 5:19) Apo mgonezi uheni uwu uli pafupi kumara, Satana ngwakukwiya comene cifukwa wakumanya kuti wali na “nyengo yifupi.” (Uvu. 12:12) Ntheura, ŵanthu awo ŵakukhuŵilizgika na Dyabulosi ŵalutilirenge kuhenipirahenipira. Ndipo cilato cawo nchakuti ŵapusike awo ŵali mu cisopa caunenesko.

² Mu manyuzipepara, mawayilesi, na ma TV, nyengo zinyake mukuyowoyeka mautesi ghakukhwaskana na ŵateŵeti ŵa Yehova kweniso vigomezgo vyawo. Ŵanthu ŵakugwiliskira nchito manyuzipepara, mapulogiramu ghanyake gha pa TV, na Intaneti kuti ŵathandazge vinthu vyautesi. Ntheura, ŵanthu ŵanyake ŵakutimbanizgika ndipo ŵakugomezgeramo bweka mautesi agha.

3. Kasi nchivici ico cingatovwira kuti tijivikilire ku maupusikizgi gha mulwani?

³ Cakukondweska nchakuti Mazgu gha Ciuta, agho “ngacandulo pa . . . kunyoloska vinthu,” ghangatovwira kuti tijivikilire ku mauryarya gha mulwani. (2 Tim. 3:16) Ivyo mpositole Paulosi wakalemba vikulongora kuti Ŵakhristu ŵanji ŵa mu Tesalonika ŵakapuluskika na kulondezga vinthu vyautesi. Wakaŵalembera kuti: “Muleke kusunkhunyika luŵiro maghanoghano.” (2 Tes. 2:1, 2) Kasi tikusambirapo vici pa ulongozgi wacitemwa wa Paulosi, ndipo tingawulondezga wuli?

4. Kasi Ŵakhristu ŵa mu Tesalonika ŵakacenjezgeka wuli vya “zuŵa la Yehova,” ndipo ise tikucenjezgeka wuli?

⁴ Mu kalata yakwamba iyo wakalembera mpingo wa ku Tesalonika, Paulosi wakazunuramo vya kwiza kwa “zuŵa  la Yehova.” Wakakhumbanga yayi kuti ŵabali ŵake ŵaŵe mu cisi ndiposo kuti ŵaŵe ŵambura kunozgeka. M’malo mwake, wakaŵaciska pakuŵa “ŵana ŵa ungweru” kuti ŵalutilire kuŵa ‘maso na kusungilira maghanoghano ghawo.’ (Ŵazgani 1 Ŵatesalonika 5:1-6.) Mazuŵa ghano tikulindilira kuparanyika kwa Babuloni Mukuru, nyinawo wa cisopa cautesi. Ici cizamulongora kuti zuŵa likuru la Yehova lamba. Cakukondweska nchakuti pa nyengo yasono tikupulikiska comene umo Yehova wakufiskira khumbo lake. Kweniso mu mpingo tikupokera vikumbusko pa nyengo yakwenelera vyeneivyo vikutovwira kuti tilutilire kuŵa maso. Para tikupulikira macenjezgo agha, tiŵikengepo mtima comene kuti ticite ‘uteŵeti wakupatulika pamoza na nkhongono yithu ya kughanaghana.’—Rom. 12:1.

5, 6. (a) Kasi Paulosi wakayowoya vici mu kalata yake yaciŵiri ku Ŵatesalonika? (b) Kasi sonosono apa, Ciuta wacitenge vici kwizira mwa Yesu, ndipo ise tikwenera kujifumba mafumbo wuli?

⁵ Paulosi wakati walemba kalata yakwamba ku Ŵakhristu ŵa ku Tesalonika, wakaŵalemberaso yaciŵiri. Mu kalata iyi, wakazunuramo vya suzgo iyo yikwiza apo Fumu Yesu yizamweruzgira wose “awo ŵakumumanya cara Ciuta na awo ŵakupulikira cara makani ghawemi.” (2 Tes. 1:6-8) Cipaturo caciŵiri ca kalata iyi cikulongora kuti ŵanji mu mpingo uwu ŵakagomezganga kuti zuŵa la Yehova lizenge pa nyengo yeneyira. (Ŵazgani 2 Ŵatesalonika 2:1, 2.) Ŵakhristu aŵa ŵakamanyanga vicoko vyakukhwaskana na umo Yehova wakufiskira khumbo lake, nga umo Paulosi nayo pamasinda wakayowoyera. Iyo wakati: “Tikumanya kwambura kufikapo ndipo tikucima mwambura kufikapo; kweni para ico nchakufikapo ciza, ico nchambura kufikapo cizamumara.” (1 Kor. 13:9, 10) Kweni macenjezgo agho Paulosi, mpositole Petrosi, na ŵabali ŵanji ŵakuphakazgika ŵa mu nyengo yira ŵakalemba, ghakaŵa ghakukwana kuŵawovwira kuti ŵalutilire kuŵa na cipulikano.

⁶ Kuti waŵawovwire, Paulosi wakayowoya mwakukhuŵilizgika na mzimu kuti ŵakugaluka ŵanandi kweniso “munthu uyo nchikanamalango” ŵazamuwoneka pambere zuŵa la Yehova lindize. a Para ivi vyazakacitika, pa nyengo yake yakwenelera, Fumu Yesu ‘yizamuŵazgora ŵawaka’ wose awo ŵapusikika.  Mpositole uyu wakayowoya cifukwa ico ŵazamweruzgikira, wakati, “ŵakazomera cara kutemwa unenesko.” (2 Tes. 2:3, 8-10) Ipo tikwenera kujifumba kuti: ‘Kasi ine nkhuwutemwa comene unenesko? Kasi nkhusambira magazini na mabuku ghanyake ghakulongosora Baibolo kuti nimanye kapulikiskiro kasono ka visambizgo vya mu Baibolo?’

7, 8. (a) Kasi Ŵakhristu ŵakwambilira ŵakeneranga kuŵa maso na vici? (b) Kasi Ŵakhristu ŵaunenesko mazuŵa ghano ŵakwenera kuŵa maso comene na vici?

⁷ Padera pa ŵanthu ŵakugaluka na visambizgo vyawo vyautesi, Ŵakhristu ŵakeneranga kukumana na masuzgo ghanyake. Paulosi wakalembera Timote kuti, “kutemwa ndalama ni msisi wa mtundu uliwose wa vinthu vyakupweteka.” Mpositole uyu wakalongora kuti “pakukuzga citemwa ici, ŵanji ŵapuluskika ku cipulikano ndipo ŵajilasa bwekabweka na vyakuŵinya vinandi.” (1 Tim. 6:10) “Milimo ya thupi” nayo yikeneranga kuŵa suzgo nyengo zose.—Gal. 5:19-21.

⁸ Paulosi wakaŵacenjezga comene Ŵatesalonika za ŵanalume ŵeneawo mu buku linyake wakalemba kuti “mbapositole ŵatesi.” Ŵanji mwa ŵanalume aŵa, ŵakayowoyanga “vinthu vyakunyongoloka kuti ŵaguzire ŵasambiri kwa iwoŵene.” (2 Kor. 11:4, 13; Mil. 20:30) Nyengo yikati yajumphapo, Yesu wakawonga mpingo wa ku Efeso cifukwa cakuti ‘ukazizipizganga cara na ŵanthu ŵaheni.’ Ŵaefeso aŵa ‘ŵakayezganga’ ŵanthu awo ŵakaŵa ŵapositole ŵatesi. (Uvu. 2:2) Mu kalata yake yaciŵiri yakuluta ku Ŵatesalonika, Paulosi wakaŵaciska kuti: “Sono tikumulangurani, ŵabali, mu zina la Fumu Yesu Khristu, kuti mufumeko kwa mbali waliyose uyo wakwenda mwambura kwenelera.” Kufuma apo, wakayowoya za Ŵakhristu awo ŵakakhumbanga “cara kugwira nchito.” (2 Tes. 3:6, 10) Usange ŵanthu aŵa ŵakendanga mwambura kwenelera, ipo ŵakugaluka ŵakendanga mwambura kwenelera comene. Nadi, kwendezgana na ŵanthu aŵa yikaŵa ngozi yikuru comene ndipo Ŵakhristu ŵakeneranga kuŵagega. Mazuŵa ghano napo tikwenera kugega ŵakugaluka.—Zinth. 13:20.

9. Cifukwa wuli tikwenera kucenjera usange yunji wamba kuyowoya nkhani zambura maukaboni panji wakususka ivyo gulu likusambizga?

⁹ Suzgo yikuru yili pafupi kucitika ndipo mgonezi uheni uwu uli pafupi kuparanyika, ntheura macenjezgo agho ghakapelekeka mu nyengo yakale ngakuzirwa comene mazuŵa ghano. Tikukhumba yayi ‘kuwinda cilato’ ca lusungu lukuru lwa Yehova na kutondeka kusanga umoyo wamuyirayira, kwali nkhucanya panji pa caru capasi. (2 Kor. 6:1) Usange munthu munyake uyo tikuwungana nayo wakuyowoya nkhani zambura maukaboni, panji wakususka ivyo gulu likusambizga, tikwenera kucenjera nayo comene.—2 Tes. 3:13-15.

10. Kasi Ŵakhristu ŵa mu Tesalonika ŵakaciskika kuti ŵakoleske maluso wuli?

¹⁰ Paulosi wakaciska ŵabali wake mu Tesalonika kuti ‘ŵachinthe’ na kukoleska ivyo ŵakasambira. (Ŵazgani 2 Ŵatesalonika 2:15.) Kasi ni “maluso” wuli agho ŵakasambizgika? Nchakuwonekerathu kuti ni ivyo cisopa cautesi cikasambizganga yayi, vyeneivyo ico cikatenge ni vyakufuma mu Malemba. M’malo mwake, Paulosi wakayowoyanga za visambizgo ivyo iyo na ŵanji ŵakasambizgika na Yesu kweniso ivyo Ciuta wakaphalira mpositole uyu kuti walembe, ndipo visambizgo ivi nchigaŵa ca Malemba ghakupatulika. Paulosi wakawonga ŵabali ŵake mu mpingo wa mu Korinte, apo wakati: “Mu vinthu vyose mukunikumbuka ndipo mukukoleska maluso umo nkhaghapelekera kwa imwe.” (1 Kor. 11:2) Visambizgo ivi vikaŵa vyaunenesko ndipo ŵakeneranga kuvigomezga.

11. Kasi ŵanji ŵakupusikika wuli?

 ¹¹ Mu kalata iyo Paulosi wakalembera Ŵahebere, wakazunuramo nthowa ziŵiri izo zingapangiska kuti cipulikano ca Mkhristu cimare na kutondeka kuchintha. (Ŵazgani Ŵahebere 2:1; 3:12.) Wakayowoya vya “kupatukako” ndiposo “kufumako.” Boti ilo likupatukako lekha ku mtunda na kunjira mu maji, pakwamba likumanyikwa yayi. Kweni pacoko na pacoko, likunjira comene mukati. Ndipouli, para wakwendeska boti wacita kulitutuzgira mu maji ndikuti walifumyako yekha ku mtunda. Viyelezgero ivi vikulongora ivyo vikucitika para munthu wapusikika na kuzomerezga kuti cigomezgo cake mu unenesko cilopwe.

12. Kasi ni vinthu wuli ivyo vingatinanga mwauzimu mazuŵa ghano?

¹² Ivi ndivyo panji vikacitikira Ŵatesalonika ŵanyake. Ise ke? Vinthu ivyo vingatimalira nyengo vyazara comene mazuŵa ghano. Ghanaghanirani unandi wa maora agho munthu wakumalira pa Intaneti, kuŵazga na kuzgora mauthenga gha pa kompyuta panji pa foni, kucita vinthu ivyo wakutemwa, panji pa maseŵero. Vinthu ivi vingatimbanizga Mkhristu na kulopweska mwamphu wake. Kasi nchivici ico cingacitika? Wangaleka kulomba mwakufumira pasi pa mtima, kusambira Mazgu gha Ciuta, ndiposo kuwungana na kupharazga makani ghawemi mwakukhazikika. Kasi tingacita wuli kuti tileke kusunkhunyika luŵiro maghanoghano?

13. Nga umo vikayowoyekerathu, kasi ŵanthu ŵanandi ŵali na maghanoghano wuli, ndipo nchivici ico cingatovwira kuti cipulikano cithu cileke kulopwa?

¹³ Cinthu cimoza ico tikwenera kucita, nkhumanya nyengo iyo tilimo kweniso ivyo vingacitika para tikwendezgana na ŵanthu awo ŵakukana kuti agha ni “mazuŵa gha umaliro.” Mpositole Petrosi wakalemba vyakukhwaskana na nyengo iyi, kuti: “Kwizenge ŵakugoska na kugoska kwawo, ŵakulondezga makhumbiro ghawo na ghawo na kuyowoya kuti: ‘Kasi kuŵapo kwake kwakulayizgika uku kuli nkhu? Cifukwa kufuma mu zuŵa ilo ŵasekuru ŵithu ŵakagonera tulo mu nyifwa, vinthu vyose vikulutilira ntheura pera kufuma pa kwamba kwa cilengiwa.’” (2 Pet. 3:3, 4) Para tikuŵazga Mazgu gha Ciuta zuŵa lililose na kughasambira nyengo zose, tikumbukenge nyengo iyo tilimo, kuti tili mu “mazuŵa gha umaliro.” Ucigaluka uwo ukayowoyekerathu ukamba ni kale comene ndipo ucalipo. “Munthu uyo nchikanamalango” wacalipo ndipo wacali kususka ŵateŵeti ŵa Ciuta. Ntheura, tikwenera kulutilira kukumbuka kuti zuŵa la Yehova lili pafupi.—Zef. 1:7.

14. Cifukwa wuli tikuvikilirika para tikuŵa ŵamwamphu pakuteŵetera Ciuta ?

¹⁴ Cinthu cinyake ico cingatovwira kuti tiŵe maso na kuleka kusunkhunyika, nkhuŵa ŵamwamphu pa mulimo wakupharazga makani ghawemi gha Ufumu. Ntheura, apo Khristu Yesu, Mutu wa mpingo, wakatuma ŵalondezgi ŵake kuti ŵakazgore ŵanthu ŵa mitundu yose kuŵa ŵasambiri, kuŵasambizga kusungilira vinthu vyose ivyo iyo wakaŵasambizga, wakapelekanga ulongozgi wakuti uŵavikilire. (Mat. 28:19, 20) Kuti tilondezge ulongozgi wake uwu, tikukhumbikwira kuŵa ŵamwamphu pa mulimo wa kupharazga. Ghanaghanirani waka, ŵabali ŵa mu Tesalonika ŵakapharazganga na kusambizga mwadango waka. Kumbukani mazgu agho Paulosi wakaŵaphalira, ghakuti: “Mungazimyanga cara moto wa mzimu. Mungayuyuranga cara mazgu gha ucimi.” (1 Tes. 5:19, 20) Maucimi agho tikusambira na kuphalirako ŵanji ngakukondweska comene.

15. Kasi ni vinthu wuli vyakovwira ivyo tingadumbiskana pa Nyengo Yakusopera ya Mbumba?

 ¹⁵ Tikwenera kovwira mbumba zithu kuti ziŵe na maluso mu uteŵeti wa m’munda. Ŵabali na ŵadumbu ŵanandi ŵawona kuti nthowa yimoza iyo ŵangacitira nthena, nkhupatura nyengo pa Nyengo Yakusopera ya Mbumba kuti ŵadumbiskanenge vya mu uteŵeti. Mungawona kuti nchakovwira comene kudumbiskana umo mungacitira maulendo ghakuwelerako ku ŵakunweka. Dumbiskanani ivyo mungakayowoya pa ulendo wakulondezgapo. Mungadumbiskanaso nkhani izo zingakaŵacontha comene ŵeneko ŵa nyumba kuti mulutilire kudumbiskana nawo. Mungadumbiskana nyengo yiwemi iyo ŵanthu ŵakusangika pa nyumba zawo. Kweniso ŵanji ŵakupatura nyengo pa Nyengo Yakusopera ya Mbumba kuti ŵanozgekere maungano gha mpingo mwakuti ŵamanye ivyo ŵamusambira. Kasi namwe mukucita nthena? Para mukuzgorapo pa maungano, cipulikano cinu cikukhozgeka ndipo mukovwirika kuti muleke kusunkhunyika maghanoghano. (Sal. 35:18) Nadi, para tikuŵa na Nyengo Yakusopera ya Mbumba tiŵenge ŵakuvikilirika ku nkhani zambura maukaboni kweniso tigongowenge yayi.

16. Kasi nchivici ico cikuciska Ŵakhristu ŵakuphakazgika kuti ŵalutilire kukhozga nkhongono yawo ya kughanaghana?

¹⁶ Para tikughanaghanirapo pa umo Yehova watumbikira ŵanthu ŵake kuti ŵapulikiske maucimi gha mu Baibolo, tizirwiskenge njombe yithu ya munthazi. Ŵakuphakazgika ŵali na cilindizga ca kukakhala kucanya na Khristu. Ici cikuŵaciska comene kuti ŵalutilire kukhozga nkhongono yawo ya kughanaghana. Mazgu agho Paulosi wakalembera Ŵatesalonika ghakugwiraso nchito kwa iwo, ghakuti: “Tikwenera kuwonga Ciuta nyengo zose cifukwa ca imwe, ŵabali ŵakutemweka na Yehova, cifukwa Ciuta wakamusorani . . . mwa kutuŵiskika na mzimu kweniso kwizira mu cipulikano cinu mu unenesko.”—2 Tes. 2:13.

17. Kasi mukukhozgeka wuli na mazgu agho ghali pa 2 Ŵatesalonika 3:1-5?

¹⁷ Awo ŵali na cilindizga ca kuzakakhala na umoyo wamuyirayira pa caru capasi, nawo ŵakwenera kufwilirapo kuti ŵaleke kusunkhunyika luŵiro maghanoghano. Usange muli na cigomezgo ici, kumbukani mazgu ghakukhozga agho Paulosi wakalembera ŵakuphakazgika ŵa mu Tesalonika. (Ŵazgani 2 Ŵatesalonika 3:1-5.) Tose tikwenera kuzirwiska comene mazgu ghakukhozga agha. Nadi, makalata ghakuluta ku Ŵatesalonika ghali na macenjezgo ghakuzirwa comene ghakukhwaskana na nkhani zambura ukaboni panji fundo zakukayikiska. Pakuti tikukhala mu mazuŵa ghaumaliro, macenjezgo agha ngakuzirwa comene kwa ise.