KATHERINE wakakulira ku United States ndipo wakabapatizika kuŵa Kaboni wa Yehova apo wakaŵa na vyaka 16. Wakaŵa wamwamphu comene mu uteŵeti kweni ŵanthu awo ŵakategherezganga uthenga wa Ufumu mu cigaŵa ico wakapharazgangako ŵakaŵa ŵacoko. Iyo wakati: “Nkhaŵazga nkhani zakukhwaskana na ŵanthu awo ŵakalomba Ciuta kuti waŵatumire munthu kuti wazakaŵawovwire kumumanya makora Ciuta. Nkhakhumbanga kusangana na munthu wanthena uyu, kweni vikacitikanga yayi.”

Wakati wapharazga mu cigaŵa ici kwa vyaka vinandi, Katherine wakamba kughanaghana kuti wasamire uko ŵanthu ŵanandi ŵakutegherezga uthenga wa Ufumu. Ndipouli, wakakayikanga usange wangafiska. Iyo wakakhalapo kutali na mbumba yakwake kamoza pera, ndipo wakakhalako sabata ziŵiri pera. Pa nyengo iyi wakakumbukanga kukwake zuŵa lililose. Nangauli wakakayikanga, kweni wakakhumba comene kovwira ŵanthu awo ŵakukhumba kumanya Yehova. Wakati waghanaghanira malo ghakupambanapambana agho wangalutako, wakalemba kalata ku ofesi ya munthavi ya ku Guam, ndipo ŵakamuphalira vyose ivyo wakakhumbanga kumanya. Mu Julayi 2007, apo wakaŵa na vyaka 26, Katherine wakasamira ku Saipan, cirwa ca pa Nyanja ya Pacific, ico cili pa mtunda wa makilomita 10,000 kufuma kukwake. Kasi vikamwendera wuli?

Wakati wafika waka mu mpingo uphya, Katherine wakasanga Doris, mwanakazi wa vyaka vyakujumpha 40, uyo wakazomera kusambira Baibolo. Ŵakati ŵasambira vipaturo vitatu vyakwambilira mu buku la Baibolo Likusambizgaci?, Katherine wakamba kufipa mtima. Iyo wakati: “Doris wakaŵa msambiri muwemi comene, ndipo nkhakhumbanga yayi kuti sambiro ili litimbanizgike. Nkhaŵa kuti nindasambirepo na munthu mwakukhazikika ndipo nkhaghanaghananga kuti pakukhumbikwa mudumbu munyake wakukhwima kuti wawovwire Doris. Nkhaghanaghananga kuti panji waŵe uyo ni nthanga yake.” Katherine wakalomba Yehova kuti wamovwire kusanga mudumbu wakwenelera wakuti wamulekere sambiro ili. Kufuma apo, wakaghanaghana kuti wakamuphalire Doris vya kusintha uku.

Katherine wakati: “Pambere nindamuphalire nkhani iyi, Doris wakati pali suzgo linyake ilo wakukhumba kuniphalira. Nkhati nategherezga suzgo lake, nkhamuphalira umo Yehova wakanovwilira kumalana na suzgo lakuyanako na lake. Wakawonga comene.” Kufuma apo, Doris wakaphalira Katherine kuti: “Yehova wakutuma iwe kuti unovwirenge. Pa zuŵa lakwamba ilo ukizira pa nyumba yane, nkhaŵa kuti naŵazga Baibolo  kwa maora ghanandi. Masozi ghakazura mu maso apo nkhalombanga Ciuta kuti watume munthu kuzakanovwira kuti nipulikiske Baibolo. Mbwe iwe ukukhung’uska pa mulyango. Apa Yehova wakazgora lurombo lwane!” Apo Katherine wakalongosoranga nkhani iyi, masozi ghakafumanga mu maso ghake. Iyo wakati: “Mazgu gha Doris ghakaŵa zgoro la lurombo lwane. Yehova wakanovwira kumanya kuti ningalutizga kusambira nayo.”

Doris wakabapatizika mu 2010, ndipo mazuŵa ghano nayo wali na masambiro gha Baibolo ghanandi. Katherine wakati: “Nili wakukondwa comene kuti ivyo nkhakhumbanga, vyakuti novwirepo munthu kuŵa muteŵeti wa Yehova, vili kufiskika.” Lero, Katherine ni mupayiniya wapadera pa cirwa ca Kosrae, pa Nyanja ya Pacific.

Ŵabali na ŵadumbu ŵakujumpha 100 (ŵa vyaka kwambira 19 mpaka 79) ŵakufuma ku vyaru vinyake, ŵali kusamira ku virwa vya ku Micronesia uko ŵapharazgi mbacoko. Iwo ŵakujipulika nga ni Erica, uyo wakasamira ku Guam mu 2006 apo wakaŵa na vyaka 19. Iyo wakati: “Nchakukondweska comene kucita upayiniya mu cigaŵa ico ŵanthu ŵakukhumba comene kumanya unenesko. Nkhumuwonga comene Yehova cifukwa cakuti wakanovwira kwamba uteŵeti uwu, weneuwo ngwakukondweska comene.” Mazuŵa ghano, Erica ni mupayiniya wapadera pa Ebeye, cimoza mwa virwa ivyo vikucemeka Marshall Islands. Para munthu wakuteŵetera mu caru cinyake pakuŵaso masuzgo. Tiyeni tiwonepo ghatatu na kuwona ivyo awo ŵali kusamira ku virwa vya ku Micronesia ŵakucita kuti ŵamalane nagho.

Kakhaliro. Simon, uyo wakaŵa na vyaka 22, wakati wafika pa cirwa ca Palau mu 2007 wakawona kuti wakasanganga ndalama zicoko comene pakuyaniska na izo wakasanganga ku caru cakwake ca England. Iyo wakati: “Nkheneranga kujisambizga kuti nileke kugura vinthu vyambura kukhumbikwa. Sono nkhusankha makora cakurya cakuti nigure, ndipo nkhupenja ivyo vili na mtengo uwemi. Para cinthu cinyake canangika, nkhugulirako cisulo cakuti cagwirapo kale nchito ndipo nkhupempha munthu munyake kuti wanovwire kunozga.” Kasi umoyo uwu ukamovwira wuli? Simon wakati: “Ukanovwira kumanya ivyo ni vyakuzirwa comene pa umoyo ndiposo umo ningakhalira na vinthu vicoko. Kanandi waka, nkhawonanga kuti Yehova wakunovwira. Pa vyaka vinkhondi na viŵiri ivyo nateŵetera kuno, nindagonepo na njara panji kusoŵa pakugona.” Nadi, Yehova wakovwira awo ŵali na umoyo wambura kukhumba vinandi cifukwa cakuti ŵakukhumba kupenja dankha Ufumu.—Mat. 6:32, 33.

Kukumbuka kukaya. Erica wakati: “Ŵamumbumba yakwithu nkhuŵatemwa comene, ndipo nkhawonanga kuti uteŵeti wane ungazakatimbanizgika cifukwa ca kukumbuka kukaya.” Kasi wakacita vici kuti wanozgekere? Iyo wakati: “Pambere nindasame, nkhaŵazga nkhani za mu Gongwe la Mulinda zakukhwaskana na kukumbuka kukaya. Nkhani izi zikanovwira comene. Nkhani yinyake yikalongosora vya mama uyo wakasimikizgira  mwana wake kuti Yehova wamupwelelerenge. Mama uyu wakati, ‘Yehova wangakupwelelera makora comene kuluska umo ine ningacitira.’ Fundo iyi yikanikhozga comene.” Hannah na mfumu wake, Patrick, ŵakuteŵetera pa Majuro, cimoza mwa virwa vyakucemeka Marshall Islands. Kuti waleke kukumbuka kukaya, Hannah wakughanaghana vya ŵabali na ŵadumbu mu mpingo. Iyo wakati: “Nyengo zose nkhuwonga Yehova cifukwa ca ubali withu wa pa caru cose. Ŵabali na ŵadumbu, ŵali nga ni mbumba yakwithu. Iwo ŵalekenge kunovwira, mphanyi nindasame kuti niteŵetere uko ŵapharazgi ŵa Ufumu mbacoko.”

Kusanga ŵabwezi. Simon wakati: “Para wamunthu wafika ku caru cinyake, cilicose cikuŵa cacilendo. Nkhutondeka kuyowoya tumilangwe na ŵanyane ndipo cikuŵa cakusuzga kuti ŵanji ŵanipulikiskenge.” Erica wakati: “Pakwamba nkhaŵanga na phukwa, kweni phukwa ili likanovwira kuti nighanaghanire ico cikanituma kuti nisame. Nkhasama na cilato cakuti nisange vyandulo yayi, kweni kuti nicite vinandi pakuteŵetera Yehova.” Wakasazgirapo kuti: “Pakati pajumpha nyengo, nkhasanga ŵabwezi ŵanandi ndipo mbakuzirwa comene kwa ine.” Simon wakafwilirapo kuti wasambire ciyowoyero cakucemeka Palauan, ndipo vikamovwira kuti ‘wasanuzge’ ku ŵabali na ŵadumbu. (2 Kor. 6:13) Cifukwa cakuti wakasambira ciyowoyero ici, ŵabali na ŵadumbu ŵakamba kumutemwa comene. Nadi, para ŵalendo na ŵabali awo mbeneko cikaya ŵakuteŵetera lumoza, wose ŵakusanga candulo na ubwezi uwo ukuŵa mu mpingo. Kasi ni vyandulo wuli vinyake ivyo awo ŵakujipeleka na mtima wose kukateŵetera uko ŵapharazgi ŵa Ufumu mbacoko ŵakusanga?

Mpositole Paulosi wakati: “Uyo wakuseŵa pakuru wazamuvunaso pakuru.” (2 Kor. 9:6) Fundo iyi njaunenesko nanga nkhu awo ŵakusazgirako uteŵeti wawo. Kasi awo ŵasamira mu virwa vya ku Micronesia ‘ŵakuvuna’ vipambi wuli?

Mu virwa vya ku Micronesia, mucali ŵanthu ŵanandi awo ŵakukhumba kusambira Baibolo ndipo ni mwaŵi ukuru kuwona umo ŵanthu awo ŵasambira Mazgu gha Ciuta na kughalondezga ŵakucitira makora mwauzimu. Patrick na Hannah ŵakakapharazgaso pa cirwa cicoko ca Angaur, ico pali ŵanthu 320. Ŵakati ŵapharazga kwa myezi yiŵiri, ŵakasanga mama uyo wakulera yekha mwana. Mama uyu wakazomera kusambira Baibolo ndipo wakati wamanya unenesko, wakasintha comene kacitiro ka vinthu pa umoyo wake. Hannah wakati: “Paumaliro wa sambiro lililose, para tikufumapo pa nyumba yake na kukwera njinga zithu, tikalaŵiskananga na kuyowoya kuti: ‘Yewo Yehova!’” Hannah wakasazgirapo kuti: “Nkhumanya kuti Yehova mphanyi wakaguzira mama uyu kwa iyo mu nthowa yinyake, kweni cifukwa cakuti tikasamira uko ŵapharazgi ŵa Ufumu mbacoko, tikamusanga na kumovwira kuti wamanye Yehova. Ici nchimoza mwa vinthu vyakukondweska comene pa umoyo withu.” Nga umo Erica wakayowoyera, “para wawovwira munthu kumanya Yehova, ukuŵa wakukondwa comene.”

Mu vyaru vinandi, ŵapharazgi ŵa Ufumu mbacoko. Kasi mungaŵa yumoza wa ŵanthu awo ŵakusamira uko kukukhumbikwa wovwiri? Lombani Yehova kuti wamovwirani kuti khumbo linu lakuti musazgireko uteŵeti winu likure. Mungadumbiskana nkhani iyi na ŵalara mu mpingo, mulaŵiliri wa dera, panji awo ŵali kuteŵeterapo uko ŵapharazgi ŵa Ufumu mbacoko. Para mwambapo kunozgekera ulendo uwu, lembani kalata ku ofesi ya munthavi iyo yikulaŵilira cigaŵa ico mukukhumba kusamirako kuti yimuphalirani vinandi. * Panji namwe mungaŵa yumoza wa ŵabali na ŵadumbu masauzandi ghanandi, ŵawukirano na ŵalaraŵalara wuwo, ŵa mu nthengwa na awo ŵandanjire mu nthengwa, ŵeneawo ŵakujipeleka na mtima wose na ‘kuvuna pakuru.’