Iwo ŵangalindilira kuti mu caru ciphya ŵazakawelerane. Mwanalume munyake uyo muwoli wake wali kufwa wakati: “Ine na muwoli wane tikakhumbanga yayi kuti nthengwa yithu yimare. Khumbo lithu likaŵa lakuti tisoperenge lumoza Ciuta kwamuyirayira. Kwa ine ivi vindasinthe.” Kasi awo ŵazamuwuskikira pa caru capasi ŵazamutora na kutengwa? Tikumanya yayi.

Kwa vyaka vinandi, mabuku ghithu ghakalongosoranga kuti mazgu gha Yesu ghakukhwaskana na ciwuka ndiposo kutora na kutengwa, ghakwenera kuti ghakuyowoya vya awo ŵazamuwuskikira pa caru capasi. Ghakatenge awo ŵazamuwuskika mu caru ciphya ŵakwenera kuti ŵazamutora yayi nesi kutengwa. * (Mat. 22:29, 30; Mrk. 12:24, 25; Luka 20:34-36) Kweni vingacitika kuti Yesu wakalongosoranga vya awo ŵazamuwuskikira kucanya. Tiyeni tisande mazgu gha Yesu.

Kasi Yesu wakayowoyanga na anjani? (Ŵazgani Luka 20:27-33.) Wakayowoyanga na Ŵasaduki. Iwo ŵakagomezganga yayi kuti ŵakufwa ŵazamuwuka. Ntheura pakukhumba kukora Yesu mu kayowoyero, ŵakamufumba pa nkhani ya ciwuka na nthengwa zakucita kuhara. * Yesu wakazgora kuti: “Ŵana ŵa mgonezi uno ŵakutora na kutengwa, kweni awo ŵapimika ŵakwenelera kusanga umoyo mu mgonezi uwo ukwiza na kuwuka ku ŵakufwa ŵakutora cara nesi kutengwa. Nakuti ŵangafwaso cara, cifukwa ŵali nga mbangelo, ndipo mbana ŵa Ciuta mwa kuŵa ŵana ŵa ciwuka.”—Luka 20:34-36.

Cifukwa wuli mabuku ghithu ghakalongosoranga kuti Yesu wakayowoyanga vya awo ŵazamuwuskikira pa caru capasi? Pali vifukwa viŵiri ivyo vikapangiska kuti tifike pa fundo iyi. Cakwamba, Ŵasaduki ŵakwenera kuti ŵakaghanaghananga vya awo ŵazamuwuskikira pa caru capasi, ntheura Yesu wakwenera kuti wakaŵazgora kuyana na maghanoghano ghawo. Caciŵiri, pakumalizga zgoro lake, Yesu wakayowoya vya Abrahamu, Yisake, na Yakobe. Aŵa mbanthu ŵakugomezgeka awo ŵazamuwuskikira pa caru capasi.—Luka 20:37, 38.

Ndipouli, vikuwoneka kuti nchamacitiko kuti Yesu wakayowoyanga vya awo ŵazamuwuskikira kucanya. Cifukwa wuli tikuyowoya nthena? Tiyeni tiwone fundo zikuru ziŵiri.

“Awo ŵapimika ŵakwenelera . . . kuwuka ku ŵakufwa.” Ŵakhristu ŵakuphakazgika awo mbakugomezgeka ‘ŵakupimika ŵakwenelera ufumu wa Ciuta.’ (2 Tes. 1:5, 11) Iwo ŵakupimika kuti mbarunji cifukwa ca sembe yakuwombora; ntheura ŵakufwa cifukwa ca kususkika cara. (Rom. 5:1, 18; 8:1) Iwo ŵakucemeka kuti ‘mbakukondwa na ŵatuŵa’ ndipo ŵakupimika kuti mbakwenelera kuwuskikira kucanya. (Uvu. 20:5, 6) Mwakupambana na ŵanthu aŵa, pa awo ŵazamuwuskikira pa caru capasi pazamuŵa ŵanthu “ŵambura urunji.” (Mil. 24:15) Kasi ŵanthu “ŵambura urunji” aŵa ‘ŵangapimika ŵakwenelera’ ciwuka?

“Ŵangafwaso cara.” Mabaibolo ghanyake ghakuti “nyifwa yiliso na mazaza pa iwo cara.”  Ŵakuphakazgika awo ŵalutilira kugomezgeka mpaka nyifwa yawo, ŵakuwuskikira kucanya na kupika umoyo wambura kufwa, panji umoyo uwo ungaparanyika cara. (1 Kor. 15:53, 54) Nyifwa yikuŵaso na mazaza cara pa ŵanthu awo ŵakuwuskikira kucanya. *

Kuyana na ivyo tadumbiskana, kasi fundo njakuti wuli? Vingacitika kuti mazgu gha Yesu ghakukhwaskana na kutora panji kutengwa kweniso ciwuka, ghakuyowoya vya awo ŵakuwuskikira kucanya. Usange ni nthena, ipo mazgu gha Yesu ghakutiphalira vinandi vyakukhwaskana na awo ŵakuwuskikira kucanya. Iwo ŵakutora cara nesi kutengwa, ŵangafwa cara, ndipo ŵakuyanako na ŵangelo. Cifukwa ca fundo iyi paliso mafumbo ghanandi.

Lakwamba ndakuti, usange Ŵasaduki ŵakaghanaghananga vya awo ŵazamuwuskikira pa caru capasi, kasi nchivici ico cikate cipangiske Yesu kuti wayowoye vya awo ŵakuwuskikira kucanya? Ni nyengo zose yayi apo Yesu wakazgoranga awo ŵakamususkanga kuyana na ivyo ŵakaghanaghananga. Mwaciyelezgero, ku Ŵayuda awo ŵakakhumbanga cimanyikwiro, Yesu wakati: “Wiskirani pasi tempele ili, ndipo mu mazuŵa ghatatu niliwuskenge.” Yesu wakwenera kuti wakamanya kuti iwo ŵakaghanaghananga vya tempile lanadi, “kweni iyo wakayowoyanga vya tempele la thupi lake.” (Yoh. 2:18-21) Panji Yesu wakawona kuti nchakukhumbikwa yayi kuti wazgore Ŵasaduki ŵapusikizgi aŵa, ŵeneawo ŵakagomezganga yayi kuti ŵanthu ŵazamuwuskika ndiposo kuti kuli ŵangelo. (Zinth. 23:9; Mat. 7:6; Mil. 23:8) M’malo mwake, wakwenera kuti wakakhumbanga kovwira ŵasambiri ŵake ŵakugomezgeka kuti ŵamanye unenesko wakukhwaskana na awo ŵakuwuskikira kucanya. Ŵasambiri aŵa ndiwo kunthazi ŵakaŵa kuti ŵazamusanga candulo na ciwuka ici.

Laciŵiri ndakuti, cifukwa wuli pakumalizga cidumbirano ici Yesu wakazunura Abrahamu, Yisake, na Yakobe, awo ŵazamuwuskikira pa caru capasi? (Ŵazgani Mateyu 22:31, 32.) Wonani kuti pambere Yesu wandazunure Abrahamu, Yisake, na Yakobe, wakadankha kuyowoya kuti: “Pa nkhani ya ciwuka ca ŵakufwa.” Mazgu agha ghangalongora kuti Yesu wakaleka kuyowoya vya awo ŵakuwuskikira kucanya na kwamba kuyowoya vya awo ŵazamuwuskikira pa caru capasi. Yesu wakamanyanga kuti Ŵasaduki ŵakagomezganga mazgu agho ghakalembeka na Mozesi, ntheura wakazunura mazgu agho Yehova wakaphalira Mozesi pa civwati ico cikabukanga. Apa, Yesu wakakhumbanga kulongora kuti ni khumbo la Ciuta kuti ŵanthu ŵanyake ŵazakawuskikire pano pa caru capasi.—Ex. 3:1-6.

Lacitatu ndakuti, usange mazgu gha Yesu ghakukhwaskana na ciwuka ndiposo kutora na kutengwa ghakuyowoya vya awo ŵakuwuskikira kucanya, kasi ndikuti awo ŵazamuwuskikira pa caru capasi ŵazamutora na kutengwa? Mu Mazgu gha Ciuta zgoro lakudunjika la fumbo ili mulije. Usange Yesu wakayowoyanga vya awo ŵakuwuskikira kucanya, ipo mazgu ghake ghakulongora yayi usange awo ŵazamuwuskikira pa caru capasi mu caru ciphya ŵazamunjiranga mu nthengwa panji yayi.

Mazgu gha Ciuta ghakutiphalira mwakudunjika kuti nyifwa yikumazga nthengwa. Ntheura, ŵanthu awo ni vyokoro, ŵakwenera yayi kujizenga mulandu usange ŵasankha kutoraso panji kutengwaso. Iwo ŵakwenera kusankha ŵekha pa nkhani iyi, ndipo munthu wakwenera cara kuŵasuska.—Rom. 7:2, 3; 1 Kor. 7:39.

Tingaŵa na mafumbo ghanandi ghakukhwaskana na umo umoyo uzamuŵira mu caru ciphya. M’malo mwa kusacizga waka mazgoro gha mafumbo agha, tikwenera kulindilira. Ndipouli tikusimikizga kuti: Ŵanthu ŵakupulikira ŵazamuŵa ŵakukondwa, cifukwa Yehova wazamukhorweska khumbo lawo.—Sal. 145:16.