1. Kasi Yehova wakujipulika wuli na ntchito zake? Kasi ichi chikumuchiska kuchita wuli?

YEHOVA wakukondwa chomene na milimo yake. (Sal. 135:6; Yoh. 5:17) Iyo wapeleka ntchito yakukondweska chomene ku vilengiwa vyake kuti navyo vikondwenge. Mwachiyelezgero, ntchito ya kulenga wakachitira lumoza na Mwana wake wakwamba. (Ŵazgani Ŵakolose 1:15, 16.) Baibolo likuti Yesu wakaŵa kuchanya pamoza na Chiuta “nga ndi fundi” pambere wandize pano pasi.—Zinth. 8:30.

2. Kasi ntchivichi icho chikulongora kuti Yehova wakugaŵirako ŵangelo milimo yakuzirwa?

² Mu Baibolo muli viyelezgero vyakulongora kuti nyengo zose Yehova wakugaŵirako ŵangelo ŵake milimo. Adamu na Eva ŵakati ŵananga na kuchimbizgika mu chikaya chawo chakutowa, Chiuta ‘wakaŵika ŵakerubi ku mafumiro gha dazi kwa munda wa Edeni, na lupanga lwa moto lwakuzgokera kosekose, kusunga nthowa ya ku khuni la umoyo.’ (Gen. 3:24) Kweniso lemba la Uvumbuzi 22:6 likuvumbura kuti, Yehova ‘wakatuma mungelo wake kuti walongore ŵazga ŵake vinthu ivyo vikwenera kuchitika mwaluŵiro.’

3. Apo Yesu wakaŵa pa charu chapasi, kasi wakachita wuli vinthu nga Mbawiske?

³ Apo Yesu wakaŵa pa charu chapasi, wakakondwanga na milimo iyo Yehova wakamupa. Nga Mbadada ŵake, Yesu nayo wakagaŵirangako ŵasambiri ŵake milimo yakuzirwa. Pakukhukiska ŵasambiri ŵake, wakati: ‘Nadi, nadi nkhumuphalirani, Uyo wakupulikana mwa ine, iyo uyu wachitengeso milimo iyo ine nkhuchita; ndipo wachitenge milimo yikuru kuluska iyi, chifukwa ine nkhuya ku Ŵadada.’ (Yoh. 14:12) Kuti waŵaphalire kuti milimo iyi yikwenera kuchitika mwaluŵiro, Yesu wakati: ‘Tikwenera kuchita milimo ya uyo wali kunituma apo kuchali muhanya; usiku ukwiza mu weneuwo palije munthu wangachita mulimo.’—Yoh. 9:4.

4-6. (a) Chifukwa wuli tikwenera kuwonga kuti Nowa na Mozesi ŵakachita milimo iyo Yehova wakaŵapa? (b) Kasi milimo yose iyo Chiuta wakupeleka ku ŵanthu yikufiska vichi?

⁴ Nanga ni apo Yesu wakaŵa kuti wandize pa charu chapasi, Chiuta wakapelekanga milimo ku ŵanthu. Adamu na Eva ŵakatondeka kufiska mulimo uwo ŵakapika. Ndipouli ŵanji ŵakachita mwakuyana na umo Chiuta wakayowoyera. (Gen. 1:28) Kuti ŵanthu ŵapone pa Chiwowota, Nowa wakapika ulongozgi wakupangira chingalaŵa. Iyo wakachita mwakuyana na umo Yehova wakamuphalilira. Chifukwa chakuti wakapulikira, lekani tiliko.—Gen. 6:14-16, 22; 2 Pet. 2:5.

⁵ Mozesi wakapulikira ulongozgi uwo wakapika wakupangira chihema ndiposo wakukhwaskana na umo ŵasofi ŵakwenera kuchitira milimo yawo. (Ex. 39:32; 40:12-16) Nanga ni lero tikusanga vyandulo chifukwa chakuti iyo wakagomezgeka pakuchita mulimo uwu. Kasi tikusanga wuli vyandulo? Mpositole Paulosi wakalongosora kuti chihema na usofi vikimiranga “vinthu viwemi ivyo vikwiza” munthazi.—Heb. 9:1-5, 9; 10:1.

⁶ Milimo iyo Chiuta wakupeleka ku ŵateŵeti ŵake, nyengo na nyengo yikusintha kuti wafiske chilato chake. Ndipouli, milimo iyo Yehova wakupeleka, yikupeleka ntchindi kwa iyo ndipo ŵanthu awo ŵakumugomezga ŵakusanga nayo chandulo. Ndimo vikaŵiraso na ivyo Yesu wakafiska pambere wandize pa charu chapasi ndiposo wakati wiza. (Yoh. 4:34; 17:4) Milimo iyo tikupika lero nayo yikuchindika Yehova. (Mat. 5:16; ŵazgani 1 Ŵakorinte 15:58.) Chifukwa wuli?

7, 8. (a) Longosorani milimo iyo Ŵakhristu ŵakuchita mazuŵa ghano. (b) Kasi tikwenera kuchita wuli na ulongozgi uwo Yehova wakutipa?

⁷ Ni mwaŵi ukuru kuti Yehova wakupempha ŵanthu ŵambura kufikapo kuti ŵaŵe ŵantchito ŵanyake. (1 Kor. 3:9) Nga ni Nowa na Mozesi, Ŵakhristu ŵanyake ŵakuzenga Malo Ghakuchitirapo Ungano, Nyumba za Ufumu, na Maofesi gha Munthavi. Kwali mukunozga Nyumba yinu ya Ufumu, kwali mukuzenga ofesi yithu yikuru ku Warwick, New York, zirwiskani uteŵeti winu. (Wonani chithuzithuzi chakwamba icho chikulongora umo ofesi yithu yikuru yizamuwonekeranga.) Mukuchita uteŵeti wakupatulika. Ndipouli, mulimo ukuru chomene uwo Ŵakhristu ŵakwenera kuchita ngwa kupharazga. Mulimo uwu nawo ukupeleka uchindami kwa Yehova kweniso ŵanthu ŵakupulikira ŵakusanga nawo chandulo. (Mil. 13:47-49) Gulu la Chiuta likupeleka ulongozgi wakwenelera kuti tichite makora mulimo uwu. Ntheura, nyengo zinyake mungapika mulimo uphya.

⁸ Nyengo zose, ŵateŵeti ŵa Yehova, ŵakujilambika ku ulongozgi wake. (Ŵazgani Ŵahebere 13:7, 17.) Nyengo zinyake pakwamba  tingapulikiska yayi chifukwa icho mulimo withu wasinthira. Ndipouli, tikupulikira chifukwa tikumanya kuti mulimo wafuma kwa Yehova kweniso kuti paŵenge vyandulo.

9. Chifukwa wuli ŵalara ntchiyelezgero chiwemi?

⁹ Ŵalara ŵakulongora kuti ŵakukhumba chomene kufiska khumbo la Yehova kwizira mu ivyo ŵakuchita pakulongozga mu mpingo. (2 Kor. 1:24; 1 Tes. 5:12, 13) Ŵakufwilirapo kuchita milimo yawo ndipo ŵakupulikira para vinthu vyasintha. Mbakunozgeka kulondezga nthowa ziphya zakupharazgira Ufumu wa Chiuta. Ŵakuwona kuti pakuŵa vyandulo vinandi para ŵanozga ndondomeko ya kupharazga pa telefoni, mu madowoko, na uko kukusangika ŵanthu ŵanandi, nangauli ŵanji pakwamba ŵakawonanga kuti ntchakusuzga kuchita upharazgi uwu. Mwachiyelezgero, ŵapayiniya ŵanayi ku Germany ŵakaghanaghana kuti ŵakapharazge ku malo gha malonda na maofesi agho ŵakapharazgangako viŵi yayi. Michael wakati: “Tikaŵa kuti tindachitepo uteŵeti wamtundu uwu kwa vyaka vinandi, ntheura tikaŵa na wofi. Ndipouli Yehova wakamanya kuti tikaŵa na wofi, ntheura wakatovwira kuti tichite makora uteŵeti uwu. Tikakondwa chomene kuti tikalondezga masachizgo gha mu Uteŵeti Withu wa Ufumu na kuthemba wovwiri wa Yehova.” Kasi mu chigaŵa chinu namwe mukuyezga nthowa ziphya zakupharazgira?

10. Kasi ni vinthu wuli ivyo vyasintha mu gulu la Yehova mu vilimika vyasonosono apa?

¹⁰ Nyengo zinyake vinthu vingasintha mu gulu la Chiuta. Mu vilimika vyasonosono apa, maofesi ghanyake gha munthavi ghasazgika pamoza. Nangauli ŵabali na ŵadumbu awo ŵakateŵeteranga pa maofesi agha ŵakeneranga kusintha vinthu vinyake, kweni ŵawona kuti pali vyandulo vinandi. (Muph. 7:8) Ŵabali na ŵadumbu aŵa ŵakukondwa chomene kovwira kuti gulu la Yehova lilutilire kwenda makora.

11-13. Kasi ŵanji ŵakumana na masuzgo wuli chifukwa cha kusintha uko kwachitika mu gulu la Yehova?

¹¹ Tikusambirako sambiro lakuzirwa chomene ku wose awo ŵakateŵeteranga pa maofesi gha munthavi agho ghali kusazgika pamoza. Ŵanji ŵakaŵa kuti ŵateŵetera pa Beteli ya mu charu chawo kwa vyaka vinandi. Mbumba yinyake iyo yikateŵeteranga pa Beteli yichoko ya ku Central America yikapempheka kuti yikateŵeterenge ku Beteli ya ku Mexico iyo njikuru chomene. Rogelio wakati: “Chikaŵa chakusuzga chomene kulekana na ŵabali ndiposo ŵabwezi ŵane.” Mubali Juan, uyo wakapempheka kuti wasamire ku Beteli ya ku Mexico, wakati: “Vinthu vyasintha chomene pa umoyo wane; nkhwenera kuŵa na ŵabwezi ŵaphya. Pakukhumbikwira kusintha kuti nikolerane na kakhaliro na kaghanaghaniro ka ŵanthu ŵa ku malo agha.”

¹² Awo ŵakateŵeteranga pa Beteli mu vyaru vinyake vya ku Europe, ŵakapempheka kuti ŵasamire ku ofesi ya munthavi ya Germany, ndipo nawo ŵakasangana na masuzgo. Awo ŵakutemwa kudaŵira mapiri, ŵakuti chikaŵa chinonono kusida mapiri ghakutowa gha ku Switzerland. Kweniso awo ŵakafuma ku Austria, pakwamba ŵakakumbukanga umoyo wakukondweska uwo ŵakasida kukwawo.

¹³ Awo ŵakasamira ku vyaru vinyake, ŵakeneranga kuzgoŵera kukhala mu malo ghachilendo, kugwira ntchito lumoza na ŵabali na ŵadumbu ŵachilendo, ndiposo panji kusambira ntchito yinyake. Ŵakeneranga kuzgoŵera mpingo uwo ŵasamirako, kupharazga mu chigaŵa chiphya, kweniso mu chiyowoyero chinyake. Chingaŵa chakusuzga kusintha, ndipouli, ŵateŵeti ŵanandi ŵa pa Beteli ŵali kusintha. Chifukwa wuli ŵali kuchita nthena?

14, 15. (a) Kasi ŵanji ŵalongora wuli kuti ŵakuzirwiska mwaŵi wawo wa kugwira ntchito na Yehova pa uteŵeti uliwose? (b) Kasi iwo ntchiyelezgero chiwemi kwa ise pa fundo wuli?

 ¹⁴ Mudumbu Grethel wakati: “Nkhazomera kusama chifukwa chakuti nkhakhumbanga kulongora Yehova kuti nkhumutemwa chomene kuluska chinthu chilichose.” Dayska wakati: “Nkhazomera kusama chifukwa cha kukumbuka kuti ni Yehova uyo wakakhumbanga kuti nisame.” André na Gabriela ŵakukolerana nayo fundo iyi. Iwo ŵakati: “Tikawona kuti uwu ni mwaŵi ukuru chomene wa kuteŵetera Yehova m’malo mwa kudangizga vyakukhumba vithu. Ntheura tikati, ‘Para Yehova wasintha vinthu, nase tikwenera kuŵa ŵakunozgeka kusintha.’”

¹⁵ Para maofesi gha munthavi ghasazgika pamoza, ŵateŵeti ŵanyake pa maofesi agha ŵakutumika kuti ŵakachitenge upayiniya. Ivi ndivyo vikachitikira ŵanandi awo ŵakateŵeteranga pa ofesi ya Denmark, Norway, na Sweden, maofesi agha ghakati ghasazgika pamoza kuŵa ofesi ya munthavi ya Scandinavia. Ŵanyake mwa iwo ŵakaŵa Florian na Anja. Iwo ŵakati: “Tikukondwa na uteŵeti uwu nangauli tikukumana na masuzgo. Tikuwona kuti ntchakukondweska chomene kuteŵetera Yehova kulikose uko iyo wakhumba. Kuyowoya unenesko tatumbikika chomene.” Nangauli ni tose yayi ise tingakhumbikwira kusintha vinthu nga mbabali na ŵadumbu aŵa, kweni tingayezga mtima wawo wa kujipeleka usange tikuŵika vinthu vya Ufumu pakwamba. (Yes. 6:8) Yehova wakutumbika chomene wose awo ŵakuzirwiska mwaŵi wawo wa kugwira ntchito na iyo pa uteŵeti uliwose.

16. (a) Kasi lemba la Ŵagalatiya 6:4 likutiphalira vichi? (b) Kasi ni mwaŵi wuli ukuru uwo waliyose wa ise wali nawo?

¹⁶ Ŵanthu ŵambura kufikapo ŵakutemwa kujiyaniska na ŵanji. Ndipouli, Mazgu gha Chiuta ghakutiphalira kuti tiŵikenge mahara pa ivyo ise tikufiska. (Ŵazgani Ŵagalatiya 6:4.) Taŵanandi tilije udindo wapadera mu gulu Yehova. Kweniso, vingachitika yayi kuti tose tiŵe  ŵapayiniya, ŵamishonale panji ŵateŵeti ŵa pa Beteli. Agha ni mauteŵeti ghawemi nadi. Ndipouli, tingaluwanga yayi kuti mwaŵi ukuru chomene uwo waliyose wa ise wali nawo nkhugwira ntchito na Yehova pakupharazga makani ghawemi. Uwu ni mwaŵi uwo tikwenera kuzirwiska.

17. Chifukwa chakuti tili mu charu cha Satana, kasi ntchivichi icho chingachitika? Chifukwa wuli tikwenera kugongowa yayi?

¹⁷ Chifukwa chakuti tili mu charu cha Satana tingatondeka kuchita vinandi pakuteŵetera Yehova. Nyengo zinyake milimo yithu ya mu mbumba yingasazgikirako, tingalwara, panji tingakumana na suzgo linyake. Ndipouli, ivi vikwenera yayi kutigongoweska. Chifukwa nanga tingaŵa na masuzgo ghanandi wuli, tili na mwaŵi wa kupharazga zina la Yehova na Ufumu wake. Chakuzirwa chomene ntchakuti tikuchitira Yehova vyose ivyo tingafiska. Kweniso tikulomba Yehova kuti watumbike ŵabali awo ŵangachita vinandi kuluska ivyo ise tingafiska. Kumbukani kuti munthu waliyose uyo wakulumba zina la Yehova ngwakuzirwa kwa iyo.

18. Kasi ni vinthu wuli ivyo tikwenera kuŵa ŵakunozgeka kuvisida? Chifukwa wuli?

¹⁸ Yehova wakukondwa kugwira nase ntchito nangauli tili ŵakulopwa kweniso ŵambura kufikapo. Tikwenera kuzirwiska chomene mwaŵi withu wa kugwira ntchito na Chiuta mu mazuŵa ghaumaliro agha. Mwantheura, tikwenera kuŵa ŵakunozgeka kusida vyakukhumba vithu pakumanya kuti mu charu chiphya Yehova wazamutovwira kukondwa na “umoyo wanadi,” uwo mbumoyo wamuyirayira wamtende.—1 Tim. 6:18, 19.

19. Kasi Yehova watisungira vichi munthazi?

¹⁹ Pakuti tili pafupi chomene kunjira mu charu chiphya, tikwenera kughanaghanira ivyo Mozesi wakaphalira Ŵaisrayeli apo ŵakaŵa pafupi kunjira mu Charu cha Layizgano. Iyo wakati: ‘Yehova Chiuta winu tiwamwandaniskirani mu milimo yinu yose ya mawoko ghinu.’ (Dute. 30:9) Para Haramagedoni yajumpha, wose awo ŵakafwilirangapo kugwira ntchito na Chiuta ŵazamuhara charu icho wali kuŵalayizga. Para ivi vyachitika, tizamuŵika maghanoghano ghithu pa mulimo uphya wa kuzgora charu kuŵa paradiso.