Yehova Wakutumbika Munthu Uyo Wali na Mtima wa Kujipeleka

JULANI

MLENGI withu, Yehova, wali kupeleka ku ŵanthu wanangwa wa kusankha. Ŵanthu awo ŵasankha kuti ŵakhozgere kusopa kwaunenesko ndiposo khumbo lake, kweniso awo ŵakutuŵiska zina lake, iyo wakuŵatumbika. Yehova wakukhumba yayi kuti timupulikirenge mwadango waka, panji mwakuchita kuchichizgika. M’malo mwake wakuzirwiska chomene ŵanthu awo ŵali na mtima wa kujipeleka chifukwa chakuti ŵakumutemwa zanadi ndiposo ŵakumuwonga.

Mwachiyelezgero, apo Ŵaisrayeli ŵakaŵa mu mapopa gha Sinayi, Yehova wakaŵaphalira kuti ŵazenge malo ghakusoperapo. Iyo wakati: “Mumutolere Yehova sembe za mukati mwinu; yose uyo wali na mtima wakukhumba wizenge nayo sembe ya Yehova.” (Ex. 35:5) Muisrayeli waliyose wakaphalirika kuti wangapeleka chilichose icho wangafiska. Chawanangwa chilichose chikaŵa chakuzirwa pakufiska khumbo la Chiuta. Kasi Ŵaisrayeli ŵakachita wuli?

“Yose uyo wakawuskika na mtima wake, na yose uyo mtima wake ukamukhumbiska,” wakapeleka chawanangwa, “wose awo ŵakakhumba na mtima wawo.” Ŵanalume na ŵanakazi ŵakiza na vyawanangwa vyawo ku mulimo wa Yehova: makhoza, mphete za mu makutu, mphete, golide, siliva, mkuŵa, salu zifipa nga ni mtambo, zitchesamu, na ziswesi, na bafuta muwemi, weya wa mbuzi, vikumba vyakunyukika vya mberere yanalume, vikumba vya mbuzi, khuni la shitimu, malibwe ghakuzirwa, vyakununkhira na mafuta. Ntheura, vinthu ‘ivyo ŵakaŵa navyo vikakwana kuchitira mulimo wose ufiskike, vikakhalaposo.’—Ex. 35:21-24, 27-29; 36:7.

Icho chikakondweska chomene Yehova ni vinthu ivyo Ŵaisrayeli ŵakapeleka yayi, kweni mtima wa kujipeleka wa awo ŵakakhozgera kusopa kwaunenesko. Kweniso ŵakapatura nyengo na kugwiliskira ntchito nkhongono zawo. Nkhani iyi yikuti: “Na ŵanakazi wose ŵa mtima wa vinjeru ŵakaluka na mawoko ghawo.” Nadi, “ŵanakazi wose awo mitima yawo yikaŵawuska mu vinjeru ŵakaluka weya wa mbuzi.” Kweniso Yehova wakapeleka kwa Bezalelu ‘vinjeru, kumanya, mahara, na ufundi [luso] wose.’ Nakuti, Chiuta wakapeleka kwa Bezalelu na Oholiabu luso lwakukhumbikwa kuti ŵachite mulimo uwo wakaŵapa.—Ex. 35:25, 26, 30-35.

Apo Yehova wakapemphanga Ŵaisrayeli kuti ŵapeleke vyawanangwa, wakamanya kuti “wose awo ŵakakhumba na mtima wawo,” ŵakhozgerenge kusopa kwaunenesko. Ŵakati ŵachita nthena, iyo wakaŵapa ulongozgi na kuŵatumbika ndipo ŵakaŵa na chimwemwe chikuru. Mwantheura, Yehova wakalongora kuti pakutumbika mtima wa kujipeleka wa ŵateŵeti ŵake, wakuwoneseska kuti waŵapa vyose ivyo vikukhumbikwa kweniso vinjeru kuti khumbo lake lifiskike. (Sal. 34:9) Para mukuteŵetera Yehova mwakujipeleka, iyo wamutumbikaninge.

UMO ŴANYAKE ŴAKUPELEKERA VYAWANANGWA VYA MULIMO WA PA CHARU CHOSE

Nga umo vikaŵiranga mu nyengo ya mpositole Paulosi, ŵanandi mazuŵa ghano ‘ŵakuŵika kanthu padera,’ panji kupangirathu bajeti ya unandi wa ndalama zakuti ŵakaponye mu bokosi la mpingo la vyawanangwa, lakulembeka kuti, “Vyakupeleka vya Mulimo wa pa Caru Cose.” (1 Kor. 16:2) Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova ya mu charu chawo. Pamwekha napo mungatuma vyawanangwa vinu ku wupu wakuzomerezgeka na dango uwo Ŵakaboni ŵa Yehova mu charu chinu ŵakugwiliskira ntchito. Kuti mumanye zina la wupu uwo Ŵakaboni ŵa Yehova mu charu chinu ŵakugwiliskira ntchito, fumbani ofesi ya munthavi iyo yikulaŵilira mulimo mu charu chinu. Adiresi ya ofesi ya munthavi mungayisanga pa www.pr418.com. Vyawanangwa ivyo mungatumizga mwekha ni ivi:

VYAWANANGWA IVYO VIKUWEZGEKA YAYI

Vyawanangwa ivi ni ivyo vikupelekeka kwizira pa makina gha ku banki ghakutumizgira ndalama, ndiposo pa makadi gha ku banki. Kweniso ku maofesi ghanyake gha munthavi, vyawanangwa vingapelekeka kwizira pa jw.org, panji pa Webusayiti yinyake yakusoleka.
Mungapeleka ndalama, majuda, panji katundu munyake wakuzirwa. Pakupeleka vinthu ivi, lembani kalata yakulongosora kuti vyawanangwa ivi kuzakaniwezgera yayi.

VYAWANANGWA IVYO VIKUWEZGEKA PARA MWENEKO WAVIKHUMBA

Ni ndalama izo zikupelekeka ndipo zingawezgeka usange mweneko wazikhumba.
Pakupeleka ndalama izi mulembe kalata yakulongosora kuti zizakawezgeke.

VYAWANANGWA VINYAKE IVYO MUNGAPELEKA

Padera pa kupeleka ndalama na katundu munyake wakuzirwa, paliso nthowa zinyake izo mungawovwilirapo pa mulimo wa Ufumu wa pa charu chose. Nthowa izi zili pasi apa. Pa nthowa yiliyose iyo mungatemwa kupelekera vyawanangwa vinu, chakwamba fumbani ofesi ya munthavi iyo yikulaŵilira mulimo mu charu chinu kuti mumanye nthowa izo zilipo mu charu chinu. Pakuti charu chilichose chili na malango ghake ndiposo malango ghake gha misonkho, ntchakuzirwa kuti mufumbenge dankha awo ŵakumanya malango gha misonkho na gha charu pambere mundasankhe nthowa yakupelekera vyawanangwa iyo yingaŵa yiwemi kwa imwe.

Inshuwalansi: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakapike ndalama zinu za inshuwalansi panji za penshoni.

Maakaunti gha ku Banki: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakatore ndalama zinu para mwafwa. Kweniso mungalembeska kuti para mwafwa ndiwo uzakapike ndalama zinu za penshoni izo mwasungiska ku banki. Pakuchita ivi, mukwenera kulondezga malango gha mabanki gha mu charu chinu.

Masheya: Mungapeleka masheya agho muli nagho ku kampani nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Kweniso mungalemba kuti para mwafwa wupu uwu ndiwo uzakatore masheya ghinu.

Malo na Nyumba: Mungapeleka malo panji nyumba nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo muchali ŵamoyo.

Kupeleka Ndalama Panji Katundu Munyake Kuti Viwezgekenge Pachokopachoko Chaka Chilichose: Pa ndondomeko iyi, munthu wangapeleka ndalama panji katundu munyake ku wupu uwo Ŵakaboni ŵa Yehova ŵakugwiliskira ntchito, na kupangana nawo kuti uwezgenge ndalama pachokopachoko kwa iyo, panji kwa munyake wakusankhika na iyo chaka chilichose umoyo wake wose. Munthu ŵakumukhizgirako msonkho mu chaka icho wapelekera vyawanangwa ivi.

Chuma Icho Chikhalenge Para Mwafwa: Mungalemba wilu yakuzomerezgeka na boma kuti wupu uwo Ŵakaboni ŵa Yehova ŵakugwiliskira ntchito uzakapike katundu panji ndalama zinu para mwafwa. Para wilu yinu mwalemba kuti wupu wa chisopa ndiwo uzakapokere chuma chinu, mukulipira msonkho ukuru yayi.

Mazgu ghakuti “vyawanangwa vinyake ivyo mungapeleka,” ghakulongora kuti uyo wapelekenge vyawanangwa ivi wakunozgekera. Kuti awo ŵakukhumba kupeleka vyawanangwa ivi ku mulimo wa pa charu chose wa Ŵakaboni ŵa Yehova ŵawovwirike, ŵaŵazge burosha la mutu wakuti, Charitable Planning to Benefit Kingdom Service Worldwide, ilo lili mu Chingelezi na Chisipanishi. Burosha ili, likulongosora umo ŵanthu ŵangapelekera vyawanangwa mu nthowa zakupambanapambana, kwali apo ŵachali ŵamoyo panji kuti vizakapelekeke para iwo ŵafwa. Nyengo zinyake, fundo izo zili mu burosha ili zingayana viŵi yayi na umo vinthu viliri mu charu chinu chifukwa malango gha misonkho ndiposo malango ghanyake ghakupambana. Ntheura, para mwaŵazga burosha ili, dumbiskanani na ŵanthu awo ŵakumanya vya malango gha charu na gha misonkho. Mwakugwiliskira ntchito nthowa izi, ŵanandi ŵawovwirapo pa mulimo withu wa chisopa ndiposo wa kovwira ŵanthu ŵakusoŵerwa pa charu chose ndipo ŵachepeskako msonkho uwo ŵakuŵadumura. Usange mu charu chinu burosha ili lilimo mungapempha kwa mulembi wa mpingo winu.

Kuti mumanye vinandi, mungalemba kalata panji kwimba telefoni ku ofesi ya munthavi ya mu charu chinu.

Panji Mungatemwa Kuŵerengaso Nkhani Izi

Umo Mungapelekera Vyawanangwa pa Intaneti

Wonani nthowa izo mungapelekera vyawanangwa.

GONGWE LA MULINDA—LAKUSAMBIRA PA MPINGO