VYAKA vichoko waka ivyo vyajumpha, Cesar, na muwoli wake Rocio, ŵakakhalanga umoyo uwemi mu California. Cesar wakanozganga makina ghakuzizimiskira na kuthukizgira mu chipinda, ndipo Rocio wakagwiranga ntchito mu ofesi ya dokotala. Ŵakaŵa na nyumba yawo, ndipo ŵakaŵavya ŵana. Kweni pakachitika chinthu chinyake icho chikasintha umoyo wawo. Kasi chikaŵa chivichi?

Mu Okutobala 2009, ofesi ya munthavi ya ku United States yikalembera makalata mipingo ya mu charu ichi kuti ŵakukhumba ŵantchito ŵakujipeleka kuti ŵakasazgireko maofesi ghanyake ku Wallkill, New York. Waliyose wakaŵa na mwaŵi wakulemberako. Cesar na Rocio ŵakati: “Mwaŵi wajulika wakuti titeŵetere Yehova. Tikakhumba yayi kuti chinyake chititondeske.” Mwaluŵiro ŵakatumizga makalata ghawo.

Pakajumpha pafupifupi chaka pambere Cesar na Rocio ŵandachemeke ku Beteli. Ndipouli, ŵakasinthaso vinthu vinyake pa umoyo wawo kuti wafiske chilato chawo. Cesar wakati: “Tikamba kukhala mu galaja, ndipo nyumba yithu tikachitiskanga lenti. Tikanozgeka kuti para ŵatichema ku Beteli, tilutenge waka.” Kasi pamasinda chikaŵachitikira ntchivichi? Rocio wakati: “Pakati pajumpha mwezi umoza tikapokera kalata yakutichema kuti tikateŵetere ku Wallkill kwa nyengo yichoko waka. Pakuti tikasintha vinthu vinyake, Yehova wakatitumbika.”

Nga ni Cesar and Rocio, ŵabali na ŵadumbu ŵanandi ŵajipeleka kuti ŵachiteko ntchito ya kuzenga iyo yikuchitika ku New York. Ŵanyake ŵakusazgirako maofesi ku Wallkill, apo ŵanyake  ŵakuzenga ofesi yithu yikuru ku Warwick. * Mbumba zinandi zaleka nyumba zawo, ntchito zapachanya, na vinyake kuti zikateŵetere Yehova ku malo agha. Yehova watumbika chomene ŵabali na ŵadumbu aŵa chifukwa cha kujipeleka kwawo.

Way, uyo wakumanya vya magesi, na Debra, ŵa ku Kansas ŵali na vyaka vya m’ma 50. Ŵakaguliska nyumba yawo na katundu munyake na kusamira ku Wallkill. Iwo ŵakateŵeteranga pa Beteli, kweni ŵakenderanga. * Nangauli ŵakasintha vinthu vinyake, kweni ŵakuwona kuti ŵakachita makora chomene kujipeleka. Debra wakayowoya umo wakajipulikiranga na uteŵeti wa pa Beteli. Iyo wakati: “Nyengo zinyake nkhuŵa nga nambapo kale kuchitako ntchito ya kuzenga iyo yizamuchitika mu Paradiso.”

Melvin na Sharon ŵa ku South Carolina ŵakaguliska nyumba na katundu wawo kuti nawo ŵalute ku Warwick. Nangauli chikaŵa chakusuzga kuti ŵasinthe vinthu vinyake, kweni ŵakuwona kuti ni mwaŵi ukuru chomene kuchitako ntchito iyi, iyo yizamuluwika yayi. Iwo ŵakati: “Tili na chimwemwe chikuru chifukwa cha kuchitako ntchito iyo yiwovwirenge ŵabali na ŵadumbu pa charu chose.”

Kenneth, uyo wali kupumura ntchito yake ya kuzenga, na Maureen ŵa ku California ŵali na vyaka vya m’ma 50 ndipo ŵakasamira ku Warwick. Pambere ŵandasame ŵakapempha mudumbu munyake mu mpingo kuti waŵasungireko nyumba. Ŵakapemphaso ŵabali ŵawo ŵakuthupi kuti ŵapwelere adada ŵa Kenneth awo ŵakaŵa ŵachekuru. Kasi ŵakudandawura chifukwa chakuti ŵakajipeleka kuti ŵakateŵetere pa Beteli? Yayi. Kenneth wakati: “Tatumbikika chomene. Nangauli vyakutimbanizga vikuŵapo, kweni ndise ŵakukhorwa chomene, ndipo tikuchiska ŵanji kuti nawo ŵachiteko mulimo uwu.”

Ŵanandi awo ŵali kujipeleka kukachitako ntchito ya kuzenga ŵatonda masuzgo ghanyake. Mwachiyelezgero, William na Sandra awo ŵali na vyaka vya m’ma 60, ŵakakhalanga umoyo uwemi kwawo ku Pennsylvania. Ŵakaŵa na kamupani yakupanga visulo vya makina ghakupambanapambana, iyo yikaŵa na ŵantchito 17. Kufuma pa wanichi ŵakaŵa mu mpingo wakwawo, ndipo ŵabali ŵawo ŵanandi ŵakukhala ku Pennsylvania. Ntheura mwaŵi ukati wasangika wa kukateŵetera ku Wallkill, ŵakamanya kuti pajumphenge nyengo  yitali kwambura kuwonana na ŵabali kweniso ŵabwezi ŵawo. William wakati: “Suzgo likuru chomene ilo tikasangana nalo, nkhuleka chikaya chithu.” Ndipouli, ŵakati ŵalomba, ŵakaghanaghana kuti ŵasame, ndipo ŵakudandaurapo yayi. William wakati: “Tikukondwa chomene kuti tikuteŵetera lumoza na ŵabali na ŵadumbu pa Beteli. Ine na muwoli wane Sandra tili ŵakukondwa chomene kuluska kale.”

Ricky wa ku Hawaii, ni manejara wa vyakuzengezenga ndipo wakachemeka kukateŵetera pa Beteli ku Warwick. Muwoli wake, Kendra, wakakhumbanga kuti mfumu wake wazomere ntchemo iyi. Ndipouli, ŵakafipanga mtima na mwana wawo Jacob, uyo wakaŵa na vyaka 11. Ŵakakayikanga usange ntchiwemi kusamira ku New York kweniso usange mwana wawo wamuzgoŵera malo ghachilendo.

Ricky wakati: “Chinthu chakwamba icho tikakhumbanga kuchita nkhusanga mpingo uwo uli na ŵawukirano awo ŵakuchita makora mwauzimu. Tikakhumbanga kuti Jacob wasange ŵabwezi ŵa nkharo yiwemi.” Ndipouli, mpingo uwo ŵakasamira ukaŵa na ŵawukirano ŵachoko kweni ŵateŵeti ŵa pa Beteli ndiwo ŵakaŵa ŵanandi. Ricky wakati: “Zuŵa lakwamba tikati tamalizga maungano, nkhafumba Jacob umo wakujipulikira na mpingo uphya, chomenechomene chifukwa chakuti mukaŵavya ŵanthanga yake. Wakaniphalira kuti, ‘Kudandaura yayi Adada. Ŵabwezi ŵane ŵaŵenge ŵawukirano awo ŵakuteŵetera pa Beteli.’”

Ŵawukirano ŵa pa Beteli ndiwo ŵakawa nadi ŵabwezi ŵa Jacob. Kasi ntchivichi icho chachitika chifukwa chakuti wakucheza na ŵawukirano aŵa? Ricky wakati: “Zuŵa linyake usiku apo nkhajumphanga pa chipinda cha Jacob nkhasanga kuti wandazimwe magesi. Nkhaghanaghananga kuti wakuseŵera gemu ya pa kompyuta, kweni wakaŵa kuti wakuŵazga Baibolo, ndipo wakaniphalira kuti, ‘nane ndine muwukirano wa pa Beteli, ndipo nkhukhumba kumalizga kuŵazga Baibolo kwa chaka chimoza.’” Mbumba iyi njakukondwa chomene chifukwa chakuti Ricky wakuchitako ntchito ya kuzenga ku Warwick, kweniso kuti mwana wawo wakuchita makora mwauzimu.—Zinth. 22:6.

Ntchito ya kuzenga ku Wallkill na Warwick yimalenge sonosono apa. Ntheura, awo ŵali kuchemeka kukateŵetera ku malo agha ŵakumanya kuti uteŵeti wawo ngwa nyengo yichoko waka. Kasi ŵabali na ŵadumbu aŵa, ŵakufipa mtima kuti para mulimo uwu wamara ŵazamusoŵa kwakunjilira? Yayi. Ŵanandi ŵali na maghanoghano  ghakuyana na mbumba ziŵiri izo zili na vyaka vya m’ma 50 zakufuma ku Florida. John ni manejara wa vyakuzenga. Iyo na muwoli wake, Carmen, mbantchito ŵakujipeleka ŵakanyengo ku Warwick. Iwo ŵakati: “Tawona kuti Yehova wakutipwelelera mwakuthupi. Yehova wangazomerezga yayi kuti tize kuno, pamasinda na kutitaya.” (Sal. 119:116) Luis, uyo wakupanga makina ghakuzimwira moto, na muwoli wake, Quenia, ŵakuteŵetera ku Wallkill. Ŵakayowoya kuti: “Tawona kale kuti Yehova wakutipa vyakukhumbikwa pa umoyo. Kweniso para mulimo uwu  wamara, tikugomezga kuti walutilirenge kutipwelelera.”—Sal. 34:10; 37:25.

Ŵanandi awo ŵachitako ntchito ya kuzenga ku New York, ŵakaŵa na vifukwa ivyo vikatenge viŵatondeskenge kuti ŵajipeleke. Ndipouli, ŵakayezga Yehova, pakuti wakupempha waliyose kuti: ‘Muniyezge, . . . usange ndileke kumujulirani vidangazi vyakuchanya na kumupungulirani thumbiko lakufuruka.’—Mal. 3:10.

Kasi namwe mumuyezgenge Yehova kuti wamutumbikani? Lombani na kuwona ivyo mungasintha kuti muchiteko uteŵeti uwu, kwali nkhu New York panji kunyake kulikose uko kukuchitika ntchito ya kuzenga. Yehova wamutumbikaninge.—Mrk. 10:29, 30.

Dale, uyo wakumanya vyakuzenga, na muwoli wake, Cathy, ŵa ku Alabama, ŵakulumba chomene uteŵeti uwu. Pakuyowoya za uteŵeti wakujipeleka ku Wallkill, iwo ŵakati: “Usange mwajipeleka kukateŵetera ku Wallkill, muzamuwona umo mzimu wa Yehova ukovwilira ŵateŵeti ŵake.” Kasi mukwenera kuchitachi kuti namwe mukateŵetereko? Dale wakati: “Mukwenera kusintha vinthu vinyake pa umoyo winu. Para mwachita nthena, muzamudandaurapo yayi.” Gary, wa ku North Carolina, wagwira ntchito ya kuzenga vyaka 30. Iyo na muwoli wake Maureen, ŵakayowoya chimoza mwa vitumbiko ivyo ŵasanga ku Warwick. Ŵakati: “Tikukondwa chomene kugwira ntchito na ŵabali na ŵadumbu awo ŵateŵetera pa Beteli vyaka vinandi.” Gary wakasazgirapo kuti: “Munthu uyo wakuteŵetera pa Beteli wakwenera kukukhumba vinandi yayi. Umoyo uwu ndiwo nguwemi mu mazuŵa ghaumaliro agha.” Jason, uyo wakagwiranga ntchito ya magesi, na Jennifer, ŵa ku Illinois, ŵakayowoya vya mulimo wa kuzenga ku Wallkill, ŵakati: “Mulimo uwu ukulongora umo umoyo uzamuŵira mu charu chiphya.” Jennifer wakasazgirapo kuti: “Ntchakukhozga chomene kumanya kuti Yehova wakuwonga mulimo uwo mukuchita. Iyo wawoneseskenge kuti wamutumbikani.”