1, 2. (a) Kasi tingachita wuli kuti tizakapone? (b) Kasi tingachita wuli kuti tileke kutimbanizgika paulendo withu?

PARA taŵa ŵasambiri ŵa Yesu, ndikuti tamba ulendo. Usange tilutilirenge kugomezgeka kwa Chiuta, tizamusanga umoyo wamuyirayira. Yesu wakati: “Uyo wazizipizga m’paka paumaliro [umaliro wa umoyo wake panji umaliro wa charu chiheni ichi] ndiyo wazamuponoskeka.” (Mat. 24:13) Paulendo uwu, tikwenera kuŵa maso kuti tileke kutimbanizgika na kusoŵa. (1 Yoh. 2:15-17) Kasi tingachita wuli kuti ulendo withu ulutilire?

² Yesu ndiyo ni mulongozgi withu paulendo uwu. Ivyo Yesu wakachita vili kulembeka mu Baibolo. Para tikuŵazga ivyo wakachita, timumanyenge makora. Timutemwenge na kuŵa na chipulikano mwa iyo.  (Ŵazgani 1 Petrosi 1:8, 9.) Mpositole Petrosi wakayowoya kuti Yesu wali kutilekera chiyelezgero kuti timulondezgenge mwakugomezgeka. (1 Pet. 2:21) Para tikulondezga mendero ghake mwakupwelelera, tizamuponoskeka. * Mu nkhani iyo yajumpha tikasambira umo tingaŵira ŵakujiyuyura na ŵalusungu nga ni Yesu. Mu nkhani iyi tiwonenge umo tingaŵira ŵachikanga na ŵamahara.

3. Kasi munthu wachikanga wakuŵa wuli? Kasi tingachita wuli kuti tiŵe ŵachikanga?

³ Munthu wachikanga wakuchita vinthu mwambura wofi. Wakuzizipizga, wakukoleska icho ntchiwemi, ndipo wakulutilira kuŵa na chipulikano para wasangana na masuzgo. Munthu wachikanga wakopa ŵanthu yayi kweni wakopa Chiuta. Wakuŵa na chigomezgo ndiposo wakutemwa ŵanji. Usange tikopa Chiuta topenge ŵanthu yayi. (1 Sam. 11:7; Zinth. 29:25) Chigomezgo chikutovwira kuzizipizga na kulindilira vinthu viwemi. (Sal. 27:14) Chitemwa chikutovwira kuŵa ŵachikanga nangauli umoyo withu ungaŵa pangozi. (Yoh. 15:13) Tikuŵa na chikanga para tikugomezga Chiuta na kulondezga Mwana wake.—Sal. 28:7.

4. Kasi Yesu wakalongora wuli chikanga apo wakaŵa “pakati pa ŵasambizgi” mu tempile? (Wonani chithuzithuzi chakwamba.)

⁴ Apo Yesu wakaŵa na vyaka 12, wakaŵa na chikanga. Iyo wakaŵa ‘mu tempele, pakati pa ŵasambizgi.’ (Ŵazgani Luka 2:41-47.) Ŵasambizgi aŵa ŵakalimanyanga makora Dango la Mozesi, kweni ŵakalondezganga maluso gha ŵanthu. Yesu wakawopanga yayi “kuŵafumba.” Ŵasambizgi ŵakazizikika na ivyo Yesu wakaŵafumbanga. Ŵakamufumba mafumbo ghakuti ghamutindike, kweni ŵakatondeka. Nadi, wose awo ŵakapulikizganga ‘ŵakazukuma chomene na kupulikiska kwake na mazgoro ghake.’ Ivyo Yesu wakazgoranga vikafumanga mu Mazgu gha Chiuta.

5. Kasi Yesu wakalongora wuli chikanga?

⁵ Yesu wakaŵa wachikanga apo wakaŵa pa charu chapasi. Wakasuska ŵaliska chifukwa ŵakapuluskanga ŵanthu na visambizgo vyautesi. (Mat. 23:13-36) Iyo wakachitangako yayi nkharo ziheni. (Yoh. 16:33) Wakalutilira kupharazga nangauli ŵanthu ŵakamususkanga. (Yoh. 5:15-18; 7:14) Iyo wakatozga tempile. Wakachimbizga wose awo ŵakabinkhiskanga malo ghakusoperamo.—Mat. 21:12, 13; Yoh. 2:14-17.

6. Kasi Yesu wakalongora wuli chikanga pa zuŵa laumaliro la umoyo wake?

⁶ Para tikusambira umo Yesu wakalongolera chikanga apo wakasuzgikanga chipulikano chithu chikukura. Pa zuŵa laumaliro la umoyo wake pa charu chapasi wakachita chikanga. Wakamanya kuti msambiri wake munyake wamupelekenge ku ŵalwani. Pa Paska, Yesu wakaphalira Yudasi kuti: ‘Icho ukukhumba kuchita chita mwaluŵiro.’ (Yoh. 13:21-27) Mu munda wa Getisemane, Yesu wakajiphara ku ŵasilikari awo ŵakiza kuzakamukora.  Yesu wakaŵa pangozi, kweni wakavikilira ŵasambiri ŵake kuti ŵaleke kukoleka. (Yoh. 18:1-8) Mu khoti la Sanihedirini, wakazgora mwachikanga kuti iyo ni Khristu, Mwana wa Chiuta. Iyo wakamanyanga kuti wasembe mulara wakapenjanga waka chifukwa chakumukomera. (Mrk. 14:60-65) Yesu wakagomezgeka m’paka nyifwa pa khuni lakusuzgikirapo. Apo wakaŵa pafupi kufwa, wakachemerezga kuti: ‘Chafiskika!’—Yoh. 19:28-30.

7. Ŵawukirano, kasi mukujipulika wuli kuti mukumanyikwa na zina la Yehova? Kasi mungalongora wuli kuti muli na chikanga?

⁷ Kasi tingaŵa wuli na chikanga nga ni Yesu? Ku sukulu. Ŵawukirano ŵangalongora kuti ŵali na chikanga usange ŵakujiphara kuti Mbakaboni ŵa Yehova nangauli ŵanyawo ŵakuŵaseka. Ichi chikulongora kuti ŵakunotha kumanyikwa na zina la Yehova. (Ŵazgani Salmo 86:12.) Ŵanyake ŵangayezga kuŵapuluska na chisambizgo chakuti vyamoyo vikachita kusintha. Kweni pali ukaboni wakukwana wakuti Baibolo likuyowoya unenesko. Burosha lithu linyake la Chingelezi (The Origin of Life—Five Questions Worth Asking) lingaŵawovwira kuti ŵalongosore makora ‘chigomezgo’ chawo. (1 Pet. 3:15) Ntheura ŵakukondwa chifukwa ŵakukhozgera unenesko wa mu Baibolo.

8. Chifukwa wuli tikupharazga mwachikanga?

⁸ Pakupharazga. Ŵakhristu ŵaunenesko ‘ŵakuyowoya na chikanga pakuŵa na mazaza kufuma kwa Yehova.’ (Mil. 14:3) Chifukwa wuli tikupharazga mwachikanga? Chifukwa tikupharazga unenesko wa mu Baibolo. (Yoh. 17:17) ‘Tili ŵantchito ŵanyake na Chiuta,’ ndipo mzimu utuŵa ukutovwira. (1 Kor. 3:9; Mil. 4:31) Para tikulimbikira kupharazga tikulongora kuti tili kujipeleka kwa Yehova ndiposo tikutemwa ŵanthu. (Mat. 22:37-39) Chikanga chizamutovwira kupharazga nanga vingasuzga. Tili ŵakunozgeka kovwira ŵanthu awo ŵajalika kumaso na visambizgo vyautesi. (2 Kor. 4:4) Tilutilirenge kupharazga makani ghawemi nangauli ŵanyake ŵangakana kutegherezga panji kutisuska.—1 Tes. 2:1, 2.

9. Kasi tingalongora wuli chikanga para tikusuzgika?

⁹ Pa masuzgo. Usange tikugomezga Chiuta tikuŵa na chipulikano kweniso chikanga kuti tizizipizge. Para mubali withu wafwa, tikuŵa na chitima, kweni tikutaya chigomezgo yayi. Tikugomezga kuti “Chiuta wa chisangulusko chose” watipenge nkhongono. (2 Kor. 1:3, 4; 1 Tes. 4:13) Usange talwara panji tachita ngozi, tikupulika vyakuŵinya, kweni tikukhomezga. Tikukana kupokera ndopa kweniso munkhwala uwo ŵakusazgako ndopa. (Mil. 15:28, 29) Nyengo zinyake “mitima yithu yingatisuska” kweni tikugomezga Chiuta uyo “wali pafupi na awo mbakuphyoka mu mtima,” lekani tikugongowa yayi. *—1 Yoh. 3:19, 20; Sal. 34:18.

10. Kasi umanyi ni vichi? Ndipo munthu waumanyi wakuchita wuli vinthu?

¹⁰ Munthu waumanyi wakupatura pakati pa chiwemi na chiheni na kusankha icho ntchiwemi. (Heb. 5:14) Mkhristu waumanyi wakuyowoya na kuchita vinthu ivyo vikukondweska Chiuta. Wakuyowoya vyakukondweska ŵanyake m’malo mwa kuyowoya mazgu ghakulasa. (Zinth. 11:12, 13) ‘Wakukalipa luŵiro yayi.’ (Zinth. 14:29) “Munthu waumanyi wakwenda mwakunyoroka” ndipo wakudemelera pa nthowa ya ku umoyo. (Zinth. 15:21) Tingawusanga wuli umanyi? Tikwenera kusambira Mazgu gha Chiuta na kulondezga ivyo tikusambira. (Zinth. 2:1-5, 10, 11) Ntchakuzirwa kughanaghanira umo Yesu wakachitira, chifukwa ndiyo munthu waumanyi kuluska waliyose.

11. Kasi ivyo Yesu wakayowoyanga vikalongora wuli umanyi?

¹¹ Ivyo Yesu wakayowoyanga na kuchita vikalongoranga umanyi. Kayowoyero. Pakupharazga makani ghawemi wakayowoyanga “mazgu ghawemi,” ndipo ŵanthu ŵakazizwanga na kasambizgiro kake. (Luka 4:22; Mat. 7:28) Nyengo zose wakasambizganga ivyo vili mu Mazgu gha Chiuta. (Mat. 4:4, 7, 10; 12:1-5; Luka 4:16-21) Para Yesu wakulongosora Malemba, ŵanthu ŵakapulikiskanga. Wakati wawuka ku ŵakufwa, wakalongozgana na ŵasambiri ŵake ŵaŵiri awo ŵakalutanga ku Emausi ndipo “wakaŵalongosolera vinthu vyakukhwaskana na iyo mu Malemba ghose.” Pamanyuma ŵasambiri aŵa ŵakati: “Asi mitima yithu yaphyanga [kuchontheka] apo wayowoyanga nase mu nthowa, apo watilongosoleranga Malemba makoraghene?”—Luka 24:27, 32.

12, 13. Kasi ntchivichi chikulongora kuti Yesu wakakwiyanga luŵiro yayi kweniso kuti wakalengeranga lusungu ŵakusuzgika?

¹² Nkharo yake. Yesu wakajikoranga, kweniso wakakalipanga luŵiro yayi. (Zinth. 16:32) Wakaŵa “wakuzika.” (Mat. 11:29) Wakaŵakalipiranga yayi ŵasambiri ŵake para ŵabudiska. (Mrk. 14:34-38; Luka 22:24-27) Wakaŵa wakuzika nangauli ŵakamusuzganga.—1 Pet. 2:23.

¹³ Yesu wakaghanaghaniranga ŵanthu chifukwa wakaŵa munthu waumanyi. Wakamanyanga Dango la Mozesi na icho likalembekera ndipo wakalilondezganga. Wonani ivyo lemba la Mariko 5:25-34 likuyowoya. (Ŵazgani.) Mwanakazi uyo wakasuluranga ndopa wakapolota mu ŵanthu na kukora munjilira wa Yesu, ndipo wakachira. Mwakuyana na Dango, mwanakazi uyu wakaŵa wakufipirwa, ntheura wakaŵa wambura kwenelera kukhwaska waliyose. (Lev. 15:25-27) Kweni Yesu wakamukalipira yayi chifukwa wakamanyanga “vinthu vyakuzirwa vya Dango” ivyo ni ‘urunji na chisungusungu.’ (Mat. 23:23) Yesu wakati: ‘Wamwana, chipulikano chako chakuchizga. Luta mumtende, ndipo uŵe makora kuulwari wako wakofya.’ Yesu wakamulengera lusungu mwanakazi yura chifukwa cha kumanya suzgo yake.

14. Kasi Yesu wakasankha vichi? Ntchivichi chikamovwira?

 ¹⁴ Umoyo wake. Yesu wakasankha kupharazga makani ghawemi. (Luka 4:43) Wakaŵika maghanoghano ghake ghose pa ntchito iyi. Wakaŵavya katundu munandi, ndipo nyengo zose wakateŵeteranga. (Luka 9:58) Yesu wakasambizga ŵasambiri ŵake kuti para iyo wafwa ŵalutizge ntchito iyi. (Luka 10:1-12; Yoh. 14:12) Wakati waŵenge nawo m’paka umaliro wa mgonezi.’—Mat. 28:19, 20.

15. Kasi munthu waumanyi wakuyowoya wuli?

¹⁵ Nase tingamuyezga Yesu. Kayowoyero. Tiyowoyenge vyakukhozga para tili na Ŵakhristu ŵanyithu. (Efe. 4:29) Para tikupharazga Ufumu wa Chiuta, mazgu ghithu ghaŵenge ‘ghakulungika na mchere.’ (Kol. 4:6) Tikusintha vyakuyowoya para tamanya umo munthu waliri. Ŵanthu ŵakukondwa para tayowoya mazgu ghawemi. Vyose ivyo tikusambizga vikufuma mu Baibolo. Tikuzunura mavesi na kuŵazga usange mphakwenelera. Tikumanya kuti ivyo Baibolo likuyowoya vikovwira kuluska mazgu ghithu.—Heb. 4:12.

16, 17. (a) Kasi tingachita wuli para munthu watikhuŵazga? (b) Kasi tingachita wuli kuti maghanoghano ghithu ghose ghaŵe pakupharazga?

¹⁶ Nkharo. Munthu waumanyi wakukwiya luŵiro yayi. (Yak. 1:19) Usange ŵanyithu ŵatikhuŵazga, tikuwona dankha icho ŵachitira nthena. Munthu waumanyi wakuwezga ukali na “kugowokera” uyo wamubudira. (Zinth. 19:11) Umanyi ungatovwiraso kuti tighanaghanirenge ŵanji. Tikumanya kuti Ŵakhristu ŵanyithu ŵangabuda chifukwa nawo vikuŵasuzga. Tikuŵategherezga na kukolerana nawo usange mphakwenelera.—Fil. 4:5.

¹⁷ Para Tikusankha Vyakuchita. Pakuti ndise ŵasambiri ŵa Yesu, tikumanya kuti ni mwaŵi ukuru kuphalirako ŵanthu uthenga uwemi. Nase tikwenera kulutilira kuŵika maghanoghano ghithu ghose pakupharazga. Tikudangizga vya Ufumu na kuleka kupenja vinthu vinandi kuti tipharazge mwakukwana makani ghawemi pambere umaliro undize.—Mat. 6:33; 24:14.

18. Kasi tingachita wuli kuti tilutilire kwenda pa ulendo wa ku umoyo? Kasi imwe mulutilirenge kuchita vichi?

¹⁸ Mu nkhani iyi tasambira nkharo ya Yesu. Tikwenera kulutilira kusambira kwa iyo na kumuyezga ndipo Yehova wazamutitumbika. Ntheura, tilutilirenge kwenda ulendo wa ku umoyo ndipo Yehova waŵenge mubwezi withu.