KWAMBA mu 1992, Wupu Wakulongozga ukusankha ŵabali ŵakukhwima mwauzimu kuti ŵawovwirenge mu makomiti ghake. * Ŵabali aŵa ŵakusankhika kufuma pakati pa “mberere zinyake,” ndipo ŵakovwira chomene Wupu Wakulongozga. (Yoh. 10:16) Sabata yiliyose ŵabali aŵa ŵakusangikapo pa ungano uwo komiti yawo yikuchita. Ŵakupeleka masachizgo agho ghakovwira Wupu Wakulongozga. Wupu Wakulongozga ndiwo ukuwona umo ungachitira na masachizgo agho ŵabali aŵa ŵakupeleka. Ŵabali awo ŵakovwira Wupu Wakulongozga, ŵakuwoneseska kuti ivyo Wupu Wakulongozga wadumura vikuchitika. Ŵabali aŵa ŵakujipeleka kuchita mulimo uliwose uwo ŵapika. Ŵakuluta na ŵabali ŵa mu Wupu Wakulongozga ku maungano ghapadera na ghamitundu yose. Nyengo zinyake ŵakutumika kukayendera maofesi gha minthavi nga Mbimiliri ŵa Ofesi Yikuru ya Ŵakaboni ŵa Yehova.

Mubali munyake uyo wateŵetera nga movwiri wa Wupu Wakulongozga kwamba mu 1992 wakati: “Para nkhuchita milimo iyo napika, nkhovwira Wupu Wakulongozga kuti uŵe na nyengo yakukwana yakupwelelera vinthu vyauzimu.” Mubali munyakeso uyo wachita uteŵeti uwu kwa vyaka 20 wakati: “Ni mwaŵi ukuru chomene kovwira Wupu Wakulongozga.”

Ŵabali awo ŵakovwira Wupu Wakulongozga ŵakuchita milimo yinandi, ndipo Wupu Wakulongozga ukuŵawonga chomene chifukwa ŵakuchita milimo yawo mwakugomezgeka. Mphanyi tose talutilira “kuwona ŵanthu ŵanthena kuŵa ŵakutemweka chomene.”—Fil. 2:29.