1, 2. Kasi ŵanthu ŵakupambana wuli na nyama?

WONGO wa munthu ngwakuzizika chomene. Mwachiyelezgero, wongo ukovwira munthu kusambira chiyowoyero. Para munthu wasambira chiyowoyero, wangaŵazga, kulemba, kuyowoya, kulomba, kwimba sumu zakulumba Yehova, kweniso kupulikiska ivyo vikuyowoyeka. Kweni vinyama vingachita chara vinthu ivi. Ndipo ŵasayansi ŵakumanya vyose yayi vyakukhwaskana na umo wongo ukugwilira ntchito.

² Chiyowoyero ntchawanangwa chakufuma kwa Yehova. (Sal. 139:14; Uvu. 4:11) Yehova wali kutilenga mu ‘chikozgo chake.’ Ichi chikutipangiska kuti tiŵe ŵakupambana na vinyama. Pakuti tili kulengeka mu chikozgo cha Chiuta, tili na wanangwa wakusankha. Tingasankha kuteŵetera na kulumba Yehova panji yayi.—Gen. 1:27.

3. Kasi Yehova watipa vichi icho chikutovwira kuti tiŵe na vinjeru?

³ Yehova watipa Baibolo kuti litovwire kumanya ivyo tingachita pakumuteŵetera na kumulumba. Baibolo likusangika mu viyowoyero vyakujumpha 2,800. Para tikughanaghanira ivyo tikusambira mu Baibolo, tiŵenge na maghanoghano  gha Chiuta. (Sal. 40:5; 92:5; 139:17) Fundo za Yehova zikutovwira kuti tiŵe na vinjeru ivyo vikulongozgera ku umoyo wamuyirayira.—Ŵazgani 2 Timote 3:14-17.

4. Kasi mazgu ghakuti ‘kughanaghanirapo’ ghakung’anamurachi? Kasi mu nkhani iyi tidumbiskanenge mafumbo wuli?

⁴ Mazgu ghakuti ‘kughanaghanirapo,’ ghakung’anamura kuŵika maghanoghano ghithu ghose pa chinthu chinyake. (Sal. 77:12; Zinth. 24:1, 2) Tikuŵa ŵakukondwa para tikughanaghanira vya Yehova na Yesu. (Yoh. 17:3) Mu nkhani iyi tidumbiskanenge mafumbo agha: Kasi tingachita wuli kuti tighanaghanirengepo pa ivyo tikuŵazga? Kasi ni vinthu wuli ivyo tikwenera kughanaghanirapo? Kasi ntchivichi chingatovwira kuti tighanaghanirenge vinthu vyauzimu nyengo zose?

5, 6. Kasi tingachita wuli kuti tipulikiskenge na kukumbukira ivyo tikuŵazga?

⁵ Pali vinthu vinyake ivyo munthu wakuchita kwambura kughanaghanirapo, nga ni kuthuta, kwenda, panji kutchova njinga. Kweni ntchachitima kuti nyengo zinyake para tikuŵazga tikughanaghanirapo yayi. Nyengo zinyake tikwamba kughanaghana vinthu vinyake uku tikuŵazga. Kasi tingachita wuli kuti tiŵikenge maghanoghano ghithu pa ivyo tikuŵazga? Nyengo zose para tikuŵazga tileke kutangwanika na vinthu vinyake, m’malo mwake tikwenera kuŵika maghanoghano ghithu ghose pa ivyo tikuŵazga na kupulikiska ng’anamuro lake. Para tafika paumaliro wa ndime, tikwenera kuyima dankha na kughanaghanirapo pa ivyo taŵazga. Pambere tindalute pa ndime yinyake, tiwoneseske kuti tapulikiska ivyo taŵazga.

⁶ Ŵasayansi ŵakuti kuŵazga mwakufumiska mazgu kukovwira munthu kuti wasungilire ivyo wakuŵazga. Mlengi withu Yehova, wakumanya fundo iyi, lekani wakaphalira Joshuwa kuti waŵazgenge buku la dango na ‘kughanaghanirapo.’ (Ŵazgani Joshua 1:8.) Kuŵazga Baibolo mwakufumiska mazgu kukutovwira kuti tiŵikenge maghanoghano ghithu pa ivyo tikuŵazga na kuvikumbukira.

7. Yowoyani nyengo yiwemi yakughanaghanira pa Mazgu gha Chiuta. (Wonani chithuzi chakwamba.)

⁷ Tikwenera kuyezgayezga kughanaghanirapo na kuŵika mahara ghithu ghose pa ivyo tikusambira. Munthu wangaŵika yayi maghanoghano pa ivyo wakuŵazga para wavuka panji wali pa malo apo pali vyakutimbanizga. Davide wakawukanga usiku kuti waghanaghanire vya Yehova. (Sal. 63:6) Yesu nayo wakalutanga ku malo ghambura vyakutimbanizga kuti wakaghanaghanire vya Yehova na kulomba.—Luka 6:12.

8. (a) Padera pa Mazgu gha Chiuta, kasi ni vinthu wuli vinyake ivyo tingaghanaghanirapo? (b) Kasi Yehova wakujipulika wuli para tikuphalira ŵanyithu vya iyo?

⁸ Pali vinthu vinandi ivyo tingaghanaghanirapo padera pa ivyo tikuŵazga mu Baibolo. Mwachiyelezgero, para mwawona vinthu vyakuzizwiska ivyo Yehova wali kulenga, ghanaghaniranipo na kujifumba kuti, ‘Kasi vinthu ivi vikunisambizgachi za Yehova?’ Usange mukughanaghanirapo ivyo Yehova wali kulenga, mumuwongenge para mukulomba. Kweniso muphalirenge ŵanyinu umo mukuwonera ivyo Yehova wali kulenga. (Sal. 104:24; Mil. 14:17) Yehova wakukondwa  chomene para tikughanaghanirapo, kumulomba, na kuphalira ŵanyithu vya iyo. Baibolo likuti: ‘Buku la chikumbusko la awo ŵakopa Yehova na awo ŵakughanaghanira zina lake likalembeka pamaso pake.’—Mal. 3:16.

9. (a) Kasi Paulosi wakamuphalira vichi Timote? (b) Kasi tingaghanaghanira vichi para tikunozgekera uteŵeti?

⁹ Paulosi wakaphalira Timote kuti waghanaghanirengepo pa ivyo wakuyowoya, nkharo yake, na umo wakusambizgira. (Ŵazgani 1 Timote 4:12-16.) Nga ni Timote, nase tikwenera kughanaghanirapo pa vinthu ivi. Para tikunozgekera kukasambizga munthu Baibolo, tikwenera kughanaghanira ivyo tamusambizga. Tighanaghanire umo msambiri withu waliri, tisankhe fumbo panji chiyelezgero icho tikuwona kuti chingamovwira kuti wakure mwauzimu. Para tikunozgekera chipulikano chithu chikhorenge, kweniso tiŵenge ŵaluso pakusambizga ŵanthu Baibolo. Kweniso tikwenera kunozgekera mu mtima withu pambere tindalute mu upharazgi. (Ŵazgani Ezra 7:10.) Buku la Milimo lili na fundo izo zingatovwira kuti tilimbikirenge kupharazga. Tinozgekerenge na kughanaghanirapo mavesi agho tamuŵerenga na mabuku agho tamugaŵira mu upharazgi. (2 Tim. 1:6) Tikweneraso kughanaghanira ŵanthu ŵa mu chigaŵa chithu na fundo izo tingayowoya kuti tiŵachonthe mtima. Kunozgekera mu nthowa iyi, kutovwirenge kuti tigwiliskirenge ntchito Baibolo mwaluso.—1 Kor. 2:4.

10. Kasi ni vinthu wuli vinyake ivyo mungaghanaghanirapo?

¹⁰ Kasi ni vichi vinyake ivyo mungaghanaghanirapo? Mungaweleramo fundo  izo mukulemba pa nyengo ya nkhani yachisanisani, maungano gha dera, na gha chigaŵa. Jifumbani kuti: Kasi nkhusambira vichi mu mazgu gha Chiuta na gulu lake? Mungaghanaghaniraso ivyo mwasambira mu magazini gha Gongwe la Mulinda na Wukani! panji mabuku ghaphya agho ghafuma pa ungano wa chigaŵa. Para mukuŵazga Buku Lapachaka, ghanaghaniranipo pa nkhani iyo yalongosoreka na kuwona umo yingamovwilirani. Para mukuŵazga mabuku ghithu, mungagwara mzere kusi kwa fundo yikuru, panji kulemba fundo mu mphepete mwa pepara. Ivi vingamovwirani apo mukunozgekera maulendo ghakuwelerako, maulendo ghauliska, panji para mukunozgekera nkhani. Para mukuyima na kughanaghanirapo pa ivyo mukuŵazga, muvisungilirenge ndipo muzamuwonga Yehova mu lurombo chifukwa cha vinthu viwemi ivyo mukusambira.

11. Kasi ni buku wuli lakuzirwa ilo tikwenera kuliŵazga na kughanaghanirapo, ndipo chifukwa wuli? (Wonani mazgu ghamusi.)

¹¹ Baibolo ni buku lakuzirwa ilo tikwenera kuliŵazga na kughanaghanirapo zuŵa lililose. Kweni kasi mungachita wuli usange muli mu ukhaliro wakuti mungaŵazga yayi Baibolo? * Palije uyo wangamukanizgani kughanaghanirapo pa fundo za mu Baibolo izo muli kusunga pa mtima. Mungasunga pa mtima mavesi gha mu Baibolo agho mukughatemwa kweniso sumu za Ufumu. (Mil. 16:25) Mzimu wa Chiuta ungamovwirani kukumbukira vinthu ivyo muli kusambira, ivyo vimovwiraninge kuti mulutilire kugomezgeka kwa Yehova.—Yoh. 14:26.

12. Kasi mungachita wuli kuti muŵazgenge Baibolo zuŵa lililose?

¹² Kasi mungachita wuli kuti muŵazgenge Baibolo zuŵa lililose? Mazuŵa ghanyake mukati mu sabata, mungalondezga ndondomeko ya kuŵazga Baibolo ya Sukulu ya Uteŵeti wa Chiuta na kughanaghanirapo fundo izo mwaŵazga. Mazuŵa ghanyake mungaŵazga na kughanaghanirapo nkhani zakulongosora umoyo wa Yesu izo zili mu mabuku gha Mateyu m’paka Yohane. (Rom. 10:17; Heb. 12:2; 1 Pet. 2:21) Tiliso na buku ilo likulongosora umoyo wa Yesu. Buku ili lingamovwirani chomene kuti mupulikiske fundo izo zili mu mabuku gha Mateyu m’paka Yohane.—Yoh. 14:6.

13, 14. Chifukwa wuli tikwenera kulutilira kughanaghanira vya Yehova na Yesu?

¹³ Tingaŵa Mkhristu wakukhwima para tikughanaghanira vya Yehova na Yesu. (Heb. 5:14; 6:1) Ubwezi withu na Yehova ungamara pachokopachoko usange tikuleka kughanaghanira vya iyo. (Heb. 2:1; 3:12) Yesu wakachenjezga kuti usange tikutondeka kupulika panji kupokelera Mazgu gha Chiuta na “mtima uwemi,” tingaghasungilira chara. M’malo mwake, tiyeghekenge na “vyenjezgo, mausambazi, na vyakukondweska vya umoyo uno.”—Luka 8:14, 15.

¹⁴ Ntheura tiyeni tilutilire kughanaghanirapo fundo za mu Baibolo kuti timumanye makora Yehova. Para tikuchita nthena timanyenge mikhaliro yake na kuyilondezga. (2 Kor. 3:18) Pali vinthu  vinandi vyakuti tisambire vya Yehova. Ndipo para tikulutilira kusambira vya iyo, timanyenge makora mikhaliro yake na kuyilondezga kwamuyirayira. Uwu ni mwaŵi wapadera chomene.—Muph. 3:11.

15, 16. (a) Kasi kughanaghanira vya Yehova na Yesu kukutovwira wuli? (b) Chifukwa wuli nyengo zinyake tingatondeka kughanaghanira vinthu vyakuzirwa, kweni chifukwa wuli tikwenera yayi kugongowa?

¹⁵ Kweniso kughanaghanira vya Yehova na Yesu kutovwirenge kulutilira kuŵa na mwamphu pakuteŵetera Chiuta. Para tili na mwamphu, tikhozgenge ŵabali ŵithu mu mpingo na kovwira ŵanthu awo tikuŵapharazgira. Tilutilirenge kukhozga ubwezi withu na Yehova, usange tikughanaghanira sembe ya Yesu. (Rom. 3:24; Yak. 4:8) Mubali Mark wa ku South Africa, wakakhala mu jele vyaka vitatu chifukwa cha chipulikano chake. Iyo wakati: “Munthu uyo wakughanaghanirapo ivyo wakusambira wakuyana na munthu uyo wali pa ulendo wakukondweska. Para tikulutilira kughanaghanira vinthu vyauzimu, tikumanya vinandi vya Chiuta withu, Yehova. Nyengo zinyake para nagongowa panji nkhwenjerwa na chinthu chinyake, nkhuŵazga Baibolo na kughanaghanirapo. Paumaliro mtima wane ukuŵa mu malo.”

¹⁶ Mu charu cha Satana ichi, muli vinthu vinandi vyakutangwaniska ivyo vingatitondeska kughanaghanira vinthu vyauzimu. Mubali Patrick wakati: “Nkhughanaghana vinthu vinandi chomene, vinyake ni vyakuzirwa ndipo vinyake ni vyambura kuzirwa. Ndipo zuŵa lililose nkhwenera kusankha ivyo ni vyakuzirwa. Kanandi nkhwenjerwa chomene ndipo nkhupempha Yehova kuti wanovwire kughanaghanira vinthu vyakuzirwa. Para nalomba na kughanaghanira vinthu vyauzimu, nkhujipulika kuti nili pafupi na Yehova. Ivi vikunovwira kupulikiska fundo za mu Malemba.” (Sal. 94:19) Para zuŵa lililose tikuŵazga Baibolo na kughanaghanirapo, tiŵenge paubwezi na Yehova.—Mil. 17:11.

17. Kasi ni nyengo wuli iyo imwe mukuŵazgira Baibolo na kughanaghanirapo?

¹⁷ Ŵanji ŵakuwuka mulenjilenji kuti ŵaŵazge, kughanaghanirapo, na kulomba. Ŵanyake ŵakuchita ivi pa nyengo ya muhanya. Ŵanyakeso ŵakuŵazga Baibolo na kughanaghanirapo pambere ŵandagone. Ŵanji ŵakutemwa kuŵazga Baibolo kaŵiri pa zuŵa, namlenji kweniso pambere ŵandagone. (Josh. 1:8) Kweni chakuzirwa ntchakuti “mugwiliskirenge ntchito makora nyengo yinu,” na kughanaghanira ivyo mukuŵazga mu Mazgu gha Chiuta zuŵa lililose.—Efe. 5:15, 16.

18. Kasi Yehova waŵalayizga vichi awo ŵakuŵazga Baibolo, kughanaghanirapo, na kuchita ivyo ŵakusambira?

¹⁸ Yehova wakulayizga kuti watumbikenge ŵanthu wose awo ŵakuŵazga Baibolo, kughanaghanirapo, na kuchita ivyo ŵakusambira. (Ŵazgani Salmo 1:1-3.) Yesu wakati: “Ŵakukondwa ni awo ŵakupulika mazgu gha Chiuta na kughasungilira!” (Luka 11:28) Para zuŵa lililose tikughanaghanirapo Mazgu gha Yehova, tichitenge vinthu mwakuyana na khumbo lake. Para tikuchita nthena, Yehova watovwirenge kuti tiŵe ŵakukondwa sono, kweniso tizamusanga umoyo wamuyirayira mu charu chiphya.—Yak. 1:25; Uvu. 1:3.