Kasi Mukukumbuka?
Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:
Para umaliro wafika, kasi ni vichi vinyake ivyo vizamumara?
Maboma gha ŵanthu, nkhondo, vinthu vyambura urunji, matchalitchi ghautesi, na ŵanthu ŵambura kusopa Chiuta.—5/1, peji 3-5.
Kasi Gogi wa Magogi uyo wakuzunulika mu buku la Ezekiyeli ni njani?
Gogi wa Magogi ni Satana yayi. Malemba ghakulongora kuti Gogi wa Magogi wakwimira kukolerana kwa ŵamitundu awo ŵazamuwukira ŵanthu ŵa Chiuta pa suzgo yikuru.—5/15, peji 29-30.
Kasi ni vinthu wuli 6 ivyo vingawovwira ŵachekuru kuŵa ŵakukondwa?
Baibolo likuti ŵachekuru ŵakwenera (1) kujichichizga yayi, (2) kuwoneka makora, (3) kudandawura yayi, (4) kuŵa ŵachigolo yayi, (5) kujipatura yayi, na (6) kuwonga. Fundo izi zingawovwira ŵachekuru kuŵa ŵakukondwa.—6/1, peji 8-10.
Kasi minthondwe iyo Yesu wakachita yikulongora wuli kuti wali na mtima wakupa?
Pa ukwati ku Kana, Yesu wakazgora maji pafupifupi malita 380 kuŵa vinyo. Nyengo yinyake wakaryeska ŵanthu ŵakujumpha 5,000. (Mat. 14:14-21; Yoh. 2:6-11) Minthondwe iyi yikulongora kuti Yesu wakayezganga Adada ŵake awo ŵali na mtima wakupa.—6/15, peji 4-5.
Kasi tingamukondweska Chiuta?
Yobu, Loti na Davide, nawo ŵakabudiskanga. Ndipouli, pakuti ŵakakhumbanga kuteŵetera Chiuta, ŵakajinyumwa na kusintha nkharo yawo, ndipo Yehova wakaŵagowokera. Nase para tabudiska, tikwenera kuchita nthena.—7/1, peji 12-13.
Kasi ŵanthu wose awo ŵali mu chisopa chautesi ŵazamufwa para Babuloni Mukuru wakuparanyika?
Yayi. Lemba la Zekariya 13:4-6 likulongora kuti ŵaliska ŵanyake ŵazamukana matchalitchi ghawo.—7/15, peji 15-16.
Chifukwa wuli Baraki wakakhumbanga kuti Debora walute nayo ku nkhondo?
Baraki wakagomezganga chomene Yehova. Ntheura m’malo mwa kupempha Yehova kuti wamupe vilwero vinandi vya nkhondo, Baraki wakawona kuti para wangaluta waka na Debora uyo wakaŵa mwimiliri wa Yehova, mbwenu nkhondo yamuŵayendera makora. (Ŵeru. 4:6-8; 5:7)—8/1, peji 13.
Kasi ni vinthu wuli vinyake ivyo tingaghanaghanirapo?
Ivyo Yehova wali kulenga, mazgu gha Chiuta, lurombo, na sembe ya Yesu.—8/15, peji 10-13.
Kasi ni vichi vingatovwira kuti tileke kusongana na ŵanthu ŵambura kusopa Chiuta?
Tikulengera lusungu munthu waliyose. Kweni para tingasongana na munthu uyo wandabatizike, mbwenu ndikuti tikususkana na fundo za Chiuta. (1 Kor. 15:33)—8/15, peji 25.
Kasi Petrosi wakataya wuli chipulikano chake, ndipo wakachita wuli kuti wachisangeso?
Petrosi wakaŵa na chipulikano, lekani wakamba kwenda pa maji pakuluta kwa Yesu. (Mat. 14:24-32) Kweni wakati wamba kudodoliska chimphepo, Petrosi wakachita wofi. Pamanyuma, Petrosi wakalaŵiskaso kwa Yesu kuti wamovwire.—9/15, peji 16-17.
Chifukwa wuli lemba la Milimo 28:4 likuti ŵanthu ŵa ku Melita ŵakatenge Paulosi ngwakukoma ŵanthu?
Chipiri chikati chaluma Paulosi, ŵanthu ŵa ku Melita ŵakawonanga kuti ichi ntchilango icho chafuma kwa chiuta wawo Dike, chiuta waurunji.—10/1, peji 9.
Kasi tikusambirako vichi kwa Marita?
Nyengo yinyake, Marita wakatangwanika kunozga chakurya chinandi. Yesu wakati munung’una wake wasankha makora, chifukwa wakategherezganga kwa iyo apo wakasambizganga. Nase tileke kutangwanika na vinthu vyambura kuzirwa ivyo vingatitondeska kuchita vinthu vyauzimu.—10/15, peji 18-20.