1, 2. Kasi mu nyengo yakale, Yehova wakawovwirapo wuli ŵanthu ŵanyake, ndipo ŵanji mazuŵa ghano ŵakughanaghana vichi para ŵalwara?

KASI mukalwarapo chomene na kujifumba kuti: ‘Kasi na munthu ine nichirenge?’ Nyengo zinyake para mubali winu panji mubwezi winu walwara chomene, mungajifumba kuti: ‘Kasi wachirenge?’ Palije uyo wakukhumba kulwara, tose tikukhumba umoyo uwemi. Baibolo likuyowoya za ŵanthu ŵanyake awo ŵakalwara chomene na kujifumba kuti, kasi nichirenge? Mwachiyelezgero, Themba Ahaziya, mwana wa Ahabu na Yezebeli, wati wapwetekeka wakakhumbanga kumanya usange wachirenge. Beni-hadadi, themba la Siriya, nayo wakati walwara, wakajifumba kuti: “Kasi nichirenge ku ulwari uwu?”—2 Mathe. 1:2; 8:7, 8.

² Baibolo likuti Yehova wakachizgapo mwamunthondwe ŵanthu ŵanyake awo ŵakalwara, kweniso wakawuska ŵanyake awo ŵakafwa. (1 Mathe. 17:17-24; 2 Mathe. 4:17-20, 32-35) Mazuŵa ghano, para ŵanthu  ŵanyake ŵalwara ŵakughanaghana kuti Yehova waŵachizgenge mwamunthondwe.

3-5. Kasi Yehova na Yesu ŵali na nkhongono wuli, ndipo tidumbiskanenge mafumbo wuli?

³ Yehova wali na mazaza pa thupi la munthu. Mwachiyelezgero, iyo wakalanga ŵanthu ŵanyake na nthenda. Mu nyengo ya Abrahamu, Yehova wakalanga Farawo. Nyengo yinyake wakalanga Miriyamu, mudumbu wa Mozesi. (Gen. 12:17; Maŵa. 12:9, 10; 2 Sam. 24:15) Kweniso wakalanganga Ŵaisrayeli na “ulwari panji nthenda yiliyose” para ŵatondeka kumupulikira. (Doto. 28:58-61) Nyengo zinyake Yehova wakawuskangapo matenda panji kuvikilira ŵateŵeti ŵake kuti ŵaleke kulwara. (Eks. 23:25; Doto. 7:15) Nyengo zinyake Yehova wakaŵachizganga para ŵalwara. Mwachiyelezgero, wakachizga Yobu uyo wakaŵa pafupi kufwa.—Yobu 2:7; 3:11-13; 42:10, 16.

⁴ Yehova wali na nkhongono zakuchizgira ŵalwari. Yesu nayo wali na nkhongono za nthena izi. Apo Yesu wakaŵa pa charu chapasi, wakachizga ŵavyoni na ŵavizilisi. Wakajura maso gha ŵachibulumutira, kweniso wakachizganga na ŵakufwa viŵaro wuwo. (Ŵazgani Mateyu 4:23, 24; Yoh. 9:1-7) Minthondwe iyi yikusimikizgira za vinthu viwemi ivyo Yesu wazamuchita mu charu chiphya. Pa nyengo iyo, “pazamuŵavya munthu wakukhala mu charu uyo wazamuti: ‘Nalwara.’”—Yes. 33:24.

⁵ Kasi para talwara tikwenera kukhazga kuti Yehova na Yesu ŵatichizgenge mwamunthondwe? Kasi tikwenera kughanaghanira vichi para tikusankha munkhwala?

6. Kasi Baibolo likuti wuli pa nkhani ya minthondwe?

⁶ Mu nyengo ya Ŵakhristu ŵakwambilira, Yehova wakaphakazga Ŵakhristu na mzimu utuŵa, ndipo ŵanyake wakaŵapa nkhongono zakuchitira minthondwe. (Mil. 3:2-7; 9:36-42) Ŵakachizganga ŵalwari na kuyowoya malulimi. (1 Kor. 12:4-11) Kweni Baibolo likati minthondwe iyi yizamumara. (1 Kor. 13:8) Ntheura mazuŵa ghano tileke kulindizga kuti Yehova watichizgenge mwamunthondwe para talwara.

7. Kasi lemba la Salimo 41:3, likutikhozga wuli para talwara?

⁷ Para mwalwara, manyani kuti Yehova wamusanguluskaninge na kumukhozgani nga umo kale wakachitiranga na ŵateŵeti ŵake. Themba Davide likalemba kuti: “Ngwakukondwa yose uyo wakughanaghanira munthu wakuyuyuka. Yehova wamuthaskenge mu zuŵa la soka. Yehova wamuvikilirenge na kumusunga wamoyo.” (Sal. 41:1, 2) Mu nyengo ya Davide namo ŵanthu ŵawemi ŵakalwaranga na kufwa. Chifukwa wuli Davide wakati Yehova wakovwira ŵanthu ŵawemi? Davide wakati: “Yehova wamufukatirenge pa bedi ilo wakulwalira. Musinthenge nadi chakugonapo chake pa ulwari wake.” (Sal. 41:3) Yehova wakumanya masuzgo agho ŵateŵeti ŵake ŵakukumana nawo, ndipo wakuŵaluwa chara. Wakuŵakhozga na kuŵapa vinjeru. Kweniso Yehova wali kupanga thupi la munthu munthowa yakuti lijichizgenge lekha.

8. Kasi Davide wakalomba vichi kwa Yehova pa Salimo 41:4?

⁸ Salimo 41 likutiphalira kuti nyengo yinyake Davide wakalwara na kulopwa chomene, ndipo wakenjerwanga. Kweniso pa nyengo iyi, mwana wake Abisalomu wakwenera kuti wakakhumbanga kupoka ufumu. Pakuti Davide wakalwara chomene,  wakatondeka kumukanizga Abisalomu. Davide wakamanya kuti masuzgo ghose agha ghakiza chifukwa cha ubudi uwo wakachita na Batisheba. (2 Sam. 12:7-14) Kasi Davide wakachita wuli na masuzgo agha? Wakalomba kuti: “A Yehova, nilongorani lusungu. Nichizgani, chifukwa namunangirani.” (Sal. 41:4) Davide wakamanyanga kuti Yehova wali kumugowokera zakwananga zake, lekani wakapempha kuti wamovwire. Kweni kasi Davide wakakhazganga kuti Yehova wamuchizgenge mwamunthondwe?

9. (a) Kasi Yehova wakamovwira wuli Hezekiya? (b) Kasi Davide wakakhumbanga kuti Yehova wamovwire wuli?

⁹ Nyengo zinyake Yehova wakachizganga ŵateŵeti ŵake. Wakachizga Themba Hezekiya apo likaŵa pafupi kufwa. Hezekiya wati wachira wakakhala vyaka 15. (2 Mathe. 20:1-6) Davide wakalomba kuti Chiuta wamuchizge mwamunthondwe yayi. Nkhani iyi yikulongora kuti Davide wakakhumbanga kuti Yehova wamovwire nga umo wakovwilira waliyose “uyo wakughanaghanira munthu wakuyuyuka.” Davide wakaŵa paubwezi na Yehova. Apo wakalombanga, wakakhumbanga kuti Yehova wamupwelelere pa ulwari wake na kovwira thupi lake kuti ligwire ntchito yake m’paka wachire. Para nase talwara tileke kulomba Yehova kuti watichizge mwamunthondwe, kweni tikwenera kumulomba kuti watipwelelere.—Sal. 103:3.

10. Kasi ivyo vikachitikira Tirofimo na Epafurodito vikutisambizgachi?

¹⁰ Nangauli mpositole Paulosi na ŵanyake ŵakapika nkhongono zakuchizgira ŵalwari mwamunthondwe, kweni nipera Ŵakhristu ŵakalwaranga na kufwa. (Ŵazgani Milimo 14:8-10.) Nyengo yinyake Paulosi wakalomba na kuŵika “mawoko ghake” pa awiske ŵa Pubuliyo na kuŵachizga. (Mil. 28:8) Kweni Paulosi wakachizganga waliyose yayi. Mwachiyelezgero, Mkhristu munyake uyo wakendera lumoza na Paulosi pa ulendo wa umishonale wakaŵa Tirofimo. (Mil. 20:3-5, 22; 21:29) Tirofimo wakati walwara, Paulosi wakamuchizga yayi. Mu malo mwake wakamuleka pa Mileto kuti wachire dankha. (2 Tim. 4:20) Paulosi wakamuchizgaso yayi Epafurodito uyo wakalwara m’paka pafupi kufwa.—Fil. 2:25-27, 30.

11, 12. Chifukwa wuli Luka wakawovwiranga Paulosi na ŵanyake para ŵalwara?

¹¹ Luka wakaŵa dokotala, ndipo nayo wakendanga na Paulosi. (Kol. 4:14; Mil. 16:10-12; 20:5, 6) Luka wakwenera kuti wakawovwiranga Paulosi na ŵanyake para ŵalwara pa ulendo wawo wa umishonale. (Gal. 4:13) Luka wakawovwiranga ŵanyake nga umo Yesu wakayowoyera kuti: “Awo ŵali makora ŵakukhumbikwira dokotala yayi, kweni ŵalwari ndiwo.”—Luka 5:31.

¹² Luka wakawovwiranga ŵanyake chifukwa wakaŵa dokotala. Baibolo likuyowoya yayi malo na nyengo iyo Luka wakasambilira udokotala. Kweni likuti Paulosi wakatumizga monire wa Luka ku Ŵakhristu ŵa ku Kolose. Panji Luka wakasambira udokotala ku Lawodikeya, msumba uwo ukaŵa pafupi na Kolose. Mu buku la Luka na Milimo, Luka wali kulembamo mazgu ghakukhwaskana na vya udokotala. Chifukwa chakuti wakaŵa dokotala, lekani wali kulembaso nkhani zinandi za umo Yesu wakachizgiranga ŵanthu.

13. Kasi tikwenera kukumbuka vichi para ŵanyithu ŵakutiphalira umo tingachitira na suzgo lithu?

 ¹³ Mazuŵa ghano, palije mubali uyo wangatichizga mwamunthondwe para talwara. Kweni nyengo zinyake ŵabali ŵangatiphalira umo tingachitira na suzgo lithu nangauli tindaŵapemphe kuti ŵatovwire. Ŵangachita nthena chifukwa cha kutighanaghanira. Ndipo vinthu vinyake ivyo ŵangatiphalira vingaŵa viwemi waka. Mwachiyelezgero, Paulosi wakaphalira Timote kuti wamwengepo vinyo pachoko. Timote wakaŵa na suzgo la munthumbo panji chifukwa wakamwa maji ghaheni. * (Ŵazgani 1 Timote 5:23.) Kweni tikwenera kuŵa maso. Nyengo zinyake mubali wangatikoserezga kuti timwe munkhwala unyake. Iyo wangati munkhwala uwu ukawovwirapo mubali wake. Panyake wangatiphalira kuti para tingarya panji kuleka kurya vyakurya vinyake, mbwee tiŵenge na umoyo uwemi. Kweni tileke kughanaghana kuti usange vikawovwirapo munthu munyake ndikuti vitovwirenge na ise wuwo, nakuti nyengo zinyake vingatipweteka waka. Tingaluwanga yayi kuti chakurya panji munkhwala uliwose uli na masuzgo ghake.—Ŵazgani Zintharika 27:12.

14, 15. (a) Kasi tikwenera kuŵa maso na ŵanthu wuli? (b) Kasi lemba la Zintharika 14:15 lingatovwira wuli?

¹⁴ Tose tikukhumbikwira umoyo uwemi kuti titeŵetere Yehova mwakukondwa. Ndipouli chifukwa cha kwananga kwa Adamu, tose tikulwara. Pali nthowa zinandi ziwemi zakuchizgira ndipo waliyose wakwenera kusankha yekha. Kweni chachitima ntchakuti ŵanyake ŵakuguliska mankhwala agho ŵakuti ghakuchizga nthenda yiliyose. Iwo ŵakukhumba waka ndalama. Ŵangayowoya kuti mankhwala ghawo ghawovwirapo ŵanthu ŵanandi. Para talwara tikuyezgayezga kuti tisange wovwiri. Kweni tingaluwanga yayi ivyo Baibolo likuyowoya. Likuti: “Munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.”—Zinth. 14:15.

¹⁵ Para ndise ŵakuchenjera tiŵenge maso na nthowa zakuchizgira, chomene usange munthu uyo wakutiphalira ni dokotala yayi. Tingajifumba kuti: “Kasi nthowa panji munkhwala uwo munthu uyu wakuniphalira, ukawovwira nadi ŵanthu awo wakuyowoya? Kasi namanya wuli kuti nane unovwirenge? Kasi nkhafumbe dankha dokotala?”—Doto. 17:6.

16. Kasi tikwenera kughanaghanira vichi para tikusankha munkhwala?

¹⁶ Usange tikusankha munkhwala tikwenera kuŵa “ŵamahara.” (Tito 2:12) Mahara ghangatovwira kusankha makora, chomene usange masachizgo agho tikuphalirika ngakukayikiska. Tingachita makora kumufumba uyo wakutipa masachizgo kuti walongosore umo munkhwala uwo ukugwilira ntchito. Kasi ivyo wakulongosora ni vyakukayikiska? Kasi madokotala ghakuzomerezga kuti munkhwala uwo ukuchizga nadi? (Zinth. 22:29) Nyengo zinyake munthu wangamuphalirani kuti kuli munkhwala unyake uwo ŵadokotala ŵakuwumanya yayi. Kweni kasi munkhwala uwo ulipo nadi? Ŵanthu ŵanyake ŵangapeleka  munkhwala uwo ukukolerana na masalamusi. Munkhwala wa nthena uwu nguheni, chifukwa Chiuta wakukana masalamusi.—Yes. 1:13; Doto. 18:10-12.

17. Kasi tose tikukhumba vichi?

¹⁷ Mu nyengo ya Ŵakhristu ŵakwambilira, wupu wakulongozga ukalembera kalata ŵabali. Kalata iyi yikalongosora vinthu vinyake ivyo ŵabali ŵakeneranga kutcheŵa, ndipo yikamara na mazgu ghakuti: “Vimuŵiraninge makora usange muziŵizgenge vinthu ivi. Tikumukhumbirani umoyo uwemi!” (Mil. 15:29) Mazgu agha, ghakutikumbuska kuti tingateŵetera makora Yehova para tili na umoyo uwemi.

18, 19. Kasi tikulindilira vichi munthazi?

¹⁸ Mazuŵa ghano, vingachitika yayi kuti tileke kulwara. Kweni para talwara, tikukhazga kuti Yehova watichizgenge mwamunthondwe yayi. Pasono tikulindilira charu chiphya umo muzamuŵavya matenda. Lemba la Chivumbuzi 22:1, 2 likuyowoya za “maji gha umoyo” na “makuni gha umoyo” agho ghazamuchizga munthu waliyose. Maji na makuni agha ghakwimira mankhwala gha mtundu uliwose yayi. Ghakwimira vinthu ivyo Yehova na Yesu ŵazamuchita kuti tiŵe na umoyo wamuyirayira.—Yes. 35:5, 6.

¹⁹ Tikulindilira mwakunweka nyengo iyo kuzamuŵavya mulwari. Kweni nanga ni sono tikumanya kuti Yehova wakutitemwa ndipo wakudandawura para talwara. Nga ni Davide, nase para talwara tikugomezga kuti Yehova watitayenge chara. Nyengo zose Yehova wasungilirenge ŵanthu awo ŵakumugomezga.—Sal. 41:12.