Sendelerani kwa Ciuta

Muliska Uyo Wakumupwelelerani

Mateyu 18:12-14

‘KASI Ciuta wakunipwelelera?’ Usange muli kujifumbapo fumbo ili, kuti ndimwe mwekha yayi. Taŵanandi tili kukumanapo na masuzgo, ndipo nyengo zinyake tikukayika usange Mlengi wa Cilengiwa cose wakuŵikako mahara ku masuzgo ghithu. Antheura, tikwenera kumanya usange Ciuta wakupwelelera munthu waliyose payekha. Pakuti Yesu wakumumanya makora Yehova, wakayowoya ntharika iyo yikulongora umo Ciuta wakupwelelera munthu waliyose payekha.

Yesu wakayowoya ntharika ya muliska wa mberere. Iyo wakati: “Usange munthu wali na mberere makhumi pera khumi, ndipo yimoza yazgeŵa, asi wakuzisida zinyake makhumi ghankhondi na ghanayi mukati zinkhondi na zinayi, na kuluta ku mapiri kuya kapenja iyo yazgeŵa? Ndipo para wayisanga, nadi nkhumunenerani, wakuyikondwera comene kwakuluska makhumi ghankhondi na ghanayi mukati zinkhondi na zinayi izo zambura kuzgeŵa. Ntheura pera Ŵawiskemwe ŵa kucanya ŵalije kukhumba kuti yumoza wa ŵacoko ŵeneaŵa watayike.” (Mateyu 18:12-14) Tiyeni tiwone umo Yesu wakalongolera kuti Yehova wakupwelelera musopi wake waliyose payekha.

Muliska wakamanyanga kuti wali na mulimo wa kupwelelera mberere yiliyose. Usange mberere yazgeŵa, wakamanyanga iyo palije. Mberere yiliyose wakayimanyanga na zina lake. (Yohane 10:3) Para mberere yazgeŵa, muliska wacitemwa wakayipenjanga mpaka wayisange na kwiza nayo ku zinyake. Pakupenja mberere yakuzgeŵa, muliska wakazijoworanga waka yayi mberere 99. Kanandi ŵaliska ŵakaliskanga pamoza mberere zawo. Antheura para muliska wawukapo kukapenja mberere iyo yazgeŵa, wakalekeranga ŵaliska ŵanji mberere zake kuti ŵazipwelelerenge. * Para mberere iyo yanguzgeŵa yasangika yindapwetekeke, muliska wakakondwanga comene. Wakayeghanga mberere iyo wayisanga pa ciŵegha na kuluta nayo uko kuli mberere zinyake.—Luka 15:5, 6.

Pakulongosora ng’anamuro la ntharika iyi, Yesu wakati Ciuta wakukhumba yayi kuti “yumoza wa ŵacoko ŵeneaŵa watayike.” Pambere wandayowoye ntharika iyi, Yesu wakacenjezga ŵasambiri ŵake kuti ŵaleke kukhuŵazga ‘yumoza wa aŵa ŵacoko, ŵeneawo ŵakapulikana [na iyo].’ (Mateyu 18:6) Ntheura, kasi ntharika iyi yikutisambizga vici? Yikutisambizga kuti Yehova wakupwelelera comene musopi wake waliyose, kusazgapo awo mu maso gha ŵanthu ŵakuwoneka kuti mbakuzirwa yayi. Mu maso gha Ciuta, musopi waliyose ngwapadera ndiposo ngwakuzirwa.

Usange mukukhumba kupanikizga kuti ndimwe ŵakuzirwa kwa Ciuta, mwalekeraci kuti musambire vinandi vyakukhwaskana na Muliska Mukuru, Yehova Ciuta, kuti musendelere kwa iyo? Para mungacita nthena, namwe muŵenge na cigomezgo nga ni ico mpositole Petrosi wakaŵa naco. Mwambura kukayika, Petrosi wakaŵapo apo Yesu wakayowoyanga ntharika ya mberere yakuzgeŵa. Petrosi wakalemba kuti: ‘Muthulirani [Ciuta] kwenjerwa kwinu kose, cifukwa wakumupwelelerani imwe.’—1 Petros 5:7.

[Mazgu ghamusi]