Mungaŵa Wakukondwa Nangauli Mungakhuŵazgika

KASI walipo uyo wandakhuŵazgikepo? Nanga ŵangaŵa Ŵadada ŵithu, Yehova Ciuta, ŵakukhuŵazgika. Mwaciyelezgero, Ciuta wakaponoska Ŵaisrayeli ku wuzga mu caru ca Eguputo ndipo wakaŵatumbika comene. Nangauli wakaŵatumbika, Baibolo likuti: “Kaŵirikaŵiri ŵakamusosomora Ciuta, na kumutopokeska moyo Mutuŵa wa Israyeli.” (Salmo 78:41) Nangauli Yehova wakukhuŵazgika, kweni iyo wakulutilira kuŵa wakukondwa.—1 Timote 1:11.

Pali vinandi ivyo vingatikhuŵazga. Kasi tingacita wuli kuti tilutilire kukondwa nangauli tingakhuŵazgika? Tiyeni tisambire umo Yehova wakucitira para wakhuŵazgika.

Ivyo Vikutikhuŵazga

Mazgu gha Ciuta ghakutiphalira kuti vinthu vyamabuci ‘vikuwira waliyose.’ (Mupharazgi 9:11) Mwamabuci kungacitika ngozi ndiposo tingalwara, vyose ivi vingatipangiska kuti tikwenyelere. Baibolo likutiphaliraso kuti: “Ico cagomezgeka kweni cacedwa kwiza cikulwariska mtima.” (Zintharika 13:12) Tikuŵa ŵakukondwa para tikulindilira cinthu cinyake ciwemi. Kweni para ico talindiliranga cacedwa, tingakhuŵazgika. Mwaciyelezgero, Duncan, * uyo wakakhumbanga kuŵa mishonale kwa umoyo wake wose, wakakhuŵazgika wakati wamanya kuti iyo na muwoli wake ŵakeneranga kuwelera kukaya kwawo, nangauli ŵakateŵetera vilimika vinandi mu uteŵeti wa umishonale. Duncan wakati: “Kwa nyengo yakwamba mu umoyo wane, nkhongono zikagululuka cifukwa cakucita cikasoŵa. Palije ico cikawoneka kuŵa cakuzirwa.” Nyengo zinyake munthu wakukhuŵazgika kwa nyengo yitali, nga ni umo vikaŵira na Claire. Iyo wakati: “Nkhanangika apo nkhaŵa na nthumbo ya myezi yinkhondi na yiŵiri. Pajumpha vilimika vinandi kufuma apo nkhanangikira, kweni sono, para nawona munyamata wakuseŵera, nkhughanaghana kuti, ‘Mwana wane waŵenge wamoyo, nthena wali msinkhu uwu.’”

Cingaŵa cakuŵinya comene usange munthu munyake wamukhuŵazgani. Mwaciyelezgero, mungakhuŵazgika para cibwezi camara, nthengwa yamara, mwana wagaluka, muli na  munyinu uyo ngwambura kugomezgeka, panji muli na mubwezi uyo wakuwonga yayi ivyo mukumucitira. Kweni pakuti tikukhala na ŵanthu ŵambura kufikapo, ndiposo mu nyengo zinonono, tingakhuŵazgika nyengo zinandi.

Vinthu ivyo tikutondeka kufiska navyo vingatikhuŵazga. Mwaciyelezgero, tingakhuŵazgika para tafeluka vilingwa, tatondeka kusanga nchito, panji tatondeka kuŵa pa cibwezi na munthu munyake. Tingakhuŵazgikaso usange mbali withu wakutondeka kukura mwauzimu. Mary wakuti: “Mwana wane msungwana wakacitanga makora comene mwauzimu. Nkhajipulikanga kuti nkhamupa ciyelezgero ciwemi. Kweni apo wakaleka kuteŵetera Yehova Ciuta, ndiposo kulondezga malango gha mbumba yithu, nkhajipulika kuti ndine wakutondekerathu. Nangauli nkhacitanga makora comene vinthu vinandi, kweni pa nyengo iyi vyose vikaŵa vyawaka. Nkhakhuŵazgika comene.”

Kasi tingacita wuli na vikhuŵazgo vyanthena ivi? Kuti tisange zgoro, tiyeni tisambire kwa Yehova umo iyo wakucitira para wakhuŵazgika.

Ghanaghanirani Nthowa Zakumazgira Masuzgo

Nangauli Yehova Ciuta wakapeleka kwa Adamu na Heva vyose vyakukhumbikwira pa umoyo wawo, iwo ŵakawonga yayi ivyo wakaŵacitira, ndipo ŵakagaluka. (Genesis, cipaturo 2 na 3) Pamanyuma pake mwana wawo, Kayini, wakazgoka mukali. Mwa kuleka kupulikira ulongozgi wa Yehova, Kayini wakakoma munung’una wake. (Genesis 4:1-8) Mwambura kukayika, Yehova wakakhuŵazgika na ivyo vikacitika.

Nangauli wakakhuŵazgika, cifukwa wuli Ciuta wakalutilira kuŵa wakukondwa? Cifukwa cakuti khumbo lake likaŵa lakuti pa caru capasi pakhalenge ŵanthu ŵakufikapo. Antheura iyo wakalutilira kufiska khumbo lake. (Yohane 5:17) Kuti wafiske cilato cake, wakanozga sembe yakuwombora kuti yipelekeke, ndiposo wakakhazikiska Ufumu wake. (Mateyu 6:9, 10; Ŵaroma 5:18, 19) Yehova Ciuta kuti wakaŵika maghanoghano ghake pa suzgo ilo likaŵapo yayi, kweni pa umo wangamazgira suzgo ilo.

Mwakuyana waka, Mazgu gha Ciuta ghakuticiska kuti tighanaghanenge vinthu viwemi, ndipo tileke kughanaghana pa vinthu ivyo tindacite makora. Baibolo likuti: “Ivyo vyose nvyakuneneska, ivyo vyose nvya nchindi, ivyo vyose nvya urunji, ivyo vyose nvituŵa, ivyo vyose nvyakutowa, ivyo vyose nvya lumbiri luwemi; usange kuli kazilwiro, usange kuli cakulumbika, ghanaghanani na vyeneivi.”—Ŵafilipi 4:8.

Tileke Kukhuŵazgika Mwakutalulira

Umoyo withu ungasintha mwamabuci. Mwaciyelezgero, nchito yingatimalira, muwoli panji mfumu withu wangafwa, panji tingaleka kucita milimo iyo pakwamba tikasangwanga nayo. Nyengo zinyake tingalwara, tingasoŵa pakukhala ndiposo tingaŵavya ŵabwezi. Kasi tingazizipizga wuli usange vinthu vingasintha nthena?

Ŵanyake ŵawona kuti cingaŵa cakovwira kucita vinthu ivyo ni vyakuzirwa. Duncan, uyo wazunurika kukwambilira wakuti: “Apo ine na muwoli wane tikamanya kuti tilutengeso yayi kukacita umishonale, tikakhuŵazgika comene. Pamanyuma tikasankha kucita vinthu vyakuzirwa viŵiri: Cakwamba, umo tingapwelelera Amama, ndipo caciŵiri, kulutilira kuŵa mu uteŵeti wa nyengo zose. Peneapo tikakhumbikwiranga kusankha vyakucita, tikaghanaghaniranga dankha umo ivyo tisankhenge vikhwaskirenge vinthu vyakuzirwa viŵiri ivyo tikatenge ticitenge. Antheura tikasuzgikanga viŵi yayi pa kusankha vyakucita.”

Para takhuŵazgika, taŵanandi tikutemwa kughanaghana vinthu viheni vinandi. Mwaciyelezgero, tingaghanaghana kuti tisuzgikenge comene pakulera mwana, kusanga nchito panji kupharazga makani ghawemi mu vigaŵa vinyake. Tingaghanaghana kuti, ‘Ine natondeka kale.’  Kweni, kumbukani kuti nangauli ŵanthu ŵakwamba ŵakamukhuŵazga Ciuta, iyo ngwakutondeka yayi. Mwakuyana waka, ndise ŵakutondeka yayi usange ivyo takhumbanga kucita vyatondeka.—Duteronome 32:4, 5.

Nchipusu kusunga vinthu kusingo usange takhuŵazgika na ŵanyithu. Kweni ndimo Yehova wakucitira yayi. Themba Davide likamukhuŵazga Ciuta apo likacita uleŵi, ndiposo apo likakomeska mfumu wa uyo wakacita nayo uleŵi. Yehova wakawona kung’anamuka mtima kwa Davide ndipo wakalutilira kumugwiliskira nchito nga ni muteŵeti wake. Mwakuyana waka, Themba lakugomezgeka Yehoshafati likanangira Ciuta apo likakolerana na ŵalwani ŵa Ciuta. Mprofeti wa Yehova wakati: “Kwa cifukwa ici ukali wakufumira kwa Yehova uli pa imwe. Kweni kawoneka kauwemi mwa imwe.” (2 Midauko 19:2, 3) Nangauli Yehoshafati wakabuda, ici cikang’anamura kuti wakamugalukira Yehova yayi. Mwakuyana waka, nase tingaleka kupambana na ŵabwezi ŵithu usange tasulako ubudi wawo. Ŵabwezi ŵithu awo ŵatikhuŵazga ŵali na mikhaliro yinyake yiwemi.—Ŵakolose 3:13.

Tingagega yayi vyakukhuŵazga peneapo tikukhumba kucita vinthu mwakwenelera. Tingajikhuŵazga usange tacita kwananga. Ndipouli, tingambaso kucita makora vinthu  usange taŵikapo mtima kucita nthena, ndiposo para taleka kuwelera nyuma. Apo Themba Davide likajikhuŵazga, likalemba kuti: “Thupi lane likaghandaghanda cifukwa ca kutampha kwane muhanya wose. . . Kwananga kwane nkhazomera panthazi pinu [Yehova] . . . ndipo penepapo mukagowokera uheni wa kwananga kwane.” (Salmo 32:3-5) Usange tacita ivyo Ciuta wakukhumba yayi, tikwenera kulomba kuti watigowokere. Ndiposo, tikwenera kusintha nkharo yithu na kulondezga ulongozgi wake mwakupwelelera.—1 Yohane 2:1, 2.

Nozgekerani Umo Muzamucitira na Vikhuŵazgo

Mwambura kukayika, tose tizamukhuŵazgikapo zuŵa linyake. Kasi tinganozgekera wuli vikhuŵazgo? Tingasambirako kanthu ku fundo izo wakayowoya Bruno, Mkhristu mucekuru, uyo vikhuŵazgo vikasintha umoyo wake. Bruno wakati: “Kuti nilimbane na vikhuŵazgo, cinthu cakuzirwa ico nkhayamba kale kucita ndico kukhozga ubwezi wane na Ciuta. Nkhumanya cifukwa ico Ciuta wazomerezgera kuti mgonezi uwo wulipo sono wulutilire. Nakhozga ubwezi wane na Yehova kwa vilimika vinandi. Sono nkhujipulika makora comene cifukwa umoyo wane wauzimu ngwakukhora. Kweniso, fundo yakuti Yehova wali nane yikunikhozga comene kuti nizizipizge vikhuŵazgo.”

Peneapo tikughanaghanira vyamunthazi, tisimikizge fundo iyi: Nangauli tingajikhuŵazga panji ŵanji kutikhuŵazga, kweni Ciuta wazamutikhuŵazgapo yayi. Nakwenenako, Ciuta wakayowoya kuti zina lake, lakuti Yehova, likung’anamura kuti iyo wangaŵa cilicose ico iyo wakhumba. (Exodus 3:14) Fundo iyi yikutikhozga cifukwa tikumanya kuti Ciuta wangaŵa cilicose mwakuti wafiske vilayizgo vyake. Kwizira mu Ufumu wake, iyo walayizga kuti khumbo lake lizamucitika “pano pasi, nga nkhucanya.” Ndico cifukwa cake Paulosi wakalemba kuti: “Ndakhorwa ine kuti nanga ndi nyifwa, panji umoyo, nesi ŵangelo, nesi maufumu, . . . nesi cakwatika cinyake, citi cimanyenge cara kutipatura ku kutemwa kwa Ciuta, uko kuli mwa Khristu Yesu.”—Mateyu 6:10; Ŵaroma 8:38, 39.

Tikulaŵiska munthazi mwakunweka peneapo tikulindilira kufiskika kwa layizgo la Ciuta, ilo wakayowoya kwizira mwa Yesaya kuti: “Nkhulenga mtambo uphya na caru ciphya; vya kale ntha vikumbukikenge panji kunjiraso mu mtima.” (Yesaya 65:17) Nchakukondweska comene kuti nyengo yizenge, peneapo vikhuŵazgo vyose vizamumalirathu khoo!

[Mazgu ghamusi]

[Mazgu Ghakukhozgera pa peji 13]

Usange tajikhuŵazga cikung’anamura kuti ndise ŵakutondeka yayi

[Mazgu Ghakukhozgera pa peji 14]

Mazgu gha Ciuta ghakuticiska kuti tighanaghanenge pa vinthu viwemi, ndipo tileke kughanaghana pa ivyo tatondeka kucita makora

[Cithuzithuzi pa peji 15]

Ciuta ngwakukondwa cifukwa cilato cake cizamufiskika nangauli ŵanthu ŵakumubudira

[Cithuzithuzi pa peji 16]

Kucita vinthu ivyo ni vyakuzirwa kutovwirenge kulimbana na vikhuŵazgo