Umo Ŵakhristu Ŵakwambilira Ŵakakhaliranga

‘Ŵakucita Milimo pa Nyumba’

“Sono apo ŵakendanga pa ulendo wawo, wakanjira mu muzi unyake. Kura mwanakazi yunji zina lake Marita wakamupokelera kuŵa mulendo mu nyumba yake. Mwanakazi uyu wakaŵaso na munung’una wake zina lake Mariya, mweneuyo wakakhala musi mu malundi gha Fumu ndipo wakapulikizganga mazgu ghake. Kweni Marita, wakatimbanizgika, wakatangwanika na milimo yinandi. Sono wakiza pafupi ndipo wakati: ‘Fumu, kasi vilije kanthu kwa imwe kuti munung’una wane wanilekera nekha kucita vinthu? Ntheura muphalirani kuti wazakanovwireko.’ Pakuzgora Fumu yikati kwa iyo: ‘Marita, Marita, ukwenjerwa na kukweŵeka na vinthu vinandi. Kweni vinthu vicoko waka vikukhumbikwa, panji cimoza pera. Mariya wasora cigaŵa ciwemi, ndipo citolekengeko kwa iyo cara.’”—LUKA 10:38-42.

NCHAKUWONEKERATHU kuti Marita wakaŵa mwanakazi wakulimbikira nchito. Ŵanji ŵakwenera kuti ŵakamulumbanga comene. Kuyana na mutheto wa Ŵayuda, mwanakazi ni uyo wakalimbikiranga nchito za pa nyumba ndiposo kupwelelera mbumba yake.

Ŵanakazi Ŵacikhristu nawo ŵakaciskikanga kuti “ŵacitenge milimo pa nyumba.” (Tito 2:5) Kweni ŵakaŵaso na mulimo wa kusambizga ŵanji ivyo ŵakagomezganga. (Mateyu 28:19, 20; Milimo 2:18) Kasi ni “milimo” wuli yinyake iyo  mwanakazi Waciyuda wakeneranga kucita? Kasi ivyo Yesu wakayowoya vyakukhwaskana na Mariya vikutisambizgaci?

‘Kutangwanika na Milimo Yinandi’ Mwanakazi wakutengwa Waciyuda wakwenera kuti wakawukanga kucali viluvilu. (Zintharika 31:15) Para waphikira bala mbumba yake, mutepanji wakapelekezganga ŵana ŵake ŵasepuka ku sukulu ya sunagoge. Ŵana ŵake ŵasungwana ŵakakhalanga pa nyumba kuti ŵasambizgike nchito mwakuti ŵakacitenge makora ku nthengwa zawo.

Mama na ŵana ŵake ŵasungwana ŵakambanga kucita milimo yinyake ya pa nyumba nga nkhuthira mafuta mu koloboyi (1), kuphyera (2), na kukama mkaka wa mbuzi (3). Pamanyuma, ŵakaphikanga cingwa ico ŵaryenge pa zuŵa ilo. Ŵasungwana ŵakapetanga tirigu kuti ŵawuskeko mwelero (4), pamanyuma ŵakasiranga pa lwara (5). Mama wakasazganga ufu na cilungo na kuthirako maji. Wakakasanga (6) para wamara kukasa wakavilekanga kuti vitukumuke, uku wakucitako milimo yinyake. Ŵasungwana ŵakapanganga cambiko (7) ca mkaka wa mbuzi ico ŵakamwanga pa cakurya ca namise.

Para zuŵa lakwerako, mutepanji mama na ŵana ŵake ŵasungwana ŵakalutanga ku msika. Ku msika ŵakapulikanga sungu la vinthu vyakupambanapambana, kulira kwa vinyama, ŵakugura ŵakudumbiskana mtengo na ŵakuguliska. Ndipo mama wakaguranga vinthu vyakukhumbikwa ku nyumba yake pa zuŵa ilo (8). Nyengo zinyake wakaguranga mphangwe na somba zakwanika. Usange ni Mkhristu, wakweneraso kuti wakaphalirangako ŵanji ivyo wakagomezganga.—Milimo 17:17.

Pakuluta na kuwera ku msika, mama wamahara wakasangirangapo mwaŵi wa kusambizga ŵana ŵake na kuŵawovwira kuti ŵazirwiskenge fundo za mu Malemba. (Duteronome 6:6, 7) Wakaŵasambizgangaso kuti nawo ŵazakagurenge vinthu mwamahara para ŵakura.—Zintharika 31:14, 18.

Mulimo unyake uwo ŵanakazi ŵakacitanga zuŵa lililose nkhunegha maji ku cisimi (9). Ŵakaneghanga maji ghakugwiliskira nchito pa nyumba kweniso ŵakacezganga na ŵanyawo awo ŵakaŵasanganga ku cisimi. Para ŵawera ku cisimi, mama na ŵana ŵake ŵasungwana ŵakambanga kuphika cingwa. Cakwamba, ŵakapanganga vibama na kuviŵika mu uvuno wakuthukira kale (10) uwo kanandi ukaŵanga kuwaro. Pakulindilira kuti cingwa ciphye, ŵakacezganga uku kasungu ka vingwa kali guu.

Pamanyuma, ŵakalutanga ku mlonga kukacapa malaya (11). Ŵakacapiranga vyoto vya vyakumera vinyake. Para ŵasukuluzga na kukamata, ŵakanikanga mu vivwati na mu malibwe.

 Para ŵawerako kukacapa, mama na ŵana ŵake ŵasungwana ŵakakweranga pa mtenje wa nyumba kuti ŵasone (12) malaya ghakukeluka pambere ŵandaghaŵike. Pamanyuma, ŵasungwana ŵakasambizgikanga kuluka (13). Kufuma apo, wakambanga kuphika cakurya ca namise (14). Ŵayuda ŵakatemwanga comene kupokelera ŵalendo, ntheura mbumba zikaŵa zakunozgeka kurya cakurya pamoza na ŵalendo awo ŵangiza. Cakurya cikaŵanga cingwa, mphangwe, cambiko, somba, na maji ghakumwa.

Pambere ŵana ŵandagone, awo ŵajipweteka mama wakaŵaphakanga mafuta pa cilonda. Pamanyuma, uku koloboyi wali kupikupi, ŵapapi ŵakaphaliranga ŵana ŵawo nkhani ya mu Malemba na kulomba. Para ŵana ŵagona, mwanalume wakaŵa na cifukwa cakupulikikwa cakuwongera muwoli wake na mazgu ghakumanyikwa makora ghakuti: “Ndinjani wangasanga mwanakazi wamagomezgeka? Mtengo wake ukujumpha mtengo wa mawe ghaswesi ghamtengo.”—Zintharika 31:10.

Kusora “Cigaŵa Ciwemi” Kwambura kukayika, ŵanakazi awo ŵakalimbikiranga nchito ŵakaŵa na “milimo yinandi” iyo ŵakatangwanikanga nayo. (Luka 10:40) Mazuŵa ghano napo, ŵanakazi, comenecomene awo ŵali na ŵana, mbakutangwanika comene. Mazuŵa ghano, mashini ghapepuskako nchito zinyake za pa nyumba. Kweni, padera pa kupwelelera mbumba zawo, ŵamama ŵanandi ŵakucicizgika kugwira nchito yakulembeka.

Nangauli mazuŵa ghano ŵanakazi Ŵacikhristu ŵakukumana na masuzgo, kweni ŵakulondezga ivyo Mariya uyo wazunulika kukwambilira kwa nkhani iyi wakacita. Ŵakuzirwiska comene vinthu vyauzimu. (Mateyu 5:3) Ŵakupwelelera makora mbumba zawo, nga umo Malemba ghakuŵaciskira. (Zintharika 31:11-31) Kweniso ŵakulondezga fundo iyo Yesu wakaphalira Marita. Pakuti Marita wakatemwanga vinthu vyauzimu, wakasunga ivyo Yesu wakamuphalira. Ŵanakazi Ŵacikhristu ŵakuzomerezga yayi kuti milimo ya pa nyumba yiŵatangwaniske kusambira vya Ciuta (15) panji kuphalirako ŵanji cipulikano cawo. (Mateyu 24:14; Ŵahebere 10:24, 25) Ntheura, ŵakusora “cigaŵa ciwemi.” (Luka 10:42) Lekani mbakuzirwa comene kwa Ciuta, Khristu, ndiposo ŵa mu mbumba zawo.—Zintharika 18:22.