Baibolo Likusintha Umoyo wa Ŵanthu

NCHIVICI cikacitiska Rasi kuti wamete madiledi ghake kweniso kuti waleke kutinkha ŵazungu? Cifukwa wuli muwukirano wambembe uyoso ŵanthu ŵakuguliska minkhwala yakuzweteska wongo ŵakamutumanga kukaŵapokera ndalama wakasintha umoyo wake? Wonani ivyo iwo ŵakuyowoya.

“Nkhaleka Kutinkha Ŵazungu.”—HAFENI NGHAMA

VILIMIKA: 34

UKO WAKABABIKIRA: ZAMBIA

IVYO WAKACITANGA: WAKAŴA RASI

UMO NKHAŴIRA KALE: Nkhababikira ku Zambia, pa msasa wa ŵanthu wakucimbira kukwawo. Amama ŵakaŵa kuti ŵacimbira nkhondo ku Namibia ndipo ŵakanjira wupu wa South West Africa People’s Organization (SWAPO). Wupu uwu ukalimbananga na muwuso wa caru ca South Africa, ico pa nyengo iyo cikawusanga Namibia.

Kwa vilimika 15 kufuma apo nkhababikira, nkhakhalanga mu misasa yakupambanapambana. Ŵana awo ŵakakhalanga mu misasa ya ŵanthu ŵa mu wupu wa SWAPO ŵakasambizgikanga kulwera wanangwa wawo. Tikasambizgika ndyali, kweniso kuti titinkhenge ŵazungu.

Apo nkhaŵa na vilimika 11, nkhakhumbanga kuŵa Mkhristu wa Chalichi la pa msasa ilo likaŵa la visopa vyakusazgikana nga ni Katolika, Lutheran, Angilikani, na visopa vinyake. Muliska uyo nkhadumbiskana nayo wakanigongoweska. Kufuma pa nyengo iyo, nkhamba kukayika kuti kuli Ciuta. Kweni apo nkhaŵa na vilimika 15, nkhamba kutemwa comene sumu za rege ndipo nkhakhumbanga comene kumazga masuzgo agho ŵanthu ŵafipa ŵakukumana nagho, ntheura nkhamba Urasi. Nkhamba kusunga madiredi, kukhweŵa camba, kulwera wanangwa wa ŵanthu ŵafipa, ndiposo nkhaleka kurya nyama. Kweni nkhaleka yayi kucita viheni ndiposo kuwonelera mafilimu gha mbembe. Kweniso, nkhalutilira kutuka.

UMO BAIBOLO LIKASINTHIRA UMOYO WANE: Mu 1995, apo nkhaŵa na vilimika 20, nkhamba kughanaghanirapo comene za umoyo wane. Nkhaŵazganga mabuku ghose gha Ŵarasi agho naghasanga. Ghanyake mwa mabuku agha mukaŵanga mavesi gha mu Baibolo, kweni umo ŵakaghalongosoleranga, nkhatorangapo cilicose yayi. Ntheura nkhaghanaghana kuti niŵazge waka nekha Baibolo.

Nyengo yikati yajumphapo, mubwezi wane uyo nayo wakaŵa Rasi wakanipa buku lakulongosora Baibolo lakulembeka na Ŵakaboni ŵa Yehova. Nkhaliŵazga panekha ndipo nkhajuranga mavesi agho ghakaŵamo. Pamanyuma, nkhakumana na Ŵakaboni ŵa Yehova ndipo ŵakamba kunisambizga Baibolo.

 Mwakusuzgikira, nkhaleka kukhweŵa hona na kugubulizga phere. (2 Ŵakorinte 7:1) Nkhamba kujipwelelera, nkhameta madiredi, nkhaleka kuwona vithuzithuzi vyamuziro, mafilimu gha mbembe, kweniso nkhaleka kutuka. (Ŵaefeso 5:3, 4) Nyengo yikati yajumphapo, nkhaleka kutinkha ŵazungu. (Milimo 10:34, 35) Kuti ivi vicitike, nkheneranga kutaya sumu izo zikukhuŵilizga sankho, ndiposo kuleka kwendezgana na ŵabwezi ŵane ŵakale awo mphanyi ŵakanipangiska kuweleraso ku nkharo zane zakale.

Nati naleka mikhaliro yose iyi, nkhafumba uko kuli Nyumba ya Ufumu ya Ŵakaboni ŵa Yehova ndipo nkhapempha kuti ninjire cisopa ici. Apo nkhaghanaghana kuti nibapatizike na kuŵa yumoza wa Ŵakaboni ŵa Yehova, ŵa mu mbumba yane ŵakakondwa yayi. Amama ŵakaniphalira kuti nisankhe cisopa cinyake “Cacikhristu” kweni Ŵakaboni ŵa Yehova yayi. Asibweni ŵane ŵa nyumba yinyake, awo ŵakaŵa ŵakumanyikwa mu boma, kanandi ŵakaninenanga cifukwa cakuti nkhawungananga na Ŵakaboni.

Ndipouli, kulondezga ivyo nkhasambira vyakukhwaskana na umo Yesu wakacitiranga na ŵanthu kukanovwira comene kuti nizizipizge apo ŵabali ŵane ŵakanisuskanga na kuninena. Apo nkhayaniskanga ivyo Ŵakaboni ŵakusambizga na ivyo Baibolo likuyowoya, nkhakhorwa kuti nasanga cisopa caunenesko. Mwaciyelezgero, ŵakulondezga dango la mu Baibolo lakuti tipharazgirenge ŵanji. (Mateyu 28:19, 20; Milimo 15:14) Kweniso ŵakunjira ndyali yayi.—Salmo 146:3, 4; Yohane 15:17, 18.

UMO NASANGIRA CANDULO: Kulondezga fundo za mu Baibolo kwanovwira comene. Mwaciyelezgero, ndalama zinandi comene izo mwezi uliwose nkhanangiranga pa camba, sono zikupona cifukwa nili kuleka kukhweŵa. Nili kuleka kuwona vizgezge, kweniso thupi na wongo wane vili makora.

Sono nkhumanya ico nkhucita ndiposo uko nkhurazga. Ivi ndivyo nkhadokeranga kufuma pa uwukirano wane. Kweni cakuluska vyose nchakuti sono nkhuwona kuti nasendelera kwa Ciuta.—Yakobe 4:8.

“Nasambira Kujikora.”—MARTINO PEDRETTI

VILIMIKA: 43

UKO WAKABABIKIRA: AUSTRALIA

IVYO WAKACITANGA: KUGULISKA MINKHWALA YAKUZWETESKA WONGO

UMO NKHAŴIRA KALE: Mbumba yithu yikendendekanga comene apo nkhaŵa muwukirano. Nili kukhalapo mu maboma, mu tawuni yikuru, ndiposo pa chalichi linyake la ku mizi. Nicali kukumbuka makora kuti nyengo iyo, ine, ŵavyara ŵane, na ŵasibweni tikaŵejanga, kuzengera, na kuŵaja vinthu.

Adada ŵakacitanga maseŵera gha mbembe ndipo ŵakamba kunisambizga kutimba nicali mucoko. Nkhaza zikaŵa  cakurya cane. Apo nkhaŵa muwukirano, nkhakhaliranga waka kumwa phere mu mabara. Ine na ŵabwezi ŵane tikapenjerezganga nthowa izo tingambiskira mbembe. Kuti titimbe ŵanthu 20 panji kujumpha apa, tikagwiliskiranga nchito vimayi na tunthonga.

Kuti nisange ndalama, nkhaguliskanga minkhwala yakuzweteska wongo na katundu uyo ŵanthu ŵakugwira nchito pa jiti ŵakibanga. Kweniso, ŵanthu ŵakuguliska minkhwala yakuzweteska wongo ŵakanitumanga kukaŵapokera ngongoli zawo. Pakukapoka ngongoli izi, nkhaŵawofyanga na futi. Nkhaŵa na cilato cakuti kunthazi nizakakomenge ŵanthu. Nkhenderanga fundo yakuti, “Wafwawafwa.”

UMO BAIBOLO LIKASINTHIRA UMOYO WANE: Apo nkhaŵa muwukirano, nkhapulikapo za Ŵakaboni ŵa Yehova. Nkhukumbuka kuti apo nkhaŵa na vilimika vya m’ma 20, nkhafumba amama usange ŵakumanya uko kuli Ŵakaboni. Pakati pajumpha mazuŵa ghaŵiri, Dixon, uyo njumoza wa Ŵakaboni ŵa Yehova, wakiza pa nyumba yane. Tikati tadumbiskana kwakanyengo, wakanicemera ku maungano gha Ŵakaboni ŵa Yehova. Nkhaluta ku maungano, ndipo mpaka sono nicali kuluta nangauli pajumpha vilimika 20. Ŵakaboni ŵakanizgora fumbo lililose ilo nkhaŵa nalo mwakunijulira Baibolo.

Nkhakondwa comene kumanya kuti Yehova wakutemwa ŵanthu, nanga ni awo ŵakuleka kumusopa. (2 Petrosi 3:9) Nkhamanya kuti nanga wose ŵanganitaya, Yehova ni Dada uyo wanganipwelelera. Kweniso nkhapembuzgika kumanya kuti wanganigowokera zakwananga zane usange ningasintha nkharo yane. Lemba la Ŵaefeso 4:22-24 likanovwira comene. Likanovwira kuti ‘niwuskeko wunthu wakale’ na ‘kuvwara wunthu uphya uwo ukalengeka mwakuyana na khumbo la Ciuta.’

Vikanitolera nyengo kuti nisinthe umoyo wane. Nkhakhalanga sabata yose kwambura kumwa munkhwala wakuzweteska wongo, kweni kuumaliro wa sabata, nkhamwangapo para nili na ŵabwezi ŵane. Nkhamanya kuti usange nkhukhumba nadi kuleka umoyo wane wakale nkhwenera kulekana na ŵabwezi ŵane ŵakale, ntheura nkhaghanaghana kusamira ku cigaŵa cinyake. Ŵabwezi ŵane ŵanyake ŵakajipeleka kuti tilutire lumoza ndipo nkhazomera. Apo tikaŵa paulendo, ŵakamba kukhweŵa camba ndipo ŵakakhumbanga kuti nane nikhweŵeko. Kweni nkhakana ndipo nkhaŵaphalira kuti nkhusama cifukwa nkhukhumba kuleka vizgoŵi viheni ivi. Ntheura, tikati tafika pa boda, tikalekana. Pamanyuma nkhapulika kuti ŵabwezi ŵane aŵa ŵiba pa banki mwakugwiliskira nchito futi.

UMO NASANGIRA CANDULO: Nkhati nalekana na ŵanyane ŵakale, cikaniŵirako cipusu kusintha nkharo ziheni. Mu 1989, nkhabapatizika na kuŵa Kaboni wa Yehova. Nkhati nabapatizika, mudumbu wane, amama, na adada nawo ŵakamba kuteŵetera Yehova.

Sono nili kutora, na muwoli wane takhala mu nthengwa vilimika 17 ndipo nili na ŵana ŵatatu. Nasambira kujikora nanga munthu wanganavya. Nasambiraso kutemwa ŵanthu ŵa mitundu yose, mafuko ghose, na viyowoyero vyose. (Uvumbuzi 7:9) Yesu wakati: “Usange mukukhalilira mu mazgu ghane, muli ŵasambiri ŵane nadi, ndipo mumanyenge unenesko, ndipo unenesko umufwaturaninge.” (Yohane 8:31, 32) Nkhuwona kuti mazgu agha ngaunenesko nadi.

[Mazgu Ghakukhozgera pa peji 15]

Kuti nisinthe nkharo yane, nkheneranga kutaya sumu izo zikukhuŵilizga sankho

[Mazgu Ghakukhozgera pa peji 16]

Ine na ŵabwezi ŵane tikapenjerezganga nthowa izo tingambiskira mbembe. Kuti titimbe ŵanthu 20 panji kujumpha apa, tikagwiliskiranga nchito vimayi na tunthonga