Baibolo Likusintha Umoyo wa Ŵanthu

NCHIVICI cikapangiska msilikari wakugaluka ndiposo munkhungu kuti wasinthe umoyo wake? Cifukwa wuli munthu uyo wakamanyanga comene maseŵero gha kutimbana wakasintha vilato vyake? Kasi dada munyake wakasanga candulo wuli cifukwa ca kulutilira kugomezga kuti mwana wake wasinthenge? Ŵazgani nkhani izi kuti musange mazgoro gha mafumbo agha.

“Nangauli nkhakura makora yayi, kweni sono nili wakukondwa.”—GARRY P. AMBROCIO

VILIMIKA: 47

UKO WAKABABIKIRA: PHILIPPINES

IVYO WAKACITANGA: WAKAŴA MSILIKARI WAKUGALUKA

UMO NKHAŴIRA KALE: Nkhakulira mu tawuni yicoko ya Vintar. Uko tikakhalanga kukaŵa mapiri ghakubiliŵira makora, milonga yakutowa ndiposo kamphepo kawemi. Nangauli uko tikakhalanga kukaŵa kwakutowa, kweni umoyo ukaŵa wakusuzga. Ŵanthu ŵakatibiranga viŵeto ndiposo kutiswera nyumba na kutibira vinthu.

Apo nkhaŵa na vilimika vya pakati pa 13 na 19, ine na ŵabwezi ŵane tikamwanga comene phere, kukhweŵa hona, ndipo nkhibanga mwakuti nisange ndalama zakugulira vinthu ivi. Nkhiba nanga ni majuda gha abuya. Ŵasilikari ŵa boma ŵakanighanaghaniranga kuti ndine yumoza wa ŵasilikari ŵakugaluka ŵa New People’s Army (NPA) ndipo kanandi ŵakanitimbanga comene. Cifukwa ca kutimbika na ŵasilikari ŵa boma, nkhaghanaghana za kunjira nadi gulu ili. Kwa vilimika vinkhondi nkhakhala mu mapiri na ŵasilikari ŵa NPA. Umoyo ukaŵa wakusuzga. Tikakhaliranga waka kucimbira ŵasilikari ŵa boma. Paumaliro umoyo wa kubisamabisama mu mapiri ukanivuska, ndipo nkhajipeleka waka kwa mulara wa cigaŵa ca Ilocos Norte. Wakanipokelera makora, ndipo wakanovwira kusanga nchito yiwemi. Ndipouli, nkhaleka yayi nkharo yane yiheni, nga nkhuswa nyumba na kofya ŵanthu.

UMO BAIBOLO LIKASINTHIRA UMOYO WANE: Mwanakazi munyake uyo nkhagwiranga nayo nchito, zina lake Loida wakaŵa yumoza wa Ŵakaboni ŵa Yehova. Mwanakazi uyu wakanovwira kuti nimanyane na Jovencio uyo wakamba kusambira nane Baibolo. Kweni cikaŵa cakusuzga nipera kuti nisinthe nkharo yane. Pambere Jovencio wandize kuzakanisambizga Baibolo, nkhakhweŵanga dankha, kweniso nkhalutilira kucita vinthu vinyake vya ucikanamalango. Pamasinda, ŵapolisi ŵakanikaka na kunijalira mu jele kwa myezi 11, cifukwa ca kuswa malango. Pa nyengo iyi nkhalomba Yehova kuti wanovwire. Nkhamulomba kuti wanigowokere ndiposo kuti wanipe mzimu wake mwakuti unikhozge ndiposo kunilongozga.

Nyengo yikati yajumphapo, kukiza yumoza wa Ŵakaboni ŵa Yehova ndipo wakanipa Baibolo. Nkhaliŵazga na kumanya kuti Yehova ngwalusungu, wacitemwa ndiposo kuti wakugowokera zakwananga. Nkhamanya kuti Yehova wanilongora lusungu ndipo wanipa mwaŵi wa kusambira za iyo. Nkhamulomba nkhongono yakuti yinovwire kumazga nkharo yane yiheni. Ivyo nkhaŵazga pa Zintharika 27:11 vikanikhwaska comene. Apo  nkhaŵazga mazgu gha mu vesi ili, nkhaŵa nga Yehova wakuyowoya nane mwakudunjika. Lemba ili likuti: “Mwana wane, khala wavinjeru na kukondwereska mtima wane, mwakuti ndimuzgore uyu wandicenya.”

Ŵati ŵanifumya mu jele, nkhalutizga kusambira Baibolo na Ŵakaboni ŵa Yehova na kwamba kuluta ku maungano ghawo ndiposo kulondezga ivyo nkhasambiranga mu Baibolo. Paumaliro, Yehova wakanovwira kumazga nkharo yane yiheni. Pamasinda nkhajipeleka kwa Yehova Ciuta na kubapatizika.

UMO NASANGIRA CANDULO: Nangauli nkhakura makora yayi, kweni sono nili wakukondwa. Nangauli kale nkhaŵa muzga wa nkharo ziheni, kweni nazgoka muphya. (Ŵakolose 3:9, 10) Sono nili na mwaŵi ukuru comene cifukwa nkhuwungana na ŵanthu ŵa Yehova awo mbakutowa, ndiposo kovwira ŵanthu kumanya Yehova, Ciuta wankhongonozose.

“Nkhakhumbanga kwimira caru ca Brazil.”​—JULIANA APARECIDA SANTANA ESCUDEIRO

VILIMIKA: 31

UKO WAKABABIKIRA: BRAZIL

IVYO WAKACITANGA: WAKAŴA NKHWANTHA PA MASEŴERO GHA MBEMBE

UMO NKHAŴIRA KALE: Nkhakulira ku Londrina. Nangauli mu cigaŵa ici ŵanandi ŵakaŵa ŵakavu, kweni cikaŵa cakutowa comene ndiposo camtende. Apo nkhaŵa na vilimika khumi, mudumbu wane mulara wakanikhuŵilizga kuti nicitenge nayo maseŵero gha mbembe ghakucemeka tae kwon do, zina ilo likung’anamura “umo mawoko na malundi ghakucitira.” Adada ŵakakondwa yayi kuti nkhamba kucita maseŵero agha, kweni pamasinda ŵakavuka nane.

Nkhalimbikiranga comene maseŵero agha ndipo nkhawina viphalizgano vinandi mu msumba wa Parana. Pamasinda, nkhawina viphalizgano vya mu caru cose ca Brazil, ndipo mu 1993, ŵakapharazga kuti mu caru cose ca Brazil ndine nkhamanyanga comene maseŵero gha mbembe gha tae kwon do. Nkhadokeranga kukacitako viphalizgano ivi mu vyaru vinyake. Kweni cifukwa ca ukavu, mbumba yithu yikatondeka kunilipilira kuti nilute ku vyaru vya kuwaro.

Nkhaŵa na cigomezgo kuti kunthazi maseŵero gha tae kwon do ghazamuŵapo pa vipharizgano vya maseŵero ghose, ndipo ndivyo vikacitika nadi. Nkhakhumbanga kwimira caru ca Brazil pa maseŵero agha, ntheura nkhalimbikira comene kusambira maseŵero agha ndipo nkhapokera wovwiri wa ndalama kuti nkhaciteko vipharizgano ku France, Vietnam, South Korea, Japan, ndiposo South America. Cilato cane cinyake cikaŵa cakuti niciteko viphalizgano vya mu America, ndipo nkhacita makora comene mwakuti nkhasoreka kuti nkhaŵe yumoza wa ŵanthu ŵatatu ŵakuti ŵakacite ciphalizgano ca maseŵero agha ku Santo Domingo, mu caru ca Dominican Republic mu 2003.

UMO BAIBOLO LIKASINTHIRA UMOYO WANE: Mu 2001, ine na cibwezi cane tikakumana na Ŵakaboni ŵa Yehova ndipo ŵakamba kutisambizga Baibolo. Pakwamba nkhaŵa wakunweka viŵi yayi. Nyengo zose nkhaŵanga wakuvuka ndipo kanandi nkhasiwanga para tikusambira. Nangauli vikaŵa nthena, ivyo nkhasambiranga vikanifikanga pa mtima. Ivyo vikacitika pa ciphalizgano cakulondezgapo ndivyo vikalongora kuti ivyo nkhasambiranga vikanifikanga nadi pa mtima.

Cifukwa cakuti nkhasoreka kuti niŵe mu timu ya  vyaru vya mu America, ŵasambizgi ŵa tae kwon do ŵakati niciteko ciphalizgano cakupimana nkhongono. Nyengo yikati yakwana kuti nambe kutimbana na munthu, nkhimilira waka kwambura kucita kalikose. Nyengo yeneyiyo nkhakumbuka kuti Mkhristu wakwenera yayi kutimbana na ŵanyake nanga pangaŵa pa maseŵero. Nkhakumbuka dango la mu Baibolo lakuti: “Utemwenge mzengezgani wako umo ukujitemwera wamwene.” (Mateyu 19:19) Nyengo yeneyiyo nkhang’anamuka na kufuma. Ŵanthu ŵakanilaŵisiska, ndipo ŵakagomezga yayi ivyo nkhacita.

Nati nawera, nkhaghanaghanirapo ivyo nicitenge na umoyo wane. Nkhamba kuŵazga burosha linyake la Ŵakaboni ŵa Yehova ilo likalongosoranga ivyo Ciuta wakukhumba kwa ise. Nkhasangamo lemba la Salmo 11:5, ilo likuti mzimu wa Yehova ukutinkha ‘uyo wakutemwa nkhaza.’ Mazgu gha wamasalmo agha ghakanicontha, ndipo nkhaghanaghana za kuleka kucita maseŵero gha tae kwon do.

Awo ŵakanisambizganga tae kwon do ŵakakondwa navyo yayi ivyo nkhacita. Ŵakayezga kunikopa mwa kuyowoya kuti nkhaŵa nkhwantha mu caru cose ca Brazil pa maseŵero agha, ndiposo kuti nkhaŵa pafupi kucitako ciphalizgano cikuru comene. Kweni nkhaŵa kuti nasintha kale maghanoghano.

Pa nyengo iyi tikaŵa kuti tatorana na cibwezi cane. Mfumu wane wakaŵa kuti wamba kale kupharazga na Ŵakaboni ŵa Yehova. Para wawerako kukapharazga wakaŵanga wakukondwa comene ndipo wakaniphaliranga za ŵanthu wose awo wadumbiskana nawo. Nkhamanyanga kuti nkheneranga kusintha vinthu vinyake mwakuti niŵe wakwenelera kucitako mulimo uwu. Nkhacileka cisopa cane cakwambilira ndipo mukuluta kwa nyengo nkhaŵa wakwenelera kubapatizika.

UMO NASANGIRA CANDULO: Ine na mfumu wane ndise ŵakukondwa comene ndiposo ŵakukolerana cifukwa cakuti tikuyezgayezga kulondezga fundo za mu Baibolo mu nthengwa yithu. Nkhumovwira para wakucita milimo yake mu mpingo uwo tili. Nkhatenge nifwilirengepo kusanga mendulo ya golide na kuŵa wakumanyikwa. Kweni nkhuwona kuti palije ico caru cambura urunji ici cingapeleka, ico cingayana na mwaŵi wa kuteŵetera Yehova Ciuta uwo nili nawo.

“Adada ŵakavuka nane yayi.”—INGO ZIMMERMANN

VILIMIKA: 44

UKO WAKABABIKIRA: GERMANY

IVYO WAKACITANGA: WAKAŴA MULONDA KU MALO GHAKUCITIRAKO MADANSI

UMO NKHAŴIRA KALE: Nkhakulira mu msumba wa Gelsenkirchen uwo mukacitikanga mulimo wa kujima malasha. Ŵapapi ŵane ŵakaŵa mu visopa vyakupambana. Adada ŵakaŵa yumoza wa Ŵakaboni ŵa Yehova. Kweni amama ŵakaŵasuskanga adada para ŵakukhumba kusambizga ine, mukuru wane, ndiposo ŵadumbu ŵane ŵaŵiri visambizgo vya cisopa cawo. Adada ŵakagwiranga nchito ya kwendeska galimoto, ndipo zuŵa lililose ŵakagwiranga kwa maora khumi panji kujumpha apa. Kanandi ŵakambanga nchito 2 koloko panji 3 koloko mulenji. Kweni nyengo zose ŵakalimbikiranga kutovwira kuti tiŵe paubwezi na Ciuta. Kweni nkhaŵikangako mahara yayi ku ivyo ŵakatisambizganga.

Apo nkhaŵa na vilimika 15, nkhaleka kutemwa maungano gha cisopa agho adada ŵakatitolerangako, ndipo nkhagaluka. Pati pajumpha cilimika cimoza nkhanjira gulu lakucita maseŵero gha mabokosheni. Adada ŵakadandawuranga comene na ivyo nkhacitanga mu vilimika viŵiri vyakulondezgapo.  Nkhati nafika vilimika 18, nkhawukapo pa nyumba.

Nkhatemwanga comene maseŵero agha, ndipo sabata yiliyose nkhasambiliranga kwa mazuŵa ghankhondi na limoza ndiposo kunyamura visulo. Kuumaliro wa sabata, ine na ŵabwezi ŵane tikatemwanga kuluta ku madansi. Zuŵa linyake nkhachayana na munthu munyake uyo wakawonekanga wakofya comene, kweni nkhamuthereska kwambura suzgo. Mweneco wa nyumba iyo mukacitikira dansi wakawona ivyo nkhacita ndipo nyengo yeneyiyo wakaniphalira kuti nambe nchito ya ulonda. Cifukwa cakuti wakaniphalira kuti wanilipirenge ndalama zinandi, nkhazomera.

Kuumaliro wa sabata yiliyose nkhakhalanga pa mulyango wa nyumba iyo mukacitikiranga dansi ndipo ndine nkhawonanga wakwenelera kunjira mu dansi. Ŵanthu awo ŵakanjiranga mu dansi nyengo zinyake ŵakakwananga 1,000, ntheura nkhatangwanikanga comene. Kanandi pakaŵanga mbembe. Ŵanthu ŵakanofyanga na futi ndiposo mabotolo ghakusweka. Ŵanyake mwa ŵanthu awo nkhaŵakaniranga kunjira mu dansi panji kuŵafumya ŵakalindiliranga kuwaro na cilato cakuti ŵanitimbe. Nkhaŵa na vilimika 20 ndipo nkhaghanaghananga kuti palije munthu uyo wanganitonda. Ndipo nadi, nkhaŵa mukali, wakujikuzga, wakunotha, ndiposo wambura kupulika vya munthu.

UMO BAIBOLO LIKASINTHIRA UMOYO WANE: Adada ŵakavuka nane yayi. Kulikose uko ningaŵa, nyengo zose ŵakanitumiranga magazini gha Gongwe la Mulinda na Galamukani! * Nkhaghaŵazganga yayi, ndipo ghakawunjikananga waka ku cipinda. Zuŵa linyake nkhaghanaghana za kuwona ghanji mwa magazini agha. Nkhani zakukhwaskana na umo mawupu gha ndyali, malonda, ndiposo gha cisopa ghazamumalira zikanipangiska kuti niceme mudumbu wane. Iyo na mfumu wake ŵakaŵa Ŵakaboni ŵa Yehova. Ŵakanipempha kuti ŵasambirenge nane Baibolo ndipo nkhazomera.

Ulongozgi wa pa Ŵagalatiya 6:7 ukanipangiska kuti nisinthe nkharo yane. Cifukwa ca ivyo vikanicitikira, nkhasambira kuti cilicose ico ningacita, kuyowoya panji kughanaghana kuti nicite mwahuno cikhwaskenge umoyo wane wose. Nkhakhozgekaso na mazgu gha pa Yesaya 1:18, agho ghakuti: “‘Zaninge pera, tilanguruke na kupana fundo,’ wakuti Yehova: ‘Nanga zakwananga zinu zikuŵa ngati nziswesi, tiziŵenge zituŵa ngati matalala.’” Kufuma waka apo tikambira kusambira Baibolo, mazgu agha ghakanikhozga kuti nileke kujiwona nga ndine wambura kwenelera, nesi kuwona nga nchambura macitiko kuweleraso kwa Yehova.

Mu myezi yinkhondi na umoza, umoyo wane ukasintha comene, nangauli nkhasuzgikira kuti nicite nthena. Nkhakhumbikwiranga kuleka kuluta uko kukacitikanga vinthu viheni ndiposo kwenda na ŵanthu ŵambura nkharo. Ntheura, nkhamba kuphalira ŵabwezi ŵane kuti nkhusambira Baibolo ndipo nkhaŵaphalirangako ivyo nkhasambiranga. Ŵakamba kunigega, ndipo ŵakaninenanga kuti ndine wasembe. Mudumbu wane wakanovwira kusanga nchito yinyake yiwemi.

Kweniso nkhamba kuluta ku Nyumba ya Ufumu uko mudumbu wane na mfumu wake ŵakawungananga, nangauli yikaŵa pa mtunda wa makilomita 30. Kufupi na uko nkhakhalanga Nyumba ya Ufumu yikaŵako, kweni nkhacitanga soni kuti namukumana na ŵanthu awo ŵakanimanyanga kufuma pa wanici. Nkhacitangaso soni kupharazga mu cigaŵa ico nkhakhalanga. Nkhawopanga kuti ningakumana na ŵanthu awo nkhaŵafumiska mu dansi panji awo nkhaŵapa munkhwala wakuzweteska wongo. Ku maseŵero agho nkhacitanga nkhasambirako fundo yakuti: Maseŵero agho ngakusuzga comene ndigho ngakukhumbikwira comene. Ntheura, nati naŵa waka wakwenelera, nkhaŵikapo mtima kupharazga.

Kweni pakaŵaso suzgo linyake ilo nkheneranga kumazga. Nkhatemwanga yayi kuŵazga. Kweni nkhamanyangaso kuti nkheneranga kuŵikapo mtima kuti nimanye vinandi ivyo Baibolo likusambizga. Nkhawona kuti nga umo vikuŵira pa maseŵero gha kunyamura visulo, nkhenerangaso kufwilirapo comene kuti nisange nkhongono zauzimu.

UMO NASANGIRA CANDULO: Candulo cimoza ico nasanga nchakuti nicali wamoyo. Ndipouli, nkhwenera kuŵa maso nipera kuti nileke kuweleraso ku wunthu wane wakale. Kweni pasono nkhusangwa na muwoli wane uyo wali na mikhaliro yakukondweska comene. Pakati pa Ŵakaboni ŵa Yehova nili na ŵabwezi ŵanadi awo nkhuŵagomezga comene. Adada ŵali kufwa vilimika vinkhondi ivyo vyajumpha, kweni pambere ŵandafwe ŵakaŵa ŵakukondwa kunipokeleraso namwana wawo.

[Mazgu ghamusi]