Longorani Kuti Mukughanaghanira Mupapi Uyo Wakulera Yekha Ŵana

MBANTHU ŵacoko comene awo ŵangayowoya kuti ŵakutangwanika ndiposo kuvuka comene kuluska mupapi uyo wakulera yekha ŵana. Wakukumana na masuzgo ghanandi comene. Wakucita yekha milimo yakupambanapambana ya pa nyumba. Padera pa kugwira nchito yakulembeka, wakwenera kukagura yekha vinthu, kuphika, kunozga mu nyumba, ndiposo kulera ŵana. Wakweneraso kupwelelera ŵana para ŵalwara, kusanga nyengo yakucitira vyakusanguluska lumoza na ŵana ŵake ndiposo nyengo yakuti wacitire vinthu vyake usange nchamacitiko.

Nangauli mbumba izo muli mupapi yumoza zamba kuŵa zinandi mazuŵa ghano, kweni tingaluwa kuti ziliko. Mama munyake wakayowoya mwambura kubisa kuti, “Nkhaŵikangako mahara yayi ku mupapi uyo wakulera yekha ŵana, mpaka apo nane nkhamba kulera nekha ŵana.” Kasi mungacitaci kuti mulongore kuti mukughanaghanira mupapi uyo wakulera yekha ŵana? Kasi masuzgo ghake ghakwenera kumukhwaskani? Tiyeni tidumbiskane vifukwa vitatu ivyo tikwenera kumughanaghanira.

Vifukwa Ivyo Tikwenera Kumughanaghanira

Ŵanandi awo ŵakulera ŵekha ŵana ŵakukhumba wovwiri. Mama munyake wa vilimika 41 uyo wakulera yekha ŵana ŵaŵiri wakati: “Nyengo zinyake nkhusoŵa pakwambira, milimo yikuniŵira yinandi comene.” Cifukwa cakuti munyake wa mu nthengwa wali kutayika, wamupata, panji cifukwa ca mikhaliro yinyake, mupapi uyo wakulera yekha ŵana wakujipulika nga umo mama munyake wakajipulikira. Iyo wakati: “Tikuŵeya kuti usange munthu wangaŵapo watovwire, ndipo tikuwukhumba comene wovwiri.”

Kucita nthena kukovwira kuti tiŵe ŵakukondwa. Kasi muli kovwirapo munthu munyake kunyamura cinthu cizito ico cikamuphyora comene? Para ni nthena, mukwenera kuti mukakondwa comene cifukwa ca kumanya kuti mwamovwira. Mupapi uyo wakulera yekha ŵana nayo wakuŵa nga wanyamura katundu muzito, ndipo nyengo zinyake wakuŵa muzito comene mwakuti wanganyamura yayi yekha. Usange mwaŵawovwira muzamuwona kuti mazgu gha pa Salmo 41:1 ngaunenesko, agho ghakuti: “Ngwakutumbikika uyo wakupwelera ŵakavu.”

Kucita nthena kukukondweska Ciuta. Lemba la Yakobe 1:27 likuti: “Kusopa kwakutowa na kwambura kufipiskika panthazi pa Ciuta withu na Dada ni uku: kupwelelera ŵalanda na vyokoro mu suzgo yawo.” Fundo iyi yikusazgapo kupwelelera mupapi uyo wakulera yekha ŵana. *  Lemba la Ŵahebere 13:16 likuti: “Mungaluwanga cara kucita uwemi na kugaŵana vinthu na ŵanji, cifukwa na sembe zantheura Ciuta wakukondweskeka nkhanira.”

Pakuti tawona vifukwa vitatu ivyo tikwenera kughanaghanira mupapi uyo wakulera yekha ŵana, tiyeni sono tiwone ivyo tingacita kuti timovwire ndiposo umo tingamanyira usange ivyo tikukhumba kumucitira vimovwirenge nadi.

Kumanya Ivyo Wakusoŵerwa

Nyengo zinyake tingawona kuti cinthu capafupi nkhufumba mupapi uyo wakulera yekha ŵana kuti wayowoye ico tingamovwira. Kweni kanandi para munthu tamupempha kuti wayowoye ivyo tingamovwira wakuyowoya nadi ivyo wakusoŵerwa yayi. Nga umo tawonera kale, lemba la Salmo 41:1 likuticiska kuti ‘tiŵapwelelerenge.’ Buku linyake likuti mazgu Ghacihebere agho ghali kung’anamulika kuti ‘kupwelelera’ ghakung’anamura “kughanaghanirapo comene pa cinthu cinyake, ndipo pamasinda kucita mwamahara.”

Ntheura, kuti movwire nadi mupapi uyo wakulera yekha ŵana mukwenera kughanaghanirapo dankha comene masuzgo agho wakukumana nawo. Ntheura, ŵani maso comene, kuwona waka mwapacanyacanya yayi. Jifumbani kuti, ‘Kasi niŵenge kuti ndine, mphanyi nakhumbanga wovwiri wuli?’ Mbunenesko kuti ŵanandi awo ŵakulera ŵekha ŵana ŵangamuphalirani kuti nanga mungayezgayezga wuli mungapulikiska yayi masuzgo agho ŵakukumana nawo, pekha para namwe mungamba kulera mwekha ŵana. Ndipouli, kuyezgayezga kuŵalengera citima cifukwa ca masuzgo agho ŵakukumana nawo kungawovwira kuti ‘muŵapwelelere.’

Tolerani Ciyelezgero ca Ciuta

Pa nkhani ya kupwelelera mupapi uyo wakulera yekha ŵana, palije uyo wangaluska Yehova. Malemba ghanandi ghakulongora umo Yehova wakupwelelera vyokoro na ŵana ŵalanda, kusazgapo ŵapapi awo ŵakulera ŵekha ŵana. Usange tingasanda umo Ciuta wakovwilira ŵakavu, nase tingasambirako umo tingawovwilira mupapi uyo wakulera yekha ŵana. Pali fundo zinayi zakuti tighanaghanirepo.

Mutegherezgani

Mu dango ilo Ŵaisrayeli ŵakapika, Yehova wakati ‘wapulikenge kulira’ kwa ŵanthu ŵakusuzgika. (Exodus 22:22, 23) Kasi mungacita wuli kuti mucite nga ndiyo? Kanandi mupapi uyo wakulera yekha ŵana wakuŵa na phukwa cifukwa wakuŵavya munthu mulara wakuti ŵacezge nayo. Mupapi munyake uyo wakulera yekha ŵana wakadandawura, wakati: “Nyengo zinyake para ŵana ŵagona, nkhulira comene. Nyengo zinyake cikuŵa cakusuzga comene kumazga phukwa.” Usange cingaŵa camacitiko, kasi mungapatura nyengo kuti mupulikenge ‘kulira’ kwa mupapi uyo wakulera yekha ŵana, uyo wangatemwa kumupungulirani vya kusingo kwake? Usange mungacita nthena mbwenu mumovwirenge kuti wazizipizge masuzgo gha kulera yekha ŵana.

Muphalirani vyakukhozga

Yehova wakawovwira ŵanthu kulemba sumu zauzimu panji kuti masalmo ghakuti Ŵaisrayeli ŵimbenge pa nyengo yakusopa. Ghanaghanirani waka umo vyokoro na ŵana ŵalanda ŵakapembuzgikiranga para ŵakwimba sumu izo mukaŵa mazgu ghakuŵakumbuska kuti Yehova ni ‘Wiskewo’ na ‘mweruzgi’ wawo, ndiposo kuti waŵawovwirenge. (Salmo 68:5; 146:9) Nase tingayowoya mazgu ghakukhozga kwa mupapi uyo wakulera yekha ŵana, agho wangaghakumbuka kwa vilimika vinandi. Ruth wacali kukumbuka mazgu agho dada munyake wakamuphalira vilimika 20 ivyo vyajumpha. Dada uyu wakati: “Ukulera makora comene ŵana ŵako. Lutilira kucita nthena.” Ruth wakuti: “Nkhakhozgeka comene nati napulika ivyo wakayowoya.” Mazgu ghalusungu ni “khuni la umoyo” nadi, ndipo ghangakhozga comene mupapi uyo wakulera yekha ŵana kuluska umo ise tingaghanaghanira. Kasi vilipo ivyo mungamuwonga munthu uyo wakulera yekha ŵana?

 Movwirani vinthu vyakuthupi para nchakwenelera

Mu dango ilo Yehova wakapa Ŵaisrayeli, mukaŵa ndondomeko yakuti vyokoro na ŵana ŵalanda ŵasangenge cakurya mu nthowa yakucindikika. Kwizira mu ndondomeko iyi ŵanthu ŵakusuzgika ŵakasanganga cakurya cakukwana kuti “ŵarye.” (Duteronome 24:19-21; 26:12, 13) Nase tingaŵawovwira mwavinjeru ndiposo mwambura kuŵakhozga soni. Kasi mungaŵapako yayi cakurya panji kuŵagulira vinthu vinyake? Kasi muli na vyakuvwara ivyo mupapi uyo wakulera yekha ŵana wangavwara panji ŵana ŵake? Panji kasi mungamupa ndalama kuti wagulire vinthu vyakukhumbikwira?

Cezgani nayo

Yehova wakalangura kuti vyokoro na ŵana ŵalanda ŵaŵengepo pa viphikiro vya mu Israyeli cilimika cilicose mwakuti ŵacezgenge na Ŵaisrayeli ŵanyawo. Nakuti ŵakaphalirika kuti: ‘Mukondwenge.’ (Duteronome 16:10-15) Mwakuyana waka, Ŵakhristu mazuŵa ghano ŵakuphalirika kuti ‘ŵapokeleranenge yumoza na munyake’ na kuŵa na nchezgo yakukondweska. (1 Petrosi 4:9) Ipo mwalekeraci kucema mbumba ya mupapi uyo wakulera yekha ŵana kuti mulyere lumoza cakurya ku nyumba kwinu? Kuti mukhumbikwira kuŵa na cakurya capacanya yayi. Apo wakaluta kukacezga ku nyumba ya ŵabwezi ŵake, Yesu wakayowoya kuti, “vinthu vicoko waka vikukhumbikwa, panji cimoza pera.”—Luka 10:42.

Wawongenge Comene Para Mukumughanaghanira

Kathleen uyo wali kulera yekha ŵana ŵatatu, wakuti wazamuluwa yayi ulongozgi wavinjeru wakuti, “Ungalindizganga kuti munthu wakovwirenge yayi, kweni uwongenge wovwiri uliwose uwo wapika.” Nga ni Kathleen, ŵapapi ŵanandi awo ŵakulera ŵekha ŵana ŵakumanya kuti ŵali na udindo wa kulera ŵana ŵawo. Ntheura ŵalije maghanoghano ghakuti vinthu ivyo ŵakwenera kucita ŵekha ŵaŵacitirenge mbanyawo. Ndipouli, tikukayika yayi kuti ŵakuwonga comene para ŵanji ŵakuŵawovwira. Para mungaŵaghanaghanira mbwenu muŵawovwirenge, kweniso namwe muŵenge ŵakukondwa cifukwa ca kumanya kuti Yehova Ciuta ‘wamuwezgeraninge ivyo mukucita.’—Zintharika 19:17.

[Mazgu ghamusi]

[Cithuzithuzi pa peji 23]

Mphawuli apo mukacemapo mbumba iyo muli mupapi yumoza kuti mulyere lumoza cakurya? Mwalekeraci kucita nthena mwasonosono?