KASI malurombo ghose ghakuya ku malo ghamoza kwambura kupwelerako za ciuta uyo tikulombako? Ŵanthu ŵanandi mazuŵa ghano ndivyo ŵakughanaghana. Ŵanthu awo ŵakuciska visopa kuti vikumanenge na kusopera pamoza ndiposo kuti visopa vyose viŵenge vyakuzomerezgeka nangauli ni vyakupambana, ŵakuyitemwa comene fundo iyi. Kweni, kasi fundo iyi njaunenesko nadi?

Baibolo likusambizga kuti malurombo gha ŵanthu ŵanandi ghakuya kwa ciuta wambura kwenelera. Nanga ni mu nyengo iyo Baibolo likalembekanga, ŵanthu ŵakatemwanga kulomba ku vikozgo. Kweni Ciuta wakaŵacenjezga kanandi waka kuti ŵaleke kucita nthena. Mwaciyelezgero, lemba la Salmo 115:4-6 likuyowoya mazgu agha pakuyowoya za vikozgo: “Ŵali na makutu, kweni ngambura kupulika.” Apa fundo njakupulikikwa makora. Tijisuzgireci kulomba kwa ciuta uyo wangatipulika yayi?

Nkhani yinyake yakukondweska iyo yili mu Baibolo, yikukhozgera fundo iyi. Eliya, uyo yikaŵa nchimi yaunenesko wakaphalira nchimi za Bala kuti zilombe kwa ciuta wawo, ndipo pamanyuma nayo walombenge kwa Ciuta wake. Eliya wakayowoya kuti uyo wazgorenge ndiyo ni Ciuta waunenesko. Nchimi za Bala zikakolerana nayo fundo iyi ndipo zikalimbikira kulomba kwanyengo yitali, kucemerezga, kweni palije ico cikacitika. Baibolo likuyowoya kuti ‘kukaŵavya nanga ni yumo wakuzgora; nanga ni yumo wakupwelerako.’ (1 Mathemba 18:29) Kweni kasi Eliya vikamwendera wuli?

Eliya wakati walomba, Ciuta wake wakamuzgora nyengo yeneyiyo, wakatuma moto kufuma kucanya na kumyangura sembe iyo wakaŵika pa jochero. Kasi malurombo agha ghakapambana mpha? Mu lurombo lwa Eliya ulo luri pa 1 Mathemba 18:36, 37 muli fundo yinyake yakuzirwa comene. Ni lurombo lufupi, luri na mazgu 30 pera mu Cihebere cakwambilira. Kweni mu lurombo lufupi ulu, Eliya wakazunura katatu zina la Ciuta lakuti Yehova.

Zina lakuti Bala, ilo likang’anamuranga “mweneco” panji “bwana,” likaŵa zina la ciuta wa Ŵakenani, ndipo ŵanthu ŵanandi ŵakamba kuŵa na ŵabala ŵawo. Zina lakuti Yehova ndapadera, ndipo nda Ciuta yumoza pera kucanya na pasi. Ciuta uyu wakaphalira ŵanthu ŵake kuti: “Ine ndine Yehova; ili ndilo zina lane; ucindami wane kuti ndipenge munyake cara.”—Yesaya 42:8.

Kasi lurombo lwa Eliya na malurombo gha nchimi za Bala ghakaluta ku malo ghamoza? Pakusopa Bala, ŵanthu ŵakacitanga uzaghali na kocha ŵanthu kuŵa sembe. Kweni Yehova wakalangura Ŵaisrayeli kuti ŵamusopenge mu nthowa yakucindikika, ndipo wakaŵakanira kucita vinthu vyaukazuzi nga ivyo ŵakacitanga awo ŵakasopanga Bala. Ghanaghanirani waka fundo iyi: Para mungalembera kalata mubwezi winu uyo mukumucindika comene, kasi mungalindizga kuti yamupelekeka kwa munthu munyake uyo zina ndiposo vyakucita vyake  vikupambaniranathu na vya mubwezi winu? Yayi.

Para mukulomba kwa Yehova, mukulomba kwa Mlengi, Dada wa ŵanthu wose. * Pakulomba kwa Yehova, nchimi Yesaya yikati: “Imwe Yehova ndimwe Ŵadada.” (Yesaya 63:16) Ciuta uyu ndiyo Yesu Khristu wakayowoyanga apo wakaphalira ŵalondezgi ŵake kuti: “Nkhukwelera ku Ŵadada na Ŵawiskemwe ndiposo kwa Ciuta wane na Ciuta winu.” (Yohane 20:17) Yehova ni Dada wa Yesu. Ni Ciuta uyo Yesu wakalombangako, kweniso ndiyo Yesu wakasambizga ŵasambiri ŵake kuti ŵalombengeko.—Mateyu 6:9.

Kasi Baibolo likutiphalira kuti tilombenge kwa Yesu, kwa Mariya, ku ŵatuŵa, panji ku ŵangelo? Yayi. Kwa Yehova pera. Wonani vifukwa viŵiri ivyo tikwenera kulombera kwa Yehova pera. Cakwamba nchakuti lurombo ni nthowa yimoza yakusopera, ndipo Baibolo likutiphalira kuti tikwenera kusopa Yehova pera. (Exodus 20:5) Cifukwa caciŵiri nchakuti Baibolo likuyowoya kuti Iyo pera ndiyo ‘Ngwakupulika malurombo.’ (Salmo 65:2) Nangauli Yehova wali kupako ŵanji milimo yinandi, kweni mulimo wa kupulika malurombo wandapeleke kwa waliyose. Ciuta uyu watilayizga kuti wategherezgenge yekha malurombo ghithu.

Ntheura para mukukhumba kuti Ciuta wapulike malurombo ghinu, kumbukani ulongozgi wa mu Malemba wakuti: “Waliyose uyo wakucema pa zina la Yehova wazamuponoskeka.” (Milimo 2:21) Kweni kasi Yehova wakupulika malurombo ghose mwambura kupwelerako umo munthu wakulombera? Panji pali cinyakeso ico tikwenera kumanya para tikukhumba kuti Yehova wapulikenge malurombo ghithu?