TOSE tikukhumba kuti ŵanthu ŵatitemwenge. Kasi ndimo nawe ukukhumbira?— * Baibolo likutiphalira za Dorika, uyo ŵanthu ŵanandi ŵakamutemwanga comene.

Dorika wakakhalanga mu msumba wa Yopa uwo ukaŵa kufupi na Nyanja ya Meditereniyani. Kufuma ku Yerusalemu kuya ku Yopa pakaŵa mtunda wa makilomita 56. Dorika wakaŵa yumoza mwa ŵasambiri ŵakwambilira ŵa Yesu.

Kasi ukughanaghana kuti nchifukwa wuli Dorika wakatemwekanga comene?— Baibolo likuti wakacitanga vinthu viwemi vinandi ndipo wakapelekanga vyawanangwa ku ŵanthu. Wakwenera kuti wakasonanga malaya ghawemi na kupa vyokoro, panji kuti ŵanakazi awo ŵafumu ŵawo ŵali kufwa. Wakaphalirangaso ŵanandi za Ciuta waunenesko Yehova, nga umo Yesu wakacitiranga.

Kasi ukumanya cinthu ciheni ico cikamucitikira  Dorika?— Wakalwara comene ndipo wakafwa. Ŵabwezi ŵake wose ŵakaŵa na citima. Ntheura ŵakatuma ŵanthu uko mpositole Petrosi wakaŵa, pa mtunda wa makilomita 16. Ŵanthu aŵa ŵakamupempha kuti wize luŵiro. Petrosi wakati wiza, wakakwera pa cipinda capacanya uko ŵakamugoneka Dorika. Ŵanakazi ŵakaliranga, ndipo ŵakamulongoranga malaya agho Dorika wakaŵasonera.

Pamanyuma, Petrosi wakaphalira wose kuti ŵafume mu cipinda. Petrosi na ŵapositole ŵanyake ŵakaŵa kuti ŵacitapo kale minthondwe yinandi, kweni pakaŵavya uyo wakawuskapo munthu wakufwa. Kasi ukughanaghana kuti Petrosi wakacita vici?—

Petrosi wakagwada pafupi na citanda ndipo wakalomba kwa Yehova. Pamanyuma wakaphalira Dorika kuti wawuke. Mbwenu Dorika wakawuka. Petrosi wakamukorako pa kawoko kuti wawuke. Pamanyuma wakacema vyokoro ndiposo ŵanthu ŵanyake kuti ŵamuwone. Kasi ungaghanaghanira umo ŵakakondwera?—

Tiye tighanaghanire ivyo ungasambira pa nkhani iyi yakulongosora za kuwuka kwa Dorika. Sambiro limoza ndakuti usange ukovwira ŵanthu ŵanyake, ŵanandi ŵakutemwenge. Kweni cakuzirwa comene nchakuti, Ciuta wakukumbukirenge na kukutemwa. Ciuta wazamuluwapo yayi vinthu viwemi ivyo ukucitira ŵanthu ŵanyake. Wazamukupa umoyo wamuyirayira mu caru capasi caurunji.