Sambirani Kufuma mu Mazgu gha Ciuta

Kasi Mungasendelera Wuli kwa Ciuta?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi Ciuta wakupulika malurombo ghose?

Yehova wakupempha ŵanthu ŵamitundu yose kuti ŵalombenge mwakuti ŵasendelere kwa iyo. (Salmo 65:2) Kweni wakupulika malurombo ghose yayi. Mwaciyelezgero, apo Ŵaisrayeli ŵakacitanga vinthu viheni, Ciuta wakakana kutegherezga malurombo ghawo. (Yesaya 1:15) Kweniso, para mwanalume wakusuzga muwoli wake malurombo ghake ghakujandizgika. (1 Petrosi 3:7) Kweni, Ciuta wakupulika nanga ni malurombo gha ŵakwananga awo ŵapera.—Ŵazgani 2 Midauko 33:9-13.

2. Kasi tikwenera kulomba wuli?

Lurombo nchawanangwa capadera ico Yehova watipa ndipo ni nthowa yimoza yakumusopera, ntheura tikwenera kulomba kwa iyo pera. (Mateyu 4:10; 6:9) Pakuti tili ŵakwananga, tikwenera kulomba kwizira mu zina la Yesu cifukwa ndiyo wali kusankhika kuŵa “nthowa.” (Yohane 14:6) Yehova wakukhumba yayi kuti para tikumulomba tiyowoyenge malurombo ghakusunga waka pamtima panji ghakulembeka, kweni wakukhumba kuti malurombo ghithu ghafumirenge pasi pa mtima withu.—Ŵazgani Mateyu 6:7; Ŵafilipi 4:6, 7.

Mlengi withu wangapulika nanga lurombo lungaŵa lwa mu mtima. (1 Samuel 1:12, 13) Wakutipempha kuti tilombenge nyengo yiliyose, nga mpha nyengo yakuwuka na yakugonera, ya cakurya, ndiposo para takumana na masuzgo.—Ŵazgani Salmo 55:22; Mateyu 15:36.

3. Cifukwa wuli Ŵakhristu ŵakuwungana pamoza?

Nchipusu yayi kusendelera kwa Ciuta cifukwa tikukhala pakati pa ŵanthu awo ŵalije cipulikano mwa Ciuta ndiposo awo ŵakususka layizgo la caru ciphya ca mtende. (2 Timote 3:1, 4; 2 Petrosi 3:3, 13) Ntheura tikukhumba kuti ŵanyithu ŵatikhozge.—Ŵazgani Ŵahebere 10:24, 25.

Mungasendelera kwa Ciuta para mungaŵa na ŵabwezi awo ŵakutemwa Ciuta. Maungano gha Ŵakaboni ŵa Yehova ghakutipa mwaŵi wakuti tikhozgeke na cipulikano ca ŵanji.—Ŵazgani Ŵaroma 1:11, 12.

  4. Kasi mungasendelera wuli kwa Ciuta?

Mungasendelera kwa Yehova mwa kulanguruka pa ivyo mwasambira mu mazgu ghake. Langulukani pa milimo yake, ulongozgi wake, na malayizgo ghake. Kulomba na kulanguruka kukutovwira kuti tizirwiskenge citemwa ca Ciuta na vinjeru vyake.—Ŵazgani Joshua 1:8; Salmo 1:1-3.

Mungasendelera kwa Ciuta pekha para mukumugomezga, ndiposo para muli na cipulikano mwa iyo. Kweni cipulikano cili nga nchinthu camoyo ico nyengo na nyengo cikukhumba cakurya. Mukwenera kuciryeska cipulikano cinu mwa kulanguruka pa ivyo mwasambira.—Ŵazgani 1 Ŵatesalonika 5:21; Ŵahebere 11:1, 6.

5. Kasi kusendelera kwa Ciuta kumovwiraninge wuli?

Yehova wakupwelelera awo ŵakumutemwa. Wakuŵavikilira ku cilicose ico cingananga cipulikano cawo na cilindizga cawo ca umoyo wamuyirayira. (Salmo 91:1, 2, 7-10) Wakuticenjezga vinthu ivyo vingananga umoyo withu na cimwemwe cithu. Yehova wakutisambizga umo tingakhalira makora.—Ŵazgani Salmo 73:27, 28; Yakobe 4:4, 8.

Kuti mumanye vinandi wonani, cipaturo 17 mu buku ili, Kasi Baibolo Likusambizgaci Comenecomene?, lakupharazgika na Ŵakaboni ŵa Yehova.