KASI mukughanaghana kuti suzgo likaŵa vici pakati pa Frederick na Leanne? Wose ŵakaŵa na vilato viwemi. Wose ŵakatemwanga Ciuta. Wose ŵakamanyanga kuti nchakuzirwa kusambira Baibolo pamoza. Kweni cinthu ico cikeneranga kuŵawovwira kuti ŵaŵe ŵakukolerana cikawonekanga kuti cikwambiska masuzgo. Ŵangaŵa kuti ŵakasambiliranga pamoza kweni ŵakakuranga yayi mwauzimu.

Kasi munthu wauzimu wakuŵa wuli? Cifukwa wuli ŵakutorana ŵakwenera kufwilirapo kuti ŵakurenge mwauzimu? Kasi ni masuzgo wuli agho ŵangakumana nagho, ndipo ŵangaghamazga wuli?

Baibolo likulongora kuti munthu wauzimu ni uyo wakulondezga malango gha mu Baibolo. (Yuda 18, 19) Mwaciyelezgero, Paulosi, uyo nayo wakalembako Baibolo, wakayowoya mphambano pakati pa munthu wauzimu na munthu wathupi. Paulosi wakalongosora kuti awo ŵakughanaghanira vya thupi ŵakujighanaghanira ŵekha m’malo mwa ŵanji. Ŵakucita ico nchiwemi mu maso ghawo m’malo mwa kuyezgayezga kulondezga malango gha Ciuta.—1 Ŵakorinte 2:14; Ŵagalatiya 5:19, 20.

Kweni awo ŵakuwona vinthu mwauzimu ŵakuzirwiska malango gha Ciuta. Ŵakumuwona Yehova Ciuta kuŵa mubwezi wawo ndipo ŵakuyezgayezga  kulondezga mikhaliro yake. (Ŵaefeso 5:1) Ntheura ŵakuŵa ŵacitemwa, ŵalusungu, na ŵakuzika para ŵakucita vinthu na ŵanji. (Exodus 34:6) Ndipo ŵakupulikira Ciuta nanga kungaŵa kwakusuzga kupulikira. (Salmo 15:1, 4) Darren wa ku Canada, uyo wakhala mu nthengwa kwa vilimika 35, wakuti: “Umo nkhumanyira ine, munthu wauzimu nyengo zose wakughanaghanira umo vyakuyowoya na vyakucita vyake vikhwaskirenge ubwezi wake na Ciuta.” Muwoli wake Jane wakusazgirapo kuti: “Nkhughanaghana kuti mwanakazi wauzimu ni uyo wakufwilirapo zuŵa lililose kulongora vigaŵa vya cipambi ca mzimu wa Ciuta.”—Ŵagalatiya 5:22, 23.

Mbakutorana pera yayi awo ŵakwenera kukura mwauzimu. Lekani Baibolo likusambizga kuti waliyose payekha wali na mulimo wa kusambira vyakukhwaskana na Ciuta na kumulondezga.—Milimo 17:26, 27.

Cifukwa wuli ŵakutorana ŵakwenera kufwilirapo kuti wose ŵakurenge mwauzimu? Wonani ciyelezgero ici: Ŵanthu ŵaŵiri ŵali na dimba ndipo ŵakukhumba kupanda mphangwe lumoza. Munyake wakukhumba kupanda, kweni munyake wakuti ŵazakapande kunthazi. Munyake wakukhumba kuthira feteleza, kweni munyake wakukana ndipo wakuwona kuti feteleza ngwakukhumbikwira yayi. Munyake wakukhumba kuti zuŵa lililose ŵapwelelerenge dimba lawo. Kweni munyake wakukhala waka na kulindilira kuti zikurenge zekha. Para vingaŵa nthena, mphangwe yingakura, kweni kakuliro kake kangayana yayi na umo yate yiŵirenge kuŵenge kuti wose ŵakolerana cimoza.

Mfumu na muwoli ŵali nga ni ŵeneko ŵa dimba awo ŵayowoyeka pacanya. Para yumoza wangakura mwauzimu, ubwezi ungaŵako makora. (1 Petrosi 3:1, 2) Kweni mukughanaghana kuti vinthu vingaŵa wuli usange ŵakutorana wose ŵangakolerana kuti ŵalondezgenge malango gha Ciuta na kufwilirapo kovwirana apo ŵakuteŵetera Ciuta? Themba lavinjeru Solomoni likalemba kuti: “Kuŵa ŵaŵiri nkhuwemi kwakuluska yumoza pa yekha.” Cifukwa wuli? “Cifukwa ŵali na njombe yiwemi pa mulimo wawo. Cifukwa usange ŵawa, yumoza tiwawuske munyake.”—Mupharazgi 4:9, 10.

Nchakuwonekerathu kuti imwe na munyinu wa mu nthengwa mukukhumba kukura mwauzimu. Kweni nga umo vikuŵira na kulima, kuŵa waka na khumbo kungapangiska kuti mukure mwauzimu yayi. Wonani masuzgo ghaŵiri agho mungakumana nagho na umo mungaghatondera.

SUZGO LAKWAMBA: Nyengo yikusoŵa.

Sue uyo watengwa sonosono apa, wakuti: “Mfumu wane wakunitora ku nchito 7:00 nausiku. Para tafika pa nyumba, nchito zose za pa nyumba zikuŵa kuti zikutilindilira. Thupi na mtima vikulimbana. Mtima ukukhumba kuti tiŵenge na nyengo yakusambilira pamoza vya Ciuta kweni mathupi ghithu ghakukhumba kupumura.”

Ico cingamovwirani: Ŵani ŵakunozgeka kusintha ndipo koleranani. Sue wakuti: “Ine na mfumu wane tikakolerana kuti tiwukenge mulenji na kuŵazga ndiposo kudumbiskana mavesi gha mu Baibolo pambere tindalute ku nchito. Mfumu wane wakunovwiraso milimo yinyake ya pa nyumba mwakuti niŵe na nyengo yakucezgera nayo.” Kasi ŵakusanga candulo wuli cifukwa ca kucita nthena? Ed, uyo ni mfumu wa Sue wakuti: “Nawona kuti para ine na Sue nyengo zose tikudumbiskana vinthu vyauzimu, tikumazga makora masuzgo ghithu ndipo tikwenjerwa comene yayi.”

Padera pa kudumbiskana, nchakuzirwa kuti zuŵa lililose muŵenge na nyengo yicoko waka yakulombera pamoza. Kasi ici cingawovwira wuli? Ryan, uyo wakhala mu nthengwa kwa vilimika 16, wakuti: “Ni kale viŵi yayi apo ine na muwoli wane tikakumana na masuzgo ghakuru mu nthengwa yithu. Kweni tikapangana kuti tilomberenge pamoza usiku uliwose kuti timuphalirenge Ciuta vyakusingo kwithu. Nkhuwona kuti kulombera pamoza kwatovwira kuti timazge masuzgo ghithu na kuŵaso ŵakukondwa mu nthengwa yithu.”

SUZGO LACIŴIRI: Tili na maluso ghakupambana.

Tony wakuti: “Nkhutemwa yayi kuŵazga mabuku.” Muwoli wake Natalie wakuti: “Nkhutemwa comene kuŵazga, ndipo nkhutemwa kuyowoya ivyo nasambira. Nyengo zinyake nkhughanaghana kuti Tony wakucita nane wofi para tikudumbiskana nkhani ya mu Baibolo iyo tikusambira.”

Ico cingamovwirani: Wovwiranani, lekani kuphalizgana panji kweruzgana. Mulumbani munyinu wa mu nthengwa pa ivyo wakucita makora na kumukhozga. Tony wakuti: “Nkhacitanga wofi cifukwa muwoli wane wakamanyanga vinthu vinandi vya mu Baibolo, ndipo kumanyuma nkhakhumbanga yayi kudumbiskana nayo vinthu vyauzimu. Ndipouli, Natalie wakunovwira comene. Sono tikudumbiskana nyengo zose vinthu vyauzimu, ndipo nkhuwona kuti palije cifukwa ca kucitira wofi. Nkhukondwa comene kuyowoya nayo ivyo tasambira. Kucita nthena kwatovwira kuti tifwatukiranenge ndiposo kuŵa pa mtende.”

Ŵakutorana ŵanandi ŵawona kuti nthengwa zawo zikuŵa makora para ŵakupatura nyengo sabata yiliyose kuti ŵaŵazgenge na kusambira Baibolo pamoza. Kweni pali cenjezgo ili: Para mukuŵazga ulongozgi wa mu Malemba, kuphalira munyinu yayi umo wangawulondezgera kweni yowoyani umo imwe mungawulondezgera. (Ŵagalatiya 6:4) Nkhani izo mwapambana maghanoghano kudumbiskana pa nyengo ya sambiro yayi kweni sangani nyengo yinyake yakudumbiskirana. Cifukwa wuli?

Wonani fundo iyi: Usange muli na cilonda ico cikununkha, kasi mungamba kucisuka na kukaka bandeji pa nyengo yakuti mukurya cakurya na mbumba yinu? Yayi. Ŵanyinu ŵangaseluka. Yesu wakayaniska kurya cakurya na kusambira vyakukhwaskana na Ciuta ndiposo kucita khumbo lake. (Mateyu 4:4; Yohane 4:34) Para nyengo yiliyose mukuyowoya ivyo munyinu wakubudiska apo mukuŵazga Baibolo, mungapangiska kuti munyinu waŵavye khumbo la kusambira vinthu vyauzimu. Mbunenesko kuti mukukhumbikwira kudumbiskana masuzgo ghinu, kweni sangani nyengo yinyake yakudumbiskirana masuzgo agho.—Zintharika 10:19; 15:23.

Muzamuŵa na mtende ndiposo ŵakukondwa mu nthengwa yinu para mose mukukura mwauzimu. Nakuti Mazgu gha Ciuta ghakutisimikizgira kuti “ico munthu wakuseŵa, cenecico ndico wazamuvuna.”—Ŵagalatiya 6:7.

Frederick na Leanne awo taŵazunura kukwambilira mu nkhani iyi, ŵakamanya kuti fundo ya mu Baibolo iyi njaunenesko. Pasono ŵakhala mu nthengwa kwa vilimika 45, ndipo ŵasanga vyandulo cifukwa ca kufwilirapo kuti ŵakure mwauzimu. Frederick wakuti: “Nkhamupanga mulandu muwoli wane cifukwa cakuti wakakhumbanga yayi kudumbiskana. Kweni mukuluta kwanyengo nkhamanya kuti nane nkhwenera kusintha.” Leanne wakuti: “Ico cikatovwira comene pa nyengo ya masuzgo nchakuti tose tikatemwanga Yehova Ciuta. Vilimika vyose ivi, tikusambira pamoza nyengo zose na kulombera pamoza. Para nkhuwona umo Frederick wakuyezgayezgera kulongora mikhaliro Yacikhristu, cikuniŵira cipusu kuti nimutemwenge.”