Kasi Kumanya Zgoro Nkhwakuzirwa?
Kasi Kumanya Zgoro Nkhwakuzirwa?
“Nkhaŵa na vilimika 10 apo nkhamba kwenda na ŵanyamata. Pakwamba tikakorananga waka mawoko na kufyofyonthana. Kweni, pamanyuma tikamba kukasana viŵaro vyakubisika na kugonana mu nthowa zakupambanapambana. Apo nkhaŵa na vilimika 15, nkhamba kugwira nchito ndipo ŵanalume awo nkhagwiranga nawo nchito ŵakakhumbanga kuti tigonanenge. Nkhakhumbanga yayi kuwoneka wakukhalira ndipo nkhacitanga cilicose ico ŵanyane awo nkhagwiranga nawo nchito ŵakacitanga. Nkhakhumbanga kuti nitemwekenge na awo nkhendanga nawo, ico cikapangiska kuti tigonanenge kanandi waka.”—SARAH, * AUSTRALIA.
KASI mungazizwa para mungamanya kuti Sarah wakakulira mu mbumba yakutemwa kusopa? Ŵapapi ŵake ŵakayezga kumulera kuti walondezgenge malango gha mu Baibolo. Kweni Sarah wakenderanga vyake.
Ŵanandi ŵangakolerana na ivyo Sarah wakasankha. Ŵakugomezga kuti ivyo Baibolo likuyowoya pa nkhani ya kugonana ni vyacikale. Ŵanyake ŵakuwonapo suzgo yayi para ŵakulimbikira kusopa uku ŵakucitaso uzaghali.
Kasi nchakuzirwa kumanya na kulondezga ivyo Baibolo likuyowoya pa nkhani ya kugonana? Baibolo likuyowoya kuti ‘ndakupelekeka na Ciuta mwa mzimu ndipo ndacandulo pakusambizga.’ (2 Timote 3:16) Usange mukugomezga kuti Ciuta wakalenga ŵanthu ndiposo kuti Baibolo ni Mazgu ghake, mbwenu nchakuzirwa kumanya ivyo likuyowoya pa nkhani iyi.
Kweni ŵanandi ŵakumanya makora yayi ivyo Baibolo likusambizga pa nkhani ya kugonana. Ŵalongozgi ŵa visopa awo ŵakuyowoya kuti ŵakucindika Baibolo, ŵakusambizga fundo zakupambana pa nkhani iyi. Nakuti, nkhani iyi yagaŵaniska machalichi ghanandi.
M’malo mwa kugomezga ivyo ŵanji ŵakuyowoya, mwalekeraci kuti mupenjerezge mwekha ivyo Baibolo likusambizga pa nkhani ya kugonana? Nkhani yakulondezgapo yikuzgora mafumbo 10 agho ŵanandi ŵakufumba pakukhwaskana na ivyo Baibolo likusambizga pa nkhani ya kugonana. Mu nkhani iyi musangenge mazgoro ghakufuma mu Baibolo ndipo muwonenge ivyo likusambizga pa nkhani iyi. Nkhani yaumaliro ya cigaŵa ici yiyowoyenge cifukwa ico vinthu ivyo tikusankha ni vyakuzirwa.
[Mazgu ghamusi]
^ ndime 2 Zina lasinthika.
