Sambirani Kufuma mu Mazgu gha Ciuta

Kasi Tikwandula Wuli na Malango gha Ciuta?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Cifukwa wuli tikwenera kupulikira Ciuta?

Tikwenera kupulikira Ciuta cifukwa ndiyo wakatilenga. Nanga ni Yesu nyengo zose wakapulikiranga Ciuta. (Yohane 6:38; Uvumbuzi 4:11) Malango gha Ciuta ghakutipa mwaŵi wakuti tilongore kuti tikumutemwa.—Ŵazgani 1 Yohane 5:3.

Malango ghose gha Ciuta ghangatovwira. Ghakutisambizga umo tingakhalira makora sono ndiposo umo tingazakasangira umoyo wamuyirayira.—Ŵazgani Salmo 19:7, 11; Yesaya 48:17, 18.

2. Kasi malango gha Ciuta ghakutovwira wuli kuti tiŵe na umoyo uwemi?

Dango la Ciuta lakukanizga uloŵevu likutivikilira ku matenda ghakofya na ngozi. Kumwa comene nkhuheni ndipo kungapangiska kuti tiŵe na nkharo yaucindere. (Zintharika 23:20, 29, 30) Yehova wakuzomerezga kuti timwenge phere kweni tileke kujumphizga.—Ŵazgani Salmo 104:15; 1 Ŵakorinte 6:10.

Yehova wakuticenjezgaso kuti tileke kuŵa na sanji, ukali wambura kujikora, na nkharo zinyake zambura kwenelera. Tiŵenge na umoyo uwemi para tikulondezga ulongozgi wake.—Ŵazgani Zintharika 14:30; 22:24, 25.

3. Kasi malango gha Ciuta ghangativikilira wuli?

Ciuta wakukana kugonana na munthu uyo ni mfumu panji muwoli withu yayi. (Ŵahebere 13:4) Ŵakutorana awo ŵakupulikira dango ili ŵakuŵa ŵakuvikilirika ndipo ici cikovwira kuti ŵana ŵawo ŵakure makora. Nakuti ŵakutorana awo ŵakugonana na munthu uyo ni mfumu panji muwoli wawo yayi kanandi ŵakutora matenda, ŵakupatana, kucitirana nkhaza, kusuzgika maghanoghano, ndipo ŵana ŵakulereka na mupapi yumoza.—Ŵazgani Zintharika 5:1-9.

Tikuvikilira ubwezi withu na Ciuta para tikugega vinthu ivyo vingatipangiska kuti tigonane na munthu uyo ni mfumu panji muwoli withu yayi. Vikovwiraso kuti tileke kupweteka ŵanji.—Ŵazgani 1 Ŵatesalonika 4:3-6.

  4. Kasi tikwandula wuli para tikucindika umoyo?

Ŵanthu awo ŵakucindika umoyo, uwo nchawanangwa cakufuma kwa Ciuta, ŵakuŵa na umoyo uwemi para ŵakuleka nkharo ziheni nga nkhukhweŵa na vinthu vinyake ivyo vingananga umoyo. (2 Ŵakorinte 7:1) Ciuta wakuzirwiska nanga ni umoyo wa mwana uyo wacali mu nthumbo. (Exodus 21:22, 23) Ntheura tingakomeranga dala yayi mwana uyo wandababike. Kweniso awo ŵakuwona umoyo nga umo Ciuta wakuwonera ŵakujivikilira ku vinthu ivyo vingaŵapweteka ku nchito, pa nyumba, ndiposo para ŵakwendeska galimoto. (Duteronome 22:8) Ŵakucitako yayi maseŵero agho ghakuŵika umoyo wawo pangozi, cifukwa ŵakumanya kuti umoyo nchawanangwa cakufuma kwa Ciuta.—Ŵazgani Salmo 36:9.

5. Kasi tikwandula wuli para tikuwona ndopa kuŵa zakupatulika?

Ndopa ni zakupatulika cifukwa Ciuta wakayowoya kuti zikwimira umoyo wa cilengiwa. (Genesis 9:3, 4) Dango la Ciuta likuzirwiska ndopa nga umo likuzirwiskira umoyo. Tikusanga candulo para tikupulikira dango ili. Mwawuli? Zakwananga zithu zikugowokereka.—Ŵazgani Leviticus 17:11-13; Ŵahebere 9:22.

Ndopa za Yesu zikaŵa zakuzirwa cifukwa cakuti wakaŵa murunji. Yesu wakapeleka cinthu cinyake kwa Ciuta ico cikimira umoyo wake. Cinthu ico ni ndopa zake. (Ŵahebere 9:12) Ndopa zake izo zikathiskika zili kupangiska kuti tizakasange umoyo wamuyirayira.—Ŵazgani Mateyu 26:28; Yohane 3:16.

Kuti mumanye vinandi wonani cipaturo 12 na 13 ca buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.