Sendelerani kwa Ciuta

Kufiska Mulimo Withu kwa Ciuta

KASI muli kujifumbapo kuti, ‘Cifukwa wuli tili ŵamoyo?’ Yehova wali kutipa khumbo lakujifumba fumbo ili pera yayi, kweni wali kutipaso khumbo lakuti timanye zgoro lake. Cakukondweska nchakuti Ciuta withu wacitemwa watovwira kuti timanye zgoro. Zgoro ili lili mu Mazgu ghake Baibolo. Wonani mazgu gha Themba Solomoni agho ghali pa Mupharazgi 12:13.

Solomoni wakaŵa pa malo ghakwenelera. Lekani wakayowoyapo umo tingaŵira ŵakukondwa ndiposo ŵakukhorwa na umoyo withu. Ciuta wakamutumbika mwa kumupa vinjeru, usambazi, ndiposo mazaza. Solomoni wakasanda makora ivyo ŵanthu ŵakukhumba pa umoyo nga ni usambazi na kumanyikwa. (Mupharazgi 2:4-9; 4:4) Pamanyuma, wakayowoya mwakulongozgeka na mzimu wa Ciuta kuti: “Tiyeni, tipulike umaliro wa makani ghose: Muwope Ciuta, na kusunga malango ghake, cifukwa ici ndico mulimo wose wa munthu.” Mazgu agha ghakuyowoya mulimo wakuzirwa uwo munthu waliyose wakwenera kuyezgayezga kufiska.

“Muwope Ciuta.” Fundo yakuti tiwope Ciuta pakwamba yingawoneka yakofya. Kweni kuwopa uku nkhwa mu mtima. Tingakuyaniska na muzga yayi uyo wakopa bwana wake mukali, kweni tingakuyaniska na mwana uyo wakukhumba kukondweska adada ŵake ŵacitemwa. Buku linyake likuti kumopa Ciuta ni “nchindi izo ŵanthu ŵake ŵakulongora kwa iyo cifukwa cakuti ŵakumutemwa ndiposo kucindika mazaza ghake na ukuru wake.” Kumopa Ciuta kukuticiska kuti ticite khumbo lake cifukwa cakuti tikumutemwa ndiposo tikumanya kuti wakutitemwa. Tikulongora kuti tikumopa kwizira mu ivyo tikucita. Mu nthowa wuli?

“Kusunga malango ghake.” Kumopa Ciuta kukuticiska kuti timupulikirenge. Nchamahara kuti timupulikirenge Yehova. Pakuti ni Mlengi withu, wakumanya makora umo tingakhalira makora, nga umo misiri wakumanyira makora umo cinthu ico wapanga cikugwilira nchito. Kweniso Yehova wakutikhumbira viwemi. Wakukhumba kuti tiŵenge ŵakukondwa, ndipo wali kutipa malango kuti ghatovwire. (Yesaya 48:17) Mpositole Yohane wakalemba kuti: “Pakuti ili ni ng’anamuro la kutemwa Ciuta lakuti tisungilire malango ghake; ndipo malango ghake ngazito cara.” (1 Yohane 5:3) Tikulongora kuti tikumutemwa Ciuta para tikumupulikira. Ciuta pa kupeleka malango wakulongora kuti wakutitemwa.

“Ici ndico mulimo wose wa munthu.” Mazgu agha ghakuyowoya cifukwa ico tikwenera kumopera Ciuta na kumupulikira. Kucita nthena ni mulimo withu. Yehova ni Mlengi withu, ntheura tikwenera kupeleka umoyo withu kwa iyo. (Salmo 36:9) Tikweneraso kumupulikira. Para tikukhala nga umo iyo wakukhumbira, tikufiska mulimo withu.

Kweni, cifukwa wuli tili ŵamoyo? Mwakudumura, tili ŵamoyo kuti ticite khumbo la Ciuta. Palije cinyake ico tingacita kuti tiŵe na umoyo wa candulo. Mwalekeraci kuti mumanye vinandi vyakukhwaskana na khumbo la Yehova ndiposo ivyo mungacita kuti mumukondweske? Ŵakaboni ŵa Yehova ŵazamuŵa ŵakukondwa kumovwirani.

Vipaturo Ivyo Mungaŵazga mu Novembala:

◼ Zintharika 22-31; Mupharazgi 1-12–Sumu ya Solomon 1-8