Cifukwa Wuli Masoka Ghacilengiwa Ghazara Nthena?

MAZUŴA ghano nkhani yikuŵa waka ya masoka ghacilengiwa. Kuluska kumanyuma kose uku, ŵanthu ŵanandi ŵakusuzgika na masoka ghakupambanapambana. Wupu wa Centre for Research on the Epidemiology of Disasters, ku Belgium, ukati mu cilimika ca 2010 pera kukacitika masoka ghacilengiwa ghakukwana 373 ndipo ŵanthu 296,000 ŵakafwa.

Mu vilimika vyakumasinda napo ciŵelengero ca masoka ghacilengiwa cikakweranga comene. Mwaciyelezgero, pakati pa 1975 na 1999, masoka ghacilengiwa pafupifupi 300 ghakacitikanga cilimika cilicose. Kweni mu vilimika vya pakati pa 2000 na 2010, masoka ghacilengiwa pafupifupi 400 pa avireji ghakacitikanga cilimika cilicose. Mutepanji namwe mukujifumba kuti, ‘Cifukwa wuli masoka ghacilengiwa ghazara comene sono?’

Nangauli kanandi ŵanthu ŵakuti masoka ghacilengiwa agha ni “milimo ya Ciuta,” kweni uwu mbunenesko yayi. Ni Ciuta yayi wakupangiska masoka agho ghakuwira ŵanthu mazuŵa ghano. Ndipouli, Baibolo likayowoyerathu kuti kuzamuŵa masoka ghanandi mu nyengo iyi. Mwaciyelezgero, pa Mateyu 24:7, 8 tikuŵazga mazgu gha Yesu ghakuti: “Kuzamuŵa njara na vindindindi mu malo na malo. Vinthu vyose ivi nkhwamba kwa masoka nga ni vyakuŵinya vya kubaba.” Cifukwa wuli Yesu wakayowoyerathu vinthu ivi, ndipo vikung’anamuraci kwa ise?

Yesu, Mwana wa Ciuta, wakazgoranga fumbo ilo wakafumbika lakuti: “Nchivici cizamuŵa cimanyikwiro . . . ca umaliro wa mgonezi?” (Mateyu 24:3) Wakazunura vinthu vyakupambanapambana ivyo vizamucitika, kusazgapo masoka agho ghayowoyeka pacanya apa. Pamanyuma wakayowoya fundo yakuzirwa comene yakuti: “Para mukuwona vinthu ivi vikucitika, manyani kuti ufumu wa Ciuta uli pafupi.” (Luka 21:31) Ntheura, masoka ghacilengiwa ghali na ng’anamuro likuru kwa ise. Ghakulongora kuti sonosono apa vinthu visinthenge.

Ivyo Vikupangiska Masoka Ghacilengiwa

Ŵanthu ŵanandi ŵacali kufumba kuti, para ni Ciuta yayi wakupangiska masoka agha, ni njani panji ni vici vikupangiska? Kuti tipulikiske zgoro la fumbo ili tikwenera kumanya dankha unenesko uwo  Baibolo likuyowoya, wakuti: “Caru cose cikugona mu nkhongono za muheni.” (1 Yohane 5:19) Vesi ili likulongora kuti ni Ciuta yayi wakupangiska masuzgo agho ghakucitika mu caru. Kanandi wakupangiska ni mulwani wake, “muheni,” uyo Baibolo likumucema “Dyabulosi.”—Uvumbuzi 12:9, 12.

Cifukwa ca kujighanaghanira yekha, mulwani wa Ciuta uyu walije nawo nchito umoyo wa ŵanthu. Pakuti caru cose cili mu mawoko ghake, wakupangiska ŵanthu kuti nawo ŵaleke kuzirwiska umoyo wa ŵanyawo. Baibolo likayowoyerathu kuti ivi vizamucitika. Likati “mu mazuŵa ghaumaliro” ŵanthu ŵazamuŵa “ŵakujitemwa iwoŵene, ŵakutemwa ndalama, ŵakujituntha, ŵakujikuzga.” (2 Timote 3:1, 2) Ntheura nchakuzizika yayi kuti Dyabulosi wapangiska kuti nkharo izi na nkharo zinyake ziheni zizare pa caru. Iyo wakupangiska ŵanthu kuti ŵajighanaghanirenge ŵekha na kulyera ŵanyawo masuku pa mutu ndipo ivi vyapangiska kuti ŵanthu ŵanandi ŵatamburenge.

Kasi uryezi wa ŵanthu mazuŵa ghano wapangiska wuli masoka ghacilengiwa? Lipoti lakufuma ku United Nations lakuyowoya za masoka agho ghakucitika pa caru cose likati: ‘Ŵanthu ŵanandi ŵakuzurana mu malo agho nyengo yiliyose kungacitika ngozi, nga ni mumphepete mwa mlonga panji nyanja. Kweniso caru cikutondeka kujivikilira ku masoka ghanyake ghacilengiwa cifukwa cakuti ŵanthu ŵananga makuni na vyakumera vinyake ndiposo ŵakamuska maji mu malo ghanyake. Kweni cakofya comene nchakuti nyengo yikusintha pa caru cose ndipo nyanja zikututuka cifukwa cakuti vijosi vyakufuma ku mafakitare vikunanga mphepo iyo yikovwira kuti caru cileke kocha comene. Vyose ivi ŵakupangiska mbanthu.’ Nangauli milimo yinandi iyo ŵanthu ŵakucita yikuwoneka kuti yikovwira kuti ŵasange ndalama, kweni unenesko ngwakuti ŵanthu ŵakuyicita cifukwa ca mtima wa kujighanaghanira ŵekha ndiposo uryezi uwo wazara pa caru.

Mwantheura, ŵanthu ŵanandi awo ŵakusanda za masoka ŵakumanya kuti masoka ghacilengiwa ghafika paheni cifukwa cakuti ŵanthu ŵakupwelerako yayi pakucita vinthu. Tingayowoya kuti ŵanthu ŵakukhozgera nthowa izo Dyabulosi wakugwiliskira nchito mwakuti ŵanyawo ŵasuzgikenge comene na masoka ghacilengiwa.

Apa tikuwona kuti masoka ghanandi ghacilengiwa ghakucitika cifukwa cakuti ŵanthu ŵakupwelerako yayi pakucita vinthu. Masoka ghanyake ghacilengiwa ghakuŵa ghakofya comene cifukwa ca umo malo ghaliri. Mu vigaŵa vinandi pa caru capasi, masoka ghacilengiwa ghakuwira ŵanthu ŵanandi cifukwa ca ivyo ŵakucita ŵanthu ŵaheni. Kweniso ghakucitika cifukwa cakuti ŵanthu ŵanandi ŵakucicizgika kusamira ku malo gha ngozi cifukwa ca kucimbira ukavu panji masuzgo ghanyake kukwawo. Kweni ŵanthu ŵanyake ŵakusuzgika na masoka ghacilengiwa cifukwa ca munthu waliyose yayi, nesi cifukwa ca kukhalira dala malo ghaheni, kweni cifukwa cakuti “nyengo na mwaŵi yikuwira wose,” panji kuti vinthu vyamabuci vikuwira waliyose.—Mupharazgi 9:11.

Mulimose umo vingaŵira, kweni kasi mungacita wuli para masoka ghacilengiwa ghamuwirani? Sono tiwonenge ivyo tingacita kuti ticepeskeko masuzgo ghanyake awo ghakuŵapo para kwacitika masoka ghacilengiwa.

[Cithuzithuzi pa peji 5]

Kuzurana Malo Ghamoza

[Cithuzithuzi pa peji 5]

Kunangika kwa Makuni

[Cithuzithuzi pa peji 5]

Kunangika kwa Mphepo

[Kulongosora Vithuzithuzi pa peji 5]

Kumazere: © Mark Henley/Panos Pictures

Pakati: © Jeroen Oerlemans/Panos Pictures