Ŵaŵazgi Ŵithu Ŵakufumba Kuti . . .

Kasi Caru Ciponenge mu 2012?

▪ “Ŵanthu awo ŵakugomezga kuti caru cimalenge ŵakuthilimukira mu muzi unyake ku France . . . Ŵakugomezga kuti caru cimalenge pa Disembala 21, 2012, cifukwa kalendara ya Maya yikalongora kuti caru cikwenera kumara para pajumpha vilimika 5,125. Vilimika ivi vizamukwana pa zuŵa ili.”—BBC News.

Nangauli ŵaliska ŵanyake, ŵanthu awo ŵakuti mbasayansi, ndiposo awo ŵakuti ŵakucima vyamunthazi ŵakuti caru cimalenge, kweni caru ciŵengepo kwa nyengo yitali comene. Unenesko ngwakuti caru ciponenge mu 2012. Nakuti caru ici cijumphenge 2012 pera yayi kweni na vilimika vyose vyakunthazi.

Baibolo likutiphalira kuti: “Fuko linyake likuluta, fuko linyakeso likwiza, kweni caru cikukhalilira muyirayira.” (Mupharazgi 1:4) Kweniso, wonani ivyo lemba la Yesaya 45:18 likuyowoya, likuti: “Yehova . . . wakuti, (Ndiye Ciuta uyo wakawumba caru na kucicita; kuti wakacilenga waka cara, wakaciwumba kuti ciŵenge cakukhalamo!) ‘Ndine Yehova ndipo kulije munyake.’”

Kasi dada wacitemwa wangamalira nyengo yinandi kupangira mwana wake cidoli kuti waseŵereskenge na kuciphwanyaso pamanyuma pakuti wamupa waka? Izi zingaŵa nkhaza. Mwakuyana waka, cifukwa cikuru ico Ciuta wakalengera caru nchakuti ŵanthu ŵakondwenge naco. Ciuta wakaphalira ŵakutorana ŵakwamba, Adamu na Eva kuti: “Babanani, mwandane, muzuzge caru, mucithereske.” Pamanyuma, “Ciuta wakawona vyose ivyo wakavilenga, ndipo wonani, vikaŵa viwemi comene.” (Genesis 1:27, 28, 31) Cilato ico Ciuta wakaŵa naco pakulenga caru capasi cindamare, wazomerezgenge yayi kuti ciparanyike. Pakuyowoya za malayizgo ghake ghose, Yehova wakati: “Ntha ghawelerenge waka kwa Ine, kweni tighafiske ico nkhuca naco, na kusakata mu ico ndaghatumira.”—Yesaya 55:11.

Kweni khumbo la Yehova ndakuti ‘waparanye awo ŵakunanga caru capasi.’ (Uvumbuzi 11:18) Mu Mazgu ghake wali kulayizga kuti: “Ŵakunyoroka tiŵakharenge mu caru, na ŵawemi ŵakufikapo tiŵakharenge mumo; kweni ŵaheni ŵadumulikenge mu caru, ndipo ŵajuvyi tiŵazgurikemo.”—Zintharika 2:21, 22.

Kasi ivi vizamucitika pawuli? Palije munthu uyo wakumanya. Yesu wakati: “Vya zuŵa ilo panji ora palije munthu wakumanya, nanga mbangelo kucanya nesi Mwana, kweni Ŵadada pera.” (Mariko 13:32) Ŵakaboni ŵa Yehova ŵakusacizga yayi zuŵa ilo Ciuta wazamuparanyira ŵaheni. Nangauli Ŵakaboni ŵakuŵa maso na “cimanyikwiro” ca umaliro wa mgonezi ndipo ŵakugomezga kuti ŵanthu ŵali mu mazuŵa agho Baibolo likuti “ghaumaliro,” kweni ŵakumanya yayi apo “umaliro” wizirenge. (Mariko 13:4-8, 33; 2 Timote 3:1) Nkhani iyi ŵakulekera Dada wawo wakucanya na Mwana wake.

Panyengo yasono, Ŵakaboni ŵa Yehova ŵakutangwanika na nchito ya kupharazga makani ghawemi gha Ufumu wa Ciuta, uwo ni boma la kucanya ilo lizamuwusa Caru na kucizgora kuŵa paradiso. Caru ici ndico “ŵakunyoroka ŵamkuhara . . . na kukhala mwenemumo kwandanda.”—Salmo 37:29.

[Kulongosora Cithuzithuzi pa peji 10]

Image Science and Analysis Laboratory, NASA-Johnson Space Center