Kuzamuŵavya Masoka Ghacilengiwa!

KASI mungacita wuli para munyake wangamuphalirani kuti, “Sonosono apa kuŵavyenge masoka ghacilengiwa”? Panji mungazgora kuti, “Ukulota kwali! Masoka ghacilengiwa ghaŵengeko nyengo zose.” Panji mu mtima mungayowoya kuti, ‘Munthu uyu wakusekapo waka kwali!’

Nangauli masoka ghacilengiwa ghakuwoneka kuti ghangamara yayi, kweni pali cifukwa cakugomezgera kuti ghamalenge. Ndipouli, ni ŵanthu yayi awo ŵaghamazgenge. Ŵanthu ŵakumanya makora yayi umo vinthu vikucitikira mu cilengiwa ndiposo cifukwa cake, kweniso ŵalije nkhongono pa vinthu ivi ndipo palije ico ŵangacitapo. Themba Solomoni, uyo wakawusanga Israyeli mu nyengo yakale ndipo wakaŵa wakumanyikwa pa nkhani ya vinjeru na kusanda tunthu, wakati: “Munthu wangamanya kusanga mulimo uwo ukucitika pano pasi cara. Nanga wangafukafuka comene kuwusanga, kuti watiwusangenge cara; nanga waŵe wavinjeru waghanaghane kuwumanya, kweni tiwatondeke kuwuvumbura.”—Mupharazgi 8:17.

Pakuti ŵanthu ŵangamazga yayi masoka ghacilengiwa, ipo ni njani wangaghamazga? Baibolo likuyowoya kuti Mlengi withu ndiyo wasinthenge vinthu pa caru. Ndiyo wali kulenga caru na vyose ivyo vilimo, kusazgapo umo maji ghakwendera. (Mupharazgi 1:7) Nakuti Ciuta wakupambana comene na ŵanthu cifukwa wali na nkhongono zambura cigoti. Nchimi Yeremiya yikalongora kuti fundo iyi njaunenesko apo yikati: “Awe Fumu Yehova! Wonani, mwalenga mtambo na caru capasi na nkhongono zinu zikuru na mkono winu wakunyoloka! Kulije kanthu kanonono kwa Imwe.” (Yeremiya 32:17) Pakuti ni Ciuta wakalenga caru na vyose ivyo vilimo, nchakupulikikwa kuti wakumanya umo wangacitira kuti ŵanthu ŵakhalenge mwakuvikilirika ndiposo mwamtende.—Salmo 37:11; 115:16.

Ipo kasi Ciuta wacitenge vici kuti wasinthe vinthu pa caru? Mungakumbuka kuti nkhani yaciŵiri yayowoya kuti vinthu vyakofya ivyo vikucitika pa caru sono ‘nchimanyikwiro’ ca “umaliro wa mgonezi.” Yesu wakati: “Para mukuwona vinthu ivi vikucitika, manyani kuti ufumu wa Ciuta uli pafupi.” (Mateyu 24:3; Luka 21:31) Ufumu wa Ciuta, uwo ni boma la Ciuta ilo lili kucanya, uzamusinthirathu vinthu pa caru, ndipo uzamumazga masoka ghose ghacilengiwa. Nangauli Yehova Ciuta wali na nkhongono zakucitira ivi, kweni mulimo uwu wali kupeleka kwa Mwana wake. Pakuyowoya za  mwana uyu, nchimi Daniyeli yikati: “Kwa iye kukapika kuwusa na nchindi na ufumu, kuti ŵanthu wose, ŵamitundu yose, na mayowoyero ghose ŵamuteŵetere.”—Daniel 7:14.

Yesu Khristu, uyo ni Mwana wa Ciuta, wali kupika nkhongono zakusinthira vinthu pa caru kuti ciŵe malo ghakunozga kukhalapo. Apo Yesu wakaŵa pa caru capasi vilimika 2000 ivyo vyajumpha, wakalongora pacoko waka kuti wali na nkhongono zakumazgira masoka ghacilengiwa. Zuŵa linyake apo iyo na ŵasambiri ŵake ŵakaŵa mu boti pa Nyanja ya Galileya, “cimphepo cikuru comene cikawuka, ndipo majigha ghakathavukiranga mu boti, mwakuti boti likaŵa pafupi kuzura na maji.” Ŵasambiri ŵake ŵakacita wofi comene. Cifukwa ca kopa kufwa, ŵakapempha Yesu kuti waŵathaske. Kasi Yesu wakacitaci? “Wakalekeska mphepo ndipo wakati ku nyanja: “Cetama! Khala cete!” Ndipo mphepo yikaleka, ntheura kukaŵa bata likuru.” Ŵasambiri ŵake ŵakazizwa comene ndipo ŵakafumba kuti: “Ni njani uyu comenecomene, cifukwa nanga ni mphepo na nyanja vikumupulikira?”—Mariko 4:37-41.

Kufuma pa nyengo yira, Yesu wali kukwezgeka ndipo wali kucanya. Nakuti sono wali kupika nkhongono na mazaza ghakuru comene. Pakuti ndiyo ni Themba la Ufumu wa Ciuta, wali na mulimo ndiposo nkhongono zakusinthira vinthu pa caru kuti ŵanthu ŵakhalenge mwakuvikilirika ndiposo mwamtende.

Kweni nga ni umo tawonera, ŵanthu ndiwo ŵakupangiska masuzgo ndiposo masoka ghanandi ghacilengiwa. Ŵanthu ŵakujighanaghanira ŵekha ndiposo ŵaryezi ndiwo ŵakupangiska kuti masoka agha ghacitike panji ghahenipe comene. Kasi Ufumu uzamucitaci ku ŵanthu awo ŵakulutilira kucita nthena ndipo ŵakukhumba yayi kusintha? Baibolo likuti Fumu Yesu yizamwiza “kufuma kucanya na ŵangelo ŵake ŵankhongono mu moto wakugolera, peneapo yizenge na nduzga pa awo ŵakumumanya cara Ciuta na awo ŵakupulikira cara makani ghawemi ghakuyowoya vya Fumu yithu Yesu.” Fumu iyi ‘yizamuparanya awo ŵakunanga caru capasi.’—2 Ŵatesalonika 1:7, 8; Uvumbuzi 11:18.

Pamanyuma, Yesu Khristu, uyo ni “Themba la mathemba,” wazamumazgirathu masoka ghacilengiwa. (Uvumbuzi 19:16) Wazamuwoneseska kuti ŵanthu awo ŵakuwusika na Ufumu wake ŵakusuzgika yayi. Wazamugwiliskira nchito nkhongono zake kuwuskamo vijosi viheni mu mtambo mwakuti mphepo na nyengo viŵe viwemi ku ŵanthu. Mazgu agho Yehova wakalayizga ŵanthu ŵake mu nyengo yakale ghazamufiskika, wakati: “Ine nditimupaninge penepapo vula pa nyengo yake, caru naco cipambikenge vipasi vyake, na makuni ghamu thondo tighapambike vipasi vyawo.” (Leviticus 26:4) Ŵanthu ŵazamuzenga nyumba kwambura kopa kuti ziwenge na vimphepo panji vindindindi. Baibolo likuti: “Tiŵazenge nyumba na kukhalamo; tiŵapande mpheska na kurya vipasi.”—Yesaya 65:21.

Kasi Mukwenera Kucitaci?

Nchakuwonekerathu kuti namwe mukudokera kuzakakhala mu caru cambura masoka ghacilengiwa. Kweni kasi mungacitaci kuti muzakakhale mu caru ici? Pakuti “awo ŵakumumanya cara Ciuta” na “awo ŵakupulikira cara makani ghawemi” ŵazamukhalamo yayi mu caru cambura masoka ico cikwiza, ipo munthu wakwenera kusambira za Ciuta na kukhozgera muwuso wake. Ciuta wakukhumba kuti timumanye na kupulikira makani ghawemi gha Ufumu uwo uzamuwusika na Mwana wake.

Nthowa yiwemi comene iyo tingamanyira Ciuta na kupulikira makani ghawemi nja kusambira Baibolo mwakupwelelera. Mu Baibolo muli ivyo munthu wangacita kuti waŵe wakwenelera kuzakakhala mu caru ciwemi ico cizamuwusika na Ufumu wa Ciuta. Fumbani Ŵakaboni ŵa Yehova kuti ŵamovwirani kusambira ivyo Baibolo likusambizga. Nawo ŵakukhumba kuzakakhala mu caru ici ndipo mbakunozgeka kumovwirani. Para mukufwilirapo kuti mumanye Ciuta na kupulikira makani ghawemi, mbwenu mazgu gha pa Zintharika 1:33 ghazamufiskika pa imwe. Ghakuti: “Yose uyo wakupulikira ine tiwakhale na kufwasa; tiwaŵe mu mtende, kwambura kopa viheni.”