“Mutuŵa, Mutuŵa, Mutuŵa ndi Yehova”
Sendelerani kwa Ciuta
“Mutuŵa, Mutuŵa, Mutuŵa ndi Yehova”
PARA ŵangati musankhe lizgu limoza kuti mulongosore umo Yehova Ciuta waliri, kasi mungasankha lizgu wuli? Mu vilimika vya m’ma 700 B.C.E., nchimi Yesaya yikawona mboniwoni. Mu mboniwoni iyi, vilengiwa vyauzimu vikathuwuskanga Yehova, ndipo vikayowoya lizgu ilo likulongosora umo Ciuta waliri. Vikati ni mutuŵa. Ivyo Yesaya wakawona na kupulika vikwenera kutipangiska kuti timopenge Yehova ndiposo kuŵa nayo paubwezi. Apo mukusanda mazgu agho ghali pa Yesaya 6:1-3, muŵe nga namwe mukaŵapo.
Kasi Yesaya wakawona vici? Iyo wakati: “Nkhawona Yehova wakhala pa cizumbe, pakutunthumuka pacanya.” (Vesi 1) Yesaya kuti wakawona nadi Yehova yayi, uyo ni Fumu ya Cilengiwa Cose. Maso gha taŵanthu ghangawona yayi ŵanthu ŵauzimu. Baibolo likuyowoya mwambura kubisa kuti: “Palije munthu wali kuwonapo Ciuta umo kuli kuŵira.” (Yohane 1:18) Ivyo Yesaya wakawona yikaŵa waka mboniwoni. a Ndipouli, mboniwoni iyi yikaŵa nga ni vinthu vyanadi. Ivyo wakawona vikaŵa nga ni vyanadi mwakuti wofi ukamukora comene ndipo wakaŵa nga wawona nadi Yehova.
Pamanyuma Yesaya wakawona vinthu ivyo panji palije munthu waliyose wali kuwonapo mu mboniwoni. Wakalemba kuti: “Pacanya pake [pa Yehova] pakimilira ŵaserafi; yose wakaŵa na mapapindo ghankhondi na limoza; wakabenekelera cisko cake na ghaŵiri, na ghaŵiriso wakabenekelera malundi ghake, ndipo wakawurukanga na ghaŵiri.” (Vesi 2) Ŵaserafi ni vilengiwa vyauzimu vyapacanya comene. Pa ŵalembi wose ŵa Baibolo, ni Yesaya pera wali kuzunurapo za ŵaserafi. Ŵaserafi ŵakimilira, kulongora kuti nyengo zose mbakunozgeka kucita ivyo Yehova wangaŵatuma. Ŵakabenekelera cisko na malundi ghawo kulongora kopa na kucindika Yehova ndiposo kulongora kuti ni mwaŵi ukuru kumuteŵetera.
Yesaya wakacita wofi na ivyo wakawona pera yayi, kweniso na ivyo wakapulika. Ŵaserafi aŵa ŵakamba kwimba mwakukoŵerana ndiposo mwakucemerezga. Yesaya wakalemba kuti: “Yumoza wakacemerezga ku munyake, wakati, ‘Mutuŵa, Mutuŵa, Mutuŵa ndi Yehova wa mipingo.’” (Vesi 3) Lizgu la Cihebere ilo lili kung’anamurika kuti “mutuŵa” likung’anamura wakutowa ndiposo wambura kabanga. Likung’anamuraso kuti mwa iyo “mulijirethu kwananga.” Mu sumu iyo panji ŵaserafi ŵakakoŵerananga kwambura kuleka, ŵakawerezga katatu lizgu lakuti “mutuŵa,” kudidimizga fundo yakuti Yehova ni mutuŵa kuluska waliyose. (Uvumbuzi 4:8) Ici cikulongora kuti utuŵa wa Ciuta ngwapadera comene. Yehova ngwambura kabanga, walije kafukwa ndiposo ngwakunyoloka mu vigaŵa vyose.
Pakuti tamanya kuti Yehova ni mutuŵa, tikwenera kusendelera kwa iyo. Cifukwa wuli? Yehova wangacita kwananga yayi cifukwa cakuti wakupambana comene na ŵawusi ŵa pa caru capasi awo mbakhuluku ndiposo ŵankhaza. Pakuti ni mutuŵa, tili na cigomezgo cose kuti iyo ni Dada muwemi nyengo zose, wakuwusa mwaurunji na kweruzga mwambura kutemwera. Tili na cifukwa cakukwana cakugomezgera kuti Ciuta, uyo ni mutuŵa, watikhuŵazgengepo yayi.
Vipaturo Ivyo Mungaŵazga mu Disembala:
[Mazgu ghamusi]
a Buku la Insight on the Scriptures likulongosora kuti: “Para munthu wawona mboniwoni yakufuma kwa Ciuta uku wali maso, wakuwona nga vinthu ivyo ni vyanadi. Pamanyuma wangakumbuka mboniwoni iyo na kuyilongosora panji kuyilemba mu mazgu ghake na ghake.”—Lakupharazgika na Ŵakaboni ŵa Yehova.
[Mazgu Ghakukhozgera pa peji 26]
Pakuti tamanya kuti Yehova ni mutuŵa, tikwenera kusendelera kwa iyo
