Kalata Yakufuma ku Norway

Ulendo Wakuluta ku Mapopa Ghakuru Ghatuŵa

UKAŴA mulenji comene mu nyengo yakuzizima. Tikalaŵiska pa windo kuti tiwone umo kuwaro kwacira. Cikaŵa cakukondweska comene kuwona kuti kuwaro kulije matutu. Tikanozgekeranga kukapharazga kwa mazuŵa ghatatu pa phiri likuru la ku mpoto kwa Arctic Circle, lakucemeka Finnmarksvidda.

Mu nyengo iyi ku Norway kukuzizima comene, ntheura pacoko tikaŵa na wofi kuluta ku mapopa agha. Cakukondweska nchakuti tikalongozgana na Ŵakaboni ŵa Yehova ŵatatu awo ŵakukhala ku malo agha. Ŵakamanyanga makora ivyo vingakacitika ndipo ŵakatiphalilirathu ulongozgi wakukhumbikwa.

Misewu njinandi yayi ku malo agha. Kuti munthu wakafike makora kwa ŵanthu awo ŵakukhala ku malo agha wakwenera kwenda pa tumithuthuthu tunyake uto tukwenda pa ciwuvi. Tikapakira vyakuvwara, cakurya, na mafuta ghanyake pa tumithuthuthu twithu na pa tumathilera. Phiri likuru likawonekeranga patali ndipo likati waka tuu cifukwa ca ciwuvi. Ciwuvi cikang’azimanga nga ni para mwaŵika libwe la dayamondi pa zuŵa. Phiri ili likuwoneka lakutowa comene.

Ku Finnmarksvidda kuli vinyama nga ni mphala, ŵazumbwe, ŵakalulu, ŵakambwe, mphumphi, nkhalamira zicoko waka, na nyama zinyake. Kweni ico cikatikondweska comene nchakuti tamukumana na ŵanthu awo ŵakukhala ku malo agha. Tikaŵa ŵakunweka comene kukumana na ŵanthu awo ŵakuyowoya ciyowoyero cakucemeka Sami, awo ŵakuŵeta mphala ndipo ŵakugwira nchito mu nyumba zakugonamo ŵalendo ku malo agha.

Kuwaro kwa nyumba yinyake yakugonamo ŵalendo, tikakumana na ŵawukirano ŵanandi. Ŵakaŵa ŵana ŵa sukulu ndipo ŵakaseŵeranga pa ciwuvi. Ŵakaleka dankha kuseŵera kuti ŵadumbiskane nase, ndipo ŵakatifumba cifukwa ico tizira. Tikaŵa ŵakukondwa kuŵalongosolera. Apo tikalekananga nawo, yumoza wawo wakatiphalira kuti, “Viwemi vyose apo mukupharazga vya Baibolo.” Tikakweraso tumithuthuthu twithu, tikayambuka nyanja zikuru izo zikaŵa kuti zakhoma na ciwuvi ndipo tikendanga mu malo ghambura kumera kalikose agho ghakaŵa ciwuvi cekhacekha. Tikajifumbanga kuti kasi tikumanengepo na mskambo wa mphala?

Apo tikakweranga kuluta pa nyumba yinyake yicoko yakugonamo ŵalendo, mwanalume munyake wakatitawuzga mwaubwezi. Wakaŵa yumoza mwa ŵanthu ŵacoko waka awo ŵakukhala ku malo agha. Wakati wawona kuti kathilera kithu kanangika wakajipeleka kuti watinozgere. Wakamba kunozga pacokopacoko.  Ŵanthu ŵa kuno ŵakucimbilira yayi pakucita vinthu. Tikamba kufwatuka cifukwa ca umo wakacitiranga vinthu. Wakati wamara kutinozgera, tikamuwonga na kumulongora fundo zicoko waka mu Baibolo zakuyowoya cifukwa ico Ciuta wazomerezgera kuti tisuzgikenge. Wakatitegherezga comene. Pambere tindalekane nayo, tikamupa buku la Kasi Baibolo Likusambizgaci Comenecomene? na magazini gha Gongwe la Mulinda na Galamukani! Wakamwemwetera na kutiphalira kuti, “Nawonga comene cifukwa ca kunendera.”

Tikati takumana na ŵanthu ŵakupambanapambana, kukamba kufipa, ndipo tikamba kuluta ku nyumba ya mathabwa iyo tikafikiramo. Mwamabuci tikawona kambwe. Wakaŵa na weya unandi uswesi wakunyezimira ndipo wakawonekanga wakutowa comene cifukwa ca ciwuvi. Wakimilira dankha na kutilaŵisiska, ndipo wakajumpha. Ciwuvi cikamba kuwa nga ni vula, ndipo tikatondekanga kuwona uko tikuya. Mtima ukakhala pasi tikati tawona nyumba iyo tikafikiramo. Tikapemba moto mu sitovu, ndipo pacokopacoko mu nyumba mukamba kuthukira. Nangauli tikaŵa kuti tavuka cifukwa ca kutandalira kukwera na kugodoboka mu mabampu, kweni tikaŵa ŵakukondwa.

Kukawoneka nga kwaca luŵiro comene cifukwa ca vyakulema. Tikapakiraso kasalasala withu ndipo tikagodobokera musi mwakulondezga kamlonga kanyake, ndipo tikafika pa nyumba yinyake yakugonamo ŵalendo. Panyumba iyi tikasanga munyamata munyake, ndipo tikamba kumuphalirako fundo zakukhozga kufuma mu Baibolo. Wakatilongora kanthowa kapusu ako tingakafikira uko tikafuma.

Zuŵa laumaliro la ulendo withu likafika. Tikati tanjira mu Stabbursdalen National Park, tikawona malo ghakutowa comene, ndipo phiri la ciwuvi likanyezimiranga capatali. Tikawona mskambo ukuru wa mphala. Zikaŵa phee, zikajimanga ŵakoŵe awo ŵakaŵa kusi ku ciwuvi na kurya. Zikajimanga na vikandiro. Capatali tikawona munthu wa ciyowoyero ca Sami wakhala pa kamuthuthuthu kake kakwendera pa ciwuvi. Wakalaŵiliranga viŵeto vyake. Ncheŵe yake yikavilaŵiliranga na kuvikhwema kuti vikhale pamoza. Ncheŵe iyi yikati dankha cete, na kutinuska. Kweni mwaluŵiro yikambaso mulimo wake. Tikamba kupharazgira muliska wa viŵeto ivi. Wakategherezganga makora ndipo wakafwatuka nase.

Apo tikaweleranga kukaya, tikaghanaghaniranga za ŵanthu ŵakupambanapambana awo tikakumana nawo pa ulendo withu uwu wa makilomita 300. Tikawona kuti ukaŵa mwaŵi ukuru kucitako mulimo wa kupharazgira ŵanthu ŵa ku mapopa ghakuru ghatuŵa agha.

[Kulongosora Cithuzithuzi pa peji 15]

© Norway Post