Ŵaŵazgi Ŵithu Ŵakufumba Kuti . . .
Cifukwa Wuli Ciuta Wakapempha Abrahamu Kuti Wapeleke Mwana Wake Kuŵa Sembe?
▪ Buku la Genesis likuti, Yehova Ciuta wakapempha Abrahamu kuti wapeleke mwana wake Yisake kuŵa sembe. (Genesis 22:2) Ŵanthu ŵanyake awo ŵakuŵazga Baibolo ŵakupulikiska yayi nkhani iyi. Purofesa munyake zina lake Carol wakuti: “Nkhaŵa mwana mucoko apo nkhaŵazga nkhani iyi kakwamba, ndipo nkhakwiya comene. Ni Ciuta wa mtundu wuli uyo wangatuma munthu kuti wacite cinthu canthena?” Nangauli nchakupulikikwa kuŵa na maghanoghano gha nthena, kweni nchakovwira kukumbuka fundo zinyake.
Cakwamba, wonani ivyo Yehova wakacita yayi. Wakazomerezga yayi kuti Abrahamu wakome mwana wake, nangauli Abrahamu wakaŵa wakunozgeka kumukoma. Nakuti Ciuta wandaphalireposo munthu munyake kuti wacite nthena. Yehova wakukhumba kuti awo ŵakumusopa, na ŵana wuwo, ŵalutilire kusangwa na umoyo.
Caciŵiri, Baibolo likuti, Yehova wakaŵa na cifukwa capadera ico wakapemphera Abrahamu kuti wapeleke sembe Yisake. Ciuta wakamanyanga kuti munthazi, iyo wazamuzomerezga Mwana wake, * Yesu, kuti wazakatifwire. (Mateyu 20:28) Yehova wakakhumbanga kutilongora umo nyifwa ya mwana wake yizamumuŵinyira. Pakupempha Abrahamu kuti wapeleke sembe mwana wake, wakalongora ivyo wazamucita kunthazi. Wakalongora wuli?
Wonani ivyo Yehova wakaphalira Abrahamu. Wakati: “Tora sono mwana wako, mwana wako yumoza pera Isaac, mweneuyo ukumutemwa, . . . umupereke . . . nga ndi sembe yakocha.” (Genesis 22:2) Wonani kuti Yehova wakati Yisake wakaŵa mwana uyo Abrahamu ‘wakamutemwanga.’ Yehova wakamanyanga umo Yisake wakaŵira wakuzirwa kwa Abrahamu. Ciuta wakamanyangaso umo Mwana wake Yesu wakaŵira wakuzirwa. Yehova wakamutemwanga comene Yesu, mwakuti kaŵiri kose wakayowoya kufuma kucanya kuti Yesu ni ‘Mwana wake wakutemweka.’—Mariko 1:11; 9:7.
Mazgu Ghacihebere ghakulongora kuti Yehova wakacita kumupempha Abrahamu kuti wapeleke mwana wake. Nkhwantha yinyake yakusanda Baibolo yikati, mazgu agho Ciuta wakayowoya ghakulongora kuti “Fumu yikamanyanga umo pempho ili limuŵinyirenge Abrahamu.” Tingaghanaghanira waka umo pempho ili likamucitiskira citima Abrahamu. Mwakuyana waka, tingaghanaghanira waka umo Yehova wakacitira citima apo wakawonanga Mwana wake wakusuzgika na kufwa. Mwambura kukayika vikamuŵinya comene Yehova, panji vikaŵa kuti vindamuŵinyirepo nthena, ndipo vizamumuŵinyiraposo nthena yayi.
Nangauli tingapulikiska yayi ivyo Yehova wakapempha Abrahamu kuti wacite, kweni nchamahara kukumbuka kuti Yehova wakazomerezga yayi Abrahamu kupeleka mwana wake kuŵa sembe. Ciuta wakavikilira Yisake kuti waleke kukomeka. Mwakucita nthena, wakawovwira Abrahamu kuti waleke kuŵa na citima ico mupapi waliyose wangaŵa naco para mwana wafwa. Ndipouli Yehova “wakakanilira cara Mwana wake, kweni wakamupeleka cifukwa ca ise tose.” (Ŵaroma 8:32) Cifukwa wuli Yehova wakajikomora nthena? Wakacita nthena mwakuti “tisange umoyo.” (1 Yohane 4:9) Ici cikutikumbuska citemwa cikuru ico Ciuta wali naco kwa ise. Asi nase tikukhuŵilizgika kumulongora citemwa cakuyana waka? *
[Mazgu ghamusi]
^ ndime 5 Baibolo likusambizgapo yayi kuti Ciuta wakababa Yesu mwa mwanakazi. Kweni likuti Yehova wakalenga munthu wauzimu uyo pamanyuma wakamutuma pa caru capasi kuzakababika mwa Mariya uyo wakaŵa mwali wambura kugonanapo na mwanalume. Pakuti Ciuta wakalenga Yesu, ipo nchakupulikikwa kuti ni Dada wake.
^ ndime 8 Kuti mumanye vinandi vyakukhwaskana na kuzirwa kwa nyifwa ya Yesu, ndiposo umo tingalongolera kuti tikuwonga ivyo Yesu wakacita, wonani cipaturo 5 mu buku la Kasi Baibolo Likusambizgaci Comenecomene?
