Baibolo Likusintha Umoyo wa Ŵanthu

NCHIVICI ico cikapangiska mulimi wa hona kuleka ulimi uwu kweniso vigomezgo vyake vya cisopa? Kasi munthu muloŵevu wakasanga wuli nkhongono zakuti wasinthire nkharo yake? Ŵazgani ivyo ŵanthu aŵa ŵakayowoya.

“Vikunikondweska comene kuŵa pakati pa mbumba yikuru iyi.”—DINO ALI

CILIMIKA ICO WAKABABIKIRA: 1949

UKO WAKABABIKIRA: AUSTRALIA

IVYO WAKACITANGA: WAKALIMANGA HONA

UMO NKHAŴIRA KALE: Ŵapapi ŵane ŵakasama ku Albania mu 1939 na kuzakakhala ku Mareeba, tawuni yicoko mu Queensland, ku Australia. Ŵanthu ŵanandi ŵa ku, Bosnia, Greece, na Italy, Serbia, mbanyake mwa ŵanthu awo ŵakakhalanga ku malo agha, ndipo ŵakiza na nkharo zawo, maluso na mitheto yawo. Ku Mareeba ŵanthu ŵakalimanga hona, ndipo ŵapapi ŵane nawo ŵakamba kulima hona.

Pakati pajumpha nyengo yicoko waka, mudumbu wane mulara wakababika, kufuma apo, ŵakuru ŵane ŵaŵiri, mbwenu ndine. Cacitima nchakuti Adada ŵakafwa na nthenda ya mtima apo ine nkhaŵa na cilimika cimoza. Amama ŵakatengwaso na kuŵa na ŵana ŵanyake ŵanayi. Tose tikakulira kwa adada ŵaciŵiri aŵa ŵeneawo ŵakalimanga comene hona.

Apo nkhaŵa muwukirano, nkhafumapo panyumba. Nkhatora muwoli wane, Saime, apo nkhaŵa na vilimika vya m’ma 20. Ukwati withu ukacitikira mu mzikiti wapafupi, cifukwa tose tikaŵa Ŵasilamu. Ŵabali ŵane wose ŵakaŵa Ŵasilamu. Nkhaŵazganga Korani na buku linyake la mdauko wa nchimi Muhamadi. Panyengo yeneyiyo pera, nkhaŵazgangaso Kabaibolo kacoko. Buku la Korani likuyowoya vya nchimi izo zikuzunulika mu Baibolo, kweni Baibolo ndilo likanovwira kumanya nyengo iyo nchimi izi zikaŵirako.

Ŵakaboni ŵa Yehova ŵakizanga pa nyumba yane ndipo nyengo zose ŵakizanga na magazini na mabuku, agho ine na Saime wuwo tikaghatemwanga comene. Nkhukumbuka umo nkhadumbiskirananga na Ŵakaboni ŵa Yehova pa nkhani zakupambanapambana za cisopa. Nyengo zose ŵakazgoranga mafumbo ghane kufuma mu Baibolo, m’malo mwa kulongosora waka maghanoghano ghawo. Ici cikanicontha comene.

 Ŵakaboni ŵakanipempha kuti ŵasambirenge nane Baibolo na kunicemera ku maungano ghawo, kweni nyengo zose nkhakananga. Cinthu cakwamba ico nkhakhumbanga kucita ndico kugura munda wane na wane na kuŵa na mbumba yikuru. Khumbo lane lakuti niŵe na munda wane na wane likafiskika yayi, kweni nyengo yikati yajumphapo nkhaŵa na ŵana ŵankhondi.

UMO BAIBOLO LIKASINTHIRA UMOYO WANE: Nkhati nakumana na Ŵakaboni ŵa Yehova kakwamba, pakajumpha vilimika 9 kwambura kusintha vigomezgo vyane vya cisopa. Ndipouli, nkhatemwanga kupokera na kuŵazga mabuku ghose agho ŵakalembanga. Pa zuŵa la Sabata lililose, ine na Saime tikapaturanga nyengo yakuŵazgira mabuku agha. Tikasunganga magazini ghose agho tikapokera kwa vilimika vyose ivi. Magazini agha ghakaŵa na fundo izo zikanikhozganga comene apo ŵanji ŵakamba kuyezga cipulikano cane ico cikakuranga.

Mwaciyelezgero, nkhakumana na mupharazgi wa chalichi la evangelical uyo wakayezgayezga kunicicizga kuti nipokere Yesu kuŵa Mponoski wane. Munthu uyu wakakhorweska mudumbu wa Saime na munung’una wane yumoza ndipo ŵakamulondezga. Nyengo yicoko waka yikati yajumphapo, ŵanthu ŵa visopa vyakupambanapambana ŵakizanga kuti ŵanikope kuti ninjire visopa vyawo. Ŵanyake ŵakanipa mabuku agho ghakanyozanga Ŵakaboni ŵa Yehova. Nkhaŵapempha ŵakususka aŵa kuti ŵanilongore mu Baibolo apo pakusangika visambizgo vyawo, kweni ŵakatondeka.

Ŵanthu ŵakususka aŵa ŵakanipangiska waka kuti sono ndipo niŵazgenge comene na kusanda Baibolo, mwakugwiliskira nchito mabuku agho nkhapokera ku Ŵakaboni. Paumaliro nkhawona kuti nyengo yakuti nicitepo kanthu pa ivyo nkhasambiranga yakwana.

Ŵakaboni ŵa Yehova ŵakaŵa kuti ŵandambe kusambira nane Baibolo, kweni nkhamba waka kuluta ku maungano ghawo. Pakwamba nkhaŵa na wofi na soni, kweni ku maungano nkhakumana na ŵanthu ŵanandi ŵacitemwa, ndipo ivyo nkhasambira vikanikondweska comene. Nkhadumura mu mtima wane kuti niŵenge yumoza wa Ŵakaboni ŵa Yehova, ndipo mu 1981, nkhalongora kuti najipatulira kwa Ciuta mwa kubapatizika.

Muwoli wane wakasuska yayi ivyo nkhacita, nangauli nyengo zinyake wakaghanaghananga kuti panji napuluskika. Ndipouli, wakazakaŵapo pa ubapatizo wane. Nkhalutilira kumuphalirako unenesko uwo nkhasambiranga. Pafupifupi cilimika cimoza cikati cajumphapo kufuma apo nkhabapatizikira, apo tikafumanga ku holide, Saime wakaniphalira kuti wakukhumba kuŵa Kaboni. Nkhazizwa comene na mazgu agha. Wakabapatizika mu 1982.

Cikaŵa cipusu yayi kuleka nkharo zithu zakale. Nkhaleka kulima hona cifukwa kukususkana na fundo za mu Baibolo. (2 Ŵakorinte 7:1; Yakobe 2:8) Pakatora nyengo kuti nisange nchito yakwenelera yakuti yitovwirenge. Kweniso, kwa vilimika vinandi kufuma pa nyengo iyi, ŵabali ŵithu ŵanyake ŵakakananga kutiyendera. Tikayezga kuŵalongora citemwa nga umo Baibolo  likuyowoyera. Pamanyuma, ŵabali ŵithu ŵakaleka kutitinkha ndipo sono ŵakutigega yayi.

UMO NASANGIRA CANDULO: Viyezgo vyakupambanapambana ivyo nakumana navyo kwali nkhumazga soni, suzgo la ndalama, panji kususkika na ŵa mu mbumba, vyanisambizga umo Yehova Ciuta waŵira wakuzika pakunovwira kumarana na masuzgo ghane. Mwaciyelezgero, sono nkhuteŵetera nga ni mulara mu mpingo ndipo kanandi nkhusambizga pa pulatifomu. Ndipouli, nicali kusuzgika kuyowoya pa pulatifomu cifukwa nili na cikwikwi. Kweni cifukwa ca kulomba nyengo zose, Yehova wanovwira kuti nifiske kucita mulimo uwu.

Sono tikutemwana comene na muwoli wane, ndipo nkhutondeka na kulongosora wuwo kukolerana uko kulipo. Tikabudiskanga vinthu vinyake pakulera ŵana ŵithu kweni tikayezga kuŵasambizga unenesko wa mu Baibolo uwo tikasambira. (Duteronome 6:6-9) Nakuti mwana wane mulara na muwoli wake sono mbamishonale.

Nkhukumbuka ivyo vikacitika zuŵa linyake pa nyengo yakwamba kuluta ku maungano gha Ŵakaboni nga ni mbumba. Nkhayimika galimoto na kulaŵiska mukati mwa holo umo mukawungana ŵanthu ŵanandi. Nkhafumba mbumba yane kuti, “Kasi mukuwonaci?” Mukaŵa ŵanthu ŵa mitundu yakupambanapambana, ŵakufuma mu vyaru vyakupambanapambana ndiposo ŵaviyowoyero vyakupambana. Mukaŵa Ŵanthu ŵa ku Albania, Australia, Croatia, kweni wose ŵakacezganga lumoza mwakukondwa. Vikunikondweska comene kuŵa pakati pa mbumba yikuru iyi ya ŵabali na ŵadumbu ŵauzimu, iyo yili ku Australia pera yayi, kweni pa caru cose.—1 Petrosi 5:9.

“Mukuru wane wakavuka nane yayi.”—YELENA VLADIMIROVNA SYOMINA

CILIMIKA ICO WAKABABIKIRA: 1952

UKO WAKABABIKIRA: RUSSIA

IVYO WAKACITANGA: WAKAŴA MULOŴEVU, KWENISO WAKAKHUMBA KUJIKOMA

UMO NKHAŴIRA KALE: Nkhababikira mu msumba ucoko, kweniso wamtende wa Krasnogorsk, kufupi na Moscow. Nkhakulira mu mbumba ya ŵasambizgi. Nkhaŵa na mahara ku sukulu ndipo nkhasambira kwimba. Nkhawonanga kuti vinthu vizamunendera makora kunthazi.

Nkhati natengwa, ine na mfumu wane tikasamira ku malo agho kutuka, uloŵevu, na kukhweŵa ndiwo ukaŵa waka umoyo. Panyengo iyi nkhamanyanga yayi kuti malo agha ghakuninanga. Pakwamba nkhalutanga ku viphikiro kuti nkhimbe waka na kulizga gitara. Ndipouli, para nili ku malo agha, ŵanthu ŵakanipanga ndudu za hona kuti nikhweŵenge na kumwa nawo. Mwaluŵiro nane nkhakhaliranga waka kuloŵera.

Uloŵevu ukamba kunipwetekeska. Pakatora nyengo kuti nimanye kuti moŵa waninjira comene, kweni apo nkhamanyanga nkhaŵa kuti naleka na kurya wuwo. Nkhakhumbanga kufwa, ndipo nkhayezga nthowa zinandi kuti nijikome kweni vikatondeka. Nili wakukondwa comene kuti vikatondeka.

Nangauli vikaŵa nthena, mukuru wane wakanenderanga nyengo zose. Wakaŵa yumoza wa  Ŵakaboni ŵa Yehova, ndipo wakayezgayezga kulongosora umo Baibolo linganovwilira. Nkhakhumba yayi kuti munthu waniphalirenge vya Baibolo, ntheura pakwamba nkhamukanizga kwiza pa nyumba yane. Kweni mukuru wane wakavuka nane yayi. Wakazikira nane na kunilongora citemwa mwakuti paumaliro nkhazomera kuti wasambirenge nane Baibolo.

UMO BAIBOLO LIKASINTHIRA UMOYO WANE: Nati namba kusambira Baibolo nkhaŵikapo mtima kuti nileke kumwa moŵa. Mu nyengo yeneyiyi, mzengezgani wane uyo wakaloŵera wakanitimba. Nkhapwetekeka kwa zani muwone ndipo ŵakanitolera ku cipatala. Wakaphyora mbambo zinayi na kunipweteka jiso. Nangauli vikaŵa nthena, nyengo iyo nkhaŵira mu cipatala yikanovwira kuti babalaza lileke kunisuzga comene.

Mu nyengo iyi nkhalombanga nyengo zose. Lemba ilo likanipembuzga comene nda Citengero ca Yeremiya 3:55, 56, ilo likuti: “Nkhacema pa zina linu, A Yehova, ndili mu zenje la pasi; mwapulika lombo lane, mungajaranga khutu linu pa kuthuta kwane, pa nkhuto yane!”

Nkhugomezga kuti Yehova wakazgora malurombo ghane. Wakanipa nkhongono kuti zinovwire kuti nileke kuwelera ku vinthu vyakumasinda. Nyengo zinyake nkhayezgekanga kuti nambeso kumwa. Nili wakukondwa kuyowoya kuti nkhathera yayi ku ciyezgo ici.

Apo nkhalutilira kuŵazga Baibolo, nkhasambira kuti nkheneranga kovwira mfumu wane pa mulimo wake wa kuŵa mutu wa mbumba. (1 Petrosi 3:1, 2) Ici cikaŵa cipusu yayi kwa ine cifukwa nkhazgoŵera kuwusa mfumu wane. Nkhalomba Yehova kuti wanovwire. Pakatora nyengo kuti nisinthe, ndipo paconapacoko nkhazgoka muwoli muwemi.

Mfumu wane wati wawona kuti namba kusintha, wakazizwa. Panyengo iyi wakaŵa kuti wandambe kunweka na Baibolo. Kweni apo nkhaghanaghananga vya kuleka kukhweŵa, wakaniphalira kuti: “Usange ulekenge kukhweŵa mbwenu nambenge kusambira Baibolo!” Tose tikalekera pa zuŵa limoza kukhweŵa.

UMO NASANGIRA CANDULO: Mfumu wane wakafiska layizgo lake ndipo wakamba kusambira Baibolo. Sono tikuŵazgira lumoza Baibolo zuŵa na zuŵa, kughanaghanirapo ivyo tasambira, na kuyezga kuvilondezga.

Nkhutondeka na kuyowoya umo mbumba yane yasangira candulo, ndipo nane nasanga candulo cikuru comene. Nkhuwonga Yehova cifukwa ca kuniguzira kwa iyo. (Yohane 6:44) Nkhuwongaso mukuru wane cifukwa cakuti wakavuka nane yayi. Pa cifukwa ici, nawona nekha kuti Baibolo likusintha umoyo wa ŵanthu.

[Mazgu Ghakukhozgera pa peji 11]

Nkhawona kuti nyengo yakuti nicitepo kanthu yakwana

[Mazgu Ghakukhozgera pa peji 13]

Mukuru wane wakazikira nane na kunilongora citemwa mwakuti paumaliro nkhazomera kuti wasambirenge nane Baibolo