▪ Cisambizgo cakuti kuli ŵaciuta ŵatatu mwa yumoza cikulongosoreka mu nthowa zinandi, ndipo yimoza mwa nthowa izi njakuti: ‘Pali ciuta Dada, ciuta Mwana na ciuta Mzimu. Wose ŵakuti mbamuyirayira, mbakuyana nkhongono nakuti palije uyo ni mukuru kuluska munyake. Waliyose ni Ciuta, kweni ŵatatu aŵa ni Ciuta yumoza.’ Kasi cisambizgo ici ncha mu Baibolo?

Kanandi awo ŵakugomezga cisambizgo ici, ŵakutemwa kuzunura lemba la Mateyu 28:19. Mu Baibolo la King James Version, mazgu gha Yesu pa lemba ili, ghali kulembeka kuti: ‘Ntheura, lutaninge na kusambizga mitundu yose, kuŵabapatiza mu zina la Dada, la Mwana na la Mzimu Mutuŵa.’ Mbunenesko kuti Dada, Mwana, na mzimu mutuŵa (panji kuti mzimu utuŵa) vyazunulika mu lemba ili, kweni vesi ili lindayowoyepo kuti wose ni munthu yumoza. Yesu wakatumanga ŵalondezgi ŵake Ŵaciyuda kuti ŵakasambizge na kubapatiza ŵanthu mu zina la Dada, la Mwana na mzimu utuŵa. Kasi Ŵayuda wose ŵakagomezganga vici?

Ŵaisrayeli ŵati ŵapika phangano la Dango, ilo nchigaŵa ca Baibolo, ŵakalangulika kuti: “Ungakhalanga na ŵaciuta ŵanyake pamaso pane.” (Duteronome 5:7) Kasi mbanthu ŵalinga awo ŵakayowoyanga apa? Kuti tisange zgoro, Lemba la Duteronome 6:4 likuti: “Pulikani, O Israyeli, Yehova Ciuta winu ndi Yehova yumoza,” ŵatatu yayi. Ŵaisrayeli ŵakaŵa kuti ŵafwatuka waka ku Eguputo, uko ŵanthu ŵakasopanga Osiris, Isis, na Horus, yumoza mwa ŵaciuta ŵatatu (walongoreka kumazere). Ntheura, Ŵaisrayeli ŵakaphalirika kuti ŵasopenge Ciuta yumoza pera. Cifukwa wuli cikaŵa cakuzirwa kuti ŵanthu ŵapulikire languro ili? Dr. J. H. Hertz wakalemba kuti: “Dango lakupulikikwa makora la kusopa Ciuta yumoza ili, likasuskanga comene kusopa ŵaciuta ŵanyake wose . . . Pa lurombo lwakucemeka Shema, ŵakawuskapo cisambizgo ca ŵaciuta ŵatatu mwa yumoza ico Ŵakhristu ŵanji ŵakugomezga ndipo ŵakatenge cikutimbanizga ŵanthu kumanya Ciuta yumoza.” *

Yesu pakuŵa Muyuda, wakaphalirika kuti walondezgenge dango ili. Wati wabapatizika, apo wakayezgekanga na Satana, Yesu wakati: “Fumapo Satana! Pakuti kuli kulembeka, ‘Yehova Ciuta wako ndiyo ukwenera kumusopa, ndipo ndiyo pera uyo ukwenera kumucitira uteŵeti wakupatulika.’” (Mateyu 4:10; Duteronome 6:13) Pa nkhani iyi tikusambirapo vinthu viŵiri. Cakwamba, Satana wakakhumba kunyengelera Yesu kuti wasope munthu munyake padera pa Yehova. Yesu waŵenge kuti njumoza na Ciuta mphanyi ici cikaŵa ciyezgo yayi. Caciŵiri, Yesu wakalongora makora kuti kuli Ciuta yumoza uyo wakwenera kusopeka apo wakati “ndiyo pera” ndipo wakayowoyapo yayi kuti “ise,” ivyo mphanyi wakacita ŵaŵenge kuti njumoza mwa ŵaciuta ŵatatu.

Para ŵanthu ŵamanya unenesko wa Ciuta na kusankha kumuteŵetera, ŵakubapatizika “mu zina la Ŵadada na la Mwana na la mzimu utuŵa.” (Mateyu 28:19) Ŵakughamanya makora mazaza agho Yehova wali nagho, kweniso mulimo wa Yesu Khristu pakufiska khumbo la Yehova. (Salmo 83:18; Mateyu 28:18) Ŵakumanya kuti mzimu utuŵa ni nkhongono iyo Ciuta wakugwiliskira nchito.—Genesis 1:2; Ŵagalatiya 5:22, 23; 2 Petrosi 1:21.

Cisambizgo cakuti kuli ŵaciuta ŵatatu catimbanizga ŵanthu kwa vilimika vinandi. Kweni Yesu wakangweruska ŵalondezgi ŵake na kuŵalongozgera kwa “Ciuta waunenesko yekha,” Yehova.—Yohane 17:3.

[Mazgu ghamusi]

[Kulongosora Cithuzithuzi pa peji 23]

Musée du Louvre, Paris