Kasi Pali Uheni Wuli Wakucita Vyamizimu?

Kufuma waka pa wanici, Barabara * wakawonanga mboniwoni na kupulika mazgu, ndipo wakakhorwanga kuti wakuyowoya na ŵabali ŵake awo ŵali kufwa. Iyo na mfumu wake Jowakimu ŵakaŵazganga mabuku gha vyamizimu ndipo ŵakaŵa nkhwantha pa kugwiliskira nchito makadi ghamayere. Ndipo ŵakasanganga ndalama zinandi pakucita bizinesi iyi. Zuŵa linyake makadi ghakaŵacenjezga kuti ku nyumba yawo kwizenge ŵanthu ŵakofya ndipo ghakaŵaphaliraso umo ŵangajivikililira.

NANGAULI kugomezga mizimu kukuwoneka nga nkhwacikale, kweni kwazara comene. Ŵanthu ŵanandi ŵakuvwara vinthumwa, ŵakuwukwa, na kuluta ku awo ŵakuyowoyeskana na mizimu kuti ŵakaŵaphalire ivyo viŵacitikirenge panji umo ŵangajivikilira ku viheni. Mu nkhani ya mutu wakuti “Laptop and Lucifer,” magazini yinyake ya ku Germany yikati: “Ŵanthu ŵanandi ŵakuyegheka na vyamizimu cifukwa cakuti vikusangika pa Intaneti.”

Kasi mukumanya kuti Baibolo likuyowoyapo pa nkhani ya kugomezga mizimu? Mungazizwa na ivyo likuyowoya pa nkhani iyi.

Kasi Baibolo Likuyowoyaci pa Vyamizimu?

Dango ilo Ciuta wakapa Ŵaisrayeli likuti: “Waleke kusangikamo mukati mwinu yumo uyo wakupeleka mwana wake, mwanalume panji mwanakazi, kuŵa sembe yakocha kwa Yehova, panji wakucita maula, panji wakupwelera zinyengo, panji wakuwukwa na minkhwala, panji canusi, panji waminthondwe, panji wakufumba ku mizimu, panji fwiti, panji wakufumba ku ŵakufwa. Cifukwa wose ŵeneaŵa ŵakucita ico mbukazuzi kwa Yehova.” (Duteronome 18:10-12) Cifukwa wuli dango la Yehova likasuska mwankhongono pa nkhani ya kucita vyamizimu?

Nga umo tawonera kukwambilira kwa nkhani iyi, ŵanandi ŵakugomezga kuti ŵamoyo ŵangayowoya na ŵakufwa ndipo ŵakuti uthenga uwo ŵakupulika ukufuma ku ŵakufwa. Vigomezgo ivi viliko cifukwa cakuti visopa vikusambizga kuti ŵakufwa ŵali ku caru ca mizimu. Mwakupambana na cisambizgo ici, Baibolo likuyowoya mwakupulikikwa makora kuti: “Ŵakufwa kuti ŵakumanya kanthu cara.”  (Mupharazgi 9:5) Baibolo likulongosora kuti ŵakufwa ŵali mu tulo tuzito, ndipo ŵakumanya yayi ico cikucitika. * (Mateyu 9:18, 24; Yohane 11:11-14) Nangauli Baibolo likuyowoya nthena, panji mungajifumba kuti, Cifukwa wuli pera ŵanthu ŵakuwona minthondwe? Kasi ŵanthu aŵa ndikuti ŵakuyowoya na njani comenecomene?

Kuyowoyeskana na Mizimu

Mabuku gha Makani ghawemi gha Mateyu, Mariko, Luka na Yohane, ghakulongora kuti Yesu wakayowoyeskananga na mizimu. Lemba la Mariko 1:23, 24 likuti, “mzimu waukazuzi” ukaphalira Yesu kuti: “Nkhumumanyani makora comene.” Namwe mizimu yikwenera kuti yikumumanyani. Kweni kasi imwe mukuyimanya?

Pambere Ciuta wandalenge ŵanthu, wakalenga dankha ŵana ŵauzimu ŵanandi, panji kuti ŵangelo. (Job 38:4-7) Ŵangelo ni vilengiwa vyapacanya comene pakuyelezgera na ŵanthu. (Ŵahebere 2:6, 7) Ŵali na nkhongono, kweniso mbamahara comene ndipo ŵakalengeka kuti ŵacite khumbo la Ciuta. Wamasalimo wakimba kuti: “Tumbikani Yehova, mwa ŵangelo ŵake, imwe mwa ŵankhongono mukufiska mazgu ghake.”—Salmo 103:20.

Baibolo likuvumbura kuti nyengo yikati yajumphapo, ŵangelo ŵanyake ŵakamba kuyowoyeskana na ŵanthu kwambura kuzomerezgeka na Ciuta. Na cilato wuli? Mungelo wakwamba uyo wakacita nthena wakapusika Adamu na Eva, na kuŵapatuska kwa Ciuta uyo ni Mlengi wawo. Cifukwa cakucita nthena, mungelo uyu wakajizgora yekha kuŵa Satana Dyabulosi, wakusesa kweniso wakususka Ciuta.—Genesis 3:1-6.

Pamasinda, ŵangelo ŵanji “ŵakaleka malo ghawo ghakwenelera kukhalako” kucanya, na kutora ŵanakazi ŵakutowa pa caru capasi. (Yuda 6; Genesis 6:1, 2) Ŵangelo ŵakugaluka aŵa pamoza na ŵana ŵawo ŵacilendo awo ŵakababa, ŵakamba kuyungwiska ŵanthu ndipo caru “cikazura na citimbahete-nkhaza.” Mukwenera kuti mukuyimanya makora nkhani ya mu Baibolo ya umo Ciuta wakaparanyira ŵanthu ŵaheni na Ciwowota mu nyengo ya Nowa.—Genesis 6:3, 4, 11-13.

Cifukwa ca ciwowota, ŵangelo ŵakacicizgika kuleka mathupi ghawo gha wunthu na kuwelera kucanya. Kweni Ciuta wakaŵazomerezga yayi kuwelera ku malo ghawo gha “kukhalako.” M’malo mwake ŵakajalirika mu malo agho ghakuyana na “mbuna za cisi cakofya.” (2 Petrosi 2:4, 5) Ŵangelo ŵakugaluka aŵa, Baibolo likuŵacema kuti “viŵanda.” (Yakobe 2:19) Viŵanda ivi ndivyo vikudangilira pa vyamizimu.

Kasi Viŵanda Vikukhumbaci?

Cilato cakwamba ico mizimu yiheni yikuyowoyera na ŵanthu nchakuti yiŵapatuske pa kusopa Ciuta waunenesko, Yehova. Nkhongono izo awo ŵakucita vyamizimu ŵakuti ŵali nazo, ni zanadi yayi, kweni ni nyambo yakusuŵizgira ŵanthu kuti ŵaleke kumanya Ciuta na kuŵa nayo paubwezi.

Cinthu caciŵiri ico viŵanda vikukhumba cikuwoneka pa ivyo Satana mulongozgi wawo, wakayezga navyo Yesu. Satana wakalongora Yesu “maufumu ghose gha caru na ucindami wawo.” Kasi Satana wakakhumbanga vici? Wakapempha Yesu kuti: ‘Jikama na kunisopa.’ Satana na viŵanda vyake ŵakukhumba kuti ŵanthu  ŵaŵasopenge. Kweni Yesu wakakana kuleka kusopa Ciuta waunenesko.—Mateyu 4:8-10.

Nkhanandi yayi kuti mizimu yiheni yiyowoye na ŵanthu mazuŵa ghano. Kweni yikukhumba kupuluska waka ŵanthu na maluso agho ghangawoneka nga ngawemi waka. Nga nkhuwukwa, na kucita mayere. Mungapusikikanga yayi. Lekani kughanaghana kuti maluso agha ni nthowa ziwemi waka zakumanyira vinthu vyamucindindi. Viŵanda vikukopa ŵanthu na mayere mwakuti ŵaleke kusopa Yehova. Para vyawona kuti khumbo lawo lindafiskike, vikwamba kofya na kutambuzga awo ŵakoleka kale mu cipingo cawo. Usange vyanthena ivi vyamucitikirani, kasi mungacita wuli kuti mufwatukeko?

Umo Mungafwatukira ku Mizimu Yiheni

Lekani kupusikika, mizimu iyo yikuyowoya na ŵanthu njilwani na Ciuta ndipo yizamuparanyika. (Yuda 6) Mizimu iyi yikujizgora kuŵa nga mbanthu awo ŵali kufwa ndipo yikupusika ŵanthu. Kasi mungajipulika wuli usange mwabowozga kuti mubwezi winu ni mupusikizgi, ndipo wakukhumba waka kumutondeskani kucita vinthu ivyo vingamovwirani? Kasi mungacita wuli usange mwamanya kuti munthu uyo mukucezga nayo pa Intaneti wakukhumba kuti wacite namwe uzaghali? Kuŵa paubwezi na viŵanda nkhwakofya kuluska apa. Mukwenera kufwilirapo kuti muleke kuyowoyeskana navyo. Kasi mungacita wuli?

Ŵanthu ŵanji ku Efeso ŵakati ŵamanya ivyo Malemba ghakusambizga pa nkhani ya vyamizimu, ŵakawocha mabuku ghawo gha vyamizimu, nangauli ghakaŵa gha ndalama zinandi. Baibolo likuti: “Ŵakaghawocha panthazi pa waliyose.” (Milimo 19:19, 20) Padera pa mabuku, vinthumwa, vyakuwukwira, na vinyake ivyo tingatora pa Intaneti navyo vingatiziyamo. Lekani kucita cilicose ico cingamulongozgerani ku vyamizimu.

Kumbukani mbumba iyo yazunulika kukwambilira kwa nkhani iyi. Kwizira pa makadi ghawo ghamayere ŵakawona kuti ku nyumba yawo kwizenge ŵanthu ŵakofya ndipo ŵaleke kuzakaŵategherezga panji kupoka cilicose kwa iwo. Ndipouli, apo Coni na Gudurani awo Mbakaboni ŵa Yehova ŵakiza pa nyumba yawo na kuyowoya kuti ŵiza na makani ghawemi ghakuyowoya vya Ciuta, Jowakimu na Barabara ŵakategherezga. Pakudumbiskana, ŵakazunurapo vyamizimu, ndipo Coni na Gudurani ŵakalongosora ivyo Malemba ghakuyowoya pa nkhani iyi. Ntheura, ŵakamba kusambira Baibolo.

Mwaluŵiro Jowakimu na Barabara ŵakaleka kuyowoyeskana na viŵanda. Ŵakaboni aŵa ŵakaŵalongosolera kuti mizimu yiheni yikondwenge yayi kuti ŵakusambira Baibolo. Nakuti Jowakimu na Barabara ŵakasuzgika comene na viŵanda ndipo vikaŵawukiranga. Kwa kanyengo, usiku uliwose ŵakaŵanga ŵawofi ndipo vikasinthako ŵati ŵasamira mu nyumba yinyake. Pa nyengo yose yakusuzga iyi, mbumba iyi yikalutilira kugomezga mazgu gha pa Ŵafilipi 4:13, agho ghakuti: “Mu vinthu vyose, nili na nkhongono mwa uyo wakunipa nkhongono.” Yehova wakatumbika ivyo ŵakacita ndipo viŵanda vikaleka kuŵasuzga. Sono Jowakimu na Barabara ŵakusopa Yehova Ciuta waunenesko mwakukondwa.

Malemba ghakuciska wose awo ŵakukhumba kutumbikika na Yehova kuti: “Jilambikani kwa Ciuta; kweni mikanani na Dyabulosi, ndipo iyo wamucimbiraninge. Sendelerani kwa Ciuta, ndipo iyo wasendelerenge kwa imwe.” (Yakobe 4:7, 8) Usange mukukhumba, Yehova Ciuta wangamovwirani kuti mufwatuke ku viŵanda. Para Jowakimu na Barabara ŵakukumbuka umo ŵali kufwatukira ku mizimu, ŵakuzomera na mtima wose kuti mazgu agho ghali pa Salmo 121:2 ngaunenesko. Ghakuti: “Kovwirika kwane kukufuma kwa Yehova.”

[Mazgu ghamusi]

[Mazgu Ghakukhozgera pa peji 21]

Kucita vyamizimu kukujandizga ŵanthu kuti ŵaleke kuŵa paubwezi na Ciuta

[Mazgu Ghakukhozgera pa peji 22]

“Sendelerani kwa Ciuta, ndipo iyo wasendelerenge kwa imwe.”—YAKOBE 4:8.