‘Khalilirani mu Mazgu Ghane’

“Usange mukukhalilira mu mazgu ghane, muli ŵasambiri ŵane nadi, ndipo mumanyenge unenesko, ndipo unenesko umufwaturaninge.”—YOHANE 8:31, 32.

Kasi Mazgu Agha Ghakung’anamuraci?: “Mazgu” gha Yesu agha ghakung’anamura visambizgo vyake, ivyo vikafuma kwa Ciuta. Yesu wakati: “Ŵadada iwoŵene awo ŵali kunituma ŵanipa dango pa ico nkhwenera kuphara na kuyowoya.” (Yohane 12:49) Apo wakalombanga ku Ŵawiske, Yesu wakati: “Mazgu ghinu mbunenesko.” Kanandi Yesu wakakoranga mazgu kufuma mu Mazgu gha Ciuta kuti wakhozgere ivyo wakasambizganga. (Yohane 17:17; Mateyu 4:4, 7, 10) Ntheura, Ŵakhristu ŵaunenesko ‘ŵakukhalilira mu mazgu ghake,’ ŵakuzomerezga kuti Mazgu gha Ciuta “mbunenesko” nakuti ndigho pajintha visambizgo na vigomezgo vyawo.

Umo Ŵakhristu Ŵakwambilira Ŵakacitira: Nga ni Yesu, mpositole Paulosi nayo wakacindikanga Mazgu gha Ciuta. Paulosi wakalemba kuti: “Malemba ghose ngakupelekeka na Ciuta mwa mzimu ndipo ngacandulo.” (2 Timote 3:16) Ŵanalume awo ŵakimikika kuti ŵasambizge Ŵakhristu ŵanyawo, ŵakeneranga ‘kukoleska mazgu ghakugomezgeka mu kasambizgiro kawo.’ (Tito 1:7, 9) Ŵakhristu ŵakwambilira ŵakaciskika kuti ŵakane “vinjeru vya caru na upusikizgi wawaka, kwakuyana na maluso gha ŵanthu, kwakuyana na vinthu vyakwambilira vya caru, kuti kwakuyana na Khristu cara.”—Ŵakolose 2:8.

Kasi Mbanjani Mazuŵa Ghano Ŵakucita nga Ndiwo?: Buku la Cikatolika la katekisima likuti: “Vinthu ivyo vili kuvumbukwa, ivyo [Chalichi] la Katolika likugomezga ni vyakufuma mu Malemba Ghatuŵa pera yayi. Ntheura, mitheto pamoza na Malemba Ghatuŵa vyose ni vyakuzomerezgeka ndipo vikwenera kucindikika mwakuyana waka.” Mazgu gha mu buku la katekisima ghali kutoleka mu buku linyake la ku Vatican lakucemeka Dogmatic Constitution on Divine Revelation ilo likamba kugwira nchito mu 1965. Nkhani yinyake mu magazini ya Maclean yikaŵa na mazgu gha nduna yinyake ya ku Toronto, Canada, iyo yikati: “Cifukwa wuli tingazomerezga munthu uyo wakakhumbanga kusintha vinthu mu vilimika 2000 ivyo vyajumpha kuti watilongozgenge? Tili na vinjeru vya pacanya comene kweni vikutimbanizgika cifukwa ca kuyaniska dankha na ivyo Yesu wakayowoya kweniso Malemba.”

Pakuyowoya za Ŵakaboni ŵa Yehova, buku la New Catholic Encyclopedia likuti: “Vigomezgo na ivyo ŵakulondezga vikufumira mu Baibolo pera.” Sonosono apa munthu munyake ku Canada wakadumulizga mwanakazi munyake uyo njumoza wa Ŵakaboni ŵa Yehova apo wakajilongosoranga. Uku wakulongora Baibolo la mwanakazi yura munthu uyu wakati: “Namumanyani, [Baibolo] ndilo nchimanyikwiro cinu.”